Gucané Biblia laacabe para bichaacabe

XI BICAA ti hombre guibiguetaʼ ndaaniʼ religión ra bisiniisicabe laa. Ximodo bidxela ti hombrehuiiniʼ ti binni ni biʼyaʼ casi bixhoze, ni gúpabe gana ñápabe dede dxi nahuiinibe. Guidúʼyanu ximodo gusiénecabe ni laanu.

«Caquiiñeʼ guibiguetaʼ ra nuu Jiobá» (ELIE KHALIL)

GÚLEBE LU IZA 1976

DE CHIPRE LAABE

BIBIGUÉTABE NDAANIʼ XQUIDXI DIOS

MODO BIBANEʼ DXIQUÉ: Guleʼ ndaaniʼ guidxi Chipre, peru biniiseʼ ndaaniʼ guidxi Australia. Bixhozeʼ ne jñaaʼ testigu stiʼ Jiobá laacaʼ ne bíʼnicaʼ stipa pur nusiidicaʼ naa ñannaxhieeʼ Dios ne nusisacaʼ cani rusiidiʼ Biblia. Dxi maʼ zedaniiseʼ maʼ qué ninaʼyaʼ nuzuubaʼ diidxaʼ. Ne nagaʼchiʼ rireeʼ de ralidxeʼ huaxhinni para guidxaagaʼ xcaadxi xhamiguaʼ biaʼca naa, rindánadu carru ne gatigá riuaaʼ lu stale guendanagana.

Nacubi que runeruaʼ ni nagaʼchiʼ para cadi guchiicheʼ bixhozeʼ ne jñaa, peru chaahuiʼ chaahuiʼ maʼ qué nidxibeʼ ñuneʼ ni. Cumu guca xhamiguaʼ binni jma huaniisi que naa ni qué runibiáʼ Jiobá la? bicaacabe naa guneʼ ni cadi jneza. Despué gudxeʼ bixhozeʼ ne jñaa maʼ qué racalaʼdxeʼ chiniáʼ laacaʼ lade religión sticaʼ. Laacaʼ qué nusaana de ñacanecaʼ naa, peru qué nudieeʼ lugar neca biraruʼ ni bíʼnicabe, ngue runi binenaʼyaʼ ladxidóʼcabe.

Bireeʼ de ralidxeʼ ne bizulú bidxaagaʼ binni ni riguʼbaʼ ne rutoo droga, dede maʼ né naa bizuluáʼ bidxiibaʼ ne bituaaʼ stale marihuana. Riuaaniáʼ tutiisi ne nabé riaaʼ ca lugar ra riguyaa binni, ra ruundacabe ne rixúdxicabe huaxhinni. Ne gucaʼ ti binni ni ridxiichi stubi. Ne pa chuʼ tuuxa ni guiníʼ o guni xiixa ni qué chuuladxeʼ la? ridxiicheʼ, rindisaʼ ridxi ne dede rigapaʼ laabe. Runeʼ guiráʼ ni bisiidicabe naa cadi naquiiñeʼ guni ti xpinni Cristu.

XIMODO GUCANÉ BIBLIA NAA PARA BICHAAʼ: Guca xhamiguaʼ ti marihuanu ni guti bixhoze dede dxi nahuiiniʼ. Stale biaje dede maʼ huaxhinni cayuírudu diidxaʼ. Ti lade rábibe naa xi runi sentirbe, ne ruzeetebe nabé ribánabe bixhózebe. Cumu dede dxi nahuiineʼ nannaʼ ziasa gueʼtuʼ la? qué nindaa gudxeʼ laabe dxiqué gundisaʼ Jesús gueʼtuʼ ne zúnirube ni despué (Juan 5:28, 29). Ne rabeʼ laabe: «Guníʼ ique pabiáʼ galán nga gúʼyaluʼ bixhózeluʼ sti biaje, ne guiranu zanda guibáninu ndaaniʼ ti paraísu lu Guidxilayú riʼ sin qué chuʼ dxi gátinu». Guizáʼ biéchebe ora binadiágabe cani gudxeʼ laabe que.

 Ne guyuu xcaadxi biaje, málasi guzeetebe de ca últimu dxi, o ni rusiidicabe de Trinidad. Riquiiñeʼ Biblia stibe para gulueeʼ laabe ca textu ni caníʼ xipeʼ rusiidiʼ ni de Jiobá, de Jesús ne de ca últimu dxi (Juan 14:28; 2 Timoteo 3:1-5). Ra jma gunieniáʼ xhamiguaʼ que de Jiobá, jma riníʼ iqueʼ Jiobá.

Cani biziideʼ de Biblia, ni zeeda gaca casi biidxiʼ, chahuiʼ chaahuiʼ gundani cani ndaaniʼ ladxiduáʼ ne bizulú biroobaʼ cani, ne bixhozeʼ ne jñaaʼ nga bíʼnicaʼ stipa para guluucaʼ cani ndaaniʼ ladxiduáʼ. Nuu tiru, ora maʼ nuaaʼ ra cayaca xiixa saa maʼ cagubaniáʼ ca xhamiguaʼ guixi, málasi ruzulú riníʼ iqueʼ Jiobá. Neca stale de ca xhamiguaʼ que nacaʼ nadxiicaʼ Dios, peru gadxé ni rúnicaʼ. Cumu qué racalaʼdxeʼ gacaʼ casi laacabe la? ngue runi rabeʼ naquiiñeʼ guibiguetaʼ ra nuu Jiobá.

Dxandíʼ, neca nanna binni xi naquiiñeʼ guni, peru nagana raca para laa guni ni. Nuu de ca cosa que cadi nagana guca para naa gusaanaʼ, casi gusaanaʼ de cubaʼ guixi. Laaca bisaanaʼ de nidxaagaʼ ca binni ni guca xhamiguaʼ ante ne bizulú biindané ti binnigola ni nuu ndaaniʼ neza binni ridagulisaa naa.

Peru guca nagana para naa gusaanaʼ xcaadxi cosa, casi cadi guidxiichepiáʼ. Riuu ora randa rucueezaʼ naa, peru málasi riabaʼ luni sti biaje ne runeʼ sentir napaʼ donda ne riníʼ iqueʼ maʼ qué zanda diʼ guneʼ ni jneza. Nabé guyuaaʼ triste, ne ngue bicaa naa guinieniáʼ Testigu ni ruundané naa Biblia que. Cumu cadi nagueenda rireebe gana ne nabé nadoʼbe la? gunda gucanebe naa. Ti biaje gúdxibe naa guundaʼ ti tema zeeda lu revista La Atalaya ni caníʼ pabiáʼ risaca nga cadi guiree binni gana. * Ne bidúʼyadu luni xi naquiiñeʼ guneʼ ora maʼ cadxiicheʼ. Bineʼ ni na revista que ne qué nusaanaʼ de ñuneʼ orar Jiobá, ne chahuiʼ chaahuiʼ gunda bicueezaʼ naa de nidxiicheʼ. Lu iza 2000 que guyuaaniʼsaʼ casi ti testigu stiʼ Jiobá. Dxi que guizáʼ biecheʼ bixhozeʼ ne jñaaʼ.

XI MAʼ GULEENDUAʼ: Yanna maʼ nuudxí ladxiduáʼ ne maʼ qué ruchiiñaʼ xquendabiaaneʼ naa, purtiʼ maʼ qué runeʼ gastiʼ ni gunibiidiʼ xcuerpuaʼ casi cubaʼ guixi o gataniáʼ tuutiisi. Intiicasi guneʼ jma maʼ nuaaʼ nayecheʼ, pa cayuneʼ dxiiñaʼ, pa chaaʼ xiixa guendaridagulisaa ni rapa ca xpinni Cristu, o guneʼ xiixa para chuaaʼ nayecheʼ, ne maʼ riníʼ iqueʼ zanda guibaneʼ galán.

Rudieeʼ xquíxepeʼ Jiobá purtiʼ qué niníʼ ique bixhozeʼ ne jñaaʼ maʼ qué zanda guchaaʼ. Laaca riníʼ iqueʼ ca diidxaʼ guníʼ Jesús lu Juan 6:44: «Biseenda Bixhoze naa, ne iruti zanda gueeda ra nuaaʼ, pa qué cuidxi be laa». Riecheʼ ora riníʼ iqueʼ gunda bibiguetaʼ ra nuu Jiobá purtiʼ laabe nga gulídxibe naa.

 «Gupaʼ gana ñapaʼ ti binni ñeedagaca casi bixhozeʼ» (MARCO ANTONIO ALVAREZ SOTO)

GÚLEBE LU IZA 1977

DE CHIPRE LAABE

GUYUUBE LU TI BANDA NI RUXHIDXI SAA DEATH-METAL

MODO BIBANEʼ DXIQUÉ: Bisiniisi jñaaʼ naa ndaaniʼ guidxi Punta arenas, ne nuuni ra nuu estrecho de Magallanes ni riaana ladu gueteʼ de ra riluxe continente americano. Ndaaniʼ guidxi ca nabé nachaʼhuiʼ binni. Dxi napaʼ gaayuʼ iza, gulaa xquendaxheelaʼ jñaaʼ ne bixhozeʼ, pur ngue bineʼ sentir casi ora bisaanacabe naa. Gupaʼ gana ñapaʼ ti binni ñeedagaca casi bixhozeʼ.

Jñaaʼ biindané ca testigu stiʼ Jiobá laa Biblia ne yenebe naa ca guendaridagulisaa ni rapa ca xpinni Cristu ra Yoo stiʼ Reinu. Peru nabé rireeʼ gana chaaʼ ne guidubi neza maʼ zidxiicheʼ. Dxi napaʼ 13 iza maʼ qué ñaaʼ guendaridagulisaa.

Ca dxi que maʼ guyuuladxeʼ saa ne biiyaʼ ruluíʼ gulepiáʼ para laani. Dxi napaʼ 15 iza maʼ ruxhidxeʼ heavy-metal ne death-metal ra raca ca saa ni rábicabe festival, ndaaniʼ ca bar, saa ra rié huaxiéʼ binni. Bidxaagaʼ ca músicu ni jma nanna, ne ngue bicaa naa chúʼladxeʼ gannaʼ de ni rábicabe música clásica. Bizuluáʼ biindaʼ ndaaniʼ ti scuela ra rusiidicabe binni guxhidxi saa. Dxi napaʼ 20 iza, yendezaʼ capital stiʼ xquidxeʼ, Santiago, para guundaʼ jma. Ne qué nusaanaʼ de nuxhidxeʼ heavy-metal ne death-metal.

Neca zaqué qué ñuneʼ sentir nayecheʼ. Para ganda gusiaandaʼ ni runeʼ sentir que la? rixudxeniáʼ cani ruxhidxeniáʼ ne rigubaniáʼ laacaʼ guixi, ne laacabe nga gupaʼ casi binnilidxeʼ. Gucaʼ ti binni ni qué ruzuubaʼ diidxaʼ ne rusihuinneʼ ni purtiʼ racuaʼ lari yaaseʼ, rudieeʼ lugar igaa guicharuaaʼ ne ziuulaʼ guicha iqueʼ dede biaʼ ra rixii cinturón.

Pur modo naa que nabé ridindeniáʼ ca pulicía ne rapaniáʼ laacaʼ guendanagana. Ti dxi bichiichi caadxi binni ni rutoo guixi naa né ca xhamiguaʼ. Cumu naxudxeʼ la? bicaaluáʼ laacabe ne bidiicabe ti paliza naa dede gulúzacabe xquijadaʼ.

Peru ca binni peʼ ni jma ridxaagaʼ nga bininacaʼ naa. Ti dxi bidieeʼ cuenta maʼ napa iza de caguite xnovia naa, purtiʼ canacaabe ti hombre huiiniʼ ni jma xhamiguaʼ ne guiráʼ ca xhamiguaʼ maca nánnacaʼ ni peru qué ñuu ora ñábicaʼ naa xiixa. Guizáʼ bininá ngue ladxiduáʼ.

Bibiguetaʼ Punta Arenas ne bizuluáʼ bisiideʼ binni guxhidxi saa ne bixhidxeʼ violonchelo. Ne laaca qué nusaanaʼ de nuxhidxeniáʼ ne ñuneʼ grabarniáʼ ca banda ni ruxhidxi heavy-metal ne death-metal. Ca dxi ca binebiaʼyaʼ Sussan, ti baʼdudxaapaʼ nabé sicarú ne gulezaniáʼ laabe. Despué gunna Sussan runi cré jñaa ni rusiidicabe de Trinidad peru naa qué runeʼ cré cani, ngue runi gunabadiidxabe naa: «Yanna yaʼ, gunapeʼ nga ni dxandíʼ». Gudxeʼ laabe naa nannaʼ cadi dxandíʼ diʼ ni rusiidicabe de Trinidad, ne neca qué zanda guluéʼ ni laabe né Biblia, peru nannaʼ tu laa zanda guni ni. Ne gudxeʼ laabe ca testigu stiʼ Jiobá zanda gusiénecaʼ laabe né Biblia gunapeʼ nga ni dxandíʼ. Oraqué bineʼ ti cosa ni qué huayuneʼ maʼ raca iza, bineʼ orar Dios para gacané naa.

Chupa chonna gubidxa despué, biiyaʼ ti hombre ni ruluíʼ runebiaʼyaʼ ne gunabadiidxaʼ laabe pa testigu stiʼ Jiobá laabe. Nannaʼ bidxíbibe naa pur modo rihuinneʼ, peru galán modo bicábibe cani gunabadiidxaʼ laabe de ca guendaridagulisaa ni raca ra Yoo stiʼ Reinu. Nanna dxiicheʼ Dios ngue bicabi oración stinneʼ ora bidxaagaʼ hombre  que. Guyaaʼ ra Yoo stiʼ Reinu ne gurieʼ dede atrá para cadi gúʼyacabe naa. Peru stale tu binibiáʼ naa purtiʼ guyaaʼ raqué dxi nahuiineʼ. Gúdxicabe naa galán bineʼ guyaaʼ ne cayéchecabe gudiidxicabe naa dede bineʼ sentir gutadxí ladxiduáʼ. Bineʼ sentir casi ora nibiguetaʼ ralidxeʼ. Ora biiyaʼ hombre ni biindané naa Biblia dede dxi nahuiineʼ, gunabaʼ laabe gúʼndanebe naa sti biaje.

XIMODO GUCANÉ BIBLIA NAA PARA BICHAAʼ: Ti dxi biindaʼ Proverbios 27:11, ra na: «Guluu xpiaanuʼ xiiñehuiineʼ ne bisiecheʼ ladxiduáʼ». Bidxagayaaʼ ora biziideʼ zanda gusiecheʼ ti binni guidxilayú ladxidóʼ Dios ni bizáʼ guibáʼ ne Guidxilayú. Óraque bieneʼ Jiobá nga hombre ni zanda guuyaʼ casi bixhozeʼ, ni gucalaʼdxeʼ ñapaʼ dede dxi nahuiineʼ.

Racalaʼdxeʼ gusiecheʼ Bixhozeʼ ni nuu guibáʼ ne guneʼ ni nabe, peru maʼ raca stale iza de nacaʼ esclavu stiʼ droga ne nisadxuʼniʼ. Bieneʼ xi gucalaʼdxiʼ Jesús nusiidiʼ né ca diidxaʼ ni zeeda lu Mateo 6:24, ra na «iruti zanda gapa chupa xpixuaana ne guni ni na iropa cabe tobi si tiru». Ra cayuneʼ stipa pur guchaaʼ modo nabaneʼ que, nabé gucané conseju ni zeeda lu 1 Corintios 15:33 naa, ra na: «Pa idxaagu [binni ni runi] ni nadxaba la? zacá ni lii». Bidieeʼ cuenta qué zanda gusaanaʼ de guneʼ ca cosa malu ni runeʼ que pa qué gusaana de chaaʼ ca lugar ra maca riaaʼ ne guidxaagaʼ laca ca binni ni rizayaniáʼ que. Conseju ni cudii Biblia ca, cayabi ni naa xipeʼ naquiiñeʼ guneʼ: naquiiñeʼ guixeleʼ tobi si tiru de guiráʼ cosa ni cucueeza naa de guneʼ ni na Dios (Mateo 5:30).

Cumu guizáʼ riuuladxeʼ guxhidxeʼ saa la? guca nagana para naa gusaanaʼ heavy-metal. Peru gunda bisaanaʼ ni purtiʼ gucané ca xhamiguaʼ ni nuu ndaaniʼ neza binni ridagulisaa naa. Bisaanaʼ guendarixudxi ne droga. Laaca bigayaʼ guicha iqueʼ ne guicha ruaaʼ, ne maʼ cadi puru lari yaaseʼ si racuaʼ. Ora gudxeʼ Sussan nuaaʼ ugayaʼ guicha iqueʼ la? bicaa ngue laabe chiguuyabe xi runeʼ ra riaaʼ que, ne gúdxibe naa: «Ziniáʼ lii ra Yoo stiʼ Reinu ca. Rapa gana ganna xi rúnicabe racá». Guyuuláʼdxibe ni bíʼyabe raqué ne qué nindaa laaca bizulú biindanécabe laabe Biblia. Despué bichaganadu ne guirópadu guyuʼnísadu lu iza 2008 casi testigu stiʼ Jiobá. Ne nuudu nayecheʼ purtiʼ laadu ne jñaaʼ cayúnidu ni na Jiobá juntu.

XI MAʼ GULEENDUAʼ: Maʼ bixeleʼ de ca binni ni cadi dxandíʼ nuucaʼ nayecheʼ ne laaca maʼ bixeleʼ de ca binni ni cadi dxandíʼ xhamígucaʼ naa. Riuuladxeruaʼ saa, peru yanna maʼ ruyubeʼ xi zanda guxhidxeʼ ne xi zanda gucaadiaʼgaʼ. Guiráʼ ni bizaaca que riquiiñeʼ cani para gacaniáʼ ca binnilidxeʼ ne xcaadxi binni, ne jma nga riquiiñeʼ cani para gacaniáʼ cani nahuiiniʼ. Rapa gana gacaniáʼ laacabe gudiicabe cuenta zeeda gaca guiráʼ ni nuu lu Guidxilayú riʼ «casi guixi» neca ruluíʼ galán cani (Filipenses 3:8).

Yanna ra maʼ nuaaʼ gaxha de Dios, maʼ bidxelaʼ xhamiguaʼ ni qué zudxii deche naa lade ca xpinni Cristu ni ridagualisaaniáʼ, ne rihuinni nadxiisaacabe ne qué ridíndecabe. Ne ni jma risaca para naa nga ora bidxiñaʼ Jiobá bidieeʼ cuenta laabe nga binni ni racalaʼdxeʼ gaca casi bixhozeʼ.

[Nota]

[Ni caníʼ yaza 13]

«Gunda bibiguetaʼ ra nuu Jiobá purtiʼ laabe nga gulídxibe naa»