Embimbiliya li Pongolola Omuenyo Womanu

NYE ca vetiya ulume umue oku tiukila vali vetavo lina a kulila? Umalẽhe umue ukuenje wa sanga ndati isia yocili a kala oku sandiliya vokuenda kuomuenyo waye? Tanga eci omanu vaco va popia.

“Nda sukilile oku tiuka ku Yehova.”—ELIE KHALIL

UNYAMO A CITIWA: 1976

KOFEKA A CITIWILA: CHIPRE

ULANDU WOMUENYO: OMÕLA OCISANDUI

OMUENYO WANGE KOSIMBU: Nda citiwila ko Chipre, pole, nda kulila kofeka yo Australia. Olonjali viange Olombangi Via Yehova, kuenda via likolisilako oku ndi kuatisa oku sola Yehova kuenda Ondaka yaye, Embimbiliya. Eci nda linga umalẽhe, nda fetika oku lekisa esino. Kovoteke nda enda oku tunda konjo vuyombeki oku ka lisanga lamalẽhe vakuavo. Tua enda oku nyana akãlu, loku linga ovina vikuavo vĩvi.

Kefetikilo nda enda oku linga ovina viaco vuyombeki omo liohele yoku sumuisa olonjali viange. Pole, vokuenda kuotembo sia kuatele vali ohele yoku ci linga. Nda kuata ukamba lomanu vana va kala akulu vange, vana ka va solele Yehova kuenje va ndi vetiya oku linga ovina vĩvi. Noke nda sapuila olonjali viange okuti si yongola vali oku tiamẽla ketavo liene. Ovo lepandi lialua va likolisilako oku ndi kuatisa, pole sia tavele kekuatiso liavo. Olonjali viange via sumuile calua.

Noke yoku tunda konjo, nda fetika oku sipa loku nyua olodroga, kuenda oku landisa calua odroga yimue yi tukuiwa hati, marijuana. Nda ambatele omuenyo umue uvĩ, kuenda nda endaenda kolonjo vioku nyua loku piluka kovoteke. Noke nda fetika oku kala ukuacinyeñohusa. Nda umue wa popia ondaka yimue ale wa linga cimue sia solele, ndu u leñuila komanu vakuavo ale ndu u tipula. Nda enda oku linga ovina viosi vĩvi nda longisiwile okuti ka vi likuata lomuenyo Wukristão.

NDOMO EMBIMBILIYA LIA PONGOLOLA OMUENYO WANGE: Nda kuata ukamba la umue wa endavo oku sipa, loku nyua olodroga okuti eci isiaye a fa wa kala umalẽhe. Tua enda oku sapela otembo yalua toke vekalasoko liuteke. Eteke limue kuteke, wa ndi sapuila ovina vialua viatiamẽla kesumuo liaye lioku fisa isiaye. Omo okuti nda kũlĩhĩle elavoko liepinduko, nda fetika oku u lomboluila ovina viatiamẽla ku Yesu, ndomo a pindula omanu kuenda ohuminyo yaye yoku ci linga vali kovaso yoloneke. (Yoano 5:28, 29) Ndo sapuila ndoco: “Sokolola oku mola vali isiove. Vosi yetu tu pondola oku kala otembo ka yi pui Voluali Luokaliye palo posi.” Ovina evi, via vetiya calua utima wekamba liange.

Eteke likuavo, ekamba liange lia fetika ombangulo yatiamẽla koloneke via sulako kuenda kelongiso lia Suku Umosi Muvatatu. Nda kuata Embimbiliya liaye, kuenje ndo lomboluila ovisonehua vialua vi situlula ocili catiamẽla ku Yehova Suku, ku Yesu, kuenda koloneke via sulako. (Yoano 14:28; 2 Timoteo 3:1-5) Osimbu nda kala oku u lomboluila catiamẽla ku Yehova, nda fetikavo oku sokolola Yehova.

Vokuenda kuotembo, ocili Cembimbiliya cina olonjali viange via ndi longisa, ca fetika oku kula vutima wange. Noke, olonjanja vimue eci tu enda lakamba vange kocipito cimue oku ka nyua loku sipa olodroga, ndi fetika oku sokolola catiamẽla ku Yehova. Valua pokati kakamba vange, va enda oku popia okuti va sole Suku, pole ovituwa viavo ka vi eci uvangi waco. Omo okuti sia yonguile oku lisoka lavo, nda limbuka eci nda sukilile oku linga. Nda sukilile oku tiuka ku Yehova.

Ocili okuti, oku kũlĩha eci o sukila oku linga kuenda oku linga ocina caco, ca litepa calua. Apongoloko amue a lelukile calua oku a linga. Nda liwekapo oku nyua loku sipa olodroga. Noke nda siapo akamba vange vosimbu, kuenje nda fetika oku lilongisa Embimbiliya lukulu umue wekongelo.

Apongoloko akuavo ka a lelukile oku a linga. Kokuange ca tĩlile calua oku likandangiya konyeño. Olonjanja vimue nda enda oku linga ovina viwa, pole noke ndi linga ovina vikuavo vĩvi. Nda enda oku sumua calua, loku sima okuti nda hongua enene. Lesumuo, nda sapela lukulu wekongelo una wa kala oku ndi longisa Embimbiliya. Lepandi kuenda ohenda wa enda oku ndi lembeleka. Eteke limue, wa ndi tuma oku tanga ocipama cimue Cutala Wondavululi ci lombolola esilivilo lioku yuvula oku tokoka. a Tua sapela ovina ndi sukila oku linga eci ndi kuata onyeño. Vokuenda kuotembo, lekuatiso liocipama caco, kuenda oku likutilila ku Yehova, nda fetika oku kandangiya onyeño yange. Noke kosãi ya Kupupu yunyamo wo 2000, nda papatisiwa kuenje nda linga Ombangi ya Yehova. Olonjali viange via ci sanjukila calua.

NDOMO NDA KUATISIWA: Cilo ndi kuete ombembua kuenda utima wa yela, loku kũlĩha okuti lalimue eteke ndi nyõla vali etimba liange lolodroga kuenda uvasi. Nda limbuka okuti oku enda enda kolohongele viekongelo, loku linga olomapalo, ci kuete esilivilo, momo ci ndi nenela esanju lialua. Cilo ndi kuete ovisimĩlo viwa viatiamẽla komuenyo.

Ngeca olopandu ku Yehova omo okuti olonjali viange lalimue eteke via liwekelepo oku ndi kuatisa. Ndi sokololavo olondaka via Yesu vi sangiwa kelivulu lia Yoano 6:44, vi popia hati: “Lomue o tẽla oku iya kokuange, te Isia wa numa u koka.” Eci ndi sokolola okuti, nda tẽla oku tiuka ku Yehova omo okuti eye wa ndi koka, ci ndi sanjuisa calua.

“Nda yonguile oku kuata isia.”—MARCO ANTONIO ALVAREZ SOTO

UNYAMO A CITIWA: 1977

KOFEKA A CITIWILA: CHILE

ULANDU WOMUENYO: WATIAMẼLELE KOCISOKO COLONJIMBI VI SIVAYA EVĨHO LUNGANGALA

OMUENYO WANGE KOSIMBU: Nda tekuiwa la ina yange ko Punta Arenas, volupale luo Estreito de Magalhães, ocipepi Lombuelo yo Amerika. Olonjali viange via litepa eci nda kuata anyamo atãlo, kuenje nda liyevele ndu okuti nda siala ulika. Nda yonguile oku kuata isia.

Ina yange wa kala oku lilongisa Embimbiliya Lolombangi Via Yehova, kuenje wa enda oku ndi ambata kolohongele Viakristão Vonjango Yusoma. Pole, nda suvukile calua olohongele viaco, kuenje olonjanja vimue nda enda oku kuata onyeño yoku enda kolohongele. Eci nda kuata 13 kanyamo, nda liwekapo oku endaenda kolohongele.

Vokuenda kuotembo yaco, nda fetika oku sola ovisikilo, kuenda nda limbuka okuti ñuete ongavelo yoku sika ovisikilo. Eci nda kuata 15 kanyamo, nda fetika oku sika kovipito, kolobare, kuenda kovisunji vikuavo ovisikilo vi tukuiwa hati, heavy-metal kuenda death-metal, vina vi sivaya evĩho lungangala. Ukamba nda kuatele lolonjimbi vikuavo via kemãla, wa ndi vetiya oku sola ovisikilo vi tukuiwa hati, músicas classica. Noke, nda fetika oku lilongisila Kosikola yimue yo pocitumãlo uloño woku sika ovisikilo. Eci nda kuata 20 kanyamo, nda ilukila kombala yo Santiago oco ndi mioñolole uloño wange woku sika. Handi vali, nda amamako oku sika ovisikilo vi tukuiwa hati, heavy-metal kuenda death-metal, vina vi sivaya evĩho lungangala.

Vokuenda kuotembo yaco, nda liyeva ndu okuti si kuete vali esilivilo. Oco ndi tulumũle esumuo liaco, nda fetika oku nyua calua evi vi koluisa loku sipa olodroga kumosi lakamba vange vana nda tendele ndepata liange. Nda kuata ocituwa cesino cina ca limbukiwila kekalo lietimba liange. Nda enda oku wala uwalo utekãva, loku yundisa olonjele, kuenda esinga liange lia lepele toke vombunda.

Vokuenda kuotembo, ocituwa cange ca fetika oku ndi vetiya oku liyaka lomanu kuenda oku kuata ovitangi lakuenje velombe. Eteke limue omo liuholua, nda liyaka locisoko cimue comanu vakuakulandisa olodroga, omo lioku tu sanumula lakamba vange. Vakuacisoko caco, va ndi veta calua toke eci va ndi teya olombanjo.

Akamba vange va enda oku vokiyavo evalo liange. Eteke limue, nda limbuka okuti ufeko una nda kala oku namulala laye, wa kalavo oku namulala vokuenda kuanyamo alua lekamba liange nda solele calua, kuenda akamba vange vosi va ndi limbika ondaka yaco. Nda sumuile calua.

Noke nda tiukila ko Punta Arenas, kuna nda fetika oku longisa omanu uloño woku sika ovisikilo kuenda nda kala ukuakusika o viyola. Nda amamako oku sika ovisikilo vi tukuiwa hati, heavy-metal kuenda death-metal, vina vi sivaya evĩho lungangala. Nda kũlĩha ufeko umue wa fina calua, o tukuiwa hati, Sussan, kuenda tua kala kumosi ndaño ka tua tokekisile olohuela. Noke, Sussan wa limbuka okuti inaye wa kolelele kelongiso lia Suku Umosi Muvatatu, pole ame sia tavele kelongiso liaco. Eye wa ndi pula hati: “Oco hẽ, cipi ocili caco?” Ndo tambulula okuti elongiso lia Suku Umosi Muvatatu, liuhembi, ndaño okuti si tẽla oku eca uvangi waco Lembimbiliya. Pole, nda kũlĩha u o pondola oku eca uvangi waco. Ndo sapuila okuti Olombangi Via Yehova vi pondola oku ku lekisa ocili caco Vembimbiliya. Noke nda linga ocina cimue sia lingile vokuenda kuanyamo alua, okuti oku likutilila ku Suku oku pinga ekuatiso.

Eci papita oloneke vimue, nda mola ulume umue okuti ocipala caye ca kala ndu okuti ndo kũlĩha, kuenje ndo pula nda Ombangi ya Yehova. Ndaño okuti ocipala cange ca molẽhele ndu okuti ndi ngangala, pole, wa tambulula locisola apulilo ange atiamẽla kolohongele Vonjango Yusoma. Nda limbuka okuti eñualẽhelo lietu lia kala etambululo liohutililo yange. Nda endele kohongele Vonjango Yusoma, kuenje nda tumãla komangu yo konyima oco si ka muiwe lomanu valua. Pole, omanu valua va ndi limbuka, momo eci nda kala omõla nda endaenda kolohongele. Ovo va ndi yolela ciwa loku ndi kuata kapepe locisola, kuenje nda yeva ombembua yovutima. Ca kala ndu okuti nda tiuka konjo. Eci nda mola ulume una wa ndi longisa Embimbiliya vutila, ndo pinga oco a ndi longise vali Embimbiliya.

NDOMO EMBIMBILIYA LIA PONGOLOLA OMUENYO WANGE: Eteke limue nda tanga elivulu Liolosapo 27:11, li popia hati: “Kuata olondunge amõlange, sanjuisa utima wange.” Oku kũlĩha okuti omunu waño o pondola oku sanjuisa Ululiki woluali luosi, ca ndi komõhisa calua. Omo liaco, nda limbuka okuti Yehova wa kala Isia yocili una nda sandiliya oku kuata komuenyo wange!

Nda yonguile oku sanjuisa Isiange wo kilu, loku linga ocipango caye, pole vokuenda kuanyamo alua nda yapuisiwa lolodroga kuenda ovina vikuavo vi koluisa. Nda fetika oku kuata elomboloko liolondaka via Yesu vi sangiwa kelivulu lia Mateo 6:24, vi popia hati, “lomue o tẽla oku vumba vacime vavali.” Osimbu nda kala oku likolisilako oku linga apongoloko, onumbi yi sangiwa kelivulu lia 1 va Korindo 15:33, ya ndi vetiya calua, yi popia hati: “Akamba vãvi va nyõla ovituwa viwa.” Nda limbuka okuti, nda nda amamako oku enda kovitumãlo viaco, loku kuata ukamba lomanu vakuavituwa vĩvi, si tẽla oku yuvula ovituwa viaco. Elungulo Liembimbiliya lia popia hati: Ndi sukila oku yuvula ovina viosi vi ndi kokela ocilondokua.—Mateo 5:30.

Ocisola nda kuatela ovisikilo vi tukuiwa hati, heavy-metal, ca tĩlile calua oku ci siapo. Pole, lekuatiso liakamba vange vekongelo, nda tẽla oku ci siapo. Nda liwekapo oku nyua calua evi vi koluisa kuenda olodroga. Handi vali, nda teta esinga liange, lolonjele, kuenda nda siapo oku wala lika uwalo utekãva. Eci nda sapuila Sussan okuti ndi yongola oku teta esinga liange, wa yonguile oku kũlĩha eci nda enda oku linga Vonjango Yusoma. Eye wa popia hati: “Ngenda love Konjango Yusoma oco ndi ka mole eci va siata oku lingamo!” Eye wa sola ovina a mola, kuenje wa fetikavo oku lilongisa Embimbiliya. Noke ame la Sussan tua tokekisa olohuela vietu. Kunyamo wo 2008, tua papatisiwa, kuenje tua linga Olombangi Via Yehova. Tua sanjuka calua omo lioku fendela Yehova kumue la ina yange.

NDOMO NDA KUATISIWA: Nda puluka koluali lulo ka lu kuete esanju liocili, kuenda kakamba vesanda. Toke cilo, ndi sole ovisikilo, pole, nda siata oku nõla evi viwa. Ulandu wange nda siata oku kuatisa lawo epata liange kuenda omanu vakuavo, ca piãla enene amalẽhe. Ndi yongola oku va kuatisa oku limbuka okuti, ovina viosi violuali lulo ndaño vi moleha ndu okuti viwa, pole, kesulilo vi kala “ndovipelekese.”—Va Filipoi 3:8.

Cilo ndi kuete akamba vocili vekongelo, muna muli ocisola kuenda ombembua. Handi vali, omo lioku kuata ukamba la Yehova, nda sanga Isia yange.

[Etosi Pombuelo Yemẽla]

 [Etosi a Velapo kemẽla 13]

“Nda tẽla oku tiuka ku Yehova omo okuti eye wa ndi koka”