Aprende husi Maromak nia Liafuan

Tanbasá mak ema kristaun hetan batizmu?

Informasaun iha neʼe esplika kona-ba pergunta neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Ema kristaun nia batizmu katak sá?

Batizmu mak dalan atu husu Maromak hodi iha relasaun diʼak ho nia. Tan neʼe, ema kristaun tenke hetan batizmu laʼós kuandu sira sei bebé, maibé kuandu sira bele ona aprende kona-ba Maromak no sai Jesus nia dixípulu. (Apostolu 8:12; 1 Pedro 3:21, MF) Ita sai Jesus nia dixípulu kuandu ita aprende no halo tuir buat neʼebé nia haruka.—Lee Mateus 28:19, 20, MF.

Iha apóstolu sira-nia tempu, ema barak halo buat ruma kedas atu aprende kona-ba Maromak no Jesus. Porezemplu, kuandu ema ida aprende katak Jesus nia mate loke dalan hodi ema bele hetan salvasaun, ema neʼe halo buat ruma kedas atu sai dixípulu. Ohin loron, ema barak neʼebé ho haraik-an no laran-moos buka lia-loos, foti desizaun atu sai Jesus nia dixípulu.—Lee Apostolu 8:26-31, 35, 36, 38.

2. Tanbasá mak Jesus hetan batizmu?

Jesus maizumenus tinan 30 kuandu João Baptista hatama nia iha Mota Jordaun hodi fó batizmu ba nia. Jesus nia batizmu hatudu ninia desizaun atu halo tuir Maromak nia hakarak. (Ebreu 10:7) Maromak nia hakarak inklui mós fó ninia moris nuʼudar sakrifísiu atu kasu ema hotu nia sala. Husi tempu neʼebé Jesus sei moris iha lalehan toʼo nia mai iha rai, nia sempre hadomi no halo tuir ninia Aman Jeová nia hakarak.—Lee Marcos 1:9-11; Joao 8:29; 17:5.

  3. Tanbasá mak ema kristaun tenke hetan batizmu?

Ita-nia situasaun la hanesan ho Jesus tanba ita hotu moris mai nuʼudar ema sala-naʼin. Maibé tanba Jesus mate atu kasu ita-nia sala, ida-neʼe loke dalan ba ita atu iha relasaun diʼak ho Maromak. (Roma 5:10, 12; 12:1, 2) Tuir loloos, agora ita iha oportunidade atu bele sai parte iha Maromak nia família. (2 Korinto 6:18) Oinsá mak ita bele hetan oportunidade espesiál neʼe? Hodi dedika ita-nia an ba Jeová liuhusi orasaun. Kuandu ita halo ida-neʼe, ita promete ba Maromak katak ita sei halo ninia hakarak iha ita-nia moris tomak. Tuirmai, ita hatudu ba ema seluk katak ita dedika ona ita-nia an ba Maromak hodi hetan batizmu.—Lee Mateus 16:24; 1 Pedro 4:2.

4. Saida deʼit mak ita bele halo atu hetan batizmu?

Testemuña ba Jeová estuda ho ema hotu neʼebé hakarak hakbesik ba Maromak. Hodi estuda Bíblia no tuir reuniaun kristaun nian, neʼe sei hametin ita-nia domin no ita-nia fiar ba Maromak. Ida-neʼe mós sei ajuda ita atu haburas hahalok no toman neʼebé diʼak. Hodi haburas domin, fiar, no hahalok sira neʼebé halo Maromak kontente, neʼe sei ajuda ita atu halo tuir ita-nia promete hodi serbí Jeová ba nafatin.—Lee Joao 17:3; Ebreu 10:24, 25.

Atu hetan informasaun liután, haree kapítulu 18 husi livru Tuir Loloos, Saida mak Bíblia Hanorin? Livru neʼe husi Testemuña ba Jeová.