Baibel i Save Senisim i Stap Bilong Man

WANEM samting i bin kirapim wanpela man long go bek long lotu em i kamap bikpela long en? Olsem wanem wanpela yangpela man i bin painim wanpela husat i kamap olsem papa bilong em? Ritim stori bilong ol dispela man.

“Mi mas i go bek long Jehova.”—ELIE KHALIL

YIA MI BON: 1976

KANTRI: SAIPRUS

BIPO: BIKHET NA LUSIM PAPAMAMA

LAIP BILONG MI LONG BIPO: Mama i karim mi long Saiprus, tasol mi kamap bikpela long Australia. Papamama i Witnes Bilong Jehova, na tupela i bin wok strong long skulim mi long laikim tru Jehova na tok bilong em long Baibel. Tasol taim mi kamap tineja mi kirap bikhet long tupela. Long nait mi save lusim haus isi isi na mi go bung wantaim ol narapela yangpela. Mipela i save stilim ol kar na mekim ol narapela pasin raskol.

Pastaim mi mekim hait ol dispela samting, nogut papamama i kros long mi. Tasol bihain mi no pret moa. Mi gat ol pren em krismas bilong ol i bikpela long mi na ol i no laikim Jehova, na ol i wok long paulim tingting na pasin bilong mi. Mi tokim papamama olsem mi no laik insait moa long lotu bilong ol. Long pasin isi tupela i laik helpim mi, tasol mi sakim ol gutpela tok ol i givim long mi. Bel bilong papamama i bagarap stret.

Taim mi lusim pinis haus bilong papamama, mi kirap long kisim ol drak, na mi planim planti mariwana na salim long ol man. Mi save slip nabaut wantaim ol meri na mi lusim bikpela haptaim long pati long ol klap. Na tu, mi kisim pasin bilong belhat kwik. Sapos man i mekim wanpela samting o wanpela tok mi no laikim, mi belhat nogut tru, na planti taim mi save singaut bikmaus long ol man na paitim ol. Mi mekim olgeta pasin em papamama i bin skulim mi olsem i no stret long ol Kristen i mekim.

BAIBEL I SENISIM I STAP BILONG MI: Mi kamap pren bilong wanpela man i save kisim drak, na taim em i liklik yet papa bilong em i dai. Planti taim mitupela i save toktok wantaim i go inap long biknait. Sampela taim em i tokaut long bel hevi bilong em long papa bilong em i bin dai. Mi save long tok bilong Baibel olsem ol man i dai pinis bai kirap bek, olsem na mi kirap tokim em long ol stori bilong Jisas—em i bin kirapim bek sampela man i dai pinis na em i tok promis long em bai mekim gen long bihain. (Jon 5:28, 29) Mi save tokim em: “Bihain yu inap lukim gen papa bilong yu. Yumi olgeta inap i stap oltaim oltaim long Paradais long graun.” Dispela tok i mekim gut tru bel bilong pren bilong mi.

 Sampela taim pren bilong mi i save kamapim ol askim long las de na God Triwan. Mi save kisim Baibel bilong em na soim em long sampela skripsa i kamapim klia tok i tru long God Jehova, Jisas, na taim bilong las de. (Jon 14:28; 2 Timoti 3:1-5) Taim mi wok long stori long pren bilong mi long Jehova, dispela i kirapim mi moa yet long tingim Jehova.

Ol tok i tru em papamama i bin planim long bel bilong mi, isi isi ol i kirap long gro. Olsem: Sampela taim mi stap long pati na mi kisim drak wantaim ol poroman bilong mi, na wantu mi kirap tingim Jehova. Planti poroman bilong mi ol i tok ol i save laikim tru God, tasol pasin bilong ol i no soim olsem. Mi no laik mekim dispela kain pasin, olsem na mi save long samting mi mas mekim. Mi mas i go bek long Jehova.

Tru, i no hatwok long save long ol samting yumi mas mekim, tasol bilong mekim olsem em i hatwok tru. Olsem, long mi i no bin hatwok long lusim drak. Na tu, mi lusim ol poroman bilong mi, na mi kirap stadi long Baibel wantaim wanpela elda Kristen.

Tasol i gat sampela pasin mi bin hatwok tru long senisim. Mi hatwok long daunim belhat bilong mi. Sampela taim mi save bosim gut bel, tasol bihain mi mekim gen dispela pasin. Taim mi mekim olsem, bel bilong mi i bagarap stret. Mi ting mi no inap winim dispela hevi. Mi bel hevi na mi go long dispela elda i stadi wantaim mi long Baibel. Long olgeta taim em i save mekim gutpela pasin isi na i no les kwik long mi, na em i strongim tru bel bilong mi. Wanpela taim em i tokim mi long ritim wanpela stori bilong Wastaua i tok olsem em i bikpela samting long yumi no ken les kwik na ting yumi no inap winim dispela samting. a Mipela i toktok long ol samting mi ken mekim taim mi belhat. Mi wok long tingim tok bilong dispela Wastaua na mi beten oltaim long Jehova, na isi isi mi inap bosim belhat bilong mi. Orait bihain, long Epril 2000, mi kisim baptais na kamap wanpela Witnes Bilong Jehova. Papamama i amamas tru.

GUTPELA SAMTING I PAINIM MI: Nau tingting na bel bilong mi i stap isi na i no kotim mi moa, long wanem, mi no wok moa long bagarapim skin long ol drak o pasin pamuk. Maski mi mekim wanem, olsem mi wok, stap long miting Kristen, o mi kisim sampela kain amamas, mi save stap amamas tru. Mi holim gutpela tingting long ol samting.

Mi tenkyu long Jehova long papamama bilong mi, em ol i no bin les na lusim mi. Na mi tingim tok bilong Jisas long Jon 6:44, i tok: “I no gat man inap kam long mi sapos Papa, husat i bin salim mi i kam, i no kirapim em long kam long mi.” Mi tenkyu tru long mi inap i go bek long Jehova, long wanem, em i bin kirapim mi long kam bek long em.

“Mi laik tru bai mi gat wanpela papa.”—MARCO ANTONIO ALVAREZ SOTO

YIA MI BON: 1977

KANTRI: SILI

BIPO: INSAIT LONG HEVI METAL BEN

 LAIP BILONG MI LONG BIPO: Mama i bin mekim bikpela long mi long Punta Arenas, em wanpela gutpela taun i stap long Strait of Magellan, klostu long poin daunbilo tru long Saut Amerika. Papamama i brukim marit taim mi gat 5-pela krismas, na mi pilim olsem ol i lusim mi na mi stap wanpis. Mi laik tru bai mi gat wanpela papa.

Mama i stadi long Baibel wantaim ol Witnes Bilong Jehova, na em i bin kisim mi i go long ol miting Kristen long Haus Kingdom. Tasol mi nolaik tru long go long ol miting, na taim mipela i go, planti taim mi save bikmaus na krai. Taim mi gat 13 krismas, mi lusim miting olgeta.

Long dispela taim mi gat bikpela laik long musik, na mi luksave olsem mi inap lain kwik long pilaim musik. Taim mi gat 15 krismas, mi pilaim hevi metal na hevi metal musik long ol bikpela bung, long ol ba, na long ol liklik bung. Mi poroman wantaim ol lain i save gut long pilaim musik, na dispela i kirapim mi long laikim klasikel musik. Mi kirap stadi long musik long wanpela bikpela skul bilong musik. Taim mi gat 20 krismas, mi go sindaun long nambawan biktaun, Santiago, bilong skul moa long musik. Na mi wok yet long pilaim hevi metal musik insait long ol ben.

Insait long dispela taim, mi pilim olsem laip bilong mi i no gat as bilong en. Bilong daunim dispela bel hevi, mi save dring spak na kisim drak wantaim ol narapela memba bilong ben, em mi tingim ol olsem famili bilong mi. Mi gat pasin bikhet, na dispela i kamap klia long lukluk bilong mi. Mi save pasim ol blakpela klos, larim mausgras i go longpela, na gras bilong mi i longpela i kam daun inap long bel bilong mi.

Pasin bilong mi i mekim na planti taim mi save pait wantaim ol man na ol polis i save raunim mi. Wanpela taim mi dring spak na mi go pait long wanpela lain bilong salim drak em ol i wok long sikirapim bel bilong mi na ol poroman bilong mi. Ol dispela lain i paitim mi nogut tru na brukim wasket bilong mi.

Tasol mi bin kisim bikpela pen moa taim mi painimaut olsem inap planti yia pinis gelpren bilong mi i wok long prenim bes pren bilong mi, na olgeta poroman i bin haitim dispela samting long mi. Bel bilong mi i bagarap stret.

Mi go bek long Punta Arenas, we mi kirap mekim wok bilong skulim ol man long musik na pilaim musik ol i kolim selo. Na mi wok yet long pilaim na rekodim hevi metal musik wantaim ol ben. Mi bungim wanpela naispela meri, nem bilong em Sussan, na mitupela i kirap sindaun wantaim. Bihain, Sussan i kisim save olsem mama bilong em i bilip long God Triwan na mi yet i no bilip long en. Em i askim mi: “So wanem tok i stret?” Mi tokim em, mi save dispela bilip long God Triwan i giaman, tasol mi no inap kamapim klia dispela long Baibel. Tasol mi save long wanpela lain husat inap mekim olsem. Mi tokim em, ol Witnes Bilong Jehova inap soim em long tok i tru bilong Baibel. Orait nau mi kirap mekim wanpela samting mi no bin mekim inap planti yia—mi beten askim God long helpim mi.

Sampela de bihain, mi lukim wanpela man mi ting bipo mi bin save long em, na mi askim em long em i wanpela Witnes Bilong Jehova. Em i kirap nogut long lukluk bilong mi, tasol long gutpela pasin em i bekim ol askim bilong mi long ol  samting bilong ol miting i save kamap long Haus Kingdom. Mi bilip tru olsem God i bin harim beten bilong mi na mi bin bungim dispela man. Mi go long Haus Kingdom na mi sindaun long baksait tru na bai ol man i no ken lukim mi. Tasol planti ol i luksave long mi, olsem mi bin kam long ol miting long taim mi pikinini yet. Ol i mekim gut long mi na holimpasim mi olsem ol i laikim mi tru, na mi pilim bikpela bel isi tru. I olsem mi kam bek long ples na famili bilong mi. Mi lukim dispela man bipo em i bin skulim mi long Baibel taim mi liklik yet, na mi askim em long stadi gen wantaim mi.

BAIBEL I SENISIM I STAP BILONG MI: Wanpela taim mi ritim Sindaun 27:11, em i tok: “Pikinini bilong mi, yu mas kisim gutpela tingting na save na bai mi belgut tru.” Mi kirap nogut long ting olsem wanpela man nating bilong graun inap amamasim bel bilong Man Bilong Wokim olgeta samting. Nau mi save, Jehova em dispela Papa mi bin wok long painim long laip olgeta bilong mi!

Mi laik amamasim Papa bilong mi long heven na mekim laik bilong em, tasol mi bin kalabus long kisim ol drak na dring inap planti yia pinis. Mi kisim save long tok bilong Jisas long Matyu 6:24, i tok “i no gat wanpela man inap stap wokboi bilong tupela bosman.” Mi wok strong long senisim pasin bilong mi, na stiatok i stap long 1 Korin 15:33 i sutim tru bel bilong mi, em i tok: “Ol poroman nogut i save bagarapim ol gutpela pasin bilong man.” Mi save mi no inap lusim ol pasin nogut bilong mi sapos mi wok long go yet long ol klap na bung wantaim ol man bipo mi bin poromanim ol. Tok bilong Baibel i klia: Mi mas taitim bun tru na lusim ol samting i mekim mi i pundaun.—Matyu 5:30.

Mi gat bikpela laik tru long musik na dispela i mekim na mi hatwok stret long lusim hevi metal musik na ben. Tasol ol pren bilong mi insait long kongrigesen i helpim mi, na bihain mi inap lusim dispela ben, pasin bilong dring planti, na kisim drak. Na tu, mi katim gras bilong mi, sevim mausgras, na mi lusim pasin bilong pasim ol blakpela klos tasol. Taim mi tokim Sussan olsem mi laik katim gras bilong mi, em i kirap nogut tru na i tok: “Mi bai go wantaim yu long Haus Kingdom na lukim wanem samting i save kamap long hap!” Em i laikim tru ol samting em i lukim, na i no longtaim na em tu i kirap stadi long Baibel. Bihain, mitupela Sussan i marit. Long 2008, mitupela i kisim baptais na kamap Witnes Bilong Jehova. Mipela i amamas long lotu long Jehova wantaim mama bilong mi.

GUTPELA SAMTING I PAINIM MI: Mi lusim pinis pasin bilong dispela graun i gat ol giaman amamas long en na ol poroman nogut. Mi laikim yet musik, tasol nau mi save skelim gut. Mi save kamapim stori bilong ol samting i bin painim mi bipo bilong helpim famili bilong mi na ol narapela, na moa yet ol yangpela. Mi laik helpim ol long save, planti samting bilong dispela graun i luk olsem ol i gutpela samting, tasol nogat, ol i “pipia nating” tasol.—Filipai 3:8.

Mi bin painim ol gutpela pren tru insait long kongrigesen Kristen, we i gat pasin laikim na bel isi i stap long en. Na bikpela samting tru, mi bin go klostu long Jehova, na long dispela rot mi painim pinis Papa bilong mi.

[Futnot]

[Rait long pes 13]

“Mi inap i go bek long Jehova, long wanem, em i bin kirapim mi long kam bek long em”