Mme Andikot N̄wed Nnyịn Ẹbụp Ẹte . . .

Anie Ọkọdọn̄ Ntantaọfiọn̄ Oro?

▪ Ndi akanam omokụt ndise emana Jesus, m̀mê ndise emi ẹwụtde mme ọfiọkn̄kpọ owo ita emi ẹkade ẹkese Jesus ke usịnudia ufene? Ndusụk owo ẹdọhọ ke Abasi akada ntantaọfiọn̄ emi owụt mmọ ebiet emi Jesus akanade ke usịnudia ufene ke Bethlehem. Ediwak nditọwọn̄ ẹkam ẹdiọn̄ọ enyịn̄ emi ẹnọde mme ọfiọkn̄kpọ owo ita emi—Melchior, Caspar, ye Baltazar. Edi nte ọwọrọetop mbụk emi ekem ye se Bible etịn̄de? Ikemke. Ediwak n̄kpọ ẹwụt ke mbụk emi inenke.

Akpa, mmanie ẹkedi iren oro ẹkekade ẹkese Jesus? Akpasarade usem Greek oro ẹkedade ẹwet Bible ikokotke mmọ mme ọfiọkn̄kpọ owo, edi okokot mmọ mme asiak ntantaọfiọn̄. Etie nte mmọ ẹkedi mbiaidiọn̄ emi ẹkesidade ebiet emi ntantaọfiọn̄ adade ẹbre idiọn̄ mmọ. Bible isiakke enyịn̄ mmọ inyụn̄ itịn̄ke m̀mê mmọ ẹkedi owo ifan̄.

Ọyọhọ iba, ini ewe ke mmọ ẹkeka ẹkese Jesus? Mmọ ikakaha ke ini Jesus okosụk odude ke usịnudia ufene. Nnyịn isan̄a didie ifiọk emi? Matthew 2:11 ọdọhọ ete: “Ke ini mmọ ẹdụkde esịtufọk mmọ ẹkụt ekpri eyen oro ye Mary eka esie.” Omokụt do ke Bible idọhọke ke Jesus ekedi nsekeyen ini oro, edi ọdọhọ ke ekedi “ekpri eyen.” Ke adianade do, mmọ ikekwe Jesus ke usịnudia ufene, edi ẹkekụt enye ye Mary ye Joseph ke “esịtufọk mmọ.”

Ọyọhọ n̄kpọ ita edi, anie ọkọdọn̄ ntantaọfiọn̄ emi okowụtde mme asiak ntantaọfiọn̄ usụn̄? Ẹkpep ke ediwak ufọkabasi nte ke Abasi ọkọdọn̄ ntantaọfiọn̄ emi. Ndi emi edi akpanikọ? Ti ete ke ntantaọfiọn̄ emi ikadaha mmọ usụn̄ nnennen nnennen ika Bethlehem, edi ekebem iso ada mmọ aka edem Edidem Herod ke Jerusalem. Herod ekedi ata idiọk owotowo. Mme asiak ntantaọfiọn̄ emi ẹma ẹka ẹkedọhọ enye ke eyen amana emi edidide “edidem mme Jew.” Emi ama anam Herod enen̄ede asua Jesus. (Matthew 2:2) Edi enye ama anam nte iyom ndiketiene n̄kpono nsekeyen oro, onyụn̄ ọdọhọ mme asiak ntantaọfiọn̄ oro ete ẹma ẹkekụt enye, ẹfiak ẹditịn̄ ẹnọ imọ. Ntantaọfiọn̄ emi ndien ama ada mmọ usụn̄ ekesịm Joseph ye Mary. Omokụt do ke mîkpedịghe emi Abasi ọkọbiọn̄ọde mme asiak ntantaọfiọn̄ oro, ke mmọ ẹkpekenam n̄kpọ emi adade Jesus ibuot. Esịt enem nnyịn nte Abasi mîkodopke-dop ise mmọ. Esịt ama enen̄ede ayat Herod ke ini enye okụtde ke mme asiak ntantaọfiọn̄ ifiakke iditịn̄ ebiet emi Jesus odude inọ imọ, ntre enye ọdọn̄ ete ẹkewot kpukpru nditọ irenowo ke Bethlehem ye ke kpukpru n̄kann̄kụk oro, ọtọn̄ọde ke eyen isua iba sụhọde.—Matthew 2:16.

N̄kọ emeti ke Jehovah okokot Jesus “edima Eyen mi, emi ami nnyịmede.” (Matthew 3:17) Mbọk kere ise: Sia usiak ntantaọfiọn̄ edide ubreidiọn̄, n̄ko Abasi mîkayakke mme asan̄autom esie ẹbre idiọn̄, ndi emekere ke Abasi emi edide ata eti Ete oro enen̄erede ama Eyen esie ọkpọkọdọn̄ mme asiak ntantaọfiọn̄ utom ke ebiet emi Jesus okodude? (Deuteronomy 18:10) Ndi enye akpanam ntantaọfiọn̄ ada mmọ usụn̄ aka edem Edidem Herod emi ekedide ata idiọk owotowo emi ekenyenede odudu etieti ini oro, anam mmọ ẹkesian enye n̄kpọ emi edinamde enye enen̄ede asua Jesus? Ndi emekere ke Abasi akpakada kpa ntantaọfiọn̄ kiet oro owụt mme asiak ntantaọfiọn̄ oro ebiet emi nsekeyen imọ okodude?

Yak idọhọ ke akwa owoekọn̄ ọnọ ata eti owoekọn̄ esie aka obio mme asua. Ndi enye akpasian mme asua ebiet emi owoekọn̄ emi odude? Ikpasianke! Ukem ntre, Jehovah ama ọdọn̄ Eyen esie edi idiọk ererimbot emi. Ndi enye ekpeketịn̄ ọnọ Edidem Herod itie emi Eyen imọ odude ke ini enye mîkemeke ndinyan̄a idem? Ikpetịn̄ke!

Anie ndien ọkọdọn̄ ntantaọfiọn̄ oro? Kere ise, anie ekenen̄ede oyom ẹwot Jesus ke ini enye ekedide ekpri mbak enye edinam se ẹkedọn̄de enye edinam ke isọn̄? Anie oyom nditụn mme owo usụn̄, nnam mmọ ẹsu nsu, ẹnam afai, ẹnyụn̄ ẹwot owo? Jesus ama anam ẹdiọn̄ọ “osu nsu ye ete nsu” oro, emi ekedide “owotowo toto ke editọn̄ọ esie”—oro edi, Satan kpa Devil.—John 8:44.