Bible achangé fini ti azo

NYEN la apusu mbeni koli ti kiri na bungbi ti Nzapa so lo kono ândö na yâ ni si lo dö ni lo zia? Tongana nyen la mbeni maseka-koli awara babâ so lo yeke gi ni depuis so? Diko tënë so akoli ni so atene.

“A yeke nzoni mbi kiri na Jéhovah.”​—ELIE KHALIL

NGU SO A DÜ LO NA NI: 1976

KODORO SO A DÜ LO DÄ: CHYPRE

MBAÏ TI LO: MOLENGE SO AGIRISA LEGE

GIGI TI MBI ÂNDÖ: A dü mbi na Chypre me mbi kono na Australie. Babâ na mama ti mbi ayeke aTémoin ti Jéhovah, na ala sara kue ti zia ndoye ti Jéhovah na ti Bible na yâ ti bê ti mbi. Me na ngoi so mbi kono kete awe, mbi to nda ti sara ye ti kirikiri. Mbi yeke sigigi ka na hondengo ni na bï ti gue ti wara tere na ambeni mba ti mbi. E yeke nzi ka a-oto na e wara akpale mingi nga.

Na tongo nda ni, mbi yeke sara aye ni na hondengo ni si babâ na mama ti mbi asuku na mbi pëpe. Me yeke na yeke mbi sara mbeto ti ala encore ape. Mbi sara kamarade na azo so ngu ti ala ahon ti mbi na so aye Jéhovah ape, na sarango ye ti mbi ague akpa gi ti ti ala. Na nda ni, mbi tene na babâ na mama ti mbi so mbi ye bungbi ti ala ni encore ape. Ala kanga bê ala tara ti mû maboko na mbi, me mbi ke ni kue. Vundu asara ala mingi.

Mbi zia da ti ala mbi hon. Na pekoni, mbi tï na yâ ti nyongo mbangi, na mbi yeke lu même gbâ ti mbangi so iri ni ayeke marijuana si mbi yeke kä ni nga. Mbi yeke gi awali kirikiri na mbi yeke mû nga ngoi ti mbi mingi ti gue gi na aboîte de nuit. Nga kete ye, ngonzo ayeke gbu mbi. Tongana mbeni zo atene mbeni tënë wala asara mbeni ye so anzere na mbi ape, mbi yeke sungba na ngonzo, na même mbi yeke dekongo na li ti zo ni wala mbi yeke pika lo. Ti tâ tënë ni, aye kue so a fa na mbi a tene Chrétien asara pëpe, gi ni la si mbi yeke sara lani.

LEGE SO BIBLE ACHANGÉ FINI TI MBI: Mbi na mbeni mba ti mbi zo ti nyongo mbangi ni, so babâ ti lo akui na ngoi so lo de kete, e ga akota kamarade. Mingi ni e yeke lango hio ape, e yeke diko tënë bï bï bï. Na ambeni bï ni, lo yeke fa atënë ti bê ti lo na mbi, lo tene babâ ti lo amanke lo mingi. Teti so mbi hinga ye na ndo ti zingongo ti akuâ, mbi to nda ti fa na lo ye na ndo ti Jésus, so lo zingo lani akuâ na so lo mû zendo ti kiri ti zingo ande azo so akui (Jean 5:28, 29). Mbi yeke tene ka na lo: “Tara ti bâ so mo na babâ ti mo akiri awara tere. E kue e lingbi ti duti na paradis na ndo ti sese lakue lakue.” Atënë ni so andu tâ bê ti kamarade ti mbi so.

Na ambeni ngoi, kamarade ti mbi ni ayeke  hunda ambeni tënë ni na mbi, na tapande, lo ye ti hinga ye na ndo ti lâ ti nda ni (wala alango ti nda ni), wala na ndo ti tënë ti Trinité. Mbi yeke mû ka Bible ti lo mbi fa na lo aversê so afa tâ tënë na ndo ti Jéhovah Nzapa, na ndo ti Jésus nga na ndo ti alango ti nda ni (Jean 14:28; 2 Timothée 3:1-5). So mbi yeke sara tënë na ndo ti Jéhovah na kamarade ti mbi so, li ti mbi ayeke nga na ndo ti Jéhovah ni mingi.

Yeke na yeke, alê ti tâ tënë ti yâ ti Bible so babâ na mama ti mbi asara lani kue ti lu ni na yâ ti bê ti mbi ato nda ti maï. Na tapande, na ambeni ngoi so mbi na akamarade ti mbi e yeke nyon mbangi, mo ye ti bâ so li ti mbi atï na ndo ti Jéhovah. Akamarade ti mbi mingi atene ala ye Nzapa, me sarango ye ti ala ayeke tâ nde. Teti so mbi ye ti duti tongana ala pëpe, mbi bâ so mbi doit ti sara mbeni ye. A yeke nzoni mbi kiri na Jéhovah.

Ti tenengo ni na yanga e yeke tene ni hio, me sarango ni aga ngangu. Mbi zia lege ti ambeni ye ni hio; a kara mbi oko ape ti zia lege ti nyongo mbangi. Mbi zia nga lege ti akamarade ti mbi ni so, na mbi to nda ti manda Bible mbi na mbeni ancien.

Me ti ambeni ye ni, a yeke tâ ngangu. A yeke lani ngangu na mbi ti zia ti sara ngonzo. Na ambeni ngoi mbi sara effort me na pekoni mbi kiri mbi tï na yâ ni. A sara mbi nzoni oko ape. Na li ti mbi, ti ti mbi awe. Na vundu na bê, mbi sara tënë ni na ancien so ayeke manda Bible na mbi. Ita ni akanga bê mingi na mbage ti mbi nga na ndoye lo mû maboko na mbi mingi. Mbeni lâ, lo hunda na mbi ti diko mbeni article na yâ ti Tour ti Ba Ndo so afa ngbanga ti nyen a yeke kota ye ti zia lege ni pëpe. * Mbi na lo e bâ ambeni ye so mbi lingbi ti sara tongana ngonzo agbu mbi. Kete na kete, na lege ti article ni so nga na sambela mingi, mbi hon ndo ti ngonzo ti mbi ni. Na nda ni, na avril ti ngu 2000, mbi mû batême mbi ga Témoin ti Jéhovah. So nzerengo tere ti babâ na mama ti mbi ape!

NZONI YE SO MBI WARA NA PEKONI: Fadeso mbi yeke na siriri ti bê nga na nzoni yingo-ti-hinga, teti mbi buba tere ti mbi na mbangi encore ape nga na gingo wali kirikiri ape. Ye kue so mbi sara, atâa na place ti kua wala na bungbi wala na sarango mbeni ye nde, mbi wara ngia dä mingi. Mbi hinga nzerengo ti gigi fadeso.

Mbi mû merci mingi na Jéhovah so babâ na mama ti mbi azia lâ oko pëpe ti mû maboko na mbi. Mbi pensé nga na atënë ti Jésus so ayeke na Jean 6:44, so atene: “Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi.” A nzere na mbi mingi so Jéhovah agboto mbi si mbi kiri na lo.

 “Mbi ye mingi ti wara mbeni babâ.”​—MARCO ANTONIO ALVAREZ SOTO

NGU SO A DÜ LO NA NI: 1977

KODORO SO A DÜ LO DÄ: CHILI

MBAÏ TI LO: ZO TI PIKANGO ASIONI MOZOKO

GIGI TI MBI ÂNDÖ: Mbi kono na Punta Arenas, mbeni kete pendere gbata ti Amerika ti Mbongo na mbage ti gbe ni. Na tango so mbi yeke na ngu oku, babâ na mama ti mbi ake tere na Mama la abata mbi. Na li ti mbi, babâ ake mbi awe, a sara si mbi ye mingi ti wara mbeni babâ.

A-Témoin ti Jéhovah amanda Bible na mama ti mbi, na lo yeke gue ka na mbi na abungbi ti ala na Da ti Royaume. Me, mbi ye ka ti gue na abungbi ni ape. Tongana mama amû mbi ti tene e gue, mbi yeke dë tâ mbeni kongo ti mbana lege lege. Na ngu 13, mbi zia lege ti guengo na abungbi ni kue.

Mbi ye lani mozoko mingi, na mbi bâ so mbi yeke na don ni. Na ngu 15, mbi na ambeni zo e yeke pika asioni mozoko so a iri ni heavy-metal na death-metal na ngoi ti amatanga, na yâ ti abar nga na ambeni ngoi nde. Mbi sara nga kamarade na ambeni kota zo ti pikango mozoko, na ala zia nzara ti pikango anzoni mozoko na bê ti mbi. Na pekoni, mbi zia iri ti mbi na mbeni ekole ti mozoko ti manda ye na ndo ni. Na ngu 20, mbi gue na Santiago, li-kodoro ti Chili, ti kono hingango ye ti mbi ni. Me mbi ngbâ nga lakue ti pika asioni mozoko ni so.

Mbi yeke lani na ngia oko ape. Ti tomba na vundu ti mbi ni, mbi yeke nyon sämba nga mbi yeke nyon mbangi, mbi na ambeni mba ti mbi ti pikango asioni mozoko ni, so ala yeke tongana afami ti mbi. Gi na bango mbi zo ayeke hinga atene mbi yeke zo ti kpengo ndia ti kodoro ape. Mbi yeke yü gi vuko bongo, kuä ti yanga ti mbi ayo, nga kuä ti li ti mbi ayo atï na ndo ti ngbonda ti mbi.

Mbi yeke tiri mingi na mbi yeke wara tënë na azo ti lapolice mingi nga. Mbeni lâ so mbi sulêe, mbi yô tiri na ambeni zo ti kango mbangi so agi yanga ti mbi na ti akamarade ti mbi. Azo ni apika mbi sioni juska ala kungbi bio ti ngbangba ti mbi.

Me ye so azia kä na bê ti mbi mingi ayeke ye so akamarade ti mbi asara na mbi. Mbeni lâ, mbi ga ti hinga so copine ti mbi ayeke sigi na kota kamarade ti mbi a sara angu mingi awe, na akamarade ti mbi ni kue ahonde tënë ni na mbi. Bê ti mbi ason sioni.

Mbi kiri na Punta Arenas. Kâ mbi to nda ti fa mozoko na azo nga mbi yeke pika violon. Mbi ngbâ nga lakue ti pika asioni mozoko ni nga ti enregistré ni. Mbi tï mbeni pendere maseka-wali so iri ti lo ayeke Sussan, na e mä tere ti lango da oko. Mbeni lâ, Sussan abâ so mbi mä na bê pëpe na tënë ti Trinité, andâ mama ti lo amä na bê na ni. Lo hunda mbi, lo tene, “Tâ tënë ni ayeke so wa?” Mbi tene na lo so mbi hinga so a yeke ti lo tâ tënë pëpe me mbi hinga versê wa si mbi lingbi ti fa ni na lo ape. Me, mbi hinga azo so alingbi ti fa na lo ni. Mbi tene na lo so aTémoin ti Jéhovah alingbi ti fa na lo tënë ni na yâ ti Bible. Na pekoni mbi sara mbeni ye so angu mingi mbi sara pëpe, a yeke so mbi sambela Nzapa ti tene lo mû maboko na mbi.

Lango kete na pekoni, mbi bâ mbeni koli so akpa mbeni zo so mbi hinga lo, na mbi hunda lo wala lo yeke Témoin ti Jéhovah. Na bango mbi mbeto asara lo kete, me na nzoni bê lo kiri tënë na ahundango ndo ti mbi so mbi hunda na lo na ndo ti abungbi ti ala. Na mbi, Nzapa la akiri tënë  na sambela ti mbi ni. Mbi gue na Da ti Royaume na mbi duti gi na ndangba banc si zo oko abâ mbi ape. Me, azo mingi ahinga atene mbi so lani mbi ngbâ kete mbi ga ka na bungbi so la. Ala yamba mbi na ngia na ala gbu mbi na kate ti ala, a sara si agingo bê ti mbi kue ahon. A yeke mo bâ mo tene mbi kiri na ngbene ndo ti mbi. Na ngoi so mbi bâ zo so amanda lani Bible na mbi na tango so mbi ngbâ kete, mbi hunda na lo ti kiri ti manda Bible na mbi.

LEGE SO BIBLE ACHANGÉ FINI TI MBI: Mbeni lâ, mbi diko aProverbe 27:11, so atene: “Molenge ti mbi, mo duti na ndara na mo mû ngia na bê ti mbi.” Bê ti mbi adö ti hinga so e asenge zo e lingbi ti zia ngia na bê ti Nzapa so asara dunia kue. Mbi ga ti hinga so Jéhovah ayeke Babâ so mbi yeke gi ni depuis so la.

Mbi ye lani ti zia ngia na bê ti Babâ ti mbi ti yayu nga ti sara ye ti bê ti lo, me teti angu mingi mbi duti ngbâa ti mbangi na ti sämba. Yeke yeke tënë ti Jésus so ayeke na Matthieu 6:24, so lo tene, “Mbeni zo alingbi ti duti ngbâa ti azo use pëpe”, aga polele na li ti mbi. Na ngoi so mbi yeke tirika ti changé aye na yâ ti fini ti mbi, atënë so ayeke na 1 aCorinthien 15:33, so atene, “Ti sara songo na asioni zo ayeke buba anzoni sarango ye ti zo”, andu bê ti mbi ngangu. Mbi bâ so ti tene mbi zia lege ti asioni sarango ye ti mbi a yeke nzoni mbi gue mbeni pëpe na ando ni so mbi yeke gue dä kozo nga mbi dö lege ti asioni kamarade mbi zia. Wango ti Bible ni ayeke polele: Aye kue so asara si mbi tï, a lingbi mbi dö lege ni mbi zia.​—Matthieu 5:30.

Ti zia lege ti pikango asioni mozoko so mbi ye tënë ni mingi la ayeke lani ngangu mingi na mbi. Me na mungo maboko ti akamarade ti mbi ti bungbi, mbi dö lege ni mbi zia. Mbi zia nga lege ti sulengo ni nga na ti nyongo mbangi. Mbi fâ nga kuä ti li ti mbi na kuä ti yanga ti mbi, nga mbi zia lege ti yungo gi avuko bongo. Lani tongana mbi tene na Sussan so mbi ye ti fâ kuä ti li ti mbi, li ti lo akpe kue. Lo tene, “Mbi na mo la e yeke gue na Da ti Royaume ni, mbi ye ti bâ ye so a yeke sara kâ.” Aye so lo bâ kâ anzere na lo mingi, na a ninga ape lo to nda ti manda Bible. Na nda ni, mbi na Sussan e sara mariage. Na ngu 2008, e wara batême e ga aTémoin ti Jéhovah. Tere ti e anzere mingi ti sara na Jéhovah, e na mama ti mbi.

NZONI YE SO MBI WARA NA PEKONI: Mbi zi tere ti mbi na angia ti dunia so ahanda lê ti zo handango nga na akamarade ti wataka. Mbi ngbâ lakue ti ye mozoko, me mbi soro yâ ni sorongo fadeso. Mbi mû aye so asi na mbi na yâ ti gigi ti mbi ti mû maboko na afami ti mbi nga na ambeni zo, mingi ni amaseka. Mbi ye si ala hinga so gbâ ti aye so dunia so ayeke mû akpa anzoni ye, me na nda ni a yeke gi “gbâ ti azende”.—aPhilippien 3:8.

Mbi wara anzoni kamarade na yâ ti bungbi, ndo so tâ ndoye na siriri ayeke dä. Me ye so anzere na mbi mingi ayeke so na gango nduru na Jéhovah, mbi wara tâ Babâ so mbi yeke gi ni depuis so.

[Kete tënë na gbe ni]

[Kete tënë na lembeti 13]

“Jéhovah agboto mbi si mbi kiri na lo”