Tra evangelietori de di e fruteri wi moro fu Yesus?

„A SANI disi prenspari srefisrefi. Wan lo sma o mandi.” „A sani disi e kenki a fasi fa wi ben frustan a Kresten bribi fu a fosi yarihondro.” Den sabiman di taki den sani disi ben breiti di na „Evangelietori fu Yudas” kon na doro, wan buku di ben lasi moro leki 1600 yari (a prenki na tapusei).

Sma e bigin poti prakseri baka na den sortu evangelietori disi. Son sma feni taki den e meki sma kon sabi prenspari sani di ben pasa èn sosrefi sani di wi kan leri fu a libi fu Yesus. Den evangelietori disi ben kibri wan heri pisi ten. San na den tori disi? A tru taki den e leri wi moro fu Yesus èn fu a Kresten bribi, tori di no de fu feni na ini Bijbel?

Bijbel evangelietori nanga tra evangelietori

Na a pisi ten fu a yari 41 te go miti 98 baka Krestes, dan Mateyus, Markus, Lukas, nanga Yohanes ben skrifi „a historia fu Yesus Krestes” (Mateyus 1:1). Son leisi sma e kari den tori disi evangelietori tu. Dati wani taki „bun nyunsu” di abi fu du nanga Yesus Krestes.​—Markus 1:1.

Aladi sma ben fruteri èn ben skrifi furu sani fu Yesus, toku sma e si den fo Evangelietori disi leki den wan-enkri wan di skrifi nanga yepi fu Gado en santa yeye èn di warti fu de wan pisi fu den Santa Buku fu Bijbel. Den tori disi e sori wi taki ’den sani di sma leri wi’ fu a libi fu Yesus na grontapu èn fu den sani di a leri sma, „de so trutru” (Lukas 1:1-4; Tori fu den apostel 1:1, 2; 2 Timoteyus 3:16, 17). Den fo Evangelietori disi kari na ini ala den owruten buku di e sori sortu buku na wan pisi fu den Kresten Griki Buku fu Bijbel. Dati meki wi no abi fu tweifri efu den buku disi na wan pisi fu a Wortu fu Gado trutru.

Ma bakaten, sma kon feni tra buku di den ben e kari evangelietori tu.

Na a kabapisi fu a di fu tu yarihondro, Irene-us fu Lyon skrifi taki sma di ben drai baka gi a Kresten bribi ben abi „bun furu buku di e fruteri tori di no de fu feni na ini Bijbel èn sosrefi furu tra buku di ben e fruteri leitori”. Wan lo fu den ben de evangelietori „di densrefi ben skrifi fu bruya a frustan fu sma di no e denki krin”. Dati meki sma kon frustan taki den ben musu luku bun nanga den sortu falsi evangelietori disi. Den no ben bun fu leisi noso fu abi srefi.

Ma moniki fu owruten nanga sma di ben e skrifi buku abra, sorgu taki den buku dati no lasi gowe. Na ini a di fu 19 yarihondro, bun furu sma ben wani sabi moro fu den sortu tori disi. Na so den kon feni furu fu den tori disi èn sosrefi sani di sabiman ben skrifi fu den. Den feni difrenti evangelietori tu. Na ini a ten disi sma tyari den tori disi kon na doro na ini furu prenspari tongo.

Den tra evangelietori: Leitori di sma fruteri fu Yesus

Nofo tron den tra evangelietori disi e taki fu sma di Bijbel no e taki furu fu den, noso di a no e kari srefisrefi. Den e fruteri wan lo sani tu di abi  fu du nanga a ten di Yesus ben de wan pikin-nengre ete. Luku wan tu eksempre.

▪ Na „Evangelietori di sma e taki dati Yakobus skrifi en”, èn di den e kari sosrefi „Di Maria gebore”, e fruteri fu a ten di Maria gebore, fu a ten di a ben pikin, èn fu a trowlibi fu en nanga Yosef. Sma abi leti fu taki dati den tori disi na anansitori di no e kruderi nanga Bijbel. A tori disi ben skrifi fu meki sma denki taki Maria ben tan wan nyunwenke, èn fu gi Maria grani.​—Mateyus 1:24, 25; 13:55, 56.

▪ Na evangelietori fu Tomas e taki fu Yesus en pikin-nengre ten (fu 5 te go miti 12 yari). A e taki dati Yesus ben du difrenti sortu wondru, aladi den sani dati no ben pasa trutru. (Luku Yohanes 2:11.) A tori e taki tu dati Yesus ben de wan ogri boi di ben e atibron esi-esi, di ben lobi puru atibron tapu tra sma, èn di ben e gebroiki a makti fu en fu pai ogri nanga ogri. A ben du dati nanga leriman, birtisma, èn nanga tra pikin. A ben meki sonwan fu den kon breni noso malengri, èn a ben kiri sonwan fu den srefi.

▪ Sonwan fu den tra evangelietori, soleki na „Evangelietori fu Petrus”, e taki fu sani di abi fu du nanga a ten di den tyari Yesus go na fesi krutu. A e taki tu fu a dede nanga na opobaka fu en. Tra evangelietori, soleki a wan di nen „Den sani di Pilatus du”, èn di de wan pisi fu na „Evangelietori fu Nikodeimus”, e taki fu sma di ben abi fu du nanga den tori dati. Fu di den tori disi abi fu du nanga sani di no tru èn nanga sma di no ben libi trutru, meki wi no kan bribi den. Na „Evangelietori fu Petrus” e meki sma denki taki Pontius Pilatus no ben du nowan ogri èn a e taki fu na opobaka fu Yesus neleki a de wan sortu span tori.

Tra evangelietori nanga falsi Kresten leri

Na ini december 1945, gronman feni 13 papirus lolo krosibei fu a dorpu Nag Hammadi, na a hei pisi fu Egepte. Den lolo dati ben abi 52 pisi tori na tapu. Sma e taki dati den lolo disi ben de fu den Gnostik sma, wan grupu di ben e poti prakseri na kerkitori èn na filosofia. A grupu disi ben e moksi dangra leri, heiden leri, Griki filosofia, leri fu a Dyu bribi èn fu a Kresten bribi kon na wán. Na so den ben e pori a bribi fu son sma di ben e taki dati den na Kresten.​—1 Timoteyus 6:20, 21.

Na ini a „Bibliotheek fu Nag Hammadi”, sma feni na „Evangelietori fu Tomas”, na „Evangelietori fu Filipus”, nanga na „Evangelietori fu sani di tru”. Den tori disi e taki fu difrenti dangra tori fu den Gnostik sma, neleki den tori dati ben kon fu Yesus. Na „Evangelietori fu Yudas”, di sma feni no so langa pasa, de fu a ten fu den Gnostik sma tu. A e taki bun fu Yudas èn a e sori taki a ben de a wan-enkri apostel di ben e frustan trutru suma Yesus ben de. Wan man di ondrosuku na evangelietori disi e taki dati a tori disi no e sori taki Yesus „na wan frulusuman di dede gi den sondu fu grontapu, ma taki a ben de wan leriman nanga wan sma di e yepi trawan fu kon abi koni nanga sabi”. Den Evangelietori di skrifi nanga yepi fu santa yeye e leri wi taki Yesus dede trutru leki wan ofrandi gi den sondu fu grontapu (Mateyus 20:28; 26:28; 1 Yohanes 2:1, 2). A de krin taki den Evangelietori fu den Gnostik sma no ben skrifi fu tranga a bribi di sma abi na ini Bijbel, ma fu swaki a bribi fu den.​—Tori fu den apostel 20:30.

Den Bijbel evangelietori na den moro bunwan

Te wi e luku den tra evangelietori moro fini, dan a de krin taki den tori dati no tru. Te wi e teki den gersi nanga den Evangelietori fu Bijbel, dan a e kon na krin taki den no ben skrifi nanga yepi fu Gado en santa yeye (2 Timoteyus 1:13). Fu di den sma di skrifi den buku disi no ben sabi Yesus nanga den apostel, meki a no kan taki den no e fruteri nyun tori fu Yesus èn fu a Kresten bribi. Na presi fu dati, den tori di den fruteri no soifri, sma srefi meki den, èn den de leitori di no e yepi wi fu kon sabi Yesus nanga den leri fu en moro bun.​—1 Timoteyus 4:1, 2.

Ma Mateyus nanga Yohanes ben de tu fu den 12 apostel. Markus nanga Lukas ben de bun mati fu Petrus nanga Paulus. Den ben skrifi den Evangelietori fu den nanga yepi fu a santa yeye fu Gado (2 Timoteyus 3:14-17). Fu dati ede, den fo Evangelietori abi ala sani na ini di wan sma abi fanowdu fu man bribi taki „Yesus na a Krestes èn a Manpikin fu Gado”.​—Yohanes 20:31.

[Sma di abi a reti fu a prenki na tapu bladzijde 18]

Kenneth Garrett/​National Geographic Stock