Jelontesbot skuxlejalik yuʼun te Biblia

¿BIN tijbot yoʼtan jtul winik yuʼun ya xchaʼsujt ta religión te yijkitayojix-ae? ¿Bin-utʼil jtul kerem la sta te tatil yak ta sleel-ae? Jkʼopontik te bin ya scholik kaʼiytike.

«Ya jkʼan ya sujton ta stojol-a te Jehová» (ELIE KHALIL)

AYIN TA: 1976

SLUMAL: CHIPRE

STALEL TA NAIL TAL: LOKʼ BAEL TA SNA

TE BIN YILEL JKUXLEJAL-A: Ayinon ta Chipre, pero chʼion ta Australia. Testigoetik te jmeʼ jtate, sok la spasik tulan yuʼun ya xchʼi te schʼuunel koʼtan ta stojol te Dios sok te Biblia. Te kʼalal jchʼielon-a bayal jajch jkʼaxuntaybey skʼop te jmeʼ jtate. Muken ya xlokʼon ta ajkʼabal sok ya kelkʼantik carro sok te kamigotak te pajal kaʼbilal soke, bayal la jchʼik jba ta kʼop.

Ta sjajchibal muken ya jpas-a yuʼun ma jkʼan ya kakʼbey smel yoʼtan te jmeʼ jtate, pero kʼunkʼun ma xiwonix ta spasel. Te kamigotak jaʼ toyolxan yaʼbilalik-a te bitʼil te joʼone sok ma kʼux ta yoʼtanik te Jehová. Jajch ta bolobel te jtalel ta skaj te jaʼ la jokinlanike. Ta jun buelta la kalbey te jmeʼ jtat te maʼyuk bin ya jkʼanix ta swenta te sreligionike. Manchukme la skʼan la skoltayonik, maba la jkʼan koltayel. Kʼax la smel yoʼtanik yuʼun.

Lokʼon bael ta jna sok jajch jtuuntes drogaetik. Jaʼnix jich ay la jtsʼun sok bayal la jchon te marihuana. Bayal machʼatik wayon sok ta spasel mulil-a, sok jteb ma spisil-ora ya xboon ta discoteca (kʼin). Jaʼnix jich, kʼax bayal ya xmajawanon-a. Oranax ya x-ilinon te kʼalal ay machʼa ay bin ya yalbon o ya spas te ma jmulane. Jteb ma spisil-ora ya kut o ya jmajtiklan. Jaʼ la jpas spisil te bin yakʼojbonik jnop te ma skʼan ya spas jtul j-abat yuʼun Dios.

¿BIN-UTʼIL LA SJELBON JKUXLEJAL TE BIBLIAE? Mero la kamigoin jtul kerem te bayal ya stuuntes droga sok te laj te spapa te kʼalal chʼinto-ae. Bayal buelta te kʼubul ajkʼabal ya xlaj koʼtankotik ta kʼop. Jaʼnix jich, bayal buelta la yalbon te bayal ya snaʼ te spapae. Te bitʼil ta jchʼinilto la jnop te ay chaʼkuxajel, jajch jcholbey yaʼiy te bayal machʼatik la schaʼkuxajtes te Jesuse sok te jichnix ya xbajt spas ta pajel chaʼbej (Juan 5:28, 29). Jich la kalbey: «Nopanax awaʼiy, yame awil yan buelta te apapae sok jpisiltik ya xjuʼ ya xkuxinotik ta nichimal kʼinal liʼ ta Balumilal». Kʼax la smulan te bin la kalbeye.

Jaʼnix jich, ay la sjojkʼoy ta swenta te slajibal kʼajkʼal, te oxeb dios te jun-nax ayik sok yantikxan temaetik. La kakʼbey yil textoetik ta sBiblia te ya yal te bin smelelil ta swenta te Jehová, te Jesús sok te slajibal kʼajkʼal (Juan 14:28; 2 Timoteo 3:1-5). Te kʼalal ya kalbey ta swenta Jehová te kamigoe, bayal ya xjul ta koʼtan te Jehová.

Kʼun ta kʼun, jajch ta chʼiel ta koʼtan te bin la yakʼbonik jnop ta Biblia te jmeʼ jtate. Ay baeltik te kʼalal ayon ta kʼin sok te kamigotak ta stuuntesel droga, ya xtal ta koʼtan te Jehová. Manchukme bayal kamigotak ya yalik te kʼux ta yoʼtanik te Diose, maba ya xchiknaj ta stalelik. Te bitʼil ma jkʼan te chaʼlam koʼtane, la jta ta nopel te ya skʼan ya xchaʼsujton ta stojol te Jehová.

Pero, ma jaʼuknax ya skʼan ya jnaʼtik te bin lek ta pasele, ya skʼan ya jpastik ta smelelil. Ay bintik ma wokol la kaʼiy spasel, jich bitʼil te ya kijkitay te droga, te kamigotak te ma lek stalelik sok te jajch jnop te Biblia sok jtul anciano.

Pero ay yantik te kʼax wokol la kaʼiy sjeltayel, jich bitʼil te kʼax ora ya x-ilinon. Aynix ya xjuʼ kuʼun skomel te kilinba, pero te kʼalal ma xjuʼ kuʼune, kʼax ma lek ya kaʼiy jba. Te kʼalal ma xjuʼix kuʼun la kaʼiy-ae, la kalbey te Testigo te ya snojpteson ta Biblia-ae. Ta swenta te slamalil yoʼtan sok te leknax te stalele, jaʼ la yakʼbon smukʼul koʼtan. Ta jun buelta la yalbon te akʼa jkʼopon jun artículo yuʼun te Atalaya te ya yalbey skʼoplal bin yuʼun ma skʼan ya jkom jbatik ta spasel tulan. * La kilbeytik skʼoplal bin ya xjuʼ ya jpas te kʼalal ya xjajch kilinba ya kaʼiye. Kʼunkʼun juʼ kuʼun skomel te kilinba te kʼalal la jkʼopon te Jehová sok ya jultes ta koʼtan te bin la jkʼopon ta Atalaya. Tey-abi, ta abril yuʼun te jaʼbil 2000 la kichʼ jaʼ bitʼil testigo yuʼun Jehová. Kʼax tseʼel yoʼtanik-a te jmeʼ jtate.

¿BINTIK LEKILAL JTAOJ YUʼUN? Ayix lamalkʼinal ya kaʼiy, lekix te bin ya yalbon te koʼtan, melel ma jtuuntesix droga sok ma jpasix mulwej. Chikan teme ayon ta aʼtel, ta tsoblej o ay bin ya jkʼases kʼajkʼal-a, tseʼelix koʼtan sok lekix ya kil te jkuxlejal.

Ya kalbey wokol te Jehová yuʼun te jmeʼ jtat, melel maʼyuk bin-ora la yalik te ma xlekubix te jtalele. Jaʼnix jich ya jnop te bin la yal te Jesús te ay ta Juan 6:44 te jich ya yal: «Mayuc machʼa ya xhuʼ ya xtal ta jtojol teme ma ba icʼbil tal yuʼun te Jtat te la sticonon tale». Mero ya yakʼbon stseʼelil koʼtan te sujton ta stojol te Jehová, ya jnaʼ te jaʼ la yikʼon sujtele.

«Ya jkʼan-a te ayuk jpapae» (MARCO ANTONIO ALVAREZ SOTO)

AYIN TA: 1977

SLUMAL: CHILE

STALEL TA NAIL TAL: YA STIJ MÚSICA TA JUN BANDA YUʼUN DEATH-METAL

TE BIN YILEL JKUXLEJAL-A: Jaʼ la schʼiteson te jmama ta Punta Arenas, ta jpam lum te ay ta estrecho de Magallanes, ta sur yuʼun te continente americano. La yijkitay sbaik te jmeʼ jtat te kʼalal joʼeb kaʼbilal-ae, ijkitaybil la kaʼiy jba. Ya jkʼan-a te ayuk jpapae.

Te jmama yak ta snopel-a te Biblia sok te testigoetik yuʼun Jehová sok ya yikʼon bael ta tsoblejetik-a. Pero kʼax ma jmulan bael-a, bayal buelta ya xjajchon ta ilinba ta olil be. Ma boonix ta tsoblejetik-a te kʼalal ayix 13 kaʼbilal-ae.

Ta yorail-abi ya jmulanix-a te música sok la kil te ya jnaʼ stijele. Te kʼalal ay 15 kaʼbilal-ae ya jtijix-a te música heavy-metal sok death-metal, ya jtij ta kʼinetik sok ta baretik. Jajch jokinlan te machʼatik ya snaʼik ta lek stijel te música, jich jajch jmulan te música te namey la yichʼikix tijele. Ochon ta escuela yuʼun música te ay ta jlumale. Te kʼalal 20 kaʼbilal-ae boon ta Santiago, te jaʼ capital yuʼun te jlumale, swenta ya jnopxan te musicae. Pero maba la kijkitay stijel te heavy-metal sok te death-metal.

Manchukme jich-abi, maʼyuk stseʼelil koʼtan-a. Swenta ya xchʼay-a te mel-oʼtan, ya kuchʼ trago sok ya jtuuntes droga-a sok te machʼatik ya jtij música te jich ya kiltiklan te bitʼil jfamilia. Maʼyuk machʼa ya kichʼ ta mukʼ-a, ya xchiknaj ta ilel ta swenta te bin kilele: spisil-ora ijkʼ te jkʼuʼ jpakʼ, najt kisim sok najt te stsotsel jol.

Te bitʼil ma lek jtalele bayal machʼa ya jmaj jba sok, jaʼ yuʼun, ay kʼop kuʼun sok te policía. Ta jun buelta, te machʼatik ya schonik droga ay bin chopol jajch yalbotik sok te kamigotak. Ta skaj te yakubenon-ae, jajch jmajtiklan, pero jaʼ tulanxan la smajonik te la swakʼbonik te yalanil kee.

Pero te bin kʼux-xan la kaʼiye, jaʼ te bin la spasbonik te machʼatik kʼuxik ta koʼtan. Ta jun buelta la jnaʼ stojol te bayal jaʼbil la sloʼlayon sok kamigo te jnoviae sok te maʼyuk bin la yalbonik te kamigotak manchukme snaʼojik-a. Kʼax bayal la jmel koʼtan.

Chaʼsujton ta Punta Arenas sok jajchon ta nojpteswanej ta stijel música sok jajch jtij te violonchelo. Jaʼnix jich ma la jkom jba ta spasel grabar te música heavy-metal sok death-metal. Ta yorail-abi la jnaʼbey sba jtul tʼujbil achʼix te Sussan sbiil, te jaʼ la kikʼ jba soke. Ta patil, te Sussan la snaʼ stojol te bin schʼuunoj te smamae; jaʼ te aylaj oxeb dios te jun-nax ayike, pero te joʼone ma jichuk jchʼuunoj, jaʼ yuʼun jich la sjojkʼoybon: «¿Bin-a te smelelile?». La kalbey te ma meleluk te ay oxeb dios te jun-nax ayike. Manchukme ma juʼ kuʼun yakʼbeyel yil ta Biblia, ya jnaʼ machʼa ya xjuʼ ya yakʼbey yil. La kalbey te jaʼ ya xjuʼ ya x-akʼbot yil ta Biblia yuʼun te testigoetik yuʼun Jehová. Tey-abi ay bin la jpas te bayalix jaʼbil ma jpasoj-ae: la jkʼopon te Dios ta skʼanbeyel koltayel.

Cheʼoxeb kʼajkʼal ta patil la kil jtul winik te jich yilel te ya jnaʼbey sbae sok la jojkʼoybey teme jaʼ testigo yuʼun Jehová. Manchukme la xiʼon ta swenta te bin kilele, leknax la sutbon te jojkʼoyeletik kuʼun ta swenta te tsoblejetik. Mero schʼuunoj koʼtan-a te jich la sutbon jkʼop te Diose. Boon ta sNail Tsoblej sok la jnajkan jba ta slajibal fila yuʼun maʼyuk machʼa ya yilon-a. Pero, bayal machʼatik la snaʼbonik jba, melel ya xkʼoon ta tsoblejetik-a te kʼalal chʼinonto-ae. Leknax la spatbonik koʼtan sok la smeyonik sok skʼuxul yoʼtanik, lamalnax kʼinal la kaʼiy. Jich la kaʼiy te chaʼsujton ta jna. Te kʼalal la kil te machʼa la snojpteson ta Biblia ta jchʼinilto, la kalbey te yakuk schaʼnojpteson.

¿BIN-UTʼIL LA SJELBON JKUXLEJAL TE BIBLIAE?: Ta jun buelta la jkʼopon te Proverbios 27:11 te jich ya yal: «Jnichʼan, ayuc me spʼijil awoʼtan, hich me yac awacʼ tseʼejinuc coʼtan». Chajpnax la kaʼiy-a te jtul jmulawil winik ya xjuʼ ya yakʼbey stseʼelil yoʼtan te Jpaswanej. Kʼot ta koʼtan te jaʼ te Jehová te lekil Tatil te yakon ta sleel-ae.

Koʼtanuk-a te lek ya yilon te jTat Jehová sok te ya jpas te skʼanojel yoʼtane, pero ta bayal jaʼbil bayal la jtuuntes droga sok la kuchʼ trago. Kʼot ta koʼtan te bin la yakʼ ta nopel te Jesús ta Mateo 6:24, te banti jich la yal: «Mayuc machʼa ya xhuʼ ya yacʼ sba ta aʼbatinel yuʼun cheb ajwaliletic». Te bin ya yal te 1 Corintios 15:33 bayal la skoltayon te kʼalal yakon ta spasel tulan ta sjeltayel-a te jkuxlejale: «Te machʼatic chopolic te ya sjoquinotic, ha ya sjimbotic te lequil costumbrehetic cuʼuntic». Kʼot ta koʼtan te maba ya xjuʼ ya jeltay jkuxlejal teme maba ya kijkitay te machʼatik kʼayemon ta sjokinel sok teme yato xboon ta lugaretik te banti kʼayemon ta bael-ae. Jamal chikan te bin ya yal te Bibliae: ya skʼan ya kijkitay spisil te bintik ya smakon ta yijkitayel te jpokoʼ kuxlejal (Mateo 5:30).

Ta skaj te bayal ya jmulan te música wokol la kaʼiy yijkitayel te heavy-metal. Pero, ta swenta te ay lekil kamigotak ta congregación, juʼ kuʼun yijkitayel. La kijkitay te uchʼ trago, te droga, la jsetʼ jol, la joch kisim sok ma jaʼukxanix la jlap ijkʼal kʼuʼul pakʼal. Te kʼalal la kalbey te Sussan te ya kakʼ ta setʼel te jole, chajpnax la yaʼiy-a, jaʼ yuʼun jich la yalbon: «Ya jokinat bael ta tsoblej, ya jkʼan ya kil bin ya spasik tey-a». Bayal la smulan sok jaʼnix jich jajch snop te Biblia. Ta patil nujpunotik, sok ta 2008 la kichʼkotik jaʼ jich bitʼil testigo yuʼun Jehová. Ta ora ini tseʼel koʼtantik ya x-abatinotik ta stojol te Jehová, jaʼnix jich sok te jmamae.

¿BINTIK LEKILAL JTAOJ YUʼUN? Maʼyukonix ta jun balumilal te banti ay stseʼelil yoʼtanik yilel sok te ay amigoetik te ya xloʼlaywanike. Yato jmulan te música, pero ta ora ini ya jtsaix ta lek. Ya jtuuntes te bin kʼax ta jkuxlejal yuʼun ya jkoltay te jfamilia sok yantik ants winiketik, kʼaxtoxan-a te jchʼieletike. Ya jkʼan te yakuk xkʼot ta yoʼtanik te spisil te bin ya sjapbotik te balumilal ini tʼujbil yilel, pero ta melel jaʼ jich ya xkʼot «bin utʼil cʼaʼpal» (Filipenses 3:8).

Te bitʼil nopol ayonix ta stojol te Jehová, jtaojix lekil kamigotak ta congregación te banti ay kʼuxul oʼtanil sok lamalkʼinal. Pero te machʼa kʼax mukʼ skʼoplal jtaojixe: jaʼ te Jehová, te jich ya kil bin-utʼil jTat te spisil-ora jleoj-ae.

[Nota]

[Xcholjel]

«Ya jnaʼ te jaʼ la yikʼon sujtel te Jehová»