ካብ ቃል ኣምላኽ ተምሃር

ክርስትያናት ዚጥመቑ ስለምንታይ እዮም፧

እዛ ዓንቀጽ እዚኣ፡ ኬተሓሳስበካ ዚኽእል ሕቶታት ኣበጊሳ፡ መልሱ ኣብ መጽሓፍ ቅዱስካ ኣበይ ከም እትረኽቦ ኽትሕብረካ እያ። ናይ የሆዋ መሰኻኽር ብዛዕባ መልሲ እዚ ሕቶታት እዚ ኼመያይጡኻ ባህ እዩ ዚብሎም።

1. ክርስትያናዊ ጥምቀት እንታይ እዩ፧

ምስ ኣምላኽ ጽቡቕ ርክብ ኪህልወና እንተ ደሊና፡ ክንጥመቕ ኣሎና። ስለዚ፡ ሓደ ክርስትያን ሕጻን ከሎ ዘይኰነስ፡ ብዛዕባ ኣምላኽ ኪመሃርን ወደ መዝሙር የሱስ ኪኸውንን ኣብ ዚኽእለሉ ዕድመ ምስ በጽሐ እዩ ኺጥመቕ ዘለዎ። (ግብሪ ሃዋርያት 8:12፣ 1 ጴጥሮስ 3:21) ብዛዕባ እቲ የሱስ ዝኣዘዞ ነገራት ምስ ተመሃርናን ኣብ ግብሪ ኸነውዕሎ ምስ ጀመርናን ኢና ወደ መዝሙር የሱስ እንኸውን።—ማቴዎስ 28:19, 20 ኣንብብ።

ብግዜ ሃዋርያት የሱስ፡ ብዙሓት ሰባት ብዛዕባ ኣምላኽን የሱስን ምስ ተማህሩ፡ ብዘይ ውዓል ሕደር ስጕምቲ ወሰዱ። ንኣብነት፡ ሓደ ሰብኣይ፡ ሞት የሱስ ናብ ድሕነት ከም ዚመርሕ ምስ ፈለጠ፡ ብኡብኡ ወደ መዝሙር የሱስ ኰነ። ሎሚ እውን፡ ብዙሓት ቅኑዓት ሰባት ሰዓብቲ የሱስ ኪዀኑ መሪጾም እዮም።—ግብሪ ሃዋርያት 8:26-31, 35-38 ኣንብብ።

2. የሱስ ስለምንታይ እዩ ተጠሚቑ፧

የሱስ ብዮሃንስ መጥምቕ ኣብ ሩባ ዮርዳኖስ ኪጥመቕ ከሎ፡ ወዲ 30 ዓመት እዩ ነይሩ። ጥምቀት የሱስ፡ ነቲ ፍቓድ ኣምላኽ ንምፍጻም ዝገበሮ ውሳነ ዜመልክት እዩ ነይሩ። (እብራውያን 10:7) መሲሕ ከም ምዃኑ መጠን፡ ንሓጢኣት ደቂ ሰብ ንምሽፋን ህይወቱ ኺውፊ ነበሮ። ካብ ሰማይ ናብ ምድሪ ቕድሚ ምምጻኡ ነዊሕ ይገብር እውን እንተ ዀነ፡ ንየሆዋ ኣቦኡ የፍቅሮን ይእዘዞን ነበረ።—ማርቆስ 1:9-11፣ ዮሃንስ 8:29፣ 17:5 ኣንብብ።

  3. ሓደ ክርስትያን ኪጥመቕ ዘለዎ ስለምንታይ እዩ፧

ሓጥኣን ኴንና ስለ እተወለድና፡ ኵነታትና ኻብ ናይ የሱስ እተፈልየ እዩ። ኰይኑ ግና፡ መስዋእታዊ ሞት የሱስ፡ ምስ ኣምላኽ ጽቡቕ ርክብ ምእንቲ ኺህልወና፡ ኣጋጣሚ ኸፊቱልና እዩ። (ሮሜ 5:10, 12፣ 12:1, 2) ኣባላት ስድራ ቤት ኣምላኽ ክንከውን ንኽእል ኢና። (2 ቈረንቶስ 6:18) ብኸመይ ኢና ኸምዚ ዝኣመሰለ ፍሉይ መሰል ክንረክብ እንኽእል፧ ኣብ ናይ ብሕቲ ጸሎትና፡ ኣብ ምሉእ ህይወትና ፍቓድ የሆዋ ኽንገብር ከም እንደሊ መብጽዓ ብምእታው፡ ርእስና ንየሆዋ ኽንውፊ ኣሎና። ድሕሪኡ፡ ኣብ ቅድሚ ህዝቢ ብምጥማቕ፡ ነቲ ብብሕቲ ዝገበርናዮ ወፈያ ኸነርኢ ኣሎና።—ማቴዎስ 16:24፣ 1 ጴጥሮስ 4:2 ኣንብብ።

4. ንጥምቀት ክትዳሎ እትኽእል ብኸመይ ኢኻ፧

ናይ የሆዋ መሰኻኽር ምስ ዝዀነ ይኹን ናብ ኣምላኽ ኪቐርብ ዚደሊ ሰብ፡ መጽናዕቲ መጽሓፍ ቅዱስ ይገብሩ እዮም። መጽሓፍ ቅዱስ ምጽናዕን ኣብ ክርስትያናዊ ኣኼባታት ምእካብን፡ ነቲ ንኣምላኽ ዘሎካ ፍቕርን ነቲ ኣብኡ ዘሎካ እምነትን ኬደልድሎ እዩ። ብዘይካዚ፡ ኣወንታዊ ኣረኣእያን ልማድን ንኸተጥሪ ኺሕግዘካ እዩ። ፍቕርን እምነትን ካልእ ኣምላኻዊ ባህርያትን እንተ ኣማዕቢልካ፡ ነቲ ንየሆዋ ንዘለኣለም ንኸተገልግሎ ዝኣተኻዮ መብጽዓ ንኽትፍጽሞ ኺሕግዘካ እዩ።—ዮሃንስ 17:3፣ እብራውያን 10:24, 25 ኣንብብ።

ዝያዳ ሓበሬታ እንተ ደሊኻ፡ ኣብ ምዕራፍ 18 መጽሓፍ ቅዱስ ብሓቂ እንታይ እዩ ዚምህር፧ ዘርእስታ ብናይ የሆዋ መሰኻኽር እተሓትመት መጽሓፍ ርአ።

[ኣብ ገጽ 17 ዘሎ ስእሊ]

መጽሓፍ ቅዱስ ብሓቂ እንታይ እዩ ዚምህር፧