Basikubala Balabuzya . . .

Ino Nguni Wakaituma “Nyenyeezi”?

▪ Sena mwakazibona kale zisobano zitondezya kuzyalwa kwa Jesu naa zitondezya bami botatwe, naa bamaalumi basongo, kabaswaya Jesu mwana muvwanda kali mucilido cabanyama? Kweelana ambocaamba caano, Leza wakabelesya nyenyeezi kubasololela kuluba lwaŋombe mu Betelehemu. Bunji bwabana bakaapeta mazyina aabami aaba botatwe—Melchior, Caspar, alimwi a Baltazar. Nokuba boobo, sena caano eeci cidumide kapati cileendelana ancolyaamba Bbaibbele? Peepe. Caano eeci taceendelani mumbazu zinji.

Cakusaanguna, ino baalumi aaba bakali bani? Mumwaambo wakusaanguna wa Chigiliki, Bbaibbele talibaambi kuti mbami naa baalumi basongo. Bakali basikupandulula bweende bwanyenyeezi. Kulibonya kuti bakali kucita micito yakusonda njobakali kucita bantu bakali kukomba baleza bakubeja, iyakayeeme abweende bwanyenyeezi mujulu. Ibbaibbele talyaambi mazyina naa mweelwe wabasikuswaya aaba.

Cabili, ino ndilili nibakaswaya baalumi aaba? Tiibakaswaya ciindi Jesu naakali muvwanda mucilido caŋombe. Ino tuzyiba buti oobo? Matayo, imulembi wa Makani Mabotu wakaamba kuti: “Nobakanjila muŋanda bakamubona mwana kali a Maliya banyina.” (Matayo 2:11) Amubone kuti Jesu tanaakacili muvwanda wazyalwa ino-ino, pele wakali “mwana.” Mariya a Josefa tiibakacili kukkala muluba lwaŋombe, pele aciindi eeci bakali kukkala muŋanda.

Catatu, ino nguni wakaituma “nyenyeezi” kuti isololele basikupandulula bweende bwanyenyeezi? Bamayi bamuzikombelo zyamazuba aano bayiisya kuti Leza ngowakaituma “nyenyeezi.” Sena ncobeni ngowakaituma? Amuyeeye kuti, “nyenyeezi” eeyi tiiyakasaanguna kusololela basikupandulula bweende bwanyenyeezi aaba ku Betelehemu. Muciindi caboobo, yakabasololela ku Mwami Heroda ku Jerusalemu. Bakayubunwida simunyono alimwi singuzu mujayi ooyu kuti Jesu wakali kupona calo cakapa kuti amusule kapati mwana iwakali kuyooba “mwami waba Juda.” (Matayo 2:2) Cabucenjezu, Heroda wakabaambila kuti bakapiluke alimwi kulinguwe kutegwa bakamwaambile busena nkwaakabede mwana ooyu, kaamba kuti awalo wakali kuyanda kuti akamulemeke. Mpoonya “nyenyeezi” eeyi yakasololela basikupandulula bweende bwanyenyeezi kuli Mariya a Josefa. Aboobo, ncobakali kucita basikupandulula bweende bwanyenyeezi nicakapa kuti mwana afwe ikuti Leza naatakabweza ntaamu. Cikkomanisya ncakuti, wakabweza ntaamu. Akaambo kakuti basikupandulula bweende bwanyenyeezi tiibakapiluka kulinguwe, Heroda wakanyema kapati cakuti wakalailila kuti bana basankwa boonse bamu Betelehemu amuzyooko zyanguwo zyoonse ibakajisi myaka yobilo akuyaansi bajaigwe.—Matayo 2:16.

Nikwakainda ciindi, Jehova wakaamba Jesu kuti “Mwanaangu ngweyandisya, ngwekkomanina.” (Matayo 3:17) Amuyeeye buyo: Sena Taata ooyu siluyando alimwi mululami naakasala basikupandulula bweende bwanyenyeezi batamukombi, basikucita micito iijatikizya mizimo iitazumizidwe mumulawo wakwe—kuba batumwa bakwe? (Deuteronomo 18:10) Sena naakabelesya nyenyeezi kutegwa ibasololele kumuntu mubi kwiinda, alimwi singuzu mujayi wamucisi, kabajisi mulumbe iwakali kukonzya kupa kuti Heroda aindile kuba amunyono? Sena Leza naakabelesya nyenyeezi njiyonya abasikubapandulula bweende bwanyenyeezi kutegwa baambe busena bwini kwakabede mwanaakwe?

Mucikozyanyo: Mupati wabasikalumamba mubotu watuma sikalumamba wakwe uucibwene kutegwa akabeleke mulimo uuyoosya kubusena nkobabede basinkondonyina. Sena inga waambila sinkondonyina nkwakonzya kumujana sikalumamba ooyu? Peepe. Mbubwenya buyo, awalo Jehova wakatuma Mwanaakwe munyika eeyi mbyaabi. Sena naakamuyubunwida Mwami mubi Heroda kwakabede Mwanaakwe iwatakali kukonzya kulikwabilila? Peepe, naatakacita oobo.

Aboobo, ino nguni wakatuma “nyenyeezi,” naa cintu cakali kulibonya mbuli nyenyeezi? Nguni wakali kuyandisya kubona kuti mwana Jesu wajaigwa kutegwa atakomeni akuzuzikizya mulimo wakwe ngwaakaboolela anyika? Nguni uuyanda kweena bantu akukulwaizya bubeji, kulwana, alimwi abujayi? Jesu lwakwe wakaamba Saatani Diabolosi kuti ngo “mubeji alimwi ngousyi wabubeji,” ooyo “wakali mujayi kumatalikilo aabuzangi bwakwe.”—Johane 8:44.