▪ Waswe, enitaem iu lukim pipol actim wanfala plei wea storyim thrifala king or wise man visitim baby Jesus taem hem leidaon long manger? Or waswe, iu lukim olketa smol dole wea pipol wakem for showimaot datwan? Long datfala story olketa sei God iusim wanfala star for leadim olketa man hia go long baby Jesus long Bethlehem. Staka pikinini baeheartim nem bilong thrifala king hia tu, wea hem Melchior, Caspar, and Baltazar. Waswe, datfala story wea staka pipol savve long hem, hem semsem witim samting wea Bible talem? Nomoa. Staka samting abaotem datfala story hem no stret.

First samting, hu nao olketa man hia? Long olketa barava old copy bilong olketa Greek Scripture, hem no sei olketa man hia king or wise man. Hem sei olketa man hia magi, wea minim olketa man wea lukluk long star for trae savve long samting wea bae happen. Diswan hem wei bilong olketa heathen and hem join witim devildevil. Bible no storyim tu haomas man nao visitim Jesus and hem no talem nem bilong olketa.

Mek-tu samting, wanem taem nao olketa man hia visitim Jesus? Olketa no visitim hem taem hem baby wea leidaon long manger. Hao nao iumi savve long datwan? Gospel bilong Matthew sei: “Taem olketa go insaed long haos olketa lukim datfala pikinini witim mami bilong hem, Mary.” (Matthew 2:11) Long hia, hem no sei Jesus hem baby wea just born nomoa, bat hem sei hem wanfala “pikinini.” Long datfala taem Mary and Joseph no stap long haos for keepim olketa animal, bat olketa stap long wanfala haos.

Mek-thri samting, hu nao sendem kam datfala “star” wea olketa man hia followim? Staka bigman bilong church distaem sei God nao sendem kam datfala “star.” Waswe, datwan hem tru? Tingim, datfala “star” no leadim olketa man hia go long Bethlehem firstaem, bat hem leadim olketa go long Jerusalem for lukim King Herod, wea hem man for jealous and killim man dae. Samting wea olketa talem mekem Herod luksavve Jesus hem born finis, and from olketa sei Jesus bae kamap “king bilong olketa Jew” datwan mekem Herod heitim Jesus. (Matthew 2:2) Herod laea for sei hem tu laek for baodaon long Jesus, so hem talem olketa man hia for faendem Jesus and talem hem wea nao Jesus stap. Then datfala “star” leadim olketa magi hia go long Joseph and Mary. Herod no win long plan bilong hem for killim Jesus dae bikos God nao stopem olketa man hia for no go bak long Herod. Herod hem kros tumas taem olketa man hia no kam bak for talem hem wea nao Jesus. So hem sendem samfala man go long Bethlehem and olketa nara ples long datfala area for killim dae olketa boy wea tufala year and wea no kasem tufala year yet.—Matthew 2:16.

Taem Jesus hem baptaes, Jehovah kolem hem “Son bilong mi wea mi lovem and wea mi hapi long hem.” (Matthew 3:17) Tingim olketa samting hia: God hem raeteous and lovem son bilong hem. Olketa magi wea duim samting wea join witim devildevil olketa brekem law bilong God. (Deuteronomy 18:10) So waswe, bae God iusim olketa man olsem for talem pipol Jesus hem born? Waswe, bae God iusim wanfala star for leadim olketa man hia go long barava nogud ruler, Herod, and talem Herod samting wea bae mekem hem jealous and barava heitim Jesus? Waswe, bihaen datwan bae God iusim datfala sem star and olketa magi for showimaot ples wea son bilong hem stap, wea hem baby nomoa?

Tingim disfala example: Wanfala komanda bilong army hem sendem best soldia bilong hem for go long area bilong olketa enemy. Waswe, bae hem talem enemy wea nao datfala soldia hem stap? Barava nomoa nao! Olsem tu, Jehovah sendem Son bilong hem long disfala nogud world. Waswe, bae hem showimaot long datfala nogud king, Herod, ples wea son bilong hem stap, wea hem baby nomoa? Hard tumas!

So hu nao sendem kam datfala “star,” or datfala samting wea luk olsem star? Tingim diswan, hu nao laekem tumas for killim dae Jesus mekem hem no growap and duim waka wea God laekem hem for duim long earth? Hu nao laekem tumas for trikim pipol and mekhae long wei for laea, wei for raf, and wei for killim man dae? Jesus hem sei Satan nao “hem man for laea and hem dadi bilong wei for laea” and “start from taem wea hem laea abaotem God, hem man for killim man dae.”—John 8:44.