Leeqkuna musyëta munayanqan

¿Pitaq Belenman qoyllurta kacharqan?

▪ ¿Imëllapis rikarqunkiku Jesus yurikunqanta rurayanqanchö kima reykuna tsëraq yuririshqa Jesusta watukayanqanta? Belenchö Jesus këkanqan establoyaq Diosnintsik juk qoyllurwan tsë nunakunata pushanqantam wakinkunaqa cuentakuyan. Awmi, hasta wamrakunapis allim musyayan kë kiman reykunapa Melchor, Gaspar y Baltasar jutinkuna kanqanta. Pero ¿cuentakuyanqannöku Biblia yachatsikun? Rasun kaqchöqa manam, tsëta rikärishun.

¿Pikunataq tsë kiman nunakuna kayarqan? Griego idiömachö Bibliaqa manam rey kayanqantatsu parlan. Antis qoyllurkunata estudiaq nunakuna kayanqantam nin. Tsëqa qoyllurkuna mëpapis kuyukunqanta estudiar imapis pasakunampaq kaqta adivinaqkunam kayan. Y jutinkunata o ëkaq kayanqantapis manam Biblia willakuntsu.

¿Imëtaq Jesusta watukayarqan qoyllurkunata estudiaq nunakuna? Bibliaqa clärom willakun Belenman chärir animalkunapa mikïnin churakuyanqanchö llulluta mana tariyanqanta, Mateo qellqanqannöpis, “wayiman yecurir[mi], llulluta maman Mariatawan quecayaqta taririyarqan” (Mateo 2:11). Këchömi claro nikämantsik, Jesus ichik winarishqatana watukaqkuna tariyanqanta, y manam tsëraq yuririshqaman chäyanqantatsu. Jina Josëwan Mariaqa manam establochötsu watukakoqkunata chaskiyarqan, sinöqa wayinkunachömi.

¿Pitaq tsë nunakunata juk qoyllurwan pusharqan? Kikin Dios pushatsinqantam kanan witsan religionta pushaqkunaqa yachatsikuyan. Pero ¿tsënöku karqan? Tsë qoyllurqa manam Belenman directotsu pusharqan. Puntataqa Jerusalenchö këkaq Herodes reymanmi pusharqan y willariyarqan “israel nunacunapa reynin” Jesus yuririnqanta. Tsëta musyarirmi tsë mana alli Herodesqa wamrata chikir qallëkurqan (Mateo 2:2). Kë yachaq mana alli reyqa adorëta munaqnöllam mañakurqan wamra mëchö këkanqanta willayänampaq. Tsëpitanam, Josëwan Maria këkäyanqanman tsë qoyllurqa nunakunata pusharqan. Pero rasun kaqchöqa, tsë qoyllurkunata estudiaq nunakuna rurayanqanwanqa itsa Jesusta wanuratsiyanman karqan. Pero ¡Diosmi permitirqantsu! Mana willarlla qoyllurkunata estudiaq nunakuna kutikuyanqanta musyarirmi, Herodes alläpa piñakurqan. Tsënöpam Belenchö y wakin markankunachö këkaq ishkë watayoqpita qepaman kaq llapan wamrakunata wanutsiyänampaq mandakurqan (Mateo 2:16).

Watakuna pasariptinnam, Jesuspaq Jehová kënö nirqan: “Quemi noqapa cuyë Tsurï. ¡Perecurmi noqa allapa cushicü!” (Mateo 3:17). Clärom këkan, Jesuspa papänin Jehoväqa kuyakoq y alli ruraqmi. Tsënö këkarninqa, ¿Leynin michäkunqanta ruraq qoyllurkuna estudiaq nunakunata akranmantsuraq karqan tsurimpita willakuyänampaq? (Deuteronomio 18:10.) Tsë mana alli rey kanqanta musyëkarqa, ¿Jehová juk qoyllurwan pushatsinmantsuraq karqan tsurimpita willayänampaq? ¿Jehoväqa utilizanmantsuraq karqan qoyllurta y tsë nunakunata llullu wamran mëchö këkanqantapis tariyänampaq?

Más tantearinapaq këman pensarishun: tröpakunata alli dirigeq nunam alli kaq soldädonta kachan chikeqnimpa markanchö juk rurëta cumplinampaq. Tsëqa, ¿soldädon mëchöpis këkanqanta chikeqninkunata willarinmantsuraq? ¡Manachi tsëtaqa rurëkunmantsu! Tsënöllam Jehoväpis juk rurëta cumplinampaq kë mundoman Tsurinta kachamurqan. ¿Manaku mana alli kanman karqan llullu wamran mëchö këkanqantapis mana alli rey Herodesta willëkunqanqa?

Tsëqa, ¿pitaq “Belenman qoyllurta” kacharqan? ¿Y pitaq Patsachö rurëninta mana cumplinanta munar Jesusta ushakätsita munarqan? ¿Pitaq nunakunata pantatsin, ulikatsin o llullakatsin, imëka mana allikunata ruratsin y wanutsinakïman chätsin? Kikin Jesusmi rikätsikurqan tsë wanutsikoq y ‘nunacunatapis ulicatseq’ o llullakatsegga Diablu kanqanta (Juan 8:44).