Wifunde mu Kinenwa kya Leza

Mwanda Waka Bene Kidishitu Babatyijibwanga?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Lelo lubatyijo lwa Bwine Kidishitu lushintulula bika?

Lubatyijo i kisakibwa kilombwa pa kwikala mu kipwano kiyampe na Leza. Nanshi, Mwine Kidishitu ufwaninwe kubatyijibwa ke mwanapo wa lukeke, ino i muntu mutame senene ubwanya kwifunda myanda ya Leza ne kwikala mwanā bwanga wa Yesu. (Bilongwa 8:12; 1 Petelo 3:21) Twikalanga bana ba bwanga ba Yesu kitatyi kyotwifunda ne kulonga bintu byasoñenye.—Tanga Mateo 28:19, 20.

Mu mafuku a batumibwa ba Yesu, bantu bavule bēfundile myanda ya Leza ne ya Yesu pampikwa kulejaleja. Kimfwa, muntu umo paāyukile amba lufu lwa Yesu lwāshitwile dishinda dya lupandilo, wāikele kiponka na ponka ke mwanā bwanga. Dyalelo bantu bavule bampikwa budimbidimbi i batonge kwikala balondi ba Yesu.—Tanga Bilongwa 8:26-31, 35-38.

2. Mwanda waka Yesu wābatyijibwe?

Yesu wādi na kintu kya myaka 30 kitatyi kyāmutokenye Yoano Mubatyiji mu mema a Munonga wa Yodano. Lubatyijo lwa Yesu lwālombwele butyibi bwandi bwa kulonga kiswa-mutyima kya Leza kwadi. (Bahebelu 10:7) Mu kuno kubatyijibwa mubadilwa ne kupāna būmi bwandi bu kitapwa mwanda wa bubi bwa bantu. Nansha ke kumeso kwa kwiya’ye pano panshi, Yesu wādi nyeke usenswe Shandi Yehova ne kumukōkela.—Tanga Mako 1:9-11; Yoano 8:29; 17:5.

  3. Mwanda waka Mwine Kidishitu ufwaninwe kubatyijibwa?

Batwe twibeshile na Yesu— mwanda tubutulwanga bipyamambo. Inoko, Lufu lwa Yesu lwa bu kitapwa lwitukwashanga twikale mu kipwano kiyampe na Leza. (Loma 5:10, 12; 12:1, 2) Tubwanya bine kwikala bantu bandi babadilwa mu kyandi kisaka. (2 Kodinda 6:18) Le tukamona dino dyese namani? Kupityila ku milombelo ya pa kasuku, twipānanga kudi Yehova na kupika mpiko ya kulonga kiswa-mutyima kyandi mu būmi bwetu bonso. Pa kupwa kwipāna uno muswelo, twikulombolanga kumeso a bantu bonso na kubatyijibwa.—Tanga Mateo 16:24; 1 Petelo 4:2.

4. I muswelo’ka oketeakanya ku lubatyijo?

Batumoni ba Yehova befundanga Bible na muntu ye-yense usaka kufwena kudi Leza. Kwifunda Bible ne kutanwa ku kupwila kwa bwine Kidishitu bikaningija buswe boswele Leza ne lwitabijo lobe mwadi. Bikakukwasha kadi utamije ngikadila ne bibidiji biyampe. Kutamija buswe, lwitabijo, ne ngikadilo mikwabo kukakukwasha wiendeje mungya mpiko yobe ya kwingidila nyeke Yehova.—Tanga Yoano 17:3; Bahebelu 10:24, 25.

Shi usaka kuyukila’ko bintu bivule, tala shapita 18 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.