▪ Nakakita ka na bala sang belen ukon palaguaon parte sa tatlo ka hari, ukon maalam nga mga tawo, nga nagbisita sa bag-ong bun-ag nga si Jesus sa pasungan? Suno sa istorya, gingamit sang Dios ang isa ka bituon para giyahan sila pakadto sa kuadra sa Betlehem. Madamo nga bata ang nakasaulo sang ngalan sadtong tatlo ka hari—sanday Melchor, Gaspar, kag Baltazar. Pero nagasanto bala ini sa ginasiling sang Biblia? Wala. Hibaluon naton kon ngaa.

Una, sin-o yadto nga mga tawo? Sa orihinal nga Griego, wala sila gintawag sang Biblia nga mga hari ukon maalam nga mga tawo. Gintawag sila nga mga mago, ukon mga astrologo. Nagapamakot sila base sa mga bituon. Wala ginsambit sang Biblia ang ila ngalan kag kon pila sila.

Ikaduha, san-o sila nagbisita? Indi sang lapsag pa si Jesus kag ara pa sa pasungan. Ngaa masiling naton ina? Ang manunulat sang Ebanghelyo nga si Mateo nagsiling: “Sang nagsulod sila sa balay nakita nila ang bata upod sa iya iloy nga si Maria.” (Mateo 2:11) Talupangda nga si Jesus indi na bag-ong bun-ag nga lapsag, kundi isa na ka “bata.” Wala na sa kuadra sanday Maria kag Jose, kundi nagaistar na sila sa isa ka balay.

Ikatlo, sin-o ang nagpadala sang “bituon” para giyahan ang mga astrologo? Ginatudlo sang mga lider sang relihion nga ang Dios ang nagpadala sang “bituon.” Matuod bala ini? Dumduma nga wala dayon gingiyahan sang “bituon” ang mga astrologo pakadto sa Betlehem. Sa baylo, gingiyahan sila pakadto kay Hari Herodes sa Jerusalem. Ginsugid nila sa sining mahisaon kag gamhanan nga manugpatay ang pagkabun-ag ni Jesus kag ang iban pa nga detalye nga nagpaugot kay Herodes sa bata nga mangin “hari sang mga Judiyo.” (Mateo 2:2) Nagpakunokuno si Herodes nga gusto man niya padunggan ang bata, gani ginsilingan niya sila nga magbalik sa iya para isugid kon diin ang bata. Dayon gingiyahan sang “bituon” ang mga astrologo pakadto kanday Jose kag Maria. Ginbutang sa katalagman sang mga astrologo ang kabuhi sang bata. Pero maayo lang kay nagpasilabot ang Dios. Naakig gid si Herodes sang wala na nagbalik ang mga astrologo, gani nagmando sia nga pamatyon ang tanan nga bata nga lalaki nga duha ka tuig paubos sa bilog nga Betlehem.—Mateo 2:16.

Sang ulihi, ginpatuhuyan ni Jehova si Jesus subong “akon Anak, ang hinigugma, nga ginakahamut-an ko.” (Mateo 3:17) Binagbinaga ini: Pilion ayhan sang mahigugmaon kag matarong nga Amay ang pagano nga mga astrologo—nga nagahimo sang espiritismo nga ginadumilian sang iya Kasuguan—bilang iya mga mensahero? (Deuteronomio 18:10) Magamit bala sia sang bituon para giyahan sila pakadto sa gamhanan kag mapintas nga manugpatay nga si Herodes, agod isugid ang mensahe nga makapaakig sa iya? Gamiton bala sang Dios ini nga bituon kag ang mga astrologo para mahibaluan kon diin ang iya anak?

Ibutang ta nga ginpadala sang isa ka maayo nga kumander ang iya pinakamaayo nga soldado sa makatalagam nga misyon sa teritoryo sang mga kaaway. Isugid bala niya sa mga kontra kon diin nahamtang ini nga soldado? Siempre indi! Ginpadala man ni Jehova ang iya Anak sa sining makatalagam nga kalibutan. Isugid bala Niya sa malaut nga si Hari Herodes kon diin nahamtang ang Iya Anak, nga bata pa kag indi makapangapin? Indi gid!

Kon amo, sin-o ang nagpadala sang “bituon,” ukon sang butang nga daw bituon? May isa nga gusto gid nga mapatay ang bata nga si Jesus para indi sini matuman ang iya misyon sa duta. Sia ang nagapatalang sa mga tawo kag nagapalapnag sang kabutigan, kalainan, kag pagpamatay. Ginpakilala mismo ni Jesus ang ‘butigon kag amay sang kabutigan,’ nga ‘manugpatay sing tawo sang nagsugod sia sa iya kalautan’—si Satanas nga Yawa.—Juan 8:44.