Hen Kwagh Ken Mkaanem Ma Aôndo

Er Nan Ve i Eren Mbakristu Batisema?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Batisema u Mbakristu la inja na ér nyi?

Batisema ka u pinen Aôndo ian ser a wase se se ya ikyar i dedoo vea na. Sha nahan yô, gba u a er Orkristu batisema shighe u nan lu iyev la ga, kpa a lu shighe u nan vese nan kom u henen kwagh u Aôndo shi hingir orhenen u Yesu la. (Aerenakaa 8:12; 1 Peteru 3:21) Ka se hingir orhenen u Yesu, shighe u se hen atindi a na shi se lu eren sha mi la.—Ôr Mateu 28:19, 20.

Sha ayange a mbaaapostoli mba Yesu la, ior kpishi hen kwagh u Aôndo man u Yesu, ve kera timbir a timbir ga. Ikyav i tesen yô, zum u orgen kav er ku u Yesu la, u bugh gbenda u zuan a myom yô, fele je maa a hingir orhenen u Yesu. Nyian kpa mbaasemamimi kpishi tsua u hingir mbahenen mba Yesu.—Ôr Aerenakaa 8:26-31, 35-38.

2. Yange i er Yesu batisema sha ci u nyi?

Yesu yange zurum anyom 30 shighe u Yohane u eren batisema mir un shin mngerem ma Ifi u Yordan la. Batisema u Yesu er la lu u tesen ér un tsua u eren ishima i Aôndo. (Mbaheberu 10:7) Kwagh ne wa u nan uma na sha u a lu nagh sha ci u asorabo a uumace la kpa ker. Shighe u Yesu lu a va shin tar ga la je kpa, yange Ter na Yehova doo un ishima shi ungwan imo na hanma shighe cii.—Ôr Marku 1:9-11; Yohane 8:29; 17:5.

  3. Gba u a er Orkristu batisema sha ci u nyi?

Mlu wase kaha kposo a u Yesu, sha ci u se mba mbaasorabo. Nahan kpa, nagh ku Yesu na sha uma na la na yô, se fatyô u yan ikyar i dedoo a Aôndo. (Mbaromanu 5:10, 12; 12:1, 2) Se fatyô u hingir kwagh na sha u lun ken tsombor na. (2 Mbakorinte 6:18) Se fatyô u lun sha ian la nena? Ka se tsegha ayol a ase sha ci u Yehova sha u tôndon zwa a na ser se er ishima na sha ayange a uma wase cii, ken msen u se er ken iuv la. Ka sea tseghan ayol a ase nahan cii yô, se tese ikyav i iyoltseghan yase la ken igbar sha u eren batisema.—Ôr Mateu 16:24; 1 Peteru 4:2.

4. U wa ago iyol u eren batisema nena?

Mbashiada mba Yehova ka ve hen Bibilo a hanma or u i sar nan u kporom hen Aôndo yô. Aluer u ngu henen Bibilo shi zan mbamkombo yô, Aôndo una seer doon we ishima shi jighjigh u ú ne un la una hemba taver cii. Shi kwagh ne una wase u u̱ lun a mbamhen man aeren a dedoo. Aluer u ngu a dooshima man jighjigh u nan kua aeren a doo a Aôndo agen yô, kwagh ne una wase u u̱ kuren ityendezwa i ú er wer u civir Yehova gbem sha won la.—Ôr Yohane 17:3; Mbaheberu 10:24, 25.

Wea soo u seer zuan a iwanger yô, ôr takerada u Bibilo Tese Ér Nyi Jimi? la, ityough 18, ka Mbashiada mba Yehova ve gber u ye.