An Biblia Nakakagbag-o han Kinabuhi

ANO an nakaaghat ha usa nga lalaki nga bumalik ha iya ginmat-an nga relihiyon? Ha ano nga paagi nabilngan han usa nga batan-on an maiha na niya nga ginhiningyap nga gugma hin usa nga amay? Tagda an ira eksperyensya.

“Kinahanglan Ko Bumalik kan Jehova.”—ELIE KHALIL

NATAWO: 1976

NATAWHAN NGA NASUD: CYPRUS

PAGKINABUHI HADTO: REBELDE NGA ANAK

NAGLABAY: Natawo ako ha Cyprus kondi nagdaku ha Australia. Mga Saksi ni Jehova an akon mga kag-anak, ngan ginhimo nira an ngatanan basi higugmaon ko hi Jehova ngan an iya Pulong, an Biblia. Kondi han magtin-edyer na ako, nagtikang ako pagrebelde. Ha gab-i, naeskapo ako ha balay basi makigkita ha iba nga tin-edyer. Nagka-carnap kami ngan nakikigrambol.

Ha tinikangan, igintatago ko ito ha akon mga kag-anak kay nahadlok ako nga mag-isog hira. Kondi hinay-hinay nga nawara ito nga kahadlok. Nagkaada ako kasangkayan nga magurang ha akon nga diri nahigugma kan Jehova, ngan nagin maraot hira nga impluwensya ha akon. Paglabay han panahon, ginsidngan ko an akon mga kag-anak nga nadiri na ako han ira relihiyon. Mapailubon nga ginbuligan nira ako, kondi waray ko karawta an ira pangalimbasog salit nasubo gud hira.

Pagbaya ha balay, nagdroga ako, nagtanom ngan nagbaligya pa ngani hin marijuana. Nagin imoral ako, agsob ha mga night club, ngan nagin supokado liwat. Kon an usa may nayakan o nabuhat nga diri ko karuyag, nabuto dayon ako ha kasina. Kasagaran nga nan-guguliat ako ngan nangangastigo. Aw, ngatanan nga akon ginbuhat kabaliktaran han igintutdo ha akon sugad nga Kristiano.

KON PAONAN-O NABAG-O HAN BIBLIA AN AKON KINABUHI: Nagin duok ko nga sangkay an usa liwat nga adik nga nailo ha amay han bata pa hiya. Agsob kami abotan ha katutnga han gab-i ha pag-inistorya, ngan may mga higayon nga nagsusumat hiya nga namimingaw hiya ha iya tatay. Tungod kay nagtubo ako nga maaram han paglaom nga pagkabanhaw, ginsumatan ko hiya nga nanbanhaw hi Jesus hin mga patay ngan nagsaad nga bubuhaton niya ito utro. (Juan 5:28, 29) “Hunahunaa la, makikita mo utro an imo tatay,” siring ko. “Kita ngatanan mahimo mabuhi ha Paraiso nga tuna ha waray kataposan,” ngan nabantad gud hiya hito.

May mga panahon liwat nga naistoryahan namon an mahitungod han kataposan nga mga  adlaw o han doktrina han Trinidad. Gin-gagamit ko an iya Biblia basi ipakita an mga teksto nga naghahayag han kamatuoran mahitungod kan Jehova nga Dios, kan Jesus, ngan han kataposan nga mga adlaw. (Juan 14:28; 2 Timoteo 3:1-5) Samtang mas agsob nga nag-iinistorya ako mahitungod kan Jehova, nagigin mas agsob liwat an akon paghinunahuna ha iya.

Hinay-hinay nga an binhi han kamatuoran han Biblia—nga ginpangalimbasogan itanom han akon mga kag-anak—nagtikang tumubo. Pananglitan, han nagdudroga kami nga magbabarkada ha usa nga party, tigda ko la nahunahuna hi Jehova. Damu han akon barkada an nasiring nga hinigugma nira an Dios, kondi kabaliktaran an ira ginbubuhat. Diri ko karuyag mapariho ha ira, nahunahuna ko nga may-ada ako sadang buhaton, kinahanglan ko bumalik kan Jehova.

Oo, maaram ako han sadang ko buhaton, pero diri ito sugad kasayon. Masayon bag-uhon an pipira nga butang; inundang ako ha pagdroga ngan binulag ha barkada. Nagtikang liwat ako pag-aram han Biblia ha bulig hin tigurang.

Kondi, nakurian ako ha pagkontrol han akon kasina. Usahay nakukontrol ko ito, pero diri nag-iiha nabuto la gihap ako ha kasina. Nasusubo ako ngan nakakaghunahuna nga diri gud ada ako makakagbag-o. Salit, nakiistorya ako ha tigurang nga nagdudumara ha akon hin pag-aram. Mapinairon hiya ngan waray umundang ha pagbulig ha akon. Makausa iya ako ginpabasa hin artikulo ha Barantayan mahitungod han bili han diri pag-undang. * Gin-istoryahan namon an mahimo ko buhaton kon nasisina ako. Ha bulig hito nga artikulo ngan ha pag-ampo kan Jehova, hinay-hinay nga nakontrol ko an akon kasina. Ha kataposan, han Abril 2000 nabawtismohan ako sugad nga usa han mga Saksi ni Jehova. Syempre pa, nalipay gud an akon mga kag-anak!

MGA KAOPAYAN NGA AKON NAPAHIMULSAN: Yana, murayaw na an akon hunahuna ngan limpyo an akon konsensya kay diri ko na ginhuhugawan an akon lawas pinaagi han droga ngan imoralidad. Anoman an akon ginbubuhat—nagtatrabaho, natambong hin katirok, o nagpapahalibway—mas malipayon na ako. Positibo na liwat an akon disposisyon ha kinabuhi.

Nagpapasalamat gud ako kan Jehova ha pagkaada mga kag-anak nga waray umundang ha pagbulig ha akon. Nahihinumdoman ko liwat an ginsiring ni Jesus ha Juan 6:44: “Waray usa nga sadang makakanhi ha akon, kon diri pagdad-on han Amay nga nagpakanhi ha akon.” Nalilipay ako ha paghunahuna nga nakabalik ako kan Jehova tungod kay iya ako iginpahirani ha iya.

 “Naghingyap Ako han Gugma hin Usa nga Amay.”—MARCO ANTONIO ALVAREZ SOTO

NATAWO: 1977

NATAWHAN NGA NASUD: CHILE

PAGKINABUHI HADTO: MEMBRO HIN DEATH-METAL NGA BANDA

NAGLABAY: Ginpadaku ako han akon nanay ha Punta Arenas, usa nga makaruruyag nga syudad ha Strait of Magellan hirani ha durho han sur han Amerika del Sur. Nagbulag an akon mga kag-anak han singko anyos ako salit naghingyap ako han gugma hin usa nga amay.

Nag-aram hi Nanay han Biblia upod han mga Saksi ni Jehova ngan gin-uupod niya ako ha mga katirok ha Kingdom Hall. Pero nadiri ako pagtambong salit agsob ako mag-inalburoto samtang tipakadto ha katirok. Han 13 anyos ako, inundang na ako pagtambong.

Hito nga panahon nagkainteres ako ha musika, ngan nasantop ko nga may talent ako hito. Han 15 anyos ako, nagtutokar na ako hin heavy-metal ngan death-metal nga mga musika ha mga piyesta, bar, ngan party. Tungod kay talented an akon mga kaupod-upod, nagkainteres ako ha klasikal nga musika ngan nag-eskwela hin music ha conservatory ha amon lugar. Ha edad nga 20, binalhin ako ha Santiago nga kapital han Chile basi kumuha hin dugang nga kahibaro ha musika. Iginpadayon ko liwat an pagtokar ha heavy-metal ngan death-metal nga mga banda.

Bisan pa hini ngatanan, para ha akon waray pulos an akon kinabuhi. Basi mawara ito nga pag-abat, naghuhubog ako ngan nagdudroga upod han amon banda nga gintatagad ko sugad nga pamilya. Rebelyoso ako, ngan nakikita gud ito ha akon hitsura. Pirme ako nakaitom hin T-shirt, bunguton, ngan haros tubtob ha hawak an akon buhok.

Tungod han akon pamatasan, pirme ako iginkakaaway ngan nagkakaproblema ha kapulisan. Makausa han mahubog ako, ginkadto ko an grupo han drug dealer nga nagsinamok ha amon nga magbabarkada. Ginkastigo nira ako salit nadaot an akon pangá.

Kondi an pinakamasakit ha akon amo an paghibaro nga may maiha na nga relasyon an akon uyab ngan an akon bestfriend; pero waray ito isumat ha akon han akon mga sangkay. Sugad hin nahugno gud ako.

Bumalik ako ha Punta Arenas, diin nagtutdo ako hin music ngan nagin paratokar hin cello. Nagpadayon liwat ako pagtokar ngan pagrekord kaupod hin heavy-metal ngan death-metal nga mga banda. Waray pag-iha nakilala ko hi Sussan, mahusay hiya ngan nag-live-in kami. Makausa hinbaroan niya nga natoo an iya nanay ha doktrina han Trinidad nga diri ko gintotoohan. Nagpakiana hiya, “Ano man an tinuod?” Binaton ako nga maaram ako nga diri husto ito nga doktrina kondi diri ko ito mapapamatud-an ha Biblia. Pero maaram ako kon hin-o an makakagpamatuod nga buwa ito. Ginsidngan ko hiya nga maipapakita han mga Saksi an kamatuoran tikang ha Biblia. Katapos nag-ampo ako ha Dios para hin bulig—usa nga butang nga waray ko na himoa ha sulod hin damu ka tuig.

Paglabay hin pipira ka adlaw, nakakita ako hin usa nga lalaki nga pamilyar ha akon, ginpakianhan ko hiya kon Saksi hiya. Bisan kon ginkulba tungod han akon hitsura, ginbaton niya an akon mga pakiana may kalabotan ha mga katirok ha Kingdom Hall. Kombinsido ako nga baton ini ha akon pag-ampo. Kumadto ako ha Kingdom Hall ngan liningkod ha kataposan nga rumbay han mga lingkoran basi waray makakilala ha akon.  Pero damu an nakakilala ha akon. Nahinumdoman nira nga natambong ako han bata pa ako. Gin-abiabi nira ako ngan ginhangkopan salit nagin murayaw ako. Sugad hin inuli ako ha akon kalugaringon nga balay. Han hikit-an ko an lalaki nga nagdumara hin pag-aram ha Biblia ha akon han bata pa ako, ginhangyo ko hiya nga tutdoan utro ako.

KON PAONAN-O NABAG-O HAN BIBLIA AN AKON KINABUHI: Makausa, nabasa ko an Proberbios 27:11 nga nasiring: “Anak ko, pagmakinaadmananon, ngan himoa an akon kasingkasing nga malipayon.” Nabantad ako ha paghunahuna nga mapapalipay ngay-an han minos nga tawo an Maglalarang han uniberso. Dida hito nasantop ko nga hi Jehova an Amay nga maiha ko na nga ginhiningyap!

Karuyag ko mapalipay an akon langitnon nga Amay ngan buhaton an iya kaburut-on, pero maiha na ako nga uripon han droga ngan de-alkohol nga irimnon. Nasantop ko an igintutdo ni Jesus ha Mateo 6:24 nga “waray tawo nga makakagmangno hin duha nga agaron.” Samtang nangangalimbasog ako magbag-o, an prinsipyo ha 1 Korinto 15:33 nga “an magraot nga kaupod nakakadaot han maopay nga pamatasan” nakabantad ha akon. Nahunahuna ko nga diri ako makakaundang ha akon mga bisyo kon makadto la gihap ako ha mga lugar nga akon gin-iistambayan hadto ngan makikig-upod ha amo la gihap nga mga tawo. Matin-aw an sagdon han Biblia: Kinahanglan ko maghimo hin daku nga mga pagbag-o basi makagawas ha mga butang nga nakakapakdol ha akon.—Mateo 5:30.

Tungod han akon hilig ha musika, an pag-undang ha pagtokar hin heavy-metal an nagin pinakamakuri nga desisyon para ha akon. Pero ha bulig han akon mga sangkay ha kongregasyon, naglampos ako. Inundang ako ha paghinubog ngan pagdroga. Nagpaarot ako, nagtusar, ngan diri na pirme nakaitom. Han ginsumatan ko hi Sussan nga magpapaarot na ako, napausa hiya. “Maupod ako ha imo ha Kingdom Hall basi hibaroan ko kon nag-aano kamo didto!” siring niya. Nalipay hiya han iya nakita ngan waray pag-iha nagtikang pag-aram han Biblia. Ha urhi, nagpakasal kami ngan han 2008 nabawtismohan sugad nga mga Saksi ni Jehova. Nalilipay gud kami nga makaupod hi Nanay ha pagsingba kan Jehova.

MGA KAOPAYAN NGA AKON NAPAHIMULSAN: Nakagawas na ako ha kalibotan nga hamabaw an kalipay ngan diri tangkod an mga kaupod. Mahilig la gihap ako ha musika, kondi namimili na ako yana. Basi makapahimulos an akon pamilya ngan an iba, labi na an mga batan-on, iginsusumat ko ha ira an akon eksperyensya. Karuyag ko makita nira nga bisan kon baga hin makaruruyag pagkit-on, “sighot” an igintatanyag hini nga kalibotan.—Filipos 3:8.

Nakabiling ako hin maunungon nga kasangkayan ha Kristiano nga kongregasyon, diin may-ada tinuod nga gugma ngan kamurayawan. Labaw ha ngatanan, pinaagi han pagin duok kan Jehova, nabilngan ko an akon Amay.

[Footnote]

[Blurb ha pahina 13]

“Nakabalik ako kan Jehova tungod kay iya ako iginpahirani ha iya”