▪ Ukadiku mumone manaya anyi filme ya diledibua dia Yezu idi ileja bakalenge anyi bena meji basatu, balue bua kutangila Yezu, muana utshivuabu balelelaku muladika mu tshidilu tshia nyama anyi? Bilondeshile muyuki eu, bantu badi bamba muvua Nzambi mutume mutoto bua kulombola bena meji abu mu tshikumbi tshia nyama tshia mu Beteleheme. Bana ba bungi mbakuate too ne mêna a bakalenge basatu abu aa: Melchior, Gaspar ne Balthasar ku muoyo. Kadi, muyuki udi mutangalake bikole eu udiku umvuangana ne tshidi Bible wamba anyi? Tòo. Kudi malu a bungi adi aleja ne: muyuki eu ngua dishima.

Tshia kumpala, bantu abu bavua banganyi? Bilondeshile muaku wa tshiena Greke, Bible kena ubabikila ne: bakalenge anyi bena meji to. Bavua bamanyi ba malu a mitoto. Bidi bimueneka ne: bavua mua kuikala babuka malu ku diambuluisha dia luendu lua mitoto. Bible ki mmutele ni mmêna abu ni mbungi buvuabu to.

Tshibidi, bantu abu bavua balue kumona muana dîba kayi? Kabavua balue kumumona patshivuaye muladika mu tshidilu to. Tudi tuamba nanku bua tshinyi? Mufundi wa mukanda wa Matayo udi wamba ne: ‘Pakabuelabu mu nzubu, bakamona muana ne baba wende Mariya.’ (Matayo 2:11) Muaba eu, Yezu katshivua muana wa mu maboko to, kadi ukavua “muana” mubandilaku. Mariya ne Yosefe kabatshivua kabidi basombele mu tshikumbi to, kadi bakavua baye kusombela mu wabu nzubu.

Tshisatu, uvua mutume “mutoto” bua kulombola bamanyi ba malu a mitoto nnganyi? Balongeshi ba mu bitendelelu bia bungi lelu batu balongesha ne: Nzambi ke uvua mutume “mutoto” au. Nyeye ke uvua bushuwa muwutume anyi? Uvuluke ne: “mutoto” kawuvua mulombole bamanyi ba malu a mitoto ku Beteleheme kumpala to. Kadi, wakanji kuya nabu ku Yelushalema, kudi mukalenge Helode. Bakambila mukalenge uvua ne mukawu ne mushipianganyi munene au bua diledibua dia Yezu, kumufikishabu ku dikina muana uvua ne bua kulua ‘Mukalenge wa bena Yuda.’ (Matayo 2:2) Helode wakabambila ne budimu bua balue kumuambila muaba uvua muana au, wamba muvuaye musue kuya pende bua kumuinamina. Pashishe “mutoto” wakalombola bamanyi abu kudi Yosefe ne Mariya. Kadi, bualu buvua bamanyi abu benze buvua mua kushipesha muana bu Nzambi kayi muambuluishe. Diakalenga, Nzambi wakambuluisha. Nunku, Helode wakafika munda pavua bamanyi abu kabayi bapingane bua kumuambila, ke yeye kutuma dîyi bua bashipe bana ba balume bonso ba mu Beteleheme ne mu misoko ya pa mpenga bavua ne bidimu kutuadijila ku bibidi kupueka.​—Matayo 2:16.

Kunyima kua matuku a bungi, Yehowa wakabikila Yezu ne: “Muana wanyi munanga, yeye udi unsankisha bimpe.” (Matayo 3:17) Anji elabi meji, Tatu wa dinanga, muena buakane uvuaku mua kusungula bamanyi ba malu a mitoto bavua benza malu a majimbu avua mikenji yende mikandike bua kubatuma anyi? (Dutelonome 18:10) Uvuaku mua kutuma mutoto bua kubalombolawu kudi Helode, muntu uvua mumanyike muaba au bu muena malu mabi ne mushipianganyi munene bua kumuambilabu mukenji uvua mumujule lukinu ne mukawu anyi? Nzambi uvuaku mua kutuma mutoto umue umue au bua kuleja bamanyi abu muaba uvua muanende uvua kayi mua kudisungila muladika anyi?

Tshilejilu, mfumu muimpe wa basalayi udi utuma musalayi wende udi mumanye mudimu bimpe muaba udi baluishi babu bua kuenza mudimu kampanda wa njiwu. Mfumu eu udiku mua kuambila baluishi abu muaba udibu mua kupetela musalayi au anyi? Nansha kakese. Bia muomumue, Yehowa wakatuma Muanende mu buloba bua njiwu. Uvuaku mua kuleja Helode mukalenge mubi muaba uvuabu baladike Muanende uvua kayi mua kudisungila anyi? Kena mua kuenza nanku to.

Kadi uvua mutume “mutoto” anyi tshintu tshivua tshienza bu mutoto nnganyi? Uvua ujinga bikole bua kumona bashipa Yezu ne musue kumupangisha bua kukola ne kukumbaja mudimu wende wa pa buloba nnganyi? Utu ukeba bua kupambuisha bantu ne kubasaka ku dishima, tshikisu ne dishipangana nnganyi? Yezu nkayende wakaleja ‘muena mashimi, udi tatu wawu,’ uvua ‘ku tshibangidilu mushipianganyi’ au patoke ne: Satana Diabolo.​—Yone 8:44.