Pukapukaanga ki te Tangata Ngutuare​—Ko Iesu Ainei te Atua?

E MATAORA ana te Au Kite o Iehova i te uriuri i te Pipiria ki te au tangata ngutuare. E tumu manako ainei taau e manako ra no runga i te Pipiria? Te inangaro ra ainei koe i te kite i tetai au irinakianga e te au peu akonoanga a te Au Kite o Iehova? Me koia ia, auraka e emiemi i te ui i te reira me aravei akaou koe i tetai o te Au Kite. Ka rekareka aia i te uriuri i taua au manako ra kia koe.

Teia tetai au pukapukaanga ta tetai o te Au Kite o Iehova i rave ana ki tetai tangata ngutuare. Akamanako ana e kua aere ana tetai Kite ko Karen tona ingoa ki te kainga o tetai vaine ko Samantha tona ingoa.

Tikai Ainei e Kare Koe e Irinaki Ana ia Iesu?

Samantha: Kua akakite mai toku orometua e kare te Au Kite o Iehova e irinaki ana ia Iesu. E tika ainei te reira?

Karen: Ka inangaro au i te akapapu atu e te irinaki nei matou ia Iesu. Te tikaanga, te irinaki nei matou e e puapinga tikai te akarongo kia Iesu e rauka ai te ora.

Samantha: Irinaki katoa au i te reira.

Karen: Aiteite to taua manako. Ko Karen toku ingoa. Koai ra toou ingoa?

Samantha: Ko Samantha. Meitaki i te aravei ia koe.

Karen: Meitaki katoa i te aravei ia koe e Samantha. Penei i manako ana koe, ‘Me te irinaki tikai ra te Au Kite o Iehova ia Iesu, eaa ra te au tangata ka tuatua akapera ei?’

Samantha: Ae, inangaro au i te kite eaa te tumu.

Karen: Ka akamarama poto atu au e Samantha, e ketaketa tikai to matou akarongo no Iesu, kare ra matou e irinaki ana i te au mea ravarai ta te au tangata e tuatua ra no runga iaia.

Samantha: Ka rauka ia koe te oronga mai i tetai akaraanga?

Karen: Ae. Te karanga ra tetai pae e e tangata meitaki ua a Iesu. Kare ra matou e ariki ana i taua manako ra.

Samantha: Kare rai au e ariki ana i te reira.

Karen: Aiteite katoa to taua manako no runga i te reira. Te rua o te akaraanga, kare te Au Kite o Iehova e ariki ana i te au apiianga kare e tano ana ki ta Iesu uaorai i tuatua no runga i tona pirianga ki tona Metua.

Samantha: Eaa te aiteanga o te reira?

Karen: Maata te au akonoanga e apii ra e ko Iesu te Atua. Penei kua apiiia atu ana tena kia koe.

Samantha: Ae, kua karanga mai toku orometua e aiteite rai te Atua raua ko Iesu.

Karen: Ka ariki ainei koe e ko te mataara meitaki e kite ei i te tika no runga ia Iesu, na te apiianga i tana i tuatua mai no runga iaia uaorai?

Samantha: Ae, ka ariki au i te reira.

Eaa ta Iesu i Tuatua Mai?

Karen: Ka uriuri ana taua i tetai irava te akamarama maira i te reira manako. Akara i ta taua i tatau ana i roto ia Ioane 6:38. Te karanga nei a Iesu e: “I eke mai nei oki au mei te rangi mai, e  akono i to tei tono mai iaku nei anoano, auraka i toku uaorai anoano.” Ka riro teia au tuatua ei akaekoko anga i te manako me ko Iesu rai te Atua.

Samantha: Eaa te aiteanga o te reira?

Karen: Akara ana ra e kare a Iesu e karanga nei e i aere mai aia mei te rangi mai i te rave i tona uaorai anoano.

Samantha: Tano rai tena, te karanga ra aia e kua aere mai aia i te rave i te anoano o Tei tono mai iaia.

Karen: Inara me ko Iesu te Atua, naai i tono mai iaia mei te rangi mai? E eaa ra a Iesu i ariki ei i te rave i te anoano o Tei tono mai iaia?

Samantha: Te marama atu nei au i toou manako. Inara kare i papu iaku me te akapapu mai nei teia irava okotai e kare ko Iesu te Atua.

Karen: Akamanako ana eaa ta Iesu i tuatua i tetai atianga ke. Kua tuatua katoa aia mei te reira rai i te pene o Ioane te ka aru mai. Ka rauka ia koe i te tatau mai ia Ioane 7:16?

Samantha: Ae. “Kua karanga aturā Iesu kia ratou, na ko atura, Kare taku uaorai i taku e apii nei, nana ra, na tei tono mai iaku nei.”

Karen: Meitaki, e Samantha. Mei ta te irava e taiku ra, te apii ra ainei a Iesu i tona uaorai manako?

Samantha: Kare, te karanga ra aia e no ko mai tana au apiianga i Tei tono mai iaia.

Karen: Tika rai tena. I na, ka akamanako ana taua e: ‘Naai i tono mai ia Iesu? Naai i oronga mai kiaia te tuatua mou tana i apii mai?’ Kare ainei e e maata atu Aia ia Iesu? Me koia ia, e maata atu tei tono mai i tei tonoia mai.

Samantha: Reka tikai au i tena manako. Kare rava au i tatau ana i tera irava i mua ana.

Karen: Akamanako katoa ana i ta Iesu au tuatua i roto ia Ioane 14:28: “Kua kite kotou i taku i karanga atura e, Te aere ke nei au, e ka oki akaou mai au kia kotou nei. Naringa kotou i anoano mai iaku, kua rekareka kotou, ko au i karanga e ka aere au ki te Metua ra: e maata oki toku Metua iaku.” Mei ta te irava e akakite maira, eaa to Iesu manako no runga iaia uaorai e tona pirianga ki tona Metua?

Samantha: Kua tuatua aia e e maata atu tona Metua iaia. Toku manako te manako ra aia e e maata atu te Atua iaia.

Karen: Tika rava tena. Tetai akaraanga akaou, akara ana i ta Iesu i akakite ki tana au pipi tei rekotiia i roto ia Mataio 28:18. Te karanga nei te irava e: “Ko te mana katoa o to te rangi e te ao katoa nei, kua tukuia mai, tei iaku anake.” Te karanga ra ainei a Iesu e tei iaia te au mana katoatoa?

Samantha: Kare, kua karanga aia e kua orongaia mai te reira kiaia.

Karen: Inara me ko Iesu te Atua, akapeea aia te oronga anga kiaia uaorai te mana maata? E naai i oronga i te reira kiaia?

Samantha: Ka akamanako ana au i te reira.

Koai ra Tana e Tuatua Ra?

Karen: Te vai katoa ra tetai manako ekoko e me ko Iesu tikai te Atua.

Samantha: Eaa te reira?

Karen: Ko ta taua i tatau ana no runga i to Iesu papetitoanga. Akara ana i te tataanga i roto ia Luka 3:21, 22. Ka rauka ia koe i te tatau mai i teia nga irava?

Samantha: “E iaia i bapetizo i te au tangata katoa ra, i bapetizo katoaiā Iesu, e te pure ra aia, mavete akera te rangi, E kua eke maira te Vaerua Tapu ki rungao iaia mei te kukupa ra te tu, e kua tae maira tetai reo mei runga mai i te rangi, i te na ko anga mai, Ko taku tamaiti akaperepere koe; kua mareka rava au ia koe.”

Karen: Te kite ra koe eaa ta Iesu e rave ra iaia e papetitoia ra?

Samantha: Te pure ra aia.

Karen: Ae. No reira ka akamanako taua e, ‘Me ko Iesu te Atua, te pure ra aia kiaai?

Samantha: E uianga meitaki tena. Ka ui au i te reira ki toku orometua.

Karen: Akamanako katoa ana i muri ake te aere mai anga a Iesu mei roto mai i te vai, kua tuatua mai tetai reo mei te rangi mai kiaia. Te kite ra koe eaa ta Tei reira i tuatua mai?

Samantha: Kua karanga mai aia e e Tamaiti a Iesu Nana, e te akaperepere ra Aia iaia, e kua mareka rava Aia iaia.

 Karen: Tika rai taau. Inara me ko Iesu te Atua, koai te tuatua maira i taua au tuatua ra mei runga mai i te rangi?

Samantha: Kare rava au i manako ana mei te reira rai i mua ana.

Eaa i Akaaiteia ai te “Metua” ki te “Tamaiti”?

Karen: Teia tetai manako akaou kia akamanakoia: Kua tatau ana tatou e kua tuatua mai a Iesu i te Atua e ko tona Metua i te rangi. Te papetitoia anga a Iesu, kua taiku mai tetai reo mei te rangi mai ia Iesu e ko Tana Tamaiti. Ko te tika, kua akakite taka meitaki mai a Iesu iaia uaorai e ko te Tamaiti a te Atua. I na, me ka apii mai koe kiaku e e aiteite tetai nga tangata e rua, eaa te pirianga pamiri taau ka taangaanga ei akatutu mai i te reira?

Samantha: Penei ka taangaanga au i te akaraanga o tetai nga tamaroa.

Karen: Tano rai tera​—penei no tetai nga maanga. Inara kua taiku a Iesu i te Atua e ko te Metua e koia uaorai te Tamaiti. I na, eaa toou manako te karere ta Iesu e akakite maira?

Samantha: Te marama atu nei au i toou manako. Te akataka maira a Iesu e e teitei atu tetai i tetai e e maata atu te mana o tetai i to tetai.

Karen: E tika rai. Akamanako ana i teia: Kua manako mai koe i tetai akatutuanga te tau tikai ra ki tetai nga mea aiteite, mei tetai nga maanga rai. Me ko Iesu tikai te Atua, i toou manako kare ainei e ka akamanako mai a Iesu, te Puapii Maata, i tetai tu akaaiteanga—me kore tetai akaraanga taka meitaki atu no te tu aiteite?

Samantha: Ae.

Karen: Inara, kua taangaanga aia i te tuatua “Metua” e te “Tamaiti” i te akataka anga i tona pirianga ki te Atua.

Samantha: E manako meitaki tena.

Eaa ta te au Pipi Mua a Iesu i Tuatua Mai?

Karen: Mua ake ka akaruke ei au, ka inangaro au i te uriuri atu i tetai tuanga o teia manako kia koe, me e taime toou.

Samantha: Ae, e manga taime toku.

Karen: Me ko Iesu tikai te Atua, kare ainei e ka akakite mai te au pipi a Iesu i te reira?

Samantha: Tika rai te reira.

Karen: Inara, kare rava tatou i tatau ana i roto i te au Tuatua Tapu e kua apii mai ratou i te reira. Akara ana eaa ta tetai pipi mua a Iesu, te apotetoro ko Paulo i tata mai. I roto ia Philipi 2:9, te akataka maira aia eaa ta te Atua i rave i muri ake te mate anga e te akatuakaouia anga a Iesu: “I akateitei rava atu ei te Atua iaia [Iesu], e kua oronga mai i te ingoa i maata ua atu i te teitei i te au ingoa ravarai nei nona.” Mei ta teia irava e akakite nei, eea ta te Atua i rave no Iesu?

Samantha: Te karanga ra e kua akateitei rava atu te Atua iaia.

Karen: Ae. Inara me e aiteite a Iesu ki te Atua i mua ake ka mate ei aia e kua akateitei rava atu te Atua iaia, kare ainei e te tuku ra teia ia Iesu i runga ake i te Atua? Akapeea tetai ua atu tangata i teitei atu ei i te Atua?

Samantha: Kare e rauka. E mea ngata te reira.

Karen: Ka ariki au i te reira. Kia tau ki te au akapapuanga, ka karanga ainei koe e te apii ra te Pipiria e ko Iesu te Atua?

Samantha: Kare, kare te reira e akapera ra. Te akakite maira te Pipiria e e Tamaiti aia na te Atua.

Karen: Ae, tika rai te reira. E ka akapapu atu au e Samantha, e te akangateitei maata ra te Au Kite o Iehova ia Iesu. Te irinaki nei matou e kua riro tona mate ei Mesia akatainuia ei ora no te au tangata akarongo mou.

Samantha: Irinaki katoa au i te reira.

Karen: Penei ka manako koe i reira e, ‘Akapeea tatou me akaari kia Iesu e te ariki tikai ra tatou e kua oronga mai aia i tona oraanga ei akaora ia tatou?’ *

Samantha: E manako ua ana au i te reira.

Karen: Penei ka oki akaou mai au ka oronga atu i te pauanga no roto mai i te Pipiria. Tei te kainga ainei koe i teia taime a teia epetoma ki mua?

Samantha: Ae, ka tiaki atu au ia koe.

Karen: Meitaki, ka kite akaou au ia koe.

[Tataanga Rikiriki i Raro]