Ibbaibbele Lilakonzya Kubacinca Bantu

NCINZI cakapa kuti mwaalumi umwi apilukile kunjiisyo zyabukombi nzyaakaiya naakacili mwana? Mbuti musankwa umwi mbwaakabajana bausyi mbaakali kulombozya kuba ambabo mubuumi bwakwe boonse. Amubale nzyobakaamba bantu aaba.

“Ndakeelede Kupiluka Kuli Jehova.”—ELIE KHALIL

MWAKA WAKUZYALWA: 1976

KUCISI NKWAZWA: CYPRUS

MBWAAKABEDE KAINDI: MWANA MUTAKA

MBONDAKABEDE KAINDI: Ndakazyalilwa mucisi ca Cyprus pesi ndakakomenena mucisi ca Australia. Bazyali bangu Mbaakamboni ba Jehova, alimwi bakandigwasya kusikila mpobagolela kutegwa ndimuyande Jehova alimwi akuyanda Jwi lyakwe, Ibbaibbele. Nokuba boobo, nindakali mukubusi ndakatalika kuzanga. Ndakali kutija aŋanda masiku kutegwa ndikaswaangane abakubusima. Twakali kubba myootokala alimwi twakali kulinjizya mumapenzi manji.

Kumatalikilo ndakali kucita zyintu eezyi cakusisikizya nkaambo ndakali kuyoowa kutabakkomanisya bazyali bangu. Pele mukuyakwaciindi buyoofu oobu bwakamana. Ndakatalika kuyanzana abantu bakali kundiinda kukomena batakali kumuyanda Jehova, alimwi bakandiyunga kucita micito mibi. Kumamanino, ndakabaambila bazyali bangu kuti tiindakacili kuyanda kuunka kucikombelo cabo. Cakukkazyika moyo, bakasoleka kundigwasya pele ndakalukaka lugwasyo lwabo. Bazyali bangu bakatyompwa kapati.

Nindakazwa aŋanda, ndakatalika kubelesya misamu iikola, alimwi akulima akusambala lubanje. Ndakali kupona buumi bwakutalilemeka alimwi ciindi cinji ndakali kucimanina mumasena aakunywida bukoko. Alimwi ndakaba apenzi lyakufwambaana kunyema. Kuti muntu umwi waamba naa wandicitila cintu ncindatakali kuyanda ndakali kunyema kapati, kanji-kanji ndakali kubabwentela akubauma. Mubufwaafwi ndakali kucita zyoonse nzindakayiisyigwa kuti Munakristo tayelede kuzicita.

BBAIBBELE MBOLYAKANDICINCA: Ndakatalika kuyanzana amweenzuma wakali kubelesya misamu iikola iwakafwidwa bausyi naakacili mwana. Kanji-kanji twakali kumuka koona akaambo kakubandika. Zimwi ziindi nitwakali kwiizya masiku, wakali kundaambila mbwaakali kulimvwa alimwi ambwaakali kubayeeya bausyi. Mbokunga ndakakomena kandizyi kujatikizya bulangizi bwabubuke, ndakatalika kumwaambila makani aajatikizya Jesu kuti wakabusya bafwide akuti wakasyomezya kuyoocita oobo alimwi kumbele. (Johane 5:28, 29) Ndakali kumwaambila kuti: “Koyeeya buyo kuyoobona bauso alimwi. Toonse tuyoopona mu Paradaiso aanyika kukabe kutamani.” Majwi aaya akamunjila mumoyo mweenzuma.

Ziindi zimwi, mweenzuma wakali kubandika makani aajatikizya mazuba aakumamanino naa  njiisyo yabutatu. Ndakali kubelesya Bbaibbele lyakwe kumutondezya magwalo aaindene-indene aatondezya kasimpe kajatikizya Jehova Leza, Jesu, alimwi amazuba aakumamanino. (Johane 14:28; 2 Timoteyo 3:1-5) Kufwumbwa ciindi nindakali kubandika amweenzuma kujatikizya Jehova, ndakali kumuyeeya Jehova kapati.

Bucebuce, mbuto zyakasimpe zyatakali kukomena mumoyo wangu—mbuto nzyobakasoleka canguzu kusyanga bazyali bangu, zyakatalika kukomena. Mucikozyanyo, zimwi ziindi nindakali kupobwe kandinywa misamu iikola abeenzuma, ndakali kunga ndatalika kuyeeya Jehova. Bunji bwabeenzuma bakali kulyaamba kuti balamuyanda Leza, pele micito yabo yakali kutondezya kuti tabamuyandi. Akaambo kakuti tiindakali kuyanda kuba mbuli mbabo, ndakazyiba ncindakeelede kucita. Ndakeelede kupiluka kuli Jehova.

Masimpe, ncuuba-uba kuzyiba ncoyelede kucita pele cilakatazya kapati kucicita. Kucinca kumwi kwakali kuuba-uba kucita; ndakacileka kunywa misamu iikola kakunyina buyumuyumu. Alimwi ndakacileka kuyanzana abeenzuma bakaindi, kumane ndakatalika kwiiya Bbaibbele amwaalu Munakristo.

Nokuba boobo, kucinca kumwi kwakali kukatazya kapati. Cintu cakandikatazya kapati nkulyeendelezya ndanyema. Zimwi ziindi ndakali kucikonzya kulyeendelezya pesi aabona aawo ndakali kwaalilwa. Ndakali kulimvwa bubi cacitika eeci nkaambo ndakali kuyeeya kuti ndaalilwa. Kandityompedwe kapati, ndakamwaambila mwaalu iwakali kundiyiisya Bbaibbele. Lyoonse wakali kundikkazyikila moyo akundicitila lubomba alimwi eeci cakandikulwaizya kapati. Bumwi buzuba wakandaambila kubala cibalo cimwi camu Ngazi Yamulindizi icakali kwaamba mbociyandika kutatyompwa. * Twakabandika ntaamu nzindakeelede kubweza ndanyema. Bucebuce, ndakatalika kulijata kunyema kwiinda mukutobela nzindakabala mucibalo alimwi akupaila kuli Jehova. Mpoonya mu April 2000, ndakabbapatizyigwa akuba Kamboni wa Jehova. Cakutadooneka, bazyali bangu bakakkomana kapati.

MBONDAGWASYIGWA: Lino ndijisi luumuno lwamumizeezo amanjezyeezya aasalala akaambo kakuzyiba kuti tandicuusofwaazyi mubili wangu kwiinda mukubelesya misamu iikola naa mukutalilemeka. Kufwumbwa cintu ncondicita, kube kubeleka, kujanika kumuswaangano wa Bunakristo naa kulikondelezya, ndilimvwa kukkomana kapati. Ndizibona munzila yeelede zyintu mubuumi bwangu.

Ndilamulumba Jehova akaambo kabazyali bangu ibatakaleka kundigwasya. Alimwi ndilaayeeya majwi aa Jesu aali mulugwalo lwa Johane 6:44 aakuti: “Kunyina muntu uukonzya kuboola kulindime ccita kuti wakwelwa a Taata wakandituma.” Ndilikkomene kuzyiba kuti ndacikonzya kupiluka kuli Jehova nkaambo ngookandikwela.

 “Ndakali Kulombozya Kuba Abataata.”—MARCO ANTONIO ALVAREZ SOTO

MWAKA WAKUZYALWA: 1977

KUCISI NKWAZWA: CHILE

MBWAAKABEDE KAINDI: UMWI WAMUBBAANDI YAKWIIMBA NYIMBO ZYA DEATH-METAL

MBONDAKABEDE KAINDI: Baama bakandikomezyezya mudolopo lya Punta Arenas, dolopo libotu ilili ku Strait of Magellan munsi-munsi a South America nkoili kumusanza. Bazyali bangu bakaandaana nindakajisi myaka yosanwe yakuzyalwa alimwi eeci cakandipa kulimvwa kulekelezyegwa. Ndakali kulombozya kuba abataata.

Baama bakali kwiiya Bbaibbele a Bakamboni ba Jehova, alimwi bakali kunditolelezya kumiswaangano yambungano ku Ŋanda ya Bwami. Nokuba boobo, ndakali kucimwa kuunka kumiswaangano, alimwi kanji-kanji ndakali kunga ndatalika kulila munzila. Nindakajisi myaka iili 13 yakuzyalwa, ndakacilekela limwi kuunka kumiswaangano.

Aciindi eeci, ndakali kuyandisya nyimbo, alimwi ndakazyiba kuti ndakajisi cipego cakwiimba. Ciindi nindakajisi myaka iili 15 yakuzyalwa, ndakali kwiimba nyimbo zya heavy-metal a death-metal mumapobwe, kumabbiyaholo, alimwi akuzisobano zimwi. Kuyanzana abantu bakacibwene kwiimba cakandipa kuti nditalike kukkomanina kwiimba nyimbo. Ndakatalika kwiiya nyimbo acikolo aakali kuyiilwa nyimbo cakali kubusena nkondakali kukkala. Nindakali amyaka iili 20, ndakalongela kudolopo lipati lya Santiago, kuyoozumanana kwiiya. Alimwi ndakazumanana kwiimba mubbaandi yanyimbo zya heavy-metal a death-metal.

Ciindi coonse eeci, ndakali kulimvwa kubula mulimo. Mukusoleka kuti ndileke kulimvwa boobu, ndakali kukolwa akunywa misamu iikola antoomwe ambotwakali kwiimba limwi, balo mbondakali kubona kuti ngomukwasyi wangu. Ndakali muzangi alimwi eeci cakali kulibonya kweelana ambondakali kuboneka. Ndakali kusama zisani zisiya, tiindakali kugela cilezu, alimwi masusu aangu akali malamfwu kusika mucibuno.

Ciindi aciindi, micito yangu yakali kupa kuti kandilwana alimwi akundipa kusubulwa amapulisa. Cimwi ciindi, akaambo kakukolwa, ndakalwana kabunga kabantu ibasambala misamu iikola ibakali kundisoka akusoka beenzuma. Basikusambala misamu bakanduuma cibyaabi cakuti ndakatyoka mweebo.

Nokuba boobo, cintu cakandicisa kapati cakazwa kuli baabo mbondakali kuyandisya kapati. Bumwi buzuba, ndakazyiba kuti musimbi wangu wakalisyabidwe akumweenzuma, alimwi beenzuma boonse bakali kundisisa. Cakandicisa kapati.

Ndakajokela ku Punta Arenas, kwalo nkondakatalika kuyiisya nyimbo kumwi kandibeleka kuuma gita. Alimwi ndakazumanana kwiimba akulekkooda nyimbo antoomwe amabbaandi a heavy-metal a death-metal. Ndakajana musimbi mubotu uutegwa Sussan, kumane twakatalika kukkala antoomwe. Mukuyakwaciindi, Sussan wakazyiba kuti banyina bakali kusyoma munjiisyo ya Butatu njindatakali kusyoma mebo. Wakandibuzya kuti: “Ino kasimpe nkaakali?” Ndakamwiingula kuti ndilizyi kuti injiisyo ya Butatu njakubeja pele tandikonzyi kupandulula kubelesya Bbaibbele. Nokuba boobo, ndakalizyi bakali kukonzya kumupandulwida. Ndakamwaambila kuti Bakamboni ba Jehova bakali kukonzya kumutondezya kasimpe kuzwa mu Bbaibbele. Mpoonya ndakacita cintu cimwi ncindatakali kucita kwaciindi cilamfwu—ndakapaila kuli Leza kulomba lugwasyo.

Kwakainda buyo mazuba masyoonto, ndakabona mwaalumi umwi ngondakayeeyela kuti ndilimuzyi, mpoonya ndakamubuzya naa ngu Kamboni wa Jehova. Nokuba kuti wakalibonya  kuyoowa akaambo kambondakali kuboneka, wakayiingula mibuzyo yangu kujatikizya miswaangano ku Ŋanda ya Bwami. Ndakasyoma ncobeni kuti mupailo wangu waingulwa. Ndakaunka ku Ŋanda ya Bwami kumane ndakakkalila musyule kutegwa kubule uundibona. Nokuba boobo, banji bakandizyiba akaambo kakuti ndakali kuunka kumiswaangano nindakacili mwana. Bakanditambula akundikumbata caluyando cakuti ndakalimvwa kwaanguluka. Cakali mbuli kuti ndapiluka kuŋanda. Nindakabona mwaalumi iwakali kundiyiisya Bbaibbele kandicili mwana, ndakamulomba kuti atalike kundiyiisya alimwi.

BBAIBBELE MBOLYAKANDICINCA: Bumwi buzuba ndakabala lugwalo lwa Tusimpi 27:11 lwaamba kuti: “Songwaala, mwanaangu, ukondezye moyo wangu.” Ndakagambwa kuzyiba kuti muntu wanyama ulakonzya kumukkomanisya Mulengi wabubumbo boonse. Ndakazyiba kuti Jehova ngo Taata ngondakali kuyandaula mubuumi bwangu boonse.

Ndakali kuyanda kumukkomanisya Taata wakujulu akucita kuyanda kwakwe, pele ndakali muzike wamisamu iikola abukoko kwamyaka minji. Ndakaiya njiisyo ya Jesu iili mulugwalo lwa Matayo 6:24, iyaamba kuti “taakwe uukonzya kubelekela basimalelo bobilo.” Nindakali kusoleka kucinca bukkale bwangu, injiisyo iili mulugwalo lwa 1 Bakolinto 15:33 yakandigwasya kapati iyaamba kuti: “Kuyanzana kubyaabi kunyonganya zilengwa zibotu.” Ndakazyiba kuti nindatakakonzya kuleka micito yangu mibyaabi kuti nindakazumanana kuunka kumasena aatali kabotu alimwi akuyanzana abantu mbabonya batali kabotu. Lulayo lwamu Bbaibbele lwakali kulimvwisya: Ndakeelede kubweza ntaamu yakuleka zyintu zyakali kundilebya.—Matayo 5:30.

Akaambo kakuti ndakali kuziyandisya nyimbo, cakapa kuti cindikatazye kapati kuleka nyimbo zya heavy-metal. Pele kwiinda mukugwasyigwa abeenzuma bamumbungano, ndakacikonzya kucileka. Ndakacileka kubelesya misamu iikola akuciindizya kunywa. Alimwi ndakaagela masusu acilezu cangu, alimwi ndakaleka kusama zisani zisiya zyalo. Nindakamwaambila Sussan kuti ndiyanda kugela masusu, cakamugambya kapati alimwi wakayanda kuti azyibe ncindakali kucita ku Ŋanda ya Bwami. Wakaamba kuti: “Ndilaunka andinywe ndikabone cicitika ku Ŋanda ya Bwami.” Wakacikkomanina ncaakaakubona, mpoonya awalo wakatalika kwiiya Bbaibbele. Kumane, twakakwatana a Sussan. Mu 2008, twakabbapatizyigwa kuba Bakamboni ba Jehova. Tulikkomene kubelekela Jehova antoomwe abaama.

MBONDAGWASYIGWA: Ndakaisiya nyika iitajisi lukkomano lwini-lwini alimwi abeenzuma basilweeno. Ndiciziyanda nyimbo, pele lino ndilasala nyimbo nzyondiswiilila. Ndibelesya luzyibo ndwejisi kwiinda muzyintu zyakandicitikila kugwasya bamukwasyi wangu abamwi, ikwaambisya bakubusi. Ndiyanda kubagwasya kubona kuti zyintu zyoonse nyika nzyoipa zilakonzya kulibonya kuti nzibotu, pele kumamanino “nzyabuyo.”—Bafilipi 3:8.

Ndajana balongwe basyomeka mumbungano ya Bunakristo mwalo muli luyando lwini-lwini aluumuno. Kuyungizya waawo, kwiinda mukuba acilongwe a Jehova, ndabajana Bataata lino.

[Bupanduluzi buyungizidwe]

[Majwi aakwelelezya sikubala aali apeeji 13]

“Ndacikonzya kupiluka kuli Jehova nkaambo ngookandikwela”