Biblia kalakgpalinilh xlatamatkan

¿TUKU makgpuwantinilh chatum chixku nataspitpara ktakanajla niku makgastakka? ¿La tekgsli chatum kgawasa tlat nema lu xkgalhiputun? Kaʼakxilhti xatakgalhtin.

«Xtalakaskin xaklakgtaspitli Jehová» (ELIE KHALIL)

KATA AKXNI LAKACHILH: 1976

PAÍS: CHIPRE

ATANU: LAKGMAKGALH TUKU XKATSI

LA XAKLAMA: Klakachilh kChipre, pero kstakli kʼAustralia. Kinatlatni xtatayananin Jehová xwankgonit, chu lu kimakgtayakgolh xlakata xakpaxkilh Jehová chu xTachuwin, Biblia. Pero akxni kgawasaku xakwanit ni xakkgalhakgaxmatnan. Tsekg xaktaxtu kkinchik katsisni chu xakkataʼan tiku nawatiya kinkata xkgalhikgo, xakkgalhanaw putlaw chu ankgalhin xakkgalhi taʼakglhuwit.

Xapulana kaj tsekg putum tuku xaktlawa xlakata ni xakkamakgalipuwamputun kinatlatni, pero titaxtulh kilhtamaku nialh chuna kmakgkatsilh. Kiʼamigos xlinkgoya kata chu ni xpaxkikgo Jehová. Xlakata xakkatalalin ktlawalh tuku nitlan. Asta kkawanilh kinatlatni pi nialh xakmakgtapakgsiputun kxtakanajlakan. Maski ni lakapala xkintasitsikgo chu lu xkimakgtayaputunkgo ni kmakgamakglhtinalh xtamakgtaykan. Lu nitlan limakgkatsikgolh.

Ktaxtulh kinchik chu ktsukulh maklakaskin drogas. Xakchan chu kstalh lhuwa marihuana. Xaklin xalimaxana latamat chu lu xakkan kdiscotecas. Nachuna lu lixkajni xaklikatsi. Lu xkimakgasitsi komo wi tiku xwan o xtlawa tuku ni xaklakgati. Makglhuwa palha xakkilhni o asta xakkgaxi. Xaktlawa putum tuku xkiwanikanit pi ni xlitlawat chatum kstalanina Cristo.

BIBLIA LAKGPALILH KILATAMAT: Lu xaktalanin chatum tiku lu xwa droga chu akxni aktsujku xwanit xninit xtlat. Lhuwa hora katsisni xakkgalhchuwinanaw. Makglhuwa kiwanilh pi lu xlakapastaka xtlat. Xlakata akxni aktsujku xakwanit xakkatsininit pi xʼama anan talakastakwanat, tunkun ktsukulh litachuwinan pi Jesús xkamalakastakwaninit makgapitsi tiku xnikgonit chu malaknu pi chuna natlawapara kilhtamaku nema aku mima (Juan 5:28, 29). Xakwani: «Kalilakpuwanti, naʼakxilhparaya mintlat chu kimputumkan nalatamayaw kʼakgtum paraíso kKatiyatni». Uma takgalhkgalhin lu tlan mamakgkatsinilh.

Atanu kilhtamaku kiʼamigo xkilitachuwinan xlakata xaʼawatiya kilhtamaku chu tamasiyat xlakata Trinidad. Akit xaklimaklakaskin xBiblia xlakata xakmasiyanilh textos nema lichuwinankgo xaxlikana xlakata Jehová, Jesús chu xaʼawatiya kilhtamaku (Juan 14:28; 2 Timoteo 3:1-5). Akxni tlakg xaklitachuwinan kiʼamigo xlakata Jehová akit na tlakg xaklilakpuwan.

Tsinu tsinu tuku xakkatsininit xlakata xaxlikana nema xakmakinit kkinaku, chu kinatlatni xkimasiyanikgonit, tsukupa staka. Lakgachunin akxni xakwi kʼakgtum fiesta chu xakmaklakaskimaw drogas kiʼamigos chu akit, xaktsuku lakapastaka Jehová. Maski lhuwa kiʼamigos xwankgo pi xpaxkikgo Dios, tuku xtlawakgo xlimasiyakgo pi nichuna xwanit. Komo ni xaklakgaputiyunamputun, kʼakgatekgsli pi xtalakaskin xaklakgtaspitpa Jehová.

Xlikana, akxni katsiya tuku militlawat ni waniputun pi namakgantaxtiya. Makgapitsi tuku klakgpalilh ni tuwa kmakgkatsilh. Akgtum liʼakxilhtit, ni tuwa kmakgkatsilh nakmakgxtakga drogas. Chu nani tuwa kmakgkatsilh nakamakgxtakga kiʼamigos chu naktalikgalhtawakga Biblia chatum kgolotsin xalak congregación.

Pero makgapitsi talakgpalit tlakg tuwa kmakgkatsilh, la nakmachokgo kintasitsi. Xmin kilhtamaku ni xaksitsi, pero alistalh xaksitsipara chu uma lu nitlan xaklimakgkatsi, xaklilakpuwan pi nikxni xakama talakgpali. Xlakata lu nitlan xakmakgkatsima ktachuwinalh tiku xkilimakgalhtawakgema Biblia. Xlakata lu tlan xlikatsi chu ni lakapala kintasitsilh ankgalhin kimakgpuwantinilh. Akgtum kilhtamaku kiwanilh pi xaklikgalhtawakgalh akgtum artículo xla Makatsinina niku xlichuwinan pi lu xlakaskinka xwanit namakgantaxtiya tuku liskujpat. a Klikgalhtawakgaw tuku kilitlawat xwanit akxni xakmakgkatsi pi xaksitsiputun. Komo xaklilakpuwan tuku xwan artículo chu ankgalhin xaktlawani oración Jehová, tsinu tsinu ktsukulh talakgpali chu nialh lakapala xaksitsi. Wa xlakata abril kata 2000 ktamunulh chu xtatayana Jehová klitaxtulh. Na tlan nakwan pi kinatlatni lu xpaxuwamakgolh.

TUKU TLAN KINKITAXTUNINIT: Tlan kmakgkatsi chu skulunku kkgalhi kintalakapastakni xlakata nialh klimaxkajwi kimakni drogas chu talakgxtumit xalimaxana. Maski katuwa tuku ktlawa, la taskujut, kkan ktamakxtumit o wi tuku klilakgastanan lu kpaxuwa chu kakxilha latamat chuna la xlilat.

Kpaxtikatsini Jehová xlakata kinatlatni nikxni kimakgxtakkgolh. Na klilakpuwan xtachuwin Jesús nema tatsokgtawilanit kJuan 6:44: «Nila tiku nakilakgmin komo ni wa kinTlat tiku kimalakgachanit natlawa pi nakilakgmin». Lu klipaxuwa akxni klilakpuwan pi wa Jehová tiku tlawalh naklakgmimpara.

«Lu xakkgalhiputun chatum tlat» (MARCO ANTONIO ALVAREZ SOTO)

KATA AKXNI LAKACHILH: 1977

PAÍS: CHILE

ATANU: XAKMAKGTAPAKGSI GRUPO XLA DEATH-METAL

LA XAKLAMA: Kimakgastaklhi kintse kPunta Arenas, akgtum kachikin niku kakakswa xwanit xla Magallanes, lakatsu xla continente americano. Kinatlatni lamakgxtakgolh akxni xakkgalhi akgkitsis kata, uma lu nitlan klimakgkatsilh. Lu xakkgalhiputun chatum tlat.

Kintse xkatakgalhtawakga Biblia xtatayananin Jehová chu xkilin ktamakxtumit. Pero akit ni xaklakgati wa xlakata ankgalhin xaksitsitaya ktiji. Akxni xakkgalhi akgkututu kata nialh kalh ktamakxtumit.

Ama kilhtamaku lu xaklakgati tatlakgni chu xakmakgkatsi pi tlan xaktlakgnan. Akxni xakkgalhi akgkukitsis kata xakmakgtlakgnan grupo xla heavy-metal chu death-metal lata niku xtlawakan festivales, bares chu paskua niku kaj makgapitsi xtanukgo. Xakkatalalin tiku lu tlan xtlakgnankgo chu uma tlawalh pi naklakgati atanu tatlakgni. Ktsukulh kgalhtawakga niku xmasiyakan la tlakgnankan. Akxni xakkgalhi akgpuxam kata kkalh latama kSantiago, capital xla Chile xlakata tlakg nakkgalhtawakga. Chu chuntiya xakkatatlakgnan tiku xtlakgnankgo heavy-metal chu death-metal.

Maski xaktlakgnan, xakmakgkatsi pi wi tuku xkintsankgani. Xlakata tlan xakmakgkatsilh xakkatawa kuchu chu droga tiku xakkatatlakgnan chu xakkaliʼakxilha la kifamilia. Kintayat chu la xaklhakganan xlimasiya pi nitu xakliʼakxilhnan: ankgalhin xaklin kilhakgat xatsitsakga, ni xaktakgalhswika chu kinchixit laklhman xwanit asta xchan kintankilhni.

Ankgalhin xakkatalatlawa amakgapitsin chu xakkatakgalhi taʼakglhuwit policías xlakata chuna la xaklikatsi. Akgtum kilhtamaku, tiku stakgo drogas xkinkamakglhuwimakgon akit chu kiʼamigos. Komo xakwanit kuchu, katalatlawalh pero xlakan kinikkgolh asta tukxkgolh kinkgalhtsan.

Pero tuku tlakg kinkatsanilh wa tuku kintlawanikgolh tiku lu tlan xakkatalalin. Akgtum kilhtamaku kkatsilh pi kintaskin akglhuwata kata la xkintaʼakgskgawima ki’amigo tiku tlakg tlan xaktalalin chu makgapitsi kiʼamigos maski xkatsikgo pero ni kiwanikgolh. Uma lu kimakgalipuwa.

Ktaspitli kPunta Arenas chu anta ktsukulh skuja, xakmasiya tatlakgni chu xaktlakga violonchelo. Chu chuntiya xakkatagrabarlinan heavy-metal chu death-metal. Ama kilhtamaku klakgapasli Sussan, chatum lu stlan tsumat chu ktatawi. Titaxtulh kilhtamaku, Sussan katsilh pi xtse xkanajla tamasiy xla Trinidad pero akit ni xakkanajla wa xlakata kinkgalhskilh: «¿Tuku xaxlikana?». Kwanilh pi uma tamasiy ni xaxlikana xwanit, maski nila xakmasiyani niku lichuwinan kBiblia pero xakkatsi tiku tlan xmasiyanilh. Kwanilh pi xtatayananin Jehová tlan xmakgatekgsnikgolh xlakata uma. Ktlawalh tuku akglhuwa kata ni xaktlawanit: ktlawanilh oración Dios chu kskinilh xtamakgtay.

Titaxtulh kilhtamaku ktatanokgli chatum chixku tiku xaklakpuwan pi xaklakgapasa chu kkgalhskilh komo xtatayana Jehová xlitaxtu. Maski makgapekualh la xaklhakgananit, xla xatapaxuwan kinkgalhtilh kintakgalhskinin xlakata tamakxtumit. Akit liwana xakkatsi pi akxni ktatanokgli uma chixku kgalhtika kiʼoración. Kkalh ktamakxtumit chu ktawi kxaʼawatiya putawilh xlakata niti xkiʼakxilhli. Pero, lhuwa tiku kilakgapaskgolh xlakata xakan ktamakxtumit akxni aktsujku xakwanit. Tlan kimakgamakglhtinankgolh, kiʼakgpixtiyakgolh chu kmakgkatsilh takaksni. Kmakgkatsilh la komo xaktaspitnit kinchik. Akxni kakxilhli xtatayana Jehová tiku xkilimakgalhtawakgenit Biblia akxni aktsujku xakwanit kwanilh pi xkimakgalhtawakgepa.

BIBLIA LAKGPALILH KILATAMAT: Akgtum kilhtamaku klikgalhtawakgalh tuku wan Proverbios 27:11, «Xaskgalala kawanti, kinkgawasa, chu kamakgapaxuwa kinaku». Kaks kimalakawanilh uma xlakata klilakpuwa pi chatum lataman tlan namakgapaxuwa xMalakatsukina putum tuku anan. Chu kʼakgatekgsli pi Jehová wa kintlat tiku xakputsanit putum kilatamat.

Xakmakgapaxuwaputun kinTlat xalak akgapun chu xaktlawaputun xtalakaskin, pero akglhuwa kata la xakwa drogas chu kuchu. Kʼakgatekgsli tuku masiyalh Jesús anta kMateo 6:24, niku wan pi «Nila tiku skujni chatiy malana». Akxni xakliskujma naklakgpali la xaklin kilatamat, tastakyaw nema lichuwinan 1 Corintios 15:33 lu kimakgtayalh: «Katalalinkan tiku nitlan likatsikgo tlawa pi namakgxtakgaw xatlan talismanin». Kʼakgatekgsli pi nila xakmakgxtakgli tuku xaktlawa komo chuntiya xakalakgalh tiku xakkatalalilh. Xtastakyaw Biblia liwana xtaʼakgatekgsa: xtalakaskin lakapala tuku xaktlawalh xlakata xakkatamakgatlinilh tuku xkimakgchakgxnima (Mateo 5:30).

Xlakata lu xaklakgati tatlakgni lu tuwa kmakgkatsilh nakmakgxtakga heavy-metal. Pero, kimakgtayakgolh kiʼamigos xalak kcongregación chu tlan kkatamakgatlinilh. Kmakgxtakgli kuchu chu drogas, kchukulh kinchixit chu ktakgalhswikli chu nialh klhakganalh la xaklhakganan. Akxni kwanilh Sussan pi xakchukuputun kinchixit xla lu xkatsiputun tuku xlakata chu kiwanilh: «Naktanan ktamakxtumit. Kakxilhputun tuku tlawakan anta». Xla lu lakgatilh chu kaj ni makgas na tsukulh kgalhtawakga Biblia. Titaxtulh kilhtamaku ktamakgaxtokgwi chu kata 2008, kinchatiykan ktamunuw chu xtatayananin Jehová klitaxtuw. La uku kintse chu akinin xatapaxuwan kskujnanimaw Jehová.

TUKU TLAN KINKITAXTUNINIT: Ktsalaninit kilhtamaku nema ni limin tapaxuwan chu amigos tiku akgskgawinankgo. Chuntiya klakgati tatlakgni, pero la uku klaksaka tuku nakkgaxmata. Klimaklakaskin tuku ktitaxtunit xlakata nakkamakgtaya kifamilia chu amakgapitsi latamanin pero tiku tlakg kamakgtaya wa kamanan. Kkamakgtayaputun xlakata naʼakgatekgskgo pi maski lu tlan tasiya tuku malaknu kakilhtamaku, ni xaxlikana xlakata «la lhuwa palhma» litaxtu (Filipenses 3:8).

Xlakata ktalakatsuwininit Dios, kkatekgsnit amigos kcongregación tiku ni makgxtakgnankgo niku anan tapaxkit chu takaksni. Pero tuku tlakg lu tlan wa pi ktekgsli chatum tlat tiku lu xakkgalhiputun: Jehová.

[Nota nema wi kpágina]

[Tuku lichuwinan]

«Klakgtaspitli Jehová xlakata wa tlawalh pi naklakgmimpara»