Puonjri Kuom Wach Nyasaye

Ang’o Momiyo Onego Obatis Jokristo?

Sulani nigi penjo manyalo bedo ni isepenjori, kendo onyiso kama inyalo somo e Mumbi mondo iyud dwoko mag penjogo. Joneno mag Jehova diher wuoyo kodi e wi dwokogo.

1. Batiso mar Jokristo tiende en ang’o?

Batiso en yo mar kwayo winjruok maber gi Nyasaye. Omiyo, ok onego obatis Jakristo ka en nyathi mayom, to onego obed ng’at manyalo puonjore e wi Nyasaye kendo obed japuonjre Yesu. (Tich Joote 8:12; 1 Petro 3:21) Wabedo jopuonjre Yesu ka wapuonjore kendo watimo gigo ma ne ochiko.—Som Mathayo 28:19, 20.

E kinde joote Yesu, ji mang’eny nokawo okang’ maok gidigni mondo gipuonjre e wi Nyasaye koda Yesu. Kuom ranyisi, kane dichwo moro opuonjore ni tho mar Yesu ne oyawo yo mar yudo warruok, nobedo japuonjre kanyo gi kanyo. Gie kindegi, jo mang’eny ma chunygi ler oseyiero bedo jolup Yesu.—Som Tich Joote 8:26-31, 35-38.

2. Ang’o momiyo ne obatis Yesu?

Yesu chiegni ne jahigini 30 kane Johana Jabatiso onyume chuth ei pi mar Aora Jordan. Batiso mar Yesu ne en ranyisi ni oyie mondo Nyasaye oti kode e timo dwache. (Jo Hibrania 10:7) Mano ne oriwo chiwo ngimane kaka misango ne richo mar oganda dhano. Kata kane pok owuok e polo mobiro e pinyka, Yesu kinde duto nosebedo kohero kendo winjo Wuon mare.—Som Mariko 1:9-11; Johana 8:29; 17:5.

  3. Ang’o momiyo onego obatis Jakristo?

Chal marwa opogore gi mar Yesu—inyuolowa ka wan joricho. Kata kamano, tho Yesu mar misango miyo wanyalo bedo gi winjruok maber gi Nyasaye. (Jo Rumi 5:10, 12; 12:1, 2) Wanyalo bedo jokanyo mag jood Nyasaye. (2 Jo Korintho 6:18) Ang’o monego ng’ato otim mondo oyud nyadhino? Otimo mano kokalo kuom lamo motimo kende owuon, kochiwore kendo osingore timo dwach Jehova kuom ngimane duto. Bang’ chiwore ne Nyasaye kamano, onyiso chiwruokno e lela e yor batiso.—Som Mathayo 16:24; 1 Petro 4:2.

4. Inyalo timo ang’o mondo obatisi?

Joneno mag Jehova puonjore Muma gi ng’ato ang’ata madwaro sudo machiegni gi Nyasaye. Puonjruok Muma koda dhi e chokruoge mag Jokristo biro tego herani ne Nyasaye koda yie ma in-go kuome. Mano bende biro konyi nyago paro koda timbe mabeyo. Nyago kido kaka hera, yie, koda kido mamoko mabeyo mamoro Nyasaye biro konyi chopo singo mari mar tiyo ne Jehova nyaka chieng’.—Som Johana 17:3; Jo Hibrania 10:24, 25.

Mondo iyud weche momedore, ne sula mar 18 e bugni, Ang’o Ma Muma Puonjo Kuom Adier?, mogo gi Joneno mag Jehova.