Lilongesa Ondaka Ya Huku

Omokonda Yatyi Ovakristau Vambatisalelwa?

Onthele ei ipopia omapulo hamwe ove wasukalala nao, nokulekesa opi upondola okuvasa omakumbululo Mombimbiliya yove. Onombangi mba Jeova vena ehambu liokutomphola nove omakumbululo oo.

1. Ombatisimu Yovakristau ihangununa tyi?

Ombatisimu okuita oupanga omuwa na Huku. Moluotyo, omunthu kapondola okumbatisalwa tyina olukembe, mahi umbatisalwa tyina ekula nawa nokutyivila okulilongesa konthele ya Huku nokukala omulongwa wa Jesus. (Atos 8:12; 1 Pedro 3:21) Tukala ovalongwa va Jesus tyina tulilongesa, nokulinga ovipuka etutuma.—Tanga Mateus 28:19, 20.

Kononthiki mbono apostolu mba Jesus, ovanthu ovanyingi kavasetele okulinga etyi valongeswa konthele ya Huku na Jesus. Nthiki imwe etyi omulume umwe alongeswa okuti ononkhia mba Jesus mbaikula ondyila pala eyovo, liwa-liwa wakala omulongwa. Hono, ovanthu vokuna omutima waviuka, vaholovona okukala ovalanduli va Jesus.—Tanga Atos 8:26-31, 35-38.

2. Omokonda Yatyi Jesus Ambatisalelwa?

Jesus ankho una omanima 30 etyi João Batista emunyingiya onthuitwi momeva Enyana Jordau. Ombatisimu ya Jesus yalekesile etokolo liae liokulinga ehando lia Huku, nokutavela otyilinga tyo Mesiya. (Hebreus 10:7) Otyo ankho tyakutikinya okuava omuenyo wae ngotyilikutila pala ononkhali mbovanthu. Alo umwe etyi nkhele eheneye pano pohi, Jesus ankho uholiale Tate yae Jeova, nokumutavela.—Tanga Marcos 1:9-11; João 8:29; 17:5.

  3. Omokonda yatyi Ovakristau Vena okumbatisalwa?

Onkhalelo yetu yelikalela noya Jesus, mokonda onthue tuatyitwa nonkhali. Tyotyili, otyilikutila tyononkhia mba Jesus tyaikula ondyila opo tukale noupanga omuwa na Huku. (Romanos 5:10, 12; 12:1, 2) Hono, tupondola okulinga onthele yombunga yae. (2 Coríntios 6:18) Oñgeni tupondola okuvasa elao olio? Melikuambelo lietu lioulike, tulipakula ku Jeova, okumulaa okuti tuhanda okulinga apeho ehando liae. Tyina tuamalingi elikuambelo olio lioulike, tutyilekesa mounyingi tyina tumbatisalwa.—Tanga Mateus 16:24; 1 Pedro 4:2.

4. Oñgeni molipongiya opo umbatisalwe?

Onombangi mba Jeova velilongesa Ombimbiliya na vana vahanda okulinga oupanga na Huku. Okulilongesa Ombimbiliya nokuenda komaliongiyo Ovakristau matyipameka oupanga wove na Huku nekolelo liove mwe. Tupu, matyikukuatesako okukala novituwa oviwa. Okukala nohole, nekolelo, novituwa ovikuavo oviwa matyikukuatesako okutualako nomulao wove wokuumbila apeho Jeova.—Tanga João 17:3; Hebreus 10:24, 25.

Opo unoñgonoke vali konthele yotyo, tala okapitulu 18 komukanda ou, walingua no Nombangi mba Jeova.