Yaan máaxoʼobeʼ taak u yojéeltikoʼob

¿Máax beet u chíikpajal u estrellail Belén?

▪ ¿A wilmaj wa junpʼéel pesebre tuʼux tsʼaʼan óoxtúul reyoʼob táan u xíimbaltikoʼob Jesús le táant u síijiloʼ? Yaan máax aʼalikeʼ Dios bin beet u chíikpajal le estrella utiaʼal u nuʼuktik le reyoʼob tak Belén, le tuʼux tsʼaʼan kaʼach Jesús tiʼ junpʼéel pesebreoʼ. Tak le mejen paalaloʼob u yojloʼob u kʼaabaʼ le óoxtúul reyoʼobaʼ: Melchor, Gaspar yéetel Baltasar. Baʼaleʼ le baʼax ku tsikbaltaʼalaʼ, ¿igual wa yéetel le baʼax ku yaʼalik le Bibliaoʼ? U jaajileʼ maʼatech.

Yáaxeʼ, ¿máax jach tu jaajil le óoxtúul máakoʼobaʼ? Le tʼaan griego meyajnaj teʼ Bibliaoʼ maʼ tu yaʼalik wa reyoʼob. Baʼaxeʼ magoʼob wa astrologoʼob. Lelaʼ u kʼáat u yaʼaleʼ ku yilkoʼob bix u péek le estrellaʼob utiaʼal u yaʼalikoʼob baʼax ku taal u kʼiinoʼ. Tsʼoʼoleʼ le Bibliaoʼ maʼatech u yaʼalik u kʼaabaʼob mix jaytúuloʼob.

U kaʼapʼéeleʼ, ¿baʼax kʼiin ka bin u xíimbaltoʼob Jesús? Le Bibliaoʼ ku yaʼalikeʼ ka kʼuchoʼob Beleneʼ maʼ tu yiloʼob juntúul chaambal tsʼaʼan tiʼ junpʼéel pesebreiʼ, tumen Mateo, juntúul tiʼ le máaxoʼob tsʼíib le Bibliaoʼ, tu yaʼalaj: «Le ka ookoʼob ichil le najoʼ tu yiloʼob le chan paaloʼ yéetel María u maama» (Mateo 2:11). Jeʼex túun k-ilkoʼ, le ka bin le astrologoʼoboʼ Jesuseʼ tsʼoʼok u chan nojochtal, maʼ táant u síijileʼ. Tsʼoʼoleʼ José yéetel Maríaeʼ maʼ kajaʼanoʼob tiʼ junpʼéel kúuchil tuʼux ku tséentaʼal baʼalcheʼobiʼ, baʼaxeʼ tiaʼanoʼob tiʼ junpʼéel najeʼ.

U yóoxpʼéeleʼ, ¿máax beet u chíikpajal le estrella nuʼukt le astrologoʼoboʼ? Le máaxoʼob ku kaʼansajoʼob teʼ religionoʼoboʼ suuk u yaʼalikoʼobeʼ Dios bin beete. Baʼaleʼ ¿jach wa tu jaajil beyoʼ? Le estrellaoʼ maʼ juntaatsʼ úuchik u biskoʼob Beleniʼ. Yáaxeʼ tu bisoʼob tu kaajil Jerusalén. Teʼeloʼ tu yaʼaloʼob tiʼ rey Herodes tsʼoʼok u síijil Jesús, «u [rey] le judíoʼo[boʼ]». Le kʼasaʼan rey túunoʼ, tu chʼaʼtuklaj u kíimsik le chan xiʼipaloʼ (Mateo 2:2). Herodeseʼ tu yaʼalaj tiʼ le astrologoʼoboʼ, ken tsʼoʼokok u xíimbaltikoʼob Jesuseʼ ka suunak u yaʼaloʼob jach tuʼux yaan utiaʼal ka xiʼik u adorarte. Baʼaleʼ chéen táan kaʼach u tuus. Ka tsʼoʼokeʼ le estrellaoʼ tu bisaj le astrologoʼob tak tuʼux kajaʼan José yéetel Maríaoʼ. U jaajileʼ le baʼax tu beetaj le máakoʼobaʼ óolak u beet u kíimsaʼal Jesús. U maʼalobileʼ Dioseʼ tu yáantaj u paal. Le ka tu yuʼubaj Herodes tsʼoʼok u bin le astrologoʼob yéetel maʼ tu yaʼaloʼob mix baʼal tiʼeʼ, jach pʼuʼuji. Le oʼolal tu túuxtaj kíimsbil tuláakal le mejen paalaloʼob maʼ u chuk kaʼapʼéel jaʼab tiʼob kajaʼanoʼob Belén yéetel teʼ kaajoʼob yanoʼob naatsʼoʼ (Mateo 2:16).

Ka máan kʼiineʼ, Jéeobaeʼ tu yaʼalaj yoʼolal Jesús: «Lelaʼ in paal in yaabilaj, tu yoʼolal máax jach kiʼimak in wóol» (Mateo 3:17). K-ilik túuneʼ, u Taata Jesuseʼ jach uts yéetel tuláakal baʼax ku beetkeʼ jach maʼalob. A tuklikeʼ, ¿jeʼel wa u yéeyik le astrologoʼob utiaʼal ka u beet u mensajeroiloʼob, kex ku beetkoʼob baʼaloʼob ku bin tu contra u Leyeʼ? (Deuteronomio 18:10.) ¿Jeʼel wa u nuʼuktikoʼob yéetel junpʼéel estrella utiaʼal ka u bisoʼob junpʼéel kʼuben tʼaan tiʼ le maas nojoch j-kíimsaj máak yaan teʼ luʼum, kex u yojel yaan u pʼuʼujul tu contra u hijooʼ? ¿Jeʼel wa u nuʼuktik le máakoʼob tu yiknal u chan hijo utiaʼal ka u tsʼáaʼob ojéeltbil tuʼux yanoʼ?

Tukult lelaʼ: juntúul comandante jach yaan u naʼateʼ ku túuxtik u maas maʼalobil tiʼ u soldadoʼob utiaʼal ka xiʼik teʼ tuʼux yaan u enemigoʼoboʼ. ¿Jeʼel wa u yaʼalik tiʼ u enemigo tuʼux yaan le soldadooʼ? ¿Máasaʼ maʼatan? Jéeoba xaneʼ tu túuxtaj u paal u beet junpʼéel nojoch meyaj teʼ kʼasaʼan yóokʼol kaabaʼ. A tuklikeʼ, ¿jeʼel wa u yaʼalik tiʼ le kʼasaʼan Herodes tuʼux yaan u chan hijooʼ? ¿Máasaʼ maʼatan xan?

Le beetik túuneʼ, ¿máax beet u chíikpajal le ku yaʼalaʼal «u estrellail Belenoʼ»? Tukult lelaʼ: ¿Máax jach ku tsʼíiboltik ka kíimik Jesús utiaʼal maʼ u tsʼoʼokbesik le meyaj kʼubéentaʼabtiʼoʼ? ¿Máax beetik u kaʼapʼéeltal u tuukul le máakoʼoboʼ, u tuusoʼob, u baʼateloʼob yéetel u kíimskoʼob u yéet máakiloʼoboʼ? Jesuseʼ tu yeʼesaj máaxiʼ: Satanás le Kʼaasilbaʼaloʼ, juntúul kíimsaj wíinik yéetel «u taata[il] le tuusoʼ» (Juan 8:44).