▪ Ñee huayuuyaluʼ ni runi binni dxi nácabe gule Jesús ra rihuinni chonna rey zigánnacaʼ Jesús casi gule la? Ruzeeteʼ binni biquiiñeʼ Dios ti beleguí para guluíʼ ca hombre que paraa nuu currá ra gule Jesús ndaaniʼ guidxi Belén. Stale baʼduhuiiniʼ dede maʼ nánnacaʼ lá guionnaʼ rey: Melchor, Gaspar ne Baltasar. Peru ñee zacá ruzeeteʼ Biblia gúcani la? Coʼ, purtiʼ stale de cani ruzeetecabe cadi biaʼsi diʼ cani né ni na Biblia.

Primé guidúʼyanu tu ca hombre que. Diidxaʼ griegu ni biquiiñecabe lu Biblia ra cayeeteʼ de ca hombre ca qué riníʼdini gúcacabe rey. Ni nani nga gúcacabe magu o ni rábicabe astrólogo. Dxiiñaʼ ni runi ti astrologo nga guʼyaʼ modo riniibi ca beleguí ca ti ganna xi chiguizaaca. Ne qué liica ruzeeteʼ Biblia tu lácabe o pándacabe.

Guiropa cosa ni naquiiñeʼ gánnanu nga pora yeganna ca astrólogo que Jesús. Biblia na ora yendácabe Belén qué ñuuyadíʼcabe ti baʼduriʼniʼ nexheʼ ra ró yuze, purtiʼ evangeliu Mateo na: «Ora biuu cabe ndaani yoo, biiya cabe badu huiini que ne María jñaa» (Mateo 2:11). Nga rusihuinni ora yendácabe raqué maʼ hombrehuiiniʼ Jesús, cadi ti baʼduhuiiniʼ casi gule. Ne cadi ndaaniʼ ti currá nuu José ne María ora bidxagalucaʼ laacabe, sínuque maʼ nabézacaʼ ndaaniʼ ti yoo.

Ne guionna, tu bicaa beleguí ni yenanda ca astrólogo que guibáʼ. Cani rusiidiʼ ndaaniʼ ca yuʼduʼ ca nacaʼ Dios bicaa ni. Peru ñee dxandíʼ nga la? Qué niné diʼ Beleguí que laacabe tobi si tiru ndaaniʼ guidxi Belén. Primeru yeneni laacabe ra nuu rey Herodes ndaaniʼ guidxi Jerusalén. Laacabe gúdxicabe rey malu que gule Jesús ni chigaca «rey sti ca judíu», ni guníʼcabe ca bicaani rey que gacananalaʼdxiʼ baʼduhuiiniʼ que (Mateo 2:2). Cumu guizáʼ nexhená rey que la? gúdxibe ca astrólogo que guibiguétacaʼ para gábicaʼ laabe paraapeʼ bidxélacaʼ Jesús ti chebe para gusisácabe laa. De raqué yené beleguí que ca hombre que ra nuu José ne María. Pur ni bíʼnicabe ca ñanda ñati baʼduhuiiniʼ que. Peru galán gucané Dios para cadi nizaaca nga. Ora gunna Herodes maʼ zeʼ ca hombre que ne qué nibiguétacaʼ para ñábicaʼ laabe ni racaláʼdxibe la? guizáʼ bidxiichibe. Ngue runi, dede biʼniʼ mandarbe gati guiráʼ hombrehuiiniʼ ni napa chupa iza o ni caʼruʼ gusaa chupa iza ni nuu ndaaniʼ guidxi Belén ne ndaaniʼ xcaadxi guidxi huiiniʼ nuu gaxha de laani (Mateo 2:16).

Despué guníʼ Jiobá de Jesús sicaríʼ: «Ndi nga Xiiñe ni nadxiee ne ni rusieche naa» (Mateo 3:17). Nga rusihuinni nadxii Bixhoze Jesús laa ne runi ni jneza. Yanna, ñee rábiluʼ niquiiñeʼ Bixhózebe ca astrólogo ni qué runi adorar Dios que pa rúnicaʼ ni na Ley stibe cadi jneza la? (Deuteronomio 18:10.) Ñee niquiiñebe ti beleguí para niné ca hombre que ra nuu rey, hombre jma malu stiʼ guidxi que, ne gábicaʼ rey que xiixa ni gucaa laa gacananalaʼdxiʼ Jesús la? Ñee nuluiʼbe ca hombre que paraa nuu Xiiñiʼ huiinibe, ni qué zanda guni gastiʼ para gulá laca laa, ne despué nitídxicaʼ ni rey que la?

Guníʼ ique ejemplu riʼ: ti comandante ni nabé nuu xpiaaniʼ biseendaʼ ti soldadu ni jma nanna para chiguni ti dxiiñaʼ ni nabé nagana neza ra nuu ca xhenemígucabe. Yanna, ñee ñábibe ca xhenemígucabe paraa nu soldadu ni biseendabe que la? Coʼ, njaʼ. Zacaca nga Jiobá, laabe biseendabe Xiiñibe gueeda guni ti dxiiñaʼ nagana lu Guidxilayú malu riʼ. Ñee ñábibe Herodes, rey malu que, paraa nuu Xiiñiʼ huiinibe que la? Coʼ xa.

Yanna, tu bicaa ni nácabe beleguí que de Belén yaʼ. Tuu nga binni ni jma racalaʼdxiʼ gunitilú baʼduhuiiniʼ que ti cadi guni dxiiñaʼ ni zeeda guni lu Guidxilayú riʼ yaʼ. Tuu nga ruyubi guché lu binni ne rucaa binni gusiguii, tinde ne guuti yaʼ. Jesús bisihuinni tuu nga ni ruuti binni ne rusiguii, dede zeeda gaca «bixhoze gola enda rusiguii», laabe nga Binidxabaʼ (Juan 8:44).