Baibulo Jikusachenga Umi wa Ŵandu

ANA chichi chachamkamuchisye mundu jwine kutandilasoni kukulupilila yajikusajiganya Baibulo? Ana jwachinyamata jwine jwapatile uli babagwe ŵachinonyelo ŵaŵasachililaga kutandila ali mwanache? Aŵalanje nganiji kuti apikane yaŵaŵechete ŵanduŵa.

“Namanyilile kuti ngusosekwa kuwujila kwa Yehofa.”​—ELIE KHALIL

CHAKA CHAKUPAGWA: 1976

CHILAMBO: CYPRUS

PANDANDA: NALIJI MWANACHE JWAMSOKONECHELE

KALA KANGU: Napagwile ku Cyprus nambo nakulile ku Australia. Achinangolo ŵangu ŵaliji wa Mboni sya Yehofa. Mwamti ŵanjiganyisye Maloŵe ga Mlungu soni kuti namnonyeleje Jwalakwe. Panakusile panandi natandite kuyiŵenga yaŵanjiganyisye achinangolo ŵangu. Mwamti chilo nakopokaga mnyumba nikwawulaga kukwiŵa magalimoto ni achimjangu. Yeleyi yatutendekasyaga kuti tusimaneje ni yakusawusya yejinji.

Pandanda natendaga yeleyi mwakusisa pakogopa kuti achinangolo ŵangu ngasangalala nayo. Nambo kaneko woga ŵamalile. Natandite kunguluka ni achakulungwakulungwa ŵele nganamnonyelaga Yehofa. Ligongo lya yeleyi natandite kutenda yindu yakusakala. Kaneko nasalile achinangolo ŵangu kuti ndesile dini jawo. Achinangoloŵa ŵalinjilile kungamuchisya mwachinonyelo nambo nakanile. Yeleyi yatumbilikasisye mnope.

Ndili ndyosile pamlango wa achinangolo ŵangu, natandite kukamulichisya mitela jakusokonasya mtwe. Natanditesoni kulima chamba ni kusumisya. Nayikene pakutanda kusimanikwa ku bala ni kutendaga yindu ya yachiwelewele. Mwamti najanguyaga kupya mtima. Naga jwine andendele yindu kapena kumbechetela yangasangalasya, napyaga mtima soni namlalatilaga mnope mwinesoni kwikana pakumputa. Kuŵecheta yisyene natendaga yindu yanganinjiganyidwa.

YAJATITE BAIBULO PAKUCHENGA UMI WANGU: Natandite kukunguluka ni mundu jwine jwele jujwakamulichisyagasoni masengo mitela jakusokonasya mtwe. Munduju babagwe ŵawile jwalakwe ali mwanache. Mwamti twakungulukaga yalumo mpaka chilo soni ŵasalilaga kuti ŵasoŵile baba wawo. Pakuŵa naliji ndili nalijiganyisye yakuti ŵawe chachijimuka, kaneko natandite kumsalila mjanguju kuti Yesu ŵajimusyaga ŵandu ŵawe mwamti jwalakwe ŵaŵechete kuti kusogoloku chachajimusyasoni ŵandu ŵaŵawile. (Yohane 5:28, 29) Namsalile kuti “Mganichisye baba ŵenu ali ajimwiche kuŵawe nikuŵasoni ni umi. Ŵosope ni umi ŵangamala mpaladaiso.” Yosope yinamsalile mjanguju yamkwayiye mumtima.

Ndaŵi sine mjanguju jwasalaga ya masiku gambesi nambosoni yakwayana ni chijiganyo cha utatu. Najigalaga Baibulo jakwe ni kumlosyaga malemba gagasalaga yisyesyene yakwamba Yehofa Mlungu, Yesu, soni ya masiku gakumalisya. (Yohane 14:28; 2 Timoteo 3:1-5) Kumsalila mjanguju yakwamba Yehofa, kwandendekasyaga kuti nganichisyeje mnope ya Yehofa.

Mwapanandipanandi usyesyene wa m’Baibulo waŵanjiganyisye achinangolo ŵangu watandite kukula munganisyo mwangu. Mwachisyasyo pandaŵi jinaŵaga kuyisangalalo nachimijangu nikumwaga mitela jakusokonasya mtwe, nagamba kusisimuka kuti nguganichisya yakwamba Yehofa. Achimjanguŵa ŵatiga akusamnonyela Mlungu nambo ndamo syawo nganisiŵa syambone. Nganisakaga kuŵa mpela jemanjajo. Mmalo mwakwe nasosekwaga kuwujila kwa Yehofa.

Nambope kumanyilila yangusosekwa kutenda kuli kwakulekangana ni kuyitenda yinduyo. Yindu yine yaliji yangasawusya kuyileka kutenda. Nalesilesoni kukunguluka ni achimjangu ŵala ni kutandilasoni kulijiganya Baibulo ni jwamkulungwa jwa mumpingo wa Chiklistu.

Nambope papali yindu yine yayaliji yakusawusya kuyileka. Mwachisyasyo kuleka kupya mtima. Ndaŵi sine yakombolekaga kuŵa jwakuwusimana mtima nambo ndaŵi sine yaŵaga yakusawusya. Yeleyi nganiyisangalasyaga mwamti naliwonaga kuŵa jwakulepela. Nasalile ŵaŵanjiganyaga Baibulo kuti angamuchisyeje. Mwakuwusimana mtima soni mwachinonyelo ŵalimbikasyaga. Line lisiku ŵambalanjile ngani ja mu Sanja ja Mlonda jajasalaga umbone wa ungawujila munyuma. * Twakambilene yampaka yingamuchisye pambile mtima. Mwapanandipanandi aku ndili mkuganichisya yanaŵalasile yila soni ndili mkupopela kwa Yehofa nakwanisye kumalana ni kupya mtima kula. Mwamti nabatisidwe mu 2000 mwesi wa Epulo, nikuŵa jwa Mboni sya Yehofa. Kusala yisyene achinangolo ŵangu ŵasangalele mnope.

UMBONE WAMBATILE: Sambano ngwete mtendele wa mumtima soni ngwete chikumbumtima cheswela ligongo ngusamanyilila kuti nalesile kuchisakasya chilu changuni mitela ja kusokonasya mtwe soni ndamo syakusakala. Apanopano ngusaŵa jwakusangalala pangukamula masengo, pandili kumisongano ja Chiklistu, soni pangutenda yakusangalasya. Umitu ukunong’a sambano.

Nguyamika Yehofa ligongo lya achinangolo ŵangu wele nganaleka. Ngusaganichisyasoni maloŵe ga Yesu gagakusimanikwa pa Yohane 6:44: “Pangali mundu jwampaka apakombole kwisa kwa une nambo akaŵe naga Atati ŵiŵandumelewo akumlongolela kwa une.” Ngusayamichila mnope ligongo lyakuti Yehofa ŵambutile kuti mbujile kwa jwalakwe.

“Nasakaga ndili mbatile baba.”​—MARCO ANTONIO ALVAREZ SOTO

CHAKA CHAKUPAGWA: 1977

CHILAMBO: CHILE

PANDANDA: NAJIMBAGA NYIMBO SYAMASEGWE SONI SYACHIWAWA

KALA KANGU: Naleledwe ni mayi ŵangu mu msinda wakusangalasya wa Punta Arenas kummwela kwa America mungulugulu nyasa ja Strait of Magellan. Ulombela ŵa achinangolo ŵangu wamasile ndili ngwete yaka 5. Yeleyi yandendekasyaga kuliwona kuti jwangali baba ŵangu.

Mayi ŵangu ŵalijiganyaga Baibulo ni ŵa Mboni sya Yehofa. Mwamti ŵanjigalaga kumisongano ku Nyumba ja Uchimwene. Nambope pambite kumisonganoji nganisangalala. Pandili mwitala naganisyaga yakuwujila kunyumba. Panakwete yaka 13 nalesile kusimanikwa ku misongano.

Pandaŵiji natandite kunonyela kwimba nyimbo mwamti nayiweni kuti ngwete luso lwa kwamba nyimbo. Ndili ngwete yaka 15, natandite kwimba nyimbo syamasegwe soni syachiwawa kuyisangalaloyakumabala, nambosoni pa yakutendekwa yine. Ligongo lyakuti nakunguluka ni ŵandu ŵakwimba, natandite kusinonyela nyimbo sya classic. Natandite kulijiganya kwimba nyimbo ku sukulu jakwiganya kwimba nyimbo jajaliji chiŵandika kunatamaga. Ndili ngwete yaka 20, napite kumsinda wa, Santiago, kukupitilisya majiganyo gangu gakwimba. Panaliji kweleku napitilisye kwimba nyimbo sya masegwe soni sya chiwawa sila.

Ndaŵi josopeji namanyililaga kuti ngusoŵa chinechakwe pa umi wangu. Pakulinga kumasya kumalana nayo natandite kumwa ukana soni kumwa mitela jakusokonasya mtwe. Natendaga yeleyi ni achimjangu ŵanajimbaga nawo ligongo nawonaga mpela achalongo achimjangu. Nawonekaga kuti ndili mundu jwakusawusya. Nanonyelaga kuwala yakuwala yepiliwu. Nasungaga ndewu soni umbo syangu. Mwamti syaliji syelewu mnope kusigala panandi kwika mchiwunu.

Ndaŵi syejinji ndamo jeleji jandendekasyaga kuti menyaneje nambosoni naliji mkutawidwa. Mwachisyasyo lisiku line ndili mwele ukana, natandite kumenyana ni gulu jakusumisya mitela jakusokonasya mtwe ŵele ŵaŵatulagasyaga. Ŵanduŵa ŵambutile mnope mwamti mpaka ŵambweteche.

Achimjangu ŵala ŵandendele yindu yayambweteche mnope. Lisiku line nayikopochele kuti mjangu jwine jwaŵele ali mkutenda uganja ni uganja wangu kwa yaka yejinji. Yangwayiye mnope kuti achimjangu ŵayimanyililaga nambo nganasalila

Kaneko nawujile ku Punta Arenas. Kweleku natandite kwajiganya ŵandu kwimba nyimbo. Nakamulichisyaga masengo chindu chakulandana ni gitala. Napitilisyepe kwimba nyimbo sya masegwe sila soni sya chiwawa. Kaneko nasimene ni ni msikana jwakusalala lina lyakwe Sussan, mwamti twatandite kutama yalumo. Jwalakwe ali ayiweni kuti jwangakulupilila chijiganyo cha utatu, ŵambusisye kuti, “Ana yisyesyene ni yapi?.” Namjanjile kuti ngusamanyilila kuti chijiganyo cha utatu chili cha unami nambo nganiwungunya m’Baibulo. Nambo ŵa Mboni sya Yehofa ni ŵampaka asale yisyesyene yajikusasala Baibulo. Kaneko namŵendile Yehofa kuti angamuchisye. Yeleyi naliji mkanindende kwa yaka yejinji.

Pali pamasile masiku gamnono nam’weni mundu juŵawonekaga mpela jwa Mboni sya Yehofa ni namŵusisye naga jwali jwa Mboni sya Yehofa. Atamose kuti jwalakwe jwatendaga woga ni munawonechelaga, jwanjanjile yiwusyo yosope yakwayana ni misongano jajikusatendekwa ku Nyumba ja Uchimwene mwakuwusimana mtima. Nayiweni kuti lipopelo lyangu lyajanjidwe. Kaneko napite ku Nyumba ja Uchimwene nambo natemi mpando wakunyumaa ni chakulinga chakuti ŵandu akamanyilila. Nambope ŵandu ŵamanyilile kuti panaliji mwanache nayikaga kumisongano ni mayi ŵangu. Ŵanduŵa ŵambochele ni magasa gaŵili. Yeleyi yasangalesye mwamti nayiweni kuti mbujile kunyumba. Ndili nam’weni mundu juŵanjiganyaga Baibulo ndili mwanache, namŵendile kuti atandilesoni kunjiganya.

YAJATITE BAIBULO PAKUNGAMUCHISYA: Lisiku line naŵalasile lilemba lya Misyungu 27:11 lyalikusati, “Mwanangu, mŵe ŵalunda, ni msangalasye mtima wangu.” Natesile chidwi panamanyilile kuti une mundu wamba mpaka namsangalasye Juŵapanganyisye yindu yosope. Namanyilile kuti Yehofa ali baba ŵachinonyelo ŵambele ndili mkwasosa kwandaŵi jelewu kutandila ndili mwanache.

Nasakaga kuti nasangalasyeje Atati ŵangu ŵakwinani soni kutendaga yakusasaka nambo naŵele ndili mkumwa mitela jakusokonasya mtwe soni ukana kwa yaka yejinji. Maloŵe ga Yesu gagali pa Mateyu 6:24, gagakusati, “mundu ngaŵa mkupakombola kwatumichila achambuje ŵaŵili” gangamuchisye. Panalimbanaga ni kumasya ndamo syangu syakusakala nakumbuchile maloŵe ga pa 1 Akolinto 15:33 gagakusati: “Kusyoŵekana ni ŵandu ŵa yitendo yakusakala kukusajonanga ndamo syambone.” Namanyilile kuti nganimba ndesile kutenda yakusakala yanatendaga naga nganguleka kwawula kumalo gakulemwecheka ganajawulaga soni kung’anda ni achimjangu ŵala. Yanalijiganyisye m’Baibulo yangamuchisye kuleka yindu yayalepelekasyaga kwawula pasogolo mwa usimu.—Mateyu 5:30.

Ligongo lyakuti nanonyelaga nyimbo, yaliji yakusawusya kuti ndeche kwimba nyimbo syangu sila. Nambo ni chikamuchisyo cha achimjangu ŵa ku mpingo nakombwele kuleka kusijimba. Nalesile kumwa mitela jakusokonasya mtwe soni kumwa mnope ukana. Nasenjile ndewu syangu soni umbo syangu syasyaliji syekulungwa mnope sila. Nalesilesoni kuwala yakuwala yepiliwu yila. Panamsalile Sussan kuti ngusaka kusenga umbo syangu wasimonjile mnope. Mwamti ŵasalile kuti, “ngusaka kwawula nawo ku Nyumba ja Uchimwene kuti ngalole yosope yayikusatendekwa.” Yaŵayiweni ali ayiche yamsangalesye mwamti watandite kulijiganya Baibulo. Kaneko une ni Sussan twalombene mu 2008 soni twabatisidwe kuti tuŵe ŵa Mboni sya Yehofa. Tuli ŵakusangalala kuti tuli ŵakamulana ni mayi ŵetu patukumtumichila Yehofa.

UMBONE UMBATILE: Nalesile kutenda yakusakala soni kunguluka ni ŵandu ŵakusakala. Apano ndili jwakusangalala mnope. Ngupitilisya kusinonyela nyimbo nambo syambone. Ngusasangalala kwakamuchisya ŵanache ŵangu. Mwamti ngusaka kwakamuchisya kumanyilila kuti chilambo chikusatenda yindu yakusangalasya nambo pambesi pakwe yikusaŵa “yangapindulisya.”—Afilipi 3:8.

Mbatile achimjangu ŵasyesyene mu mpingo wa Chiklistu ŵali ŵakulupichika. Akusatenda yindu mwachinonyelo soni mwamtendele. Kupunda yosopeyi, kuŵa paunasi ni Yehofa kungamuchisye kupata Baba ŵangu ŵanasosaga.

[Malowe ga Mwiwanda]

[Malowe Gagombelechesya pa peji 13]

“Nakombwele kuwujila kwa Yehofa ligongo ŵalongolele jwalakwe”