Baibolo Likusintha Umoyo wa Ŵanthu

NCHIVICI cikawovwira munthu munyake kuwelera ku cisopa ico wakaleka? Vikenda wuli kuti munthu uyo wakakhumbisiska kuwona awiske, wasange dada munyake? Ŵazgani ivyo ŵakuyowoya ŵanthu aŵa.

“Nkhawona kuti nchiwemi kuwelera kwa Yehova.”—ELIE KHALIL

CILIMIKA ICO WAKABABIKIRA: 1976

UKO WAKABABIKIRA: CYPRUS

IVYO WAKACITANGA: WAKAŴA MWANA WAKUZGEŴA

UMO NKHAŴIRA KALE: Nkhababikira ku Cyprus, kweni nkhakulira ku Australia. Ŵapapi ŵane Mbakaboni ŵa Yehova, ndipo ŵakanisambizga kutemwa Yehova na Mazgu ghake. Kweni nkhati naŵa munyamata, nkhamba kugaluka. Nkhagwenthanga usiku na kukakumana na ŵanyane. Tikibanga magalimoto na kujitaya mu masuzgo ghanandi.

Pakwamba nkhacitanga mwakubisa, kopa kukhuŵazga ŵapapi. Kweni pamanyuma wofi ukamara. Ŵabwezi ŵane ŵakaŵa ŵalara comene kwa ine. Ŵakamutemwanga yayi Yehova, ndipo nkhanangika cifukwa ca iwo. Nkhaphalira ŵapapi ŵane kuti naleka mpingo wawo. Ŵakayezga comene kunovwira, kweni nkhakanirathu. Cikaŵaŵinya comene.

Nkhati nafumapo pa nyumba, nkhamba kumwa na kukhweŵa minkhwala yakutimbanizga wongo. Nakuti nkhalimanga vyamba vinandi na kuguliska. Nkhaŵa muzaghali ndipo kanandi nkhaŵanga ku moŵa. Nkhaŵa wabefu, ndipo para munthu wanavya, nkhakwiyanga comene. Kanandi nkhakalipiranga ŵanthu na kuŵatimba. Nkhacitanga vyose ivyo nkhasambizgika kuti Mkhristu wakwenera yayi kucita.

UMO BAIBOLO LIKASINTHIRA UMOYO WANE: Nkhamba kutemwana na munyane uyo tikamweranga lumoza minkhwala. Awiske ŵakafwa apo wakaŵa mucoko comene. Kanandi tikacezganga mpaka usiku. Nyengo zinyake wakaniphaliranga vyakusingo. Wakatenge wakuŵakumbuka comene awiske. Pakuti ine nkhasambizgika vya ciwuka, nkhamba kumuphalira vya Yesu, kuti wakawuskanga ŵakufwa ndipo wakalayizga kuti wazamuwuskaso ŵanthu kunthazi. (Yohane 5:28, 29) Nyengo zinyake nkhatenge: “Iwe ungajipulika wuli usange ungawonanaso na awuso? Nakuti tose tingazakakhala pa caru capasi mu Paradiso kwamuyirayira.” Mazgu agha ghakamucontha comene munyane.

Nyengo zinyake munyane wakayowoyanga vya mazuŵa ghaumaliro panji vya cisambizgo ca Utatu. Nkhamujuliranga Malemba mu Baibolo lake kuti nimulongore umo likulongosolera  vya Yehova Ciuta, Yesu, na mazuŵa ghaumaliro. (Yohane 14:28; 2 Timote 3:1-5) Apo nkhamuphaliranga vya Yehova mubwezi wane, nane nkhamba kughanaghana comene vya Yehova.

Pacoko na pacoko, mbuto za unenesko izo ŵapapi ŵane ŵakapanda mwa ine zikamba kumera. Nyengo zinyake, para nkhumwa panji kukhweŵa minkhwala yakutimbanizga wongo na ŵanyane, nkhacilukiranga kuti nkhughanaghana vya Yehova. Ŵanyane ŵanandi ŵakatenge ŵakumutemwa Ciuta, kweni ivyo ŵakacitanga vikalongoranga kuti ŵakumutemwa yayi. Ine nkhawona kuti nchiwemi kusintha mwakuti nileke kuŵa nga ndiwo. Nkhawona kuti nchiwemi kuwelera kwa Yehova.

Nangauli nkhamanyanga kuti nkhwenera kuwelera kwa Yehova, kweni cikaŵa cipusu yayi kucita nthena. Vinyake vikaŵa vipusu kusintha, nga nkhuleka munkhwala wakutimbanizga wongo. Kweniso nkhaleka kwenda na ŵabwezi ŵane, ndipo nkhalomba mulara mu mpingo kuti wasambire nane Baibolo.

Kweni cikaŵa cinonono kusintha vinyake. Ico cikaŵa cakusuzga comene ni ukali. Nyengo zinyake nkhacitanga makora, kweni nyengo zinyake vikanisuzganga. Para vyanisuzga kujikora, citima cikanikoranga. Nkhawonanga nga nili wakutondeka comene. Nkhaphalira mulara uyo wakasambiranga nane Baibolo. Iyo wakaŵa wakuzika nyengo zose, ndipo wakanovwira comene. Nyengo yinyake wakaniphalira kuti nkhaŵazge nkhani mu Gongwe la Mulinda, iyo yikuyowoya kuti nchakuzirwa kuleka kugongowa. * Tikayowoyapo ivyo ningacita para nakwiya. Nkhani iyi, kweniso malurombo, vikanovwira comene kujikora para nakwiya. Mu Epulero 2000, nkhabapatizika na kuŵa yumoza wa Ŵakaboni ŵa Yehova. Ŵapapi ŵane ŵakakondwa comene.

UMO NASANGIRA CANDULO: Sono nili na mtende mu mtima, ndipo njuŵi yane yikunisuzga yayi, cifukwa nili kuleka kunanga thupi lane na vimunkhwala panji uzaghali. Sono nkhukondwa na vyose ivyo nkhucita ku nchito, ku mpingo, na para nkhusanguluka. Nkhuwona kuti umoyo nguwemi.

Nkhuwonga Yehova cifukwa ca kunipa ŵapapi ŵawemi awo ŵakanitaya yayi. Kweniso nkhumuwonga cifukwa ca mazgu gha Yesu agho ghali pa Yohane 6:44, ghakuti: “Palije munthu uyo wangiza kwa ine kwambura kuti Ŵadada, awo ŵakanituma, ŵamuguza.” Nkhukhozgeka comene para nkhughanaghana kuti nili kuwelera kwa iyo cifukwa cakuti wali kuniguza.

“Nkhakhumbanga comene kuŵa na dada.”—MARCO ANTONIO ALVAREZ SOTO

CILIMIKA ICO WAKABABIKIRA: 1977

UKO WAKABABIKIRA: CHILE

IVYO WAKACITANGA: WAKIMBANGA SUMU ZA DEATH-METAL

 UMO NKHAŴIRA KALE: Nkhakulira ku Punta Arenas, mu mugolonga wa Magellan ku South America. Nkhalereka na amama pera. Ŵapapi ŵakapatukana apo nkhaŵa na vilimika vinkhondi, ndipo nkhawona nga ŵanipata. Nkhakhumbanga comene kuŵa na dada.

Amama ŵakasambiranga Baibolo na Ŵakaboni ŵa Yehova, ndipo ŵakalutanga nane ku maungano gha mpingo. Kweni nkhakhumbanga yayi kuluta ku maungano, ndipo kanandi nkhasuzganga comene munthowa. Apo nkhaŵa na vilimika 13, nkhaleka kuyako.

Nyengo iyi nkhamba kutemwa sumu, ndipo nkhawona kuti nili na luso lwa kwimba. Apo nkhaŵa na vilimika 15, nkhaŵa mu gulu lakwimba sumu za heavy-metal na death-metal. Tikimbanga ku viphikiro, ku malo ghakumwerako moŵa na kunyake. Nkhacezganga na ŵanthu ŵaluso pakwimba, ntheura nkhamba kutemwa sumu za classical. Nkhamba kusambira sumu pa sukulu yapafupi. Apo nkhaŵa na vilimika 20, nkhasamira ku msumba ukuru wa Santiago kuti nkhalutizge masambiro ghane. Kweniso nkhalutilira kwimba na magulu ghakwimba sumu za heavy-metal na death-metal.

Nyengo yose iyi, nkhawonanga kuti umoyo wane ulije candulo. Kuti niluweko ivi, nkhaloŵeranga na kumwa munkhwala wakutimbanizga wongo pamoza na awo nkhimbanga nawo. Aŵa ndiwo nkhawonanga kuti mbabali ŵane. Nkhaŵa wakugaluka, ndipo nkhavwaranga vifipa pera na kusunga mwembe unandi. Sisi nalo likakura mpaka mu ciwuno.

Cifukwa ca mtima uwo nkhaŵa nawo, kanandi waka nkhambananga na ŵanthu, ndipo ŵapolisi ŵakanilekanga ca! Nyengo yinyake, nkhaloŵera, ndipo nkhawukira ŵanthu ŵakuguliska minkhwala yakutimbanizga wongo, cifukwa ŵakatisuzganga. Ŵakanitimba comene mwakuti ŵakaniphyora muskati.

Ndipouli, ico cikaniŵinya comene nchakuti msungwana uyo cikaŵa cibwezi cane wakaŵaso pa cibwezi na munyane uyo tikatemwananga comene. Kweni ŵabwezi ŵane wose ŵakanibisanga. Nkhakhuŵara comene.

Nkhaweleraso ku msumba wa Punta Arenas, ndipo nkhamba kusambizga sumu na kulizga cakwimbira cakucemeka cello. Kweniso nkhalutilira kwimba na magulu ghakwimba sumu za heavy-metal na death-metal. Nkhakumana na msungwana wakutowa zina lake Sussan, ndipo tikasomphorana. Pakati pajumpha nyengo, Sussan wakabowozga kuti anyina ŵakugomezga kuti kuli ŵaciuta ŵatatu, apo ine nkhugomezga yayi. Ntheura wakanifumba kuti, “Sono unenesko ni ngu?” Nkhamuzgora kuti ico nkhumanya nchakuti cisambizgo ca utatu nchautesi, kuti waka mavesi agho ghakuyowoya nthena nkhughamanya yayi. Kweni nkhamanya awo ŵangalongosora. Nkhamuphalira kuti Ŵakaboni ŵa Yehova ndiwo ŵangamulongosolera ivyo Baibolo likuyowoya pa nkhani iyi. Kufuma apo, nkhacita cinthu ico nkhaŵa nindacitepo kwa vilimika vinandi. Nkhalomba kwa Ciuta kuti wanovwire.

Pakati pajumpha mazuŵa ghacoko waka, nkhakumana na munthu uyo wakaŵa wacilendo viŵi yayi, ndipo nkhamufumba usange wakaŵa yumoza Ŵakaboni ŵa Yehova. Nangauli wakawoneka  wawofi cifukwa ca umo nkhawonekeranga, wakanizgora makora nkhati namufumba nyengo iyo ŵakwambira maungano ku Nyumba ya Ufumu. Nkhakhorwa kuti Ciuta wazgora lurombo lwane. Nkhaluta ku Nyumba ya Ufumu na kukhala kumanyuma comene kuti ŵanthu ŵaleke kuniwona. Ndipouli, ŵanandi ŵakanimanya cifukwa cakuti apo nkhaŵa mwana nkhalutanga ku maungano. Ŵakanipokelera makora na kunivumbatira, ndipo mtima wane ukakhazikika. Nkhaŵa nga nawelera ku nyumba. Nkhati nawona uyo wakanisambizganga Baibolo apo nkhaŵa mwana, nkhamupempha kuti wambeso kunisambizga.

UMO BAIBOLO LIKASINTHIRA UMOYO WANE: Zuŵa linyake, nkhaŵazga lemba la Zintharika 27:11, ilo likuti: “Mwana wane, khala wavinjeru na kukondwereska mtima wane.” Nkhakondwa comene kumanya kuti munthu wapasi nga ndine wangakondweska Mlengi wa vinthu vyose. Nkhamanya kuti Yehova ndiyo Dada uyo nkhapenjanga kwamba kale!

Nkhakhumbanga kukondweska Ŵadada ŵakucanya na kucita khumbo lawo, kweni nkhaŵa muzga wa minkhwala na moŵa kwa nyengo yitali comene. Nkhapulikiska fundo iyo Yesu wakayowoya pa Mateyu 6:24, yakuti “palije uyo wangateŵetera nga ni muzga wa ŵeneco ŵaŵiri.” Apo nkhayezganga kusintha nkharo yane, fundo iyo yili pa 1 Ŵakorinte 15:33 yikanikhwaska comene. Ni fundo yakuti: “Mendezgano ghaheni ghakunanga makhaliro ghawemi.” Nkhawona kuti ningasintha yayi usange nilutilirenge kwenda ku malo agho kukucitika vinthu viheni, na kucezga na ŵanthu awo ŵakucita vinthu ivi. Nkhapulikiska ico Baibolo likung’anamura: Nkhenera kucitapo kanthu kuti nileke vinthu ivyo vikanikhuŵazganga.—Mateyu 5:30.

Cikaŵa cinonono kuleka sumu za heavy-metal, cifukwa nkhazitemwanga comene. Kweni ŵabwezi ŵane mu mpingo ŵakanovwira. Nkhaleka kumwa moŵa mwakujumphizga, na minkhwala. Kweniso nkhameta sisi na mwembe, ndipo nkhaleka kuvwara vifipa pera. Nkhati naphalira Sussan kuti nkhukhumba kumeta sisi, wakanweka comene. Iyo wakati “Nilutenge namwe ku Nyumba ya Ufumu kuti nkhawone ivyo vikucitika.” Wakakondwa na ivyo wakawona ku Nyumba ya Ufumu, ndipo nayo wakamba kusambira Baibolo. Pamanyuma, iyo na ine tikalembeska nthengwa yithu. Mu 2008, tikabapatizika na kuŵa Ŵakaboni ŵa Yehova. Tose tili ŵakukondwa cifukwa tikuteŵetera Yehova pamoza na amama.

UMO NASANGIRA CANDULO: Napona ku caru ico kulije cimwemwe canadi kweniso ku ŵabwezi ŵautesi. Nicali kutemwa sumu, kweni nkhusankha. Ivyo vikanicitikira nkhuphalirako ŵabali ŵane na ŵanthu ŵanyake, comenecomene ŵanyamata na ŵasungwana, mwakuti ŵasambirepo kanthu. Nkhukhumba ŵamanye kuti vinthu ivyo vikucitika mu caru vingawoneka nga vikunozga, kweni unenesko ngwakuti “ni viswaswa pera.”—Ŵafilipi 3:8.

Mu mpingo, nasanga ŵabwezi ŵakugomezgeka, kweniso ndimo muli citemwa canadi na mtende. Kuluska vyose, sono nili pafupi na Yehova, ndipo iyo ni Dada uyo nkhapenjanga.

[Mazgu ghamusi]

[Mazgu Ghakukhozgera pa peji 13]

“Nili kuwelera kwa Yehova cifukwa ndiyo wali kuniguza.”