Yumi Lanem Samting Long Tok Blong God

?From Wanem Ol Kristin Oli Baptaes?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?Taem man i baptaes, hemia i minim wanem?

Taem man i baptaes, hem i wantem we God i fren gud wetem hem. Taswe i no stret blong wan Kristin i baptaes taem hem i bebi. Be hem i mas bigwan inaf blong lanem se God i hu, nao hem i biaen long Jisas i man blong hem. (Ol Wok 8:12; 1 Pita 3:21) Yumi save kam man blong Jisas sipos yumi stadi long ol tok blong hem, mo yumi folem ol tok ya long laef blong yumi.—Ridim Matiu 28:19, 20.

Long taem blong ol aposol, plante man oli glad blong save moa long God mo Jisas. I gat wan man we i lanem se ded blong Jisas i mekem rod blong ol man oli save kasem laef. Ale wantaem nomo hem i kam man blong Jisas. Tede plante man we oli wantem save God, oli mekem desisen blong kam man blong Jisas.—Ridim Ol Wok 8:26-31, 35-38.

2. ?From wanem Jisas i baptaes?

Jisas i gat samwe 30 yia taem hem i baptaes. Long Jodan Reva, Jon Baptaes i draonem ful bodi blong Jisas long wota. Baptaes blong Jisas i soemaot se hem i rere blong mekem wok we God i wantem hem blong mekem. (Hibrus 10:7) Hem i rere blong givim laef blong hem olsem wan sakrefaes blong i pemaot ol man long sin. Bifo we Jisas i kam long wol, hem i stap long heven wetem Papa blong hem. Oltaem hem i lavem Jehova God we i Papa blong hem, mo i obei long hem.—Ridim Mak 1:9-11; Jon 8:29; 17:5.

 3. ?From wanem ol Kristin oli mas baptaes?

Yumi no olsem Jisas we i stret gud olgeta. Be from ded blong Jisas, yumi save fren gud wetem God. (Rom 5:10, 12; 12:1, 2) Yumi save kam man blong God, we yumi joen long famle blong hem. (2 Korin 6:18) ?Yumi mekem wanem blong kasem blesing ya? Yumi prea yumi wan nomo, blong givim laef blong yumi long Jehova. Yumi promes blong mekem samting we hem i wantem, long ful laef blong yumi. Biaen yumi baptaes blong soemaot long ol man se yumi givim laef blong yumi i go long God.—Ridim Matiu 16:24; 1 Pita 4:2.

4. ?Yu save mekem wanem blong yu baptaes?

Ol Witnes blong Jehova oli stadi Baebol wetem ol man we oli wantem kam klosap long God. I gud yu stadi Baebol mo yu go long ol Kristin miting. Hemia bambae i mekem lav blong yu mo bilif blong yu long God i kam strong moa. Mo bambae i givhan long yu blong gat tingting mo fasin we God i glad long hem. Sipos yu mekem olsem, bambae yu save holem promes we yu mekem blong wosipim Jehova olwe.—Ridim Jon 17:3; Hibrus 10:24, 25.

Sipos yu wantem save moa, plis lukluk japta 18 long buk ya ?Wanem Samting We Baebol i Rili Tijim? we ol Witnes blong Jehova oli wokem.