Bijbel e kenki sma libi

SAN meki taki wan man teki a bribi baka di a ben kweki na ini? Fa wan yonkuman kon feni a papa di a ben wani abi en heri libi langa kaba? Leisi san den sma disi abi fu taki.

„Mi ben musu drai go baka na Yehovah.”​—ELIE KHALIL

A GEBORE NA INI 1976

KONDRE: SIPRUS

A BEN DE WAN LASI MANPIKIN

A LIBI FU MI FOSI: Mi gebore na ini Siprus, ma mi gro kon bigi na ini Australia. Mi papa nanga mama na Yehovah Kotoigi, èn den du tranga muiti fu yepi mi fu kon abi lobi gi Yehovah èn gi en Wortu, Bijbel. Ma di mi ben de wan tini, mi bigin opo misrefi teige den. Te neti mi ben e boro gowe fu miti tra yonguwan. Wi ben e fufuru oto èn wi ben poti wisrefi na ini wan lo tra problema.

Na a bigin, mi ben e du den sani disi kibrikibri fu di mi ben e frede taki mi papa nanga mama ben o mandi nanga mi. Ma baka wan pisi ten mi no ben frede moro. Mi tron mati fu sma di ben owru moro mi èn di no ben lobi Yehovah. Den no ben e leri mi bun sani. Te fu kaba, mi taigi mi papa nanga mama taki mi no ben wani abi noti moro fu du nanga a bribi fu den. Den ben abi pasensi nanga mi èn den pruberi fu yepi mi, ma mi no ben wani taki den yepi mi kwetikweti. A sani disi hati den trutru.

Baka di mi gowe libi oso, mi bigin gebroiki drugs. Mi ben e prani èn mi ben e seri bun furu marwana. Mi ben e libi wan yayolibi èn mi ben lobi go na dansi-oso. Mi ben kon tron wan faya-ati sma tu. Efu wan sma ben e taki noso du wan sani di mi no ben lobi, dan mi ben e kisi bigi atibron. Nofo tron, mi ben e bari sma èn mi ben e naki den tu. Te yu luku en bun, mi ben e du ala sani di mi ben leri taki wan Kresten no musu du.

A FASI FA BIJBEL KENKI MI LIBI: Mi tron bun mati nanga wan man di ben e gebroiki drugs tu. Di a ben de wan yongu boi ete, en papa kon dede. Wi ben gwenti taki tori te lati neti. Son leisi a ben e fruteri mi fa a ben e misi en papa. Fu di mi kon leri sabi na opobaka howpu di mi ben pikin, meki mi bigin fruteri en fu Yesus. Mi fruteri en taki Yesus ben wiki den dedewan èn taki a pramisi fu du dati baka na ini a ten di e kon (Yohanes 5:28, 29). „Prakseri fa a o de fu si yu papa baka”, na so mi ben e taigi en. „Wi alamala kan libi fu têgo na ini wan Paradijs na grontapu.” Den sani dati naki na ati fu mi mati.

Tra leisi baka, mi mati ben e taki fu sani soleki den lasti dei, èn fu a leri di e taki dati a Tata, a Manpikin, nanga a Santa yeye na wán. Te a ben e  du dati, dan mi ben e teki a Bijbel èn mi ben e sori en difrenti tekst di ben e tyari kon na krin san na den tru tori di abi fu du nanga Yehovah Gado, Yesus, nanga den lasti dei (Yohanes 14:28; 2 Timoteyus 3:1-5). O moro mi ben e fruteri mi mati fu Yehovah, o moro mi ben e prakseri Yehovah.

Mi papa nanga mama ben du tranga muiti fu prani den siri fu den tru tori fu Bijbel na ini mi ati, ma den siri dati no ben gro. Safrisafri dati ben e pasa now. Fu eksempre, son leisi te mi ben de na den fesa e gebroiki drugs makandra nanga den mati fu mi, dan wantronso mi ben e prakseri Yehovah. Furu fu den mati fu mi ben e taki dati den lobi Gado, ma a fasi fa den ben e tyari densrefi no ben e sori dati. Fu di mi no ben wani de leki den, meki mi ben sabi san mi ben musu du. Mi ben musu drai go baka na Yehovah.

Ma taki nanga du a no a srefi. A ben makriki gi mi fu tyari son kenki kon. A no ben de wan problema gi mi fu tapu nanga drugs. Mi no ben e moksi moro nanga wan tu fu den mati di mi ben abi fosi, èn mi bigin studeri Bijbel nanga wan Kresten owruman.

Ma nanga tra kenki a no go so makriki. A ben muilek spesrutu fu hori misrefi te mi ben atibron. Son leisi, a ben e go bun wan pisi ten, ma dan mi ben e lasi misrefi baka. Baka dati, mi konsensi ben e fon mi. Mi ben e denki taki noiti mi ben o man wini a swakifasi disi. Fu di mi ben e firi brokosaka, meki mi suku yepi na a owruman di ben e studeri Bijbel nanga mi. Ala ten na owruman disi ben abi pasensi, a ben sori switifasi, èn a ben gi mi deki-ati trutru. Wan leisi, a meki mi leisi wan artikel na ini A Waktitoren, di ben e sori fu san ede a prenspari fu no lasi-ati. * Wi taki fu sani di mi ben kan du te na atibron fu mi ben e opo kon. Fu di mi tan hori na artikel dati na prakseri, èn fu di mi begi Yehovah furu leisi, meki safrisafri mi no ben e atibron so furu moro. Te fu kaba, na ini april 2000, mi teki dopu kon tron wan Kotoigi fu Yehovah. Yu kan frustan taki mi papa nanga mama ben breiti srefisrefi.

DEN WINI DI MI KISI: Now mi abi wan korostu firi èn wan krin konsensi, fu di mi sabi taki mi no e doti mi skin moro. Iya, mi no e gebroiki drugs moro èn mi no e libi wan yayolibi moro tu. Now mi de moro koloku awansi san mi e du, efu na wroko mi de, efu na wan konmakandra mi de, noso efu na prisiriten mi abi. Mi e si a libi tra fasi now.

Mi e taigi Yehovah tangi taki mi papa nanga mama noiti no frigiti mi. Mi e prakseri tu san Yesus taki na Yohanes 6:44: „Nowan sma kan kon na mi, efu a Tata di seni mi kon no e hari en kon.” A e naki mi ati te mi e prakseri taki mi ben man drai kon baka na Yehovah fu di a hari mi kon na en.

 „Mi ben e angri fu abi wan papa.”​—MARCO ANTONIO ALVAREZ SOTO

A GEBORE NA INI 1977

KONDRE: CHILI

A BEN E PREI HEBI ROCK POKU

A LIBI FU MI FOSI: Mi gro kon bigi na ini Punta Arenas, wan foto pe a libi ben switi. A foto disi ben de na a Straat Magallanes, na a zuidsei fu Zuid-Amerika. Mi mama wawan kweki mi, fu di en nanga mi papa ben prati. A sani dati meki taki mi ben e firi leki mi ben de mi wawan èn mi ben e angri fu abi wan papa.

Mi mama ben studeri Bijbel nanga Yehovah Kotoigi èn a tyari mi go na den Kresten konmakandra na a Kownukondre zaal. Ma mi no ben lobi go na den konmakandra kwetikweti èn mi ben e rigeri te wi ben de na pasi go drape. Di mi ben abi 13 yari, mi tapu fu go na den konmakandra.

Na a ten dati, mi ben kon lobi poku èn mi ben si taki mi ben man prei poku bun. Di mi ben abi 15 yari, mi ben e prei hebi rock poku na bigi fesa, na ini bar, èn na sma oso. Fu di mi ben e moksi nanga koni pokuman, meki mi kon lobi klassiek poku. Mi bigin studeri poku na wan heiskoro na ini a kontren pe mi ben e libi. Di mi ben abi 20 yari, mi froisi go tan na ini a mamafoto, Santiago, fu studeri moro fara. Mi ben e tan prei hebi rock poku, makandra nanga den mati fu mi.

A heri pisi ten disi, mi ben e firi so leigi. Fu di mi no ben wani firi so, meki mi ben e dringi sopi fu kon drungu èn mi ben e gebroiki drugs makandra nanga den tra pokuman di mi ben e si leki mi famiri. Mi ben tranga-ede èn dati ben de fu si na mi. Mi ben e weri dungru krosi, mi ben kweki wan barba, èn mi meki mi wiri gro te na mi baka.

Ibri tron baka, a fasi fa mi ben de ben e meki taki mi ben e feti èn mi ben e kisi problema nanga skowtu. Wan leisi di mi ben dringi sopi, wan tu man di ben e seri drugs ben e fruferi mi nanga den mati fu mi. Mi feti nanga den man disi èn den fon mi so te, taki den naki mi kakumbe broko.

Ma den sma di ben du den moro hati sani nanga mi, ben de sma di mi ben lobi srefisrefi. Wan dei, mi kon sabi taki a meisje di mi ben e hori nanga en ben e waka gi mi furu yari kaba nanga a moro bun mati fu mi. Ala den mati fu mi ben sabi a tori, ma nowan fu den no taigi mi. A sani dati broko mi trutru.

Mi froisi go baka na Punta Arenas pe mi bigin leri sma fa fu meki poku èn mi ben e prei cello fu meki moni. Mi tan prei poku èn mi ben e tyari poku kon na doro tu. Mi miti wan moi meisje di nen Sussan èn wi bigin libi nanga makandra. Baka wan pisi ten, Sussan kon sabi taki en mama ben e bribi na ini a leri di e taki dati a Tata, a Manpikin, nanga a Santa yeye na wán. A kon sabi tu taki mi no ben e bribi a sani dati. „Dan san tru?”, na so a ben aksi mi. Mi piki en taki mi ben sabi taki a leri dati no tru, ma taki mi no ben sabi fa fu sori en dati nanga yepi fu Bijbel. Ma mi ben sabi suma ben man du dati. Mi taigi en taki Yehovah Kotoigi ben kan sori en na ini Bijbel fa a tori dati de trutru. Baka dati, mi du wan sani di mi no ben du omeni yari langa. Mi begi Gado èn mi aksi en fu yepi mi.

Wan tu dei baka dati, mi si wan man di ben gersi wan sma di mi ben sabi. Mi aksi en efu a ben de wan Kotoigi fu Yehovah. Aladi mi ben kan si taki a skreki di a si mi, toku a taki switi nanga mi di mi aksi en fu den konmakandra na a Kownukondre zaal. Mi ben sabi taki na Yehovah  ben meki mi miti a man disi. Mi go na a Kownukondre zaal èn mi sidon te na bakasei so taki nowan sma ben kan si mi. Ma furu sma ben sabi mi ete fu a ten di mi ben e kon na den konmakandra leki pikin boi. Den gi mi wan switikon èn den brasa mi nanga so furu lobi taki mi ben e firi bun srefisrefi. A ben de neleki mi ben doro baka na oso. Di mi si a man di ben studeri Bijbel nanga mi di mi ben pikin, dan mi aksi en fu studeri baka nanga mi.

A FASI FA BIJBEL KENKI MI LIBI: Wan dei mi leisi Odo 27:11, pe skrifi: „Mi manpikin, de koni èn meki mi ati prisiri.” A ben naki mi ati di mi prakseri taki wan lawlaw libisma leki mi ben kan meki na ati fu a Mekiman fu hemel nanga grontapu prisiri. Mi kon si taki na Yehovah ben de a Papa di mi ben e suku mi heri libi langa!

Mi ben wani plisi mi hemel Tata èn mi ben wani du a wani fu en. Ma drugs nanga sopi ben abi krakti na mi tapu someni yari kaba. Mi kon frustan a sani di Yesus e leri wi na Mateyus 6:24, pe a e taki dati „nowan sma kan dini tu masra leki srafu”. Di mi ben e feti fu tyari kenki kon, dan a gronprakseri na 1 Korentesma 15:33 ben abi bigi krakti na mi tapu. Drape skrifi: „Takru kompe e pori bun gwenti.” Mi kon si taki mi no ben o man tapu nanga den takru gwenti fu mi efu mi ben e tan go na den srefi presi èn efu mi ben e tan moksi nanga den srefi sma. A rai fu Bijbel ben de krin: Mi no ben musu draidrai fu tyari den kenki kon di ben de fanowdu, efu mi ben wani tapu nanga den sani di ben e meki mi naki futu.​—Mateyus 5:30.

Fu di mi ben lobi poku so, meki a no ben makriki srefisrefi fu tapu nanga ala sani di ben abi fu du nanga hebi rock poku. A sani dati ben de a moro muilek bosroiti di mi ben musu teki. Ma nanga yepi fu den mati fu mi na ini a gemeente, mi ben man tapu nanga den sani dati te fu kaba. Mi no ben e dringi tumusi furu sopi moro, èn mi no ben e gebroiki drugs moro. Mi koti mi wiwiri tu, mi krebi mi barba, èn mi tapu fu weri soso blaka krosi. Di mi taigi Sussan taki mi ben wani koti mi wiwiri, dan a ben wani sabi san mi ben e du te mi ben de na a Kownukondre zaal. A taki: „Mi e go nanga yu fu go luku san e pasa na a Kownukondre zaal disi!” A ben lobi san a si drape èn heri esi ensrefi bigin studeri Bijbel. Te fu kaba, mi nanga Sussan trow. Na ini 2008, wi teki dopu kon tron Yehovah Kotoigi. Wi breiti taki now wi e dini Yehovah makandra nanga mi mama.

DEN WINI DI MI KISI: Mi breiti taki mi no de wan pisi moro fu wan grontapu pe sma no de koloku, èn pe mati e kori trawan. Mi lobi poku ete, ma mi e luku bun sortu poku mi e arki. Mi e gebroiki den sani di mi ondrofeni fu gi mi famiriman nanga tra sma deki-ati, spesrutu yonguwan. Mi wani yepi den fu kon si taki furu sani fu a grontapu disi, kan gersi moi sani, ma te fu kaba den sani dati na „wan ipi doti” nomo.​—Filipisma 3:8.

Mi feni bun mati na ini a Kresten gemeente pe lobi nanga freide de. Ma san moro prenspari, na taki mi kon moro krosibei na Yehovah èn na so mi feni mi Papa.

[Futuwortu]

[Prenspari pisi na tapu bladzijde 13]

„Mi ben man drai go baka na Yehovah fu di a hari mi kon baka na en”