▪ ¿Jesús därebare ye ngwane rei nimä nükani känti ye erere bämikata abokän mäkwe mrüsaibarera? Nitre kwati tä niere Ngöbökwe mukebiti nitre ye jie ngwani nemen establo nämene Belén yekänti, aune Jesús nämene pesebre yete kwani ietre. Monsotre kia kwati ie rei nimä ye kä gare ja töibiti: Melchor, Gaspar aune Baltasar. Akwa ¿kukwe ye erere nieta Bibliabätä? Ñakare, ñobätä ñan aune nitre tä kukwe ye jene jene.

Kena, ¿nitre nimä ye abokän nire? Nitre ye abokän reire ye nie ñaka kukwe tikani griekore Bibliabätä yekwe. Ñakare aune, niaratre ye abokän sukiare, o nitre ja tötikaka mukebätä. Ye tä mike gare niaratre nämene ja tötike mukebätä kukwe ngwarbe mikakäre gare. Arato, niaratre kädeka nämene ño aune nibe ye Biblia ñaka mike gare jire chi.

Ketebukäre, ¿nitre ja tötikaka mukebätä ye nükani ñongwane Jesús känti? Niaratre namani Belén ye ngwane Jesús ñaka nämene mikani pesebre yete monso chi därebe ye erere nieta Bibliakwe. Ne madakäre, Mateo kukwe ne tikabare: “Nikanintre gwä angwane, ngäbäkre ye nämane gwi meye Maríabe, btä okwä namani” (Mateo 2:11). Kukwe ye tä mike gare, nitre ye nükani yete angwane Jesús namanina baliente. Ne madakäre, José aune María ñaka nitre ye kani ngäbiti establo yekänti, ñakare aune kani ngäbiti kwetre gwi.

Ketamäkäre, ¿nirekwe muke juani abokän jiebiti nitre ja tötikaka mukebätä nikani? Ngöbökwe nuainbare drieta nitre ji ngwanka kukwebätä kä nengwane yekwe. Akwa, ¿ye erere namani bare? Muke ye ñaka niaratre jie ngwani nemen metre Belén. Käne jie ngwani kwe nemen Jerusalén, namani kä yekänti ngwane Jesús därebare aune rabai “Jrei nitre israelitakwe” niebare kwetre rei kri Herodes ie. Kukwe niebare kwetre yebiti Herodes ni mada murie ketaka ye brukwä namani krubäte monso chi ye kräke (Mateo 2:2). Ni ni ngökaka ye käkwe niebare nitre yei, niaratre rikadre Jesús känti mikakäre ütiäte jai, ye bitikäre Jesús tädre medente metrere ye mikadre gare ie niebare kwe ietre, ne kwe niara rikadre mike ütiäte jai arato. Ye bitikäre, muke ye nikani nitre ja tötikaka mukebätä ye ngwena nemen José aune María känti. Erametre, kukwe nuainbare kwetre ye bäsi kukwe tare mikani nemen bare: ye abokän monso chi ye murie ketadre. Aisete, Ngöbökwe ja mikani kukwe yete. Nitre ye ñaka janamene kukwe miketa gare Herodes ie, ye käkwe mikani bäri rubun. Namani rubun krubäte, ye medenbätä nitre juani monsotre kia biti kä nämene kubu o bäri chi nämene Belén aune Belén bäre tibien ye murie kete (Mateo 2:16).

Ye bitikäre, Jehovakwe kukwe ne niebare Jesubätä: “Ni ne abra ti Ngobo tikwe. Niara tare kri tikwe. Niara käi nuäre kri tibtä” (Mateo 3:17). Erametre, Jesús Rün ye abokän ja tarekä aune kukwe erametre nuainkä. Nitre käkwe ja tötikaka mukebätä ye Ngöbö nämene ñäkäire, ¿nitre ye erere diandrekä kwe kukwe mikakäre gare raba ruin mäi? (Deuteronomio 18:10). Nitre ye jie ngwandre kwe mukebiti nemen ni ni murie ketaka kri aune käme krubäte yekänti, kukwe mikakäre gare ie, ne kwe rabadre bäri rubun ¿raba ruin mäi? Nitre ye jie ngwandre kwe nemen monso chi kwe yekänti ne kwe tädre medente ye mikadre gare kwetre ¿raba ruin mäi?

Ani bämike krörö: ni nitre rükä jie ngwanka töi kwin käkwe ni rükä kwin juandre rüe ngätäite sribi ñaka nuäre nuainkäre. ¿Ni rükä kwe ye tädre medente ye mikadre gare kwe rüe yei? Ñakare. Ye erere Jehovakwe Monso kwe ye juani sribi ñaka nuäre nuainne kä tibienbätä. Ye medenbätä, Jesús nämene medente ye mikadre gare kwe ni blo Herodes yei akräke ñaka kukwe kwin nuaindre kwe, ¿ñan ererea?

Ye erere angwane, ¿nirekwe “muke ye juani”? ¿Nire tö namani monso chi Jesús ye murie ketai ne kwe ñaka sribi nuaindre kwe Kä tibienbätä? ¿Nire tö nitre töi kwitai, aune tä ni ngökö, tä nitre mike ni mada nuainne tare bätä tä nitre mike ja murie kete? Ni käme ni murie ketaka bätä ni ngökaka ye Jesús käkwe mikani gare, “kira niarakwe kukwe niebare ngwarbe”: ni ye abokän Satana Diablu (Juan 8:44).