Katak Jãn Naan In Anij

Etke Kũrjin Ro Rej Peptaij?

Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ta ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.

1. Ta mel̦el̦ein ñe juon ej peptaij?

Peptaij ej juon wãween jej kajjitõk ippãn Anij ñan ejaak juon jem̦jerã em̦m̦an ippãn. Kõn men in, juon Kũrjin ej aikuj peptaij, jab ilo iien eo ñe ej niñniñ, ak ej ilo iien eo ñe erũtto ñan an mel̦el̦e kõn Anij im erom juon rũkal̦ooran Jijej. (Jerbal 8:12; 1 Piter 3:21, UBS) Jej erom ro rũkal̦ooran Jijej ñe jej katak im mel̦el̦e kõn kien ko ear litok im ñe jej jerbali.​—Riit Matu 28:19, 20.

Ilo raan ko an rijjelõk ro an Jijej, elõñ armej rar jab aepedped in katak kõn e im Anij. Ñan waanjoñak, ãlikin an kar juon em̦m̦aan katak bwe mej eo an Jijej ear kepel̦l̦o̦k juon ial̦ ñan an armej maroñ bõk lo̦mo̦o̦r, ilo m̦õkaj ear erom juon rũkal̦ooran. Rainin, elõñ armej ro em̦ool bũrueer rar pepe in erom rũkal̦ooran Jijej.​—Riit Jerbal 8:26-31, 35-38.

2. Etke Jijej ear peptaij?

Kar 30 an Jijej iiõ ke Jon Ri Peptaij ear peptaiji ium̦win dãn ilo Reba Jordan. Peptaij in an Jijej ear jutak ak kõkkar kõn pepe eo an ñan kõm̦anm̦an ankilaan Anij ikijjeen an kar m̦õn̦õn̦õ in kõm̦m̦ane jerbal in Messaia. (Hibru 10:7) Men in ear bar kitibuj an lel̦o̦k mour eo an ãinwõt juon menin katok kõn jerawiwi ko an armej. Aolep iien, jãn iien eo Jijej ear mour ilañ im itok ñan lal̦ in, ear pokake im yokwe Jeova, Jemen.​—Riit Mark 1:9-11; Jon 8:29; 17:5.

  3. Etke juon Kũrjin ej aikuj m̦okta peptaij?

Jej oktak jãn Jijej kõnke jaar l̦õtak tok ãinwõt ro rejjab weeppãn. Bõtab, katok in mej eo an Jijej ear kõm̦m̦an bwe jen maroñ ejaak juon kõtaan em̦m̦aan ikõtaad im Anij. (Rom 5:10, 12, UBS; Rom 12:1, 2, UBS) Jemaroñ erom ro nejin Anij. (2 Korint 6:18) Ak ewi wãween jemaroñ bõk jeraam̦m̦an in? Eokwe, ej ilo ad make jar ñan Jeova bwe jej ajel̦o̦k kõj make ñan e ilo ad kallim̦ur ñan e bwe jenaaj kõm̦anm̦an ankilaan toõn wõt ad mour. Ãlikin ad kõm̦m̦ane men in, jenaaj kalikkare kallim̦ur in ad ñan Jeova im̦aan mejen armej ro ilo ad peptaij.​—Riit Matu 16:24; 1 Piter 4:2, UBS.

4. Ta eo emaroñ jipañ eok bwe kwõn maroñ pojak ñan peptaij?

Ri Kõnnaan ro an Jeova rej katak Baibõl̦ ippãn jabdewõt eo im ekõn̦aan epaake Anij. Am̦ katak Baibõl̦ ippãn rein im pãd ilo iien kweilo̦k ko aer enaaj kakajoorl̦o̦k yokwe eo am̦ ñan Anij im tõmak eo am̦ ilo e. Bareinwõt, enaaj jipañ eok ñan kwal̦o̦k m̦wil im m̦anit ko rem̦m̦an. Ilo an l̦apl̦o̦k an wõr ippam̦ yokwe, tõmak, im wãween ko jet me rej kabuñbũruon Anij, men kein renaaj jipañ eok ñan kajejjet kallim̦ur eo am̦ bwe kwõnaaj karejar ñan Jeova ñan indeeo.​—Riit Jon 17:3; Hibru 10:24, 25.

Ñan bõk mel̦el̦e ko jet, jouj im lale bok in, ilo jebta 18. Ri Kõnnaan ro an Jeova rar kõm̦m̦ane bok in. TA EO BAIBEL EJ Lukkun KATAKIN?