La Biblia bitzaʼ mod bibanyibu

¿Xí láani bichiin toib buñguieeu par nabiguetbu religión ro goniʼsbu? ¿Ximod bidzel toib mbioxhlas toib ni binladx láabu xomod bixiosbu ni goniiny láabu dzú gócbu mbiox? Guibiʼno xi goniʼyibu.

«Biquiin nabiguetta ronoʼ Jehová» (ELIE KHALIL)

ÍZ NI GOLBU: 1976

GUDX: CHIPRE

TIPNÉS CÓS NI BUNYBU: TOIB MBIOXHLAS NI BISIAN LIDX

NI BUNI LÓ DZÚ NI SEE: Goola gudx Chipre, per goniʼsa gudx Australia. Bixiosa né xinaʼya gocyibu testigos xtuny Jehová, né bunyibu rutigoygaʼlni layibu par nasuidyibu naʼ nadxiʼya Dios né Xtiitzbu, la Biblia. Per órni góca mbioxhlasien ma diti bisoba. Nalanga bireʼya lidxi goxin, né stipnés ximiga ni nap xisa, golando camión né guirá ór goyoʼdo ló galnagan.

Primer la, buni láani nagach portín bidzubi nadzuitz bixiosa né xinaʼya, per dxoga dxoga ma diti bidzubi. Ximiga gocyibu más lagol que naʼ né diti gondxiʼyibu Jehová. Diti noʼ pu gocnéyibu naʼ. Bidxin midid goodxi bixiosa né xinaʼya que ma diti nainy naʼ gaana de fe xtunyibu. Ná biyopyibu mod ñacnéyibu naʼ né paseins, diti goloʼya cuent layibu. Nigolú bioʼob xcalnabanyibu.

Bireʼya lidxi né gosaló biquiinna drogas. Dada bidxi’ba né bitoʼya mariguan. Gotnéya xidal buñ né godudydzúya lainy cantin. Láaca, góca buñ nadox. Nigolú bidzutzi órni buñ goniʼ o buny cós ni diti bioladxi. Casi guirá ór gonidiéya né godina layibu. Buni guirá ni bisuidyibu naʼ ni diti non ñony toib cristiano.

¿XIMOD BITZAʼ LA BIBLIA MOD BIBANI?: Bidzaga toib buñ ni goty bixios dzú nacsabu mbiox, né láabu nigolu’ biquiimbu drogas. Biaʼdo biiydo diitz dada ma goxinroʼ. Xidal buelt gochbu naʼ que nigolú rasetnaladxbu bixiosbu. Desde dzú góca mbiox ma naana que siás buñ ni ma goity, Nimaca goodxi láabu que Jesús golísbu gueʼet né que radudybu xtiitzbu gonybu láani ló dzú ni sietra (Juan 5:28, 29). Goodxi láabu: «Bunysi pensary, sabiʼlo bixioslo stoib, né guiráno labúu guibanyno ló toib lagary móz ló Gudxlio». Ngú nigolú bidxin lainy xcalnabanybu.

Stipnés ór, ximiga goleʼ tema de dzú ni ma guidubylagaʼ né xcalrrasuidy trinidad. Naʼ biquiinna Biblia xtunybu par naslooya láabu textos ro ritlaa galnigolú de Jehová, Jesús né dzú ni ma guidubylagaʼ (Juan 14:28; 2 Timoteo 3:1-5). Laʼga más goninéya láabu de Jehová, más buni pensary lóo Jehová.

Dxoga dxoga, laach galnigolú xtuny la Biblia ni goyoʼ dada lainy xcalnabani ni bixiosa né xinaʼya buny rutigoygaʼlni layibu por bidxiʼpyibu gosaló goniʼsni. Goyoʼ ór órni noʼya ló toib lanii né caquiinna drogas né ximiga, tisintiempsi gosaló buni pensary lóo Jehová. Ná guirá ximiga goniʼyibu que gondxiʼyibu Dios, per mod ni bunyibu bidudyni diitz que diti gocni scú. Diti bioladxi ñaca xomod toib buñ ni raniʼ toib cós né rony stoib, bidudi cuent que biquiin nabiguetta ronoʼ Jehová.

Nigolú, diti ngúca láani guiniʼ buñ gony alga né gony láani. Tipnés cós diti gosac nagana natzaʼya láani. Por ejemplo, diti gosac nagana nasiana drogas. Nili gosac nagana nasiana ximiga né nasalóya nasudi la Biblia né toib anciano.

Per stipnés cós nigolú nagan gocni par naʼ, gosac nagana ñony mandary xcalnadzutzi. Goyoʼ ór labúu buni láani por tidxó tiemp, per órni biaba loni gosaca que gopa dool né gosaca que diti noʼ pu raquiinna. Goloʼya guica guininéya Testigo ni bisuidy naʼ ni ná la Biblia. Gócbu toib buñ paseins né nadaʼa né ngú goloʼ gan naʼ. Toibtica dzú gochbu naʼ ñoola toib artículo xtuny Guiich ni caniʼ ro ritlaa que nigolú rasac diti guireʼganno. * Bisuidydo tipnés cós ni non ñoni órni casaca que ma cadzutzi. Por ni bisetnaladxi información de artículocu né goninéya Jehová, dxoga dxoga labúu buni mandary xcalnadzutzi. Bidxin midid, ló abril íz 2000 goyonisa xomod testigo xtuny Jehová. Bixiosa né xinaʼya nigolú bibaladx.

¿XÍ GALNASÁC MA CUAʼYA?: Nigoreʼ rasaca sacró né naʼca, portín xcalrriena ma diti ronynudy naʼ, portín ma diti ronybudi ladi né drogas né galyoxh. Nac nitisi cós ni cayoni dxiin, reunión, galnakit, ma más goxt nabani né ma sacró rabiʼya galnabany.

Radudi guixquix Jehová por bixiosa né xinaʼya, portín diti bireʼganyibu né naʼ. Láaca roni pensary ló ni goniʼ Jesús ni sieed ló Juan 6:44: «Diti noʼ chú labúu guieed ro noʼya, pal Bixiosa ni bixel naʼ, diti raxelcaʼ láabu». Rabaladxi órni roni pensary que labúu bibigueta ronoʼ Jehová portín láabu bixelcaʼbu naʼ.

«Goniiny naʼ ñapa bixiosa» (MARCO ANTONIO ALVAREZ SOTO)

ÍZ NI GOLBU: 1977

GUDX: CHILE

TIPNÉS CÓS NI BUNYBU: TOIB BUÑ NI GOYOʼ LAD TOIB GRUPO DE DEATH-METAL

NI BUNI LÓ DZÚ NI SEE: Goniʼsa né xinaʼya lainy Punta Arenas, ni riaʼan estrecho de Magallanes, gaxca lad sur de continente americano. Bixiosa né xinaʼya bisianyibu saʼyibu dzú gopa gáay íz, né ngú buny que gosaca que bisiambu naʼ. Goniiny naʼ ñapa bixiosa.

Xinaʼya bisuidy la Biblia né testigos xtuny Jehová né goynébu naʼ reunión ni góc lainy Salón del Reino. Per naʼ diti bioladxi ñaʼya, né guirá ór buni rudx ló néz. Bisiana de goyaʼya reunión dzú gopa 13 íz.

Par ló dzúcu ma nadxiʼya música né bidudi cuent que galán buni láani. Órni gopa 15 íz biscoʼla heavy-metal né death-metal ló festivales, cantin né lanii. Bidzaga músicos galán, né ngú buny que ñoladxi música clásica. Gosaló bisudi ló conservatorio local. Órni gopa 20 íz goyaʼya capital, Santiago, par nasudi más. Né laʼga bisudi biscoʼla lad grupo de heavy-metal né death-metal.

Ná scú, guirá ór gosaca que noʼ ni cayatz naʼ. Par diti nasaca modcu, gosodxi né biquiinna drogas né stipnés xcompañera de grupo, ni góc xomod xfamila. Diti bisoba, né ngú bienni por mod goctzaya: xhaba góc color niyaʼas, bigaʼ loxa né guitzguica casi bidxinni ronoʼ xcolaʼna.

Mod góca, guirá ór goloʼni naʼ ló galrradíil, né gopa galnagan né policia. Toibtica dzú, tipnés buñ ni bitoʼ drogas bitzaldaʼyibu guirá ximiga né naʼ. Ló ro casodxi, cualóya layibu, né nigolú godinyibu naʼ, dada gocnaa dxitroʼya.

Ná scú, buñ ni más bidzaga bisiobyibu xcalnabani. Toibtica dzú goona que xinobi ma sané íz cascú naʼ né ximigdxina né guirá ximiga gon láani per diti gochyibu naʼ. Nigolú bioʼobni naʼ.

Bibigueta Punta Arenas né gosaló buni dxiin, bisudi música né bisudi buñ nascol violonchelo. Láaca buni grabar né tipnés grupos de heavy-metal né death-metal. Par ló dzúcu bimbuya Sussan, toib mbioxhlas móz né gosaló golesnéya láabu. Diti xidzú después, Sussan gon que xinábu rony crer ló xcalrrasuidy trinidad né naʼ yaca, por ngú gonabdiitzbu naʼ: «¿Chú ngú galnigolú?». Cuabi láabu que galrrasuidy cu diti nigolúni, ná naʼ diti labúu naslooya láani láabu né la Biblia, goona chú labúu ñony láani. Goodxi láabu que testigos xtuny Jehová labúu nabexa láani né la Biblia. Órcu buni alga ni ma xidzú íz diti buni: gonaba xcalrracné Dios.

Diti xidzú bibiʼya toib buñguieeu ni ralooyni rimbuya né gonabdiidza láabu pal nacbu testigo xtuny Jehová. Ná mod góca bitzuibyni láabu, cuapybu guirá galrranabdiitz ni buni láabu de reunión ni rac lainy Salón del Reino. Gondxichi que modcu cuapy Dios oración xtuni. Goyaʼya Salón goruya dada nixitz par diti ñoʼ chú nabiʼ naʼ. Per xidalyibu bimbuyibu naʼ por ni goyaʼya Salón dzú góca mbiox. Sacró godabioyibu naʼ né goduʼuchyibu naʼ, nigolú gosaca sacró. Gocni suusi nabiguetta lidxi. Órni bibiʼya Testigo ni bisuidy naʼ de la Biblia dzú góca mbiox goodxi láabu nasuidybu naʼ stoib.

¿XIMOD BITZAʼ LA BIBLIA MOD BIBANI?: Toibtica dzú biila ni ná Proverbios 27:11, ro ná: «Goloʼ xcalrrienlo, xiingaʼna, né buny que guibaladx xcalnabani». Bidziguiaʼya órni buni pensary que toib buñ labúu coʼ nakit ni Bisaʼ guiránac cós. Órcu bidudi cuent que Jehová góc xomod bixiosa ni biyobi.

Goniiny naʼ ñoni ni ná Bixiosa ni noʼ guibá né ñoni xchiimbu, per goyoʼya xan xomandary drogas né alcohol xidal íz. Bienna ni bidudy Jesús diitz ló Mateo 6:24, ro ná que «ni toib buñ labúu tzoʼ chop xpixuan». Laʼga buni rutigoygaʼlni naʼ por natzaʼya mod góca, principio ni sieed ló 1 Corintios 15:33 nigolú gocnéni naʼ: «Pal toib buñ radzak buñ mal raxin mod tzaay ni nacbu». Bidudi cuent que diti labúu nasiana cós mal pal diti rasiana riaʼya lagary ro goyaʼya né radzaʼga buñ ni bidzaga. Consej ni bidudy la Biblia nayadit nacni: non ñoni alga par narestzooya de cós ni cayony que guiaba (Mateo 5:30).

Por ni bioladxgoluʼya música por ngú nigolú gosac nagana nasiana heavy-metal. Per né xcalrracné guirá ximiga de congregación xtuni, bidxin midid labúu buni láani. Bisiana galrrasoch né drogas, bigaaya guitzguica, bigaaya loxa né ma diti godoca lairy yaʼas. Órni goodxi Sussan que nainy naʼ guigaaya guitzguica, goniiny láabu ñanbu xigony né gochbu naʼ: «Tzaʼya Salón né looy. Nainy naʼ guibiʼya xi ronyto cu». Nigolú bioladxbu láani né nimaca gosaló bisuidybu la Biblia. Bidxin midid bunydo galtzeʼel, né ló íz 2008, guiropcado goyonisdo xomod testigos xtuny Jehová. Nigoreʼ nakit ronydo xchiin Jehová né xinaʼya.

¿XÍ GALNASÁC MA CUAʼYA?: Bireʼya ladxña toib Gudxlio ro diti goyoʼya sacró né gopa ximiga ni rascú. Rioladxsa’ya música, per ma rayobi xi música guicadiaga. Raquiinna ni gosacloya par gacnéya xfamila né stipnés buñ, máspa la mbioxhlas. Nainy naʼ gacnéya layibu guienyibu que xidal cós de gudxliogoxreʼ ni rien que sacróyenni, «nosi nacni timontón guix» (Filipenses 3:8).

Por ni bibigaxa Dios, bidzela ximiga lainy congregación ni diti rasian naʼ, ro rareʼ loguiaʼ galnadxiʼ né paz. Per ni máspa la, ma bidzela bixiosa ni goniiny naʼ: Jehová.

[Ñeʼ guiich]

[Comentario]

«Labúu bibigueta ronoʼ Jehová portín láabu bixelcaʼbu naʼ».