▪ Na o kile wa bona ditiragatšo goba dipapadi tša matswalo a Jesu tšeo di bontšhago dikgoši tše tharo, goba banna ba bohlale, ba etetše leseana leo le sa tšwago go belegwa e lego Jesu, le letše legopong? Go ya ka kanegelo, Modimo o ile a diriša naledi gore e ba iše setaleng kua Betlelehema. E bile bana ba bantši kudu ba swere maina a dikgoši tšeo tše tharo ka hlogo—Melchior, Caspar le Baltazar. Lega go le bjalo, na kanegelo yeo ye e tumilego e dumelelana le seo ge e le gabotse Beibele e se bolelago? Aowa. Kanegelo yeo ga se ya nepagala ka ditsela tše dintši.

Ya pele, banna bao e be e le bomang? Segerikeng sa mathomo, Beibele ga e ba bitše dikgoši goba banna ba bohlale. E be e le balepi ba dinaledi. Go bonagala e be e le bao ba dirišago mekgwa ya boheitene ya bonoge yeo e theilwego dinaleding. Pego ya Beibele ga e utolle maina goba palo ya baeng bao.

Ya bobedi, banna bao ba ile ba eta neng? Ga se ba eta nakong ya ge Jesu e be e sa le leseana leo le lego ka legopong. Re tseba seo bjang? Mongwadi wa Ebangedi e lego Mateo o re: “Ge ba tsena ka ntlong ba bona lesea le na le Maria mmago lona.” (Mateo 2:11) Ela hloko gore Jesu e be e se sa le leseana leo le sa tšwago go belegwa, eupša e be e le “lesea” goba ngwana yo monyenyane. Maria le Josefa ba be ba se sa dula ka setaleng; go e na le moo, ka nako yeo ba be ba dula ka ntlong.

Ya boraro, ke mang yo a rometšego “naledi” gore e hlahle balepi ba dinaledi? Baetapele ba bodumedi ba tlwaetše go ruta gore Modimo ke yena a rometšego “naledi” yeo. Na ruri o e rometše? Gopola gore “naledi” ga se ya thoma ka go iša balepi bao ba dinaledi Betlelehema. Go e na le moo, e ile ya ba iša go Kgoši Heroda kua Jerusalema. Ba ile ba utolla go ba gona ga Jesu go mmolai yo wa lehufa le yo matla, ba ba ba mo nea lebaka le tiilego la gore a hloye ngwana yoo e bego e tlo ba “kgoši ya Bajuda.” (Mateo 2:2) Heroda ka boradia o ile a ba botša gore ba boe ba mmegele moo ngwana yo a lego gona, gomme a bolela gore le yena o be a nyaka go yo mo godiša. Ke moka “naledi” e ile ya iša balepi ba dinaledi go Josefa le Maria. Ka gona, balepi ba dinaledi ba be ba le tseleng yeo e bego e ka feleletša ka gore ngwana yoo yo monyenyane a bolawe ge e ba Modimo a be a se a tsena ditaba gare. Go a thabiša gore o ile a tsena ditaba gare. Ge balepi ba dinaledi ba sa boe go tlo mmegela, Heroda o ile a tuka bogale moo e lego gore o ile a laela gore go bolawe bana ka moka ba bašemanyana ba nywaga e mebedi le ka tlase ga moo ba Betlelehema le ba kgauswi le gona.—Mateo 2:16.

Jehofa ka morago o ile a bitša Jesu “Morwa wa ka, morategi, yo ke mo amogetšego.” (Mateo 3:17) Ela hloko se: Na Tate yoo yo lerato le yo a lokilego o be a ka kgetha balepi ba dinaledi ba baheitene—bao ba dirišago mekgwa ya go dirišana le meoya yeo e iletšwago Molaong wa gagwe—gore e be batseta ba gagwe? (Doiteronomio 18:10) Na o be a ka diriša naledi gore e ba iše go mmolai yo kotsi kudu le yo matla nageng, ba rwele molaetša woo go se nago pelaelo gore o be o tla gakatša lehloyo la lehufa la Heroda? Na ka morago Modimo o be a ka diriša naledi yona yeo le balepi bao ba dinaledi go utolla lefelo leo morwa wa gagwe yo a sa kgonego go itirela selo a bego a letše go lona?

Ka mohlala: Molaodi yo bohlale wa madira o roma lešole la gagwe leo le nago le bokgoni lesolong le kotsi nageng ya manaba. Na o be a ka utollela lenaba moo le ka hwetšago lešole leo? O be a ka se dire bjalo! Ka mo go swanago, Jehofa o ile a roma Morwa wa gagwe lefaseng le le kotsi. Na O be a ka utollela Kgoši Heroda yo kgopo moo Morwa wa Gagwe a bego a letše gona e le ngwana yo a sa kgonego go itwela? Le gatee!

Ka gona, ke mang yo a rometšego “naledi,” goba selo seo se swanago le naledi? Go ba gona, ke mang yo a bego a ka thabela kudu go bona ngwana Jesu a bolawa, a mo šitiša go gola le go phetha thomo ya gagwe lefaseng? Ke mang yo a nyakago go aroša batho e bile a kgothaletša maaka, bošoro le polao? Jesu o ile a mo hlaola e le “moaketši le tatago maaka,” yena yoo e bilego “mmolai wa batho go tloga mathomong”—Sathane Diabolo.—Johane 8:44.