Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵakukondwa kudumbiskana namwe mazgoro ghake.

1. Kasi ubapatizo ni vici?

Ubapatizo cikung’anamura kulomba Ciuta kuti tiŵe nayo pamtende. Ntheura munthu wakwenera kubapatizika para ni bonda yayi, kweni mulara. Wakwenera kuŵa na mahara mwakuti wangasambira vya Ciuta na kuŵa msambiri wa Yesu. (Milimo 8:12; 1 Petrosi 3:21) Munthu wakuŵa msambiri wa Yesu para wasambira na kucita ivyo Yesu wakayowoya.—Ŵazgani Mateyu 28:19, 20.

Mu nyengo ya ŵapositole, ŵanthu ŵanandi ŵakacitangapo kanthu mwaluŵiro kuti ŵasambire vya Ciuta na Yesu. Munthu munyake wakati wasambira kuti nyifwa ya Yesu yili kujura nthowa kuti ŵanthu ŵaponoskeke, nyengo yeneyiyo wakazgoka msambiri. Mazuŵa ghano, ŵanthu ŵanandi awo ŵakukhumba nadi kumanya unenesko, ŵasankha kulondezga Yesu.—Ŵazgani Milimo 8:26-31, 35-38.

2. Cifukwa wuli Yesu wakabapatizika?

Yesu wakaŵa na vilimika 30 apo Yohane Mbapatizi wakamubizga mu Mlonga wa Yorodani. Yesu wakabapatizika kulongora kuti wajipeleka kucita khumbo la Ciuta. (Ŵahebere 10:7) Cinyake ico wakenera kucita nkhupeleka umoyo wake kuŵa sembe yakuwombolera ŵanthu ku kwananga. Nanga ni apo wakaŵa kucanya, nyengo zose Yesu wakatemwanga Ŵawiske na kuŵapulikira.—Ŵazgani Mariko 1:9-11; Yohane 8:29; 17:5.

  3. Cifukwa wuli Ŵakhristu ŵakwenera kubapatizika?

Ise na Yesu tikupambana, cifukwa tili kubabika ŵakwananga. Kweni cifukwa ca sembe iyo Yesu wali kupeleka, tingaŵa pamtende na Ciuta. (Ŵaroma 5:10, 12; 12:1, 2) Nakuti tingaŵa ŵana ŵa Ciuta. (2 Ŵakorinte 6:18) Kasi munthu wangaŵa wuli mwana wa Ciuta? Wakwenera kulomba kwayekha na kumulayizga Yehova kuti wacitenge khumbo Lake umoyo wake wose. Para walomba, wakubapatizika pakweru kuti wose ŵamanye ico walayizga Yehova.—Ŵazgani Mateyu 16:24; 1 Petrosi 4:2.

4. Kasi munganozgekera wuli ubapatizo?

Ŵakaboni ŵa Yehova ŵakusambira Baibolo na waliyose uyo wakukhumba kusendelera kwa Ciuta. Kusambira Baibolo na kuwungana vimovwiraninge kuti mumutemwe comene Ciuta, ndipo cipulikano cinu mwa iyo cikurenge. Kweniso ivi vimovwiraninge kuŵa na nkharo yiwemi. Para mwaŵa na citemwa, cipulikano na nkharo iyo Ciuta wakutemwa, vimusuzganinge yayi kufiska layizgo linu lakuti muteŵetere Yehova muyirayira.—Ŵazgani Yohane 17:3; Ŵahebere 10:24, 25.

Kuti mumanye vinandi, wonani cipaturo 18 mu buku la Kasi Baibolo Likusambizgaci Comenecomene?, lakupharazgika na Ŵakaboni ŵa Yehova.