Käeö seni än Kot we Kapas

Pwata Chon Kraist Ra Papatais?

Lon ei lesen a wor ekkewe kapas eis neman ka fen eäni me epwe äiti ngonuk ia lon noum Paipel kopwe tongeni älleani pölüwer kewe. Ekkewe Chon Pwäraatä Jiowa repwe pwapwa le pworaus ngonuk usun pölüwen ekkeei kapas eis.

1. Met weween än Chon Kraist papatais?

Papatais, a wewe ngeni än emön epwe tingor eü riri mi mürinnö ngeni Kot. Iwe, emön Chon Kraist epwe papatais, esap lemönükolun, nge lupwen an a käeö usun Kot me wiliti emön nöün Jises chon käeö. (Fofor 8:12; 1 Piter 3:21) Sia wiliti nöün Jises chon käeö atun sia käeö me föri ekkewe mettoch a allükü ngenikich.​—Älleani Mattu 28:19, 20.

Lon fansoun nöün Jises kewe aposel, chommong aramas ra mwittir käeö usun Kot me Jises. Äwewe chök, lupwen emön mwän a käeö pwe än Jises mälo a suuki ewe al ngeni amanau, iwe, a mwittir wiliti emön chon käeö. Lon ei fansoun, chommong aramas mi letip wenechar ra filatä ar repwe wiliti nöün Jises chon käeö.​—Älleani Fofor 8:26-31, 35-38.

2. Pwata Jises a papatais?

Jises a 30 ierin atun Jon Papatais a akokaalo lon ewe Chanpupu Jortan. Än Jises papatais a liosuetä an filatä le föri met Kot a tipeni fän itan. (Ipru 10:7) A pwal kapachelong an fangolo manauan usun eü asoren tipis fän iten aramas. Pwal mwo nge mwen an we feitiw me läng pwe epwe nonnom fönüfan, fansoun meinisin Jises a tongei me älleasochisi Seman we, Jiowa.​—Älleani Mark 1:9-11; Jon 8:29; 17:5.

  3. Pwata a lamot Chon Kraist repwe papatais?

Nonnomun Jises a sokkolo seni nonnomuch, pun kich chon tipis. Nge, än Jises asoren mälo a atufichi an epwe wor ach ririöch ngeni Kot. (Rom 5:10, 12; 12:1, 2) Sia wesewesen tongeni wiliti nöün usun emön chon lon an famili. (2 Korint 6:18) Ifa usun sia angei ena feiöch? Lon pwisin ach iotek, sia fangolo manauach ngeni Jiowa me pwon pwe sipwe föri minne a tipeni lon unusen manauach. Mwirin ach fangolo manauach, sia pwäraalo ena ngeni aramas ren ach papatais.​—Älleani Mattu 16:24; 1 Piter 4:2.

4. Ifa usun kopwe mmolnetä ngeni papatais?

Chon Pwäraatä Jiowa ra käeö ewe Paipel ngeni emön mi mochen arap ngeni Kot. Om käkkäeö Paipel me fiffiti än Chon Kraist kewe mwich repwe apöchökküla om tong ngeni Kot me om lükülük woon i. Epwe pwal älisuk le ämääraatä ekiek me napanap mi mürinnö. Om ämääraatä tong, lükü me ekkewe napanap Kot a pwapwaiti, repwe älisuk le apwönüetä om pwon le angang ngeni Jiowa tori feilfeilo chök.​—Älleani Jon 17:3; Ipru 10:24, 25.

Ren pwal ekkoch pworaus, ppii sopwun 18 lon ei puk, Met ewe Paipel A Wesewesen Apasa?, förien Chon Pwäraatä Jiowa.