Magnova Ndaty ty Baiboly

NIALA tamy ty fivavahagne nitezagne aze ty lahilahy raike, faie niheregne indraike naho fa tafara tatoy. Nenga ty baba’e ty ajaja raike, faie nahatrea baba hafa avao naho fa nibey. Andao hohenteantikagne ty tantara iareo.

“Mila miheregne amy i Jehovah raho.”​—ELIE KHALIL

TERAKE TAMY: 1976

FIRENENA NIAVIA’E: SIPRE

FIAIGNA’E TALOHA: NARENGERENGE

TY FIAIGNAKO TALOHA: Terake ta Sipre teto raho, faie nibey ta Ostralia agne. Vavolombelo i Jehovah ty baba’ay naho i rene’ay sady nikezake iareo nagnampe ahy ho tea i Jehovah naho ho tea ty Baiboly. Faie nanjare narengerenge raho naho fa tafara tatoy. Nilay boake an-tragno ao raho naho fa nihariva mba hiarake amy i namako rey. Nangalatse tobile zahay sady nanao hagegeagne hafa.

Nietake raho tamy ty voaloha’e fa natahotse i baba’ay naho i rene’ay. Faie tsy nidare raho naho fa nandeha ty fotoagne. Vao mainke narengerenge raho satria ndaty tsy tea i Jehovah ty ninamako sady fa zokeko lavitse ka. Nirehake tamy i baba’ay naho i rene’ay raho tamy ty fara’e fa tsy hiarake mivavake amy iareo sasa. Nikezake nampisaintsaigne ahy iareo faie tsy nidareako, le tena nalahelo iareo.

Nisintake boake an-tragno’ay ao raho naho fa tafara tatoy sady nifoke rongony. Nambole naho namarotse rongony maro aza raho. Nanjare raty findesam-batagne naho namonje bale iaby aza raho. Nanjare mora boseke ka raho. Naho vaho nisy ndaty nirehake ndra nanao raha tsy teako ohatse, le avy le nikorakoraheko ndra tena nasiahako. Ze raha nampianaregne ahy boake amy Baiboly ao tie tsy azo atao, le nataoko iaby.

TY NAGNOVÀ TY BAIBOLY TY FIAIGNAKO: Nanjare tena ninamako i lahilahy raike mpifoke rongonỳ. Mbe kede reke le fa nimate ty baba’e. Mateteke zahay ro nirehake hatrake halembey. Nitaraigne amako reke tie tena malahelo i baba’e, le nirehafeko reke tie fa namelogne ty mate ty Jesosy, sady mbe hanao izay amy ty hoavy. (Jaona 5:28, 29) Toe fa nianarako zay tie taloha. Tena fale reke nirehafeko tie: “Alao sare an-tsaigne moa tie hifankatrea indraike nareo! Hiaigne amy i Paradisa an-tane etoỳ tikagne iaby ty amy izay.”

Nagnontane miomba ty andro fara’e ndra i Andrianagnahare telo miharo raikey ka o namako iohoe. Nalaeko i Baiboli’ey sady natoroko aze tao tie ino maregne i andro fara’ey, sady ia ty Jehovah Andrianagnahare naho i Jesosy. (Jaona 14:28; 2 Timoty 3:1-5) Arakarake ty nirehafako ty miomba i Jehovah ty nahavy ahy hieretseretse indraike ty fifandrambesako ama’e.

Niheregne tsikede tan-tsaiko ato i raha nampianare i baba’ay naho i rene’ay tamy i Baiboly aoy. Tsiaroko tampoke ohatse ty raha nianarako naho fa nifoke rongony niarake amy ty namako tamo o feteo agne raho. Nirehake iareo fa tea an’Andrianagnahare ie amy izao tsy mifagnarake amy izay ty raha atao iareo. Tsy te hanahake iareo raho, le hoe raho tie mila miheregne amy i Jehovah raho.

Mora fa rehafegne zay fa sarotse tanterahegne. Ie aloha tsy le nanahiragne ty niala amy i rongonỳ! Tsy niarake tamo o namakò sasa ka raho, sady nianatse Baiboly tamy ty androanavi-pagnahy ty Vavolombelo i Jehovah.

Faie tena nimafe tamako ty nifehe tegna naho fa niboseke raho. Misy fotoagne raho mahavita, fa misy fotoagne tsy nahavita. Tena kivy raho, le nirehake tamy i androanavi-pagnahỳ. Nanam-paharetagne naho nisoa fagnahy reke sady tena nampahery ahy. Nampamakie’e lahatsoratse raike amy ty Fitalakesan-davitse raho, indraike andro zay. Mandrisike io fa ilaegne ty fikezahagne mafe. * Nirehafe’ay ka tie inogne iaby ty raha azo atao naho fa boseke raho. Nahavita nahafehe tegna avao raho naho fa nitadidy i lahatsoratsey sady nivavake avao tamy i Jehovah. Natao badisa raho tamy Avrily 2000. Mazava hoaze fa tena fale ty baba’ay naho i rene’ay.

TY SOA NIRAMBESEKO: Milamin-tsaigne raho sady tsy heagne ty eretsereko, satria tsy mifoke rongony naho tsy raty findesam-batagne sasa. Fale raho tie amy izao, ndra naho fa miasa zay ndra naho fa mivory ndra naho fa mihisa. Nanjare teako ty fiaignako!

Misaotse i Jehovah raho nagnomey i baba’ay naho i rene’ay. Nikezake avao iareo nagnampe ahy. Teako ka i reha i Jesosy tihoey: “Tsy misy afake magnarine ahy naho tsy taone i Rae.” (Jaona 6:44) Tena fale raho satria nitaone i Jehovah le niheregne ama’e indraike.

“Mba te hanagne baba raho.”​—MARCO ANTONIO ALVAREZ SOTO

TERAKE TAMY: 1977

FIRENENA NIAVIA’E: SILIA

FIAIGNA’E TALOHA: MPANAO ROCK MAVESATSE

TY FIAIGNAKO TALOHA: Nibey ta Puntas Arenas, tanàgne soasoa Amerika Atimo atoy raho. Nisarake ty baba’ay naho i rene’ay, le i rene’ay avao ty niteza ahy. Tsy nidarea i baba’ay sasa raho, le mba te hanagne baba.

Nianatse Baiboly tamy ty Vavolombelo i Jehovah ty rene’ay, sady niente’e nivory niarake tama’e avao raho. Faie tena tsy teako zay, le niolaola avao raho naho fa tan-dalagne ey. Tsy nimete nandeha sasa raho naho fa ni-13 taogne.

Nanjare tea mozike raho sady tena nahay nititike. Nanjare agnisa ty tarike mpanao rock mavesatse raho, tamy iraho ni-15 taogne. Tamo o barao agne ndra tamy ty fete ty keleiagne ndra tamy ty fete hafa zahay ro nihira. Niarake tamy ty ndaty tena nahay mozike raho, le nanjare tea mozike klasike ka. Nianatse mozike tamo o lakilasy marine anay io egne raho. Nandeha an-drova agne, a Santiago agne raho tamy iraho ni-20 taogne, satria te hampitombo ty fahaiako mozike. Faie mbe niarake tamy ty tarike mpanao rock avao raho.

Tena tsy niafa-po tamy ty fiaignagne raho tamy izay, le ninon-toake bey, naho nifoke rongony niarake tamy i namako tamy i tarikey ao. Nirambeseko hoe keleiako iareo. Tena narengerenge raho sady trea amy ty poziko zay. Akanjo mainte avao ty nagnisiako, sady lava vaoke raho. Nataoko lava bey iaby aza ty voloko.

Mateteke nialy tamo o ndatio avao raho, le nitsepahe o polisio mateteke. Nisy fotoagne raho nimamo tampegne, le nialy tamy ty mpivarotse rongony satria nipay aly tama’ay naho i namako rey iareo. Nidemodemohe iareo raho, le tena nivoa i vavakoy.

Faie mbe nizakako avao igne, fa ty tena nimafe tamako, le iraho finita ty namako naho i somondrara niarake amakoy. Kay irekeo nampirafe ahy tamy ty ajalahy raike tena namako sady fa aman-tao’e iaby kay iareo ty niarake. Nahafantatse izay iaby o namakò faie tsy mba nirehake. Tena nikivy raho!

Niheregne ta Punta Arenas agne raho, le nampianatse mozike sady nikarama nititike raha magneno. Mbe nanao rock mavesatse naho namoake hira maromaro niarake tamy ty tarike ka raho. Nifankatrea tamy ze somondrara soasoa zay raho indraike andro. Sussan ty agnara’e. Nifankatea zahay roe, le niarake nipetrake. Tsikary i Sussan naho fa tafara tatoy fa nino Andrianagnahare telo miharo raike ty rene’e, ie amy izao raho tsy mino. Nagnontenea’e raho tie: “Ty an’ia ty maregne?” Le nivaleako reke tie: ‘Fantako fa tsy telo miharo raike ty Andrianagnahare, faie tsy haiko ty magnaporofo aze boake agnate Baiboly ao. O Vavolombelo i Jehovah-o ty tena mahay mamale izay.’ Nivavake raho naho fa avy eo mba hampean’Andrianagnahare. Fa ela raho ty tsy nanao izay.

Nifankatrea tamy ty lahilahy raike raho tsy ela tafara izay. Hoe raha fa nitreako zay reke, le nagnonteneako naho Vavolombelo i Jehovah. Somare nimahimahigne zay reke nahatrea ty poziko, faie nivalea’e soa avao raho naho fa nagnontane miomba i fivoriagney. Nieretseretse raho tie tena valem-bavake zay. Nandeha amy i Anjomba i Fanjakagney agne raho, le nipetrake tafara agne mba tsy ho trea o ndatio. Faie maro ty nahatsiaro ahy, le nanalama ahy sady namihigne ahy. Nahatsapa ho maivagnivagne raho! Manahake ty ajaja narengerenge niala ty tragno’e fa ela bey rey raho, le fale indraike fa niheregne. Treako tagne ka i lahilahy nampianatse Baiboly ahy tamy iraho mbe nikedey, le nirehake ama’e indraike raho mba hampianare’e.

TY NAGNOVÀTY BAIBOLY TY FIAIGNAKO: Namaky ty Ohabolana 27:11 raho, i manao tihoey: “Mihendrea, anake, le ampifaleo ty foko.” Somare nitaitse raho: “Iraho ndaty kidikidy tsy misy dika’e toy vao le mba afake mampifale i Mpamorogne ze kila rahay?” Tsapako tie kay i Jehovah, i Baba nipaliaveko hatrake amy izaỳ.

Te hampifale naho te hanao ty zoton’arofo i Babako an-dagnitse agney raho, faie mbe nifoke rongony naho ninon-toake bey. Faie nirehake ty Jesosy tie: “Tsy misy mahay manompo tompo roe.” (Matio 6:24) Nikezake niova areke raho, sady tena nahavy ahy hahatsapa tegna ty 1 Korintianina 15:33 manao tihoe: “Manimba ty fahazaragne mahasoa ty naman-draty.” Fantako boake amy izay fa tsy ho afake hiala amy i raha fataoko rey raho naho mbe miarake amy i namako rey sady mandeha amy i toeragne fandehana’ay rey agne. Tsy maintsy nataoko areke ze nialàgne tamy ze raha va’e hahavoa ahy.​—Matio 5:30.

Sarotse tamako ty tsy nanao rock mavesatse sasa satria tena teako i rahay. Faie nagnampe ahy ty namako tamo o fiangonagneo teo, le vitako avao reke tamy ty fara’e. Tsy ninon-toake maro loatse sasa raho, sady tsy nifoke rongony sasa. Nitapaheko ka i volokoy, nafahako i vaokoy, sady tsy nanao akanjo mainte sasa ka raho. Tena gaga ty Sussan naho fa nirehafako tie hotapaheko i volokoy, le hoe reke: “Ino vata’e o raha atao’areo amo ze o Anjomba i Fanjakagney agne zao? Ndra ho mbeo ka raho!” Nahafinaritse aze ty raha nitrea’e tagne, le nianatse Baiboly reke. Nisoratse zahay amy i Sussan, tafara tatoy, sady natao badisa tamy 2008. Fale zahay roe fa manompo i Jehovah miarake amy i rene’ay.

TY SOA NIRAMBESEKO: Tena sambatse raho tie amy izao fa tsy manahake ty taloha sasa. Niala tamy i namako mpamitake rey ka raho. Mbe tea mozike raho faie filifilieko soa avao. Teako ty mitantara ty fiaignako mba hagnampeako ty keleiako naho ty ndaty hafa, lohotsie fa o tanorao. Teako ho tsapa iareo fa somare hoe soa zay ty raha amy ty tontolo toy eto, ie amy izao “fako mitoborogne” naho ty maregne.​—Filipianina 3:8.

Managne namagne tsy mamitake raho amo o fiangonagneo eo. Mifandrambe soa naho mifankatea zahay. Faie ty tena mahafale ahy, le nahatrea Baba avao raho satria nanjare mifandrambe soa amy i Jehovah.

[Fagnamarehagne ambane peje]

[Hevetse Lahibey]

“Nitaone i Jehovah raho le niheregne ama’e indraike”