Yuvu Y’atangi eto . . .

Nani Wafila e “Ntetembwa”?

▪ Nga wamona kala fwaniswa kisonganga atinu tatu yovo akwa ngangu, bayiza kingula Yesu wa nsedia vana dikilwa kia twelezi? Mun’owu wa lusansu, Nzambi wasadila ntetembwa mu kubafila kuna Beteleme. Wana ayingi besungamenanga e nkumbu z’atinu atatu awaya​—Melchior, Gaspar ye Baltasar. Kansi, nga o lusansu lwalu ngwizani lwina ye dina Nkand’a Nzambi kevovanga? Ve. Vena ye kuma yayingi, isonganga vo lusansu lwalu lwaluvunu.

Diantete, wantu awaya aki nani bakala? Muna Kingerekia, Nkand’a Nzambi ke ukubayikilanga atinu ko ngatu akwa ngangu. Akwa mpandu yovo afimpi a ntetembwa bakala. Ediadi disonganga vo nganga za ngombo bakala ana basadilanga e ntetembwa. Lusansu lwa Nkand’a Nzambi ke luyikanga nkumbu zau ko ngatu e ntalu bakala.

 Diazole, nkia ntangwa bakingula Yesu? Ke mu kolo kina Yesu kakala nsedia ko vana dikilwa kia twelezi. Aweyi tuzayidi wo? Nkanda wasoneka Matai uvovanga vo: “Una bakotele muna nzo, bamwene e kingyana-ngyana yo Maria wa ngw’andi.” (Matai 2:​11) Tumwene vo Yesu kakala nsedia ko, kansi “kingyana-ngyana.” Maria yo Yosefe ke balekanga diaka mu mpak’a twelezi ko, kansi mu nzo bakala muna kolo kiakina.

Diatatu, nani watuma “ntetembwa” yayina mu fila afimpi a ntetembwa? Mfumu za mabundu belonganga vo Nzambi watuma “ntetembwa” yayi. Nga yandi kikilu watuma yo? Sungamena vo entete, e ntetembwa yayi ke yafila afimpi a ntetembwa ku Beteleme ko. Kansi, kwa Ntinu Erodi yabafila kuna Yerusaleme. Bazayisa luwutuku lwa Yesu kwa ntinu ndioyo wakala vo nkwa kimpala ye mvondi. Bamvana nkutu kuma kiasikila kia menga mwana ona okituka se ‘ntinu a Ayuda.’ (Matai 2:2) Kuna makani mambi, Erodi wabavovesa vo bavutuka kwa yandi banzayisa e fulu kakala o mwana kimana yandi mpe kenda kunkunda. I bosi, e “ntetembwa” yafila afimpi a ntetembwa kwa Yosefe yo Maria. Kele vo Nzambi katanina ko, dina bavanga afimpi a ntetembwa mwana diadi vondesa. Kansi, o Nzambi watanina kikilu o mwana. Erodi wafunga makasi vava afimpi a ntetembwa ke bavutuka ko yandi mu kunzayisa e nsangu. Muna kuma kiaki, wakanikina vo wan’akala awonso a mvu miole bakala muna Beteleme ye muna zunga yandi bavondwa.​—Matai 2:16.

Kuna kwalanda, Yave wayikila Yesu vo “Mwan’ame anzolwa, ona iyangalelanga.” (Matai 3:​17) Badika edi: Nga Se diadi dianzodi ye wansongi wadi sola afimpi a ntetembwa a esi zula, ana bayivananga muna mavangu ma mpandu masimwanga muna Nsiku, bakala akunzi andi? (Nsiku 18:​10) Nga wadi sadila ntetembwa mu kubafila kwa ntinu ambi ona wavondesanga wantu yo kunzayisa e nsangu zamwesa Erodi e kimpala? Nga Nzambi wadi sadila e ntetembwa yayi ye afimpi a ntetembwa mu songa e fulu kina o mwana kalekeswa?

Muna bong’e nona: O mfumu a makesa otumini e soladi dina ketoma zolanga kuna zunga kia mbeni. Nga ozayisa kwa mbeni e fulu balenda sololwela e soladi diadi? Ve, kalendi wo vanga ko. Diau adimosi, Yave watuma Mwan’andi va nza yayi ya vonza. Nga wadi zayisa kwa Erodi wa ntinu ambi e fulu kiakala mwan’andi? Ve.

Ozevo, nani wafila e “ntetembwa” yovo lekwa kiakala nze ntetembwa? Nani kikilu wakala ye makani ma vondesa Yesu, ona kazola ko vo kasansuka yo lungisa kiyekwa kiandi ova ntoto? Nani ovunanga wantu yo nungununa luvunu, umpumbulu ye vondesa wantu? Yesu wasengomona ndiona una vo “nkwa luvunu kwandi, ese mpe dia luvunu,” i sia vo, Satana wa Nkadi Ampemba, wa “mu mponda-muntu tuka kuna lubaniku.”​—Yoane 8:44.