Mu Fil Ban’en Ko Thin Rok Got

Mang Fan ni Yima Taufenag e Piin Kristiano?

Re article ney e be weliy boch e deer ni kaam fith ma be dag ko uw e rayog ni ngam pirieg e fulweg riy u Bible. Pi Mich Rok Jehovah e yad ra felfelan’ ni ngar tamilangnaged e pi fulweg ney ngom.

1. Mang fan ni yima taufenag e piin Kristiano?

Taufe e aram reb e kanawo’ ni ga be yog ngak Got ni ga baadag ni nge fel’ e tha’ u thilmew. Ere reb e Kristiano e susun ni ngan taufenag u nap’an ni ke ilal ni ka yog ni nge fil ban’en u murung’agen Got ma be folwok rok Jesus, ma gathi u nap’an ni kab bitir. (Acts 8:12; 1 Peter 3:21) Gad ra mang pi gachalpen Jesus u nap’an ni kad filed ma gad fol ko pi n’en ni ke tay chilen ngodad.​—Mu beeg e Matthew 28:19, 20.

Nap’an e pi apostal rok Jesus kakrom ma boor e girdi’ ni ur filed murung’agen Got nge Jesus nib papey. Ni bod nnap’an ni fil reb e pumoon murung’agen e yam’ ni tay Jesus ni ir e ke bing e kanawo’ ni nge yog e yafas ni manemus, mab papey ni nge mon’og nge mang reb i gachalpen Jesus. Ngiyal’ ney e ke yoor e girdi’ ni yad ba yul’yul’ ni kar mel’eged ni ngar folwokgad rok Jesus.​—Mu beeg e Acts 8:26-31, 35-38.

2. Mang fan ni kan taufenag Jesus?

Sogonap’an 30 e duw yangaren Jesus me yan ngak John ni Tataufe nge taufenag ko fare Lul’ ni Jordan. Taufe ni tay Jesus e be m’ug riy ni baadag ni nge rin’ e n’en nib m’agan’ Got ngay. (Hebrews 10:7) Re n’ey e ba muun ngay e yafas rok ni pi’ ni maligach ni fan ngak gubin e girdi’. U m’on ni nge yib nga fayleng, ma ba t’uf Jehovah ni Chitamangin rok ma ma ta’ fan.​—Mu beeg e Mark 1:9-11; John 8:29; 17:5.

 3. Mang fan ni nge un reb e Kristiano ko taufe?

Ba thil rarogodad ngak Jesus, ya ni gargelnagdad ni gad bogi tadenen. Machane, bochan fare maligach ni pi’ Jesus ma aram e rayog ni nge fel’ e tha’ u thildad Got. (Roma 5:10, 12; 12:1, 2) Riyul’ ni ke yog ni nge fel’ e tha’ u thildad ma kad manged girdien. (2 Korinth 6:18) Uw rogon me yog e re tow’ath nem ngodad? Nap’an ni ga ra ognagem ngak Jehovah ma ga ra meybil ni goo gur ni ga be micheg ngak ni ga baadag ni ngam rin’ e n’en nib m’agan’ ngay u n’umngin nap’an e yafas rom. Tomuren ni kad ognaged gadad ngak Got ma gad un ko taufe ni aram e gad be tamilangnag ngak urngin e girdi’ ni kad ognaged gadad ngak.​—Mu beeg e Matthew 16:24; 1 Peter 4:2.

4. Uw rogon ni ngam fal’eg rogom ni ngam un ko taufe?

Pi Mich Rok Jehovah e yad ma fil e Bible ngak e piin ni yad baadag ni ngar chugurgad ngak Got. Fol Bible nge muulung ni yima un ngay e ra gelnag e t’ufeg nge michan’ rom ngak Got. Re n’ey e ku rayog ni nge ayuwegem nge yog ni nge puluw e lem rom nge pi n’en ni ga ma rin’ ko tin m’agan’ Got ngay. Ra ngam maruweliy e t’ufeg, michan’ nge ku boch e pi fel’ngin Got nib fel’ ma ra ayuwegem ko n’en ni kam micheg ngak Jehovah ni aram e ngam pigpig ngak ni manemus.​—Mu beeg e John 17:3; Hebrews 10:24, 25.

Ra ga baadag ni ngkum nang boch, mag guy fare thin ni bay ko guruy ni 18 ko re ke babyor ney ni ke fal’eg e Pi Mich Rok Jehovah.