‘Umwana Afwaya Ukusokolola Wishi’

“Takuli uwaishiba Umwana ifyo aba kano Wishi, kabili takuli uwaishiba Wishi ifyo aba kano Umwana, na untu Umwana afwaya ukusokolwela.”—LUKA 10:22.

KUTI MWAYASUKA SHANI?

․․․․․

Mulandu nshi Yesu abelele uwalinga ukusokolola Wishi?

․․․․․

Bushe Yesu asokolwele shani Wishi ku bantu?

․․․․․

Ni mu nshila nshi twingapashanishamo Yesu ukusokolola Wishi?

1, 2. Cipusho nshi icapelenganya abantu abengi, kabili mulandu nshi?

‘BUSHE Lesa nani?’ Ici cipusho cilapelenganya abengi. Ku ca kumwenako, abengi abatila Bena Kristu abasumina ukuti muli Lesa mwaba abene batatu, abengi balanda ukuti takuli uwingeshiba umo ici cisambilisho calola. Shimapepo uubomba incito ya bukalemba na o atile: “Takwaba umuntu nangu umo uwingeshiba umo ici cisambilisho calola.” Na kabili, abengi abasumina mu kusanguka, tabasumina ukuti Lesa e ko aba. Batila ifintu fyonse fyaishilebako fye. Mu nshita ya kukaana ukuti takwaba Lesa, Charles Darwin ena atile: “Takwaba umuntu nangu umo uwingomfwa umo ici cisambilisho calola.”

² Nangu ca kuti abantu balisumina mu fisambilisho ifyalekanalekana, abengi balepusha nga ca kuti Lesa eko aba. Apo tabasanga amasuko ayabafika pa mutima, abengi balaleka ukufwaya Lesa. Ukwabula no kutwishika, Satana ‘alipofwisha amatontonkanyo ya bashatetekela.’ (2 Kor. 4:4) Kanshi e calenga abantu abengi ukukanaishiba icine pali Shifwe Kabumba wa fintu fyonse!—Esa. 45:18.

3. (a) Nani uwasokolola Kabumba kuli ifwe? (b) Mepusho nshi twalalanshanyapo?

³ Lelo nangu cibe fyo, calicindama sana ukuti abantu basambilile icine pali Lesa. Mulandu nshi? Pantu ‘abalilila kwi shina lya kwa Yehova’ fye e bakapusuka. (Rom. 10:13) Ukulilila kwi shina lya kwa Lesa cipilibula ukwishiba Yehova bwino bwino. Yesu Kristu alisambilishe abasambi bakwe ici cishinka cacindama. Alibasokolwelele Wishi. (Belengeni Luka 10:22.) Mulandu nshi Yesu asokolwelele Wishi ukucila ifyo umuntu uli onse engacita?  Bushe acitile shani? Kabili kuti twamupashanya shani ilyo tulesambilisha abantu pali Wishi? Nomba natulanshanye pali aya mepusho.

YESU KRISTU E WALI UWALINGA

4, 5. Mulandu nshi Yesu e wali uwalinga sana ukusokolola Wishi?

⁴ Yesu e walingile ukusokolola Wishi. Mulandu nshi? Pantu ilyo ifintu fimbi fishilabumbwa, Yesu ali icibumbwa ca mupashi ku muulu, kabili ali “Umwana wa kwa Lesa uwafyalwa eka.” (Yoh. 1:14; 3:18) Icifulo akwete cali icaibela. Ilyo kushilaba icibumbwa nangu cimo, lyonse aleba mu ceni ca kwa Wishi kabili alesambilila pali Ena na pa mibele yakwe. Pa myaka iingi iyo Wishi no Mwana baikele pamo bafwile balelanshanya sana kabili balitemwanene. (Yoh. 5:20; 14:31) Yesu afwile alisambilile sana no kwishiba ifyo Wishi aba!—Belengeni Abena Kolose 1:15-17.

⁵ Wishi apeele Umwana wakwe umulimo wa kumulandilako. Ali “Cebo ca kwa Lesa.” (Ukus. 19:13) Kanshi Yesu e wali uwalinga ukusokolola Wishi. Yohane uwalembele ibuuku lya Mbila Nsuma alondolwele ukuti Yesu, “Cebo” ali “pa cifuba ca kwa Wishi.” (Yoh. 1:1, 18) Pa kulanda aya mashiwi, Yohane aleibukisha ifyo balecita nga balelya ica kulya. Umweni balemuteka mupepi no mweni umbi pa kuti balelanshanya. Apo Umwana ali “pa cifuba ca kwa Wishi” afwile alelanshanya sana na Wishi.

6, 7. Cinshi calengele bucibusa pali Wishi no Mwana bulekoselako?

⁶ Bucibusa pali Wishi no Mwana bwalekoselako fye. Umwana ‘balimutemenwe nga nshi [kuli Lesa] inshiku shonse.’ (Belengeni Amapinda 8:22, 23, 30, 31.) Kanshi e calengele ukuti bucibusa bwabo bulekoselako fye ilyo balebombela pamo, na kabili Umwana alisambilile imibele ya kwa Wishi. Ilyo Yehova abumbile abantunse, Umwana alemona ifyo alebasunga kabili ukwabula no kutwishika calengele atemwe sana Wishi no kulamucindika.

⁷ Na lintu Satana atwishike nampo nga Yehova alilinga ukuteka abantunse, Umwana alisambilileko ku fyo Yehova ali no kulanga ukutemwa, umulinganya, amano na maka maka ilyo aleba mu bwafya ubukalamba. Ifi fyalengele Yesu ukwishiba ifya kucita pa mafya ali no kukwata mu mulimo apeelwe ukubomba pe sonde.—Yoh. 5:19.

8. Bushe amabuuku ya Mbila Nsuma yatwafwa shani ukwishiba imibele ya kwa Lesa?

⁸ Pa mulandu wa kuti bucibusa bwa kwa Yesu na Yehova bwali ubwakosa, calengele ukuti alondolole bwino sana Wishi ukucila ne fyo abantu bambi bengamulondolola. Kanshi nga tulefwaya ukwishiba bwino Wishi, tufwile ukusambilila ifyo Umwana wakwe uwatemwikwa alesambilisha e lyo ne fyo alecita. Tontonkanyeni pa fyo cingatwafya ukwishiba bwino bwino ifyo ishiwi lya kuti “ukutemwa” lipilibula nga ca kuti twabelenga fye mu dikishonari. Lelo nga twatontonkanya pa fyo abalembele amabuuku ya Mbila Nsuma pa mulimo wa kwa Yesu balandile e lyo ne fyo alesakamana abantu, kuti calenga twaishiba ifyo amashiwi ya kuti “Lesa kutemwa” yapilibula. (1 Yoh. 4:8, 16) Ifi fine e fyo twingasambilila na pa mibele imbi iya kwa Lesa iyo Yesu asokolwele ku basambi bakwe ilyo ali pano calo.

IFYO YESU ASOKOLWELE WISHI

9. (a) Ni mu nshila nshi shibili isho Yesu asokolwelelemo Wishi? (b) Landeni ica kumwenako icilanga ukuti Yesu alisokolwele Wishi mu fyo alesambilisha.

⁹ Bushe Yesu asokolwele shani Wishi  ku basambi na ku bali no kuba abasambi bakwe? Amusokolwele mu nshila shibili: mu fyo alesambilisha e lyo na mu fyo alecita. Intanshi natulande pa fyo Yesu alesambilisha. Ifyo Yesu asambilishe abasambi bakwe fyalangilile ukuti alishibe sana ifyo Wishi aletontonkanya ne fyo aleyumfwa e lyo ne nshila alebombelamo ifintu. Ku ca kumwenako, Yesu apashenye Wishi ku mucemi uusunga bwino sana impaanga, uuya mukufwaya impaanga imo iilubile. Yesu atile umucemi nga asanga impaanga iilubile, “alasekelela nga nshi pali imo ukucila pa mpaanga amakumi pabula na pabula (99) ishishaluba.” Bushe ici cilangililo calola mwi? Yesu alondolwele ukuti, “Ifyo fine na Tata uwaba mu muulu tafwaya ukuti umo pali aba abanono alobe.” (Mat. 18:12-14) Finshi twingasambilila pali Yehova muli ici cilangililo? Nangu ca kuti limo kuti muleyumfwa kwati tamwacindama nangu ukuti abantu tabamubikako amano, Shifwe wa mu muulu ena alamubikako amano kabili alamusakamana. Kuli ena, mwaba “pali aba abanono” abo asakamana.

10. Bushe Yesu asokolwele shani Wishi mu fyo alecita?

¹⁰ Inshila iyalenga bubili iyo Yesu asokolwelelemo Wishi ku basambi bakwe ni mu mibele yakwe. E co ilyo umutumwa Filipi aebele Yesu ati: “Tulangeni Shinwe,” Yesu atile: “Uwamona ine, ninshi amona na Tata.” (Yoh. 14:8, 9) Natulande pa fya kumwenako fimo umo Yesu alepashanya Wishi imibele. Ilyo umwaume “uwalwele ifibashi umubili onse” alombele Yesu ukuti amuposhe, Yesu alimwikete no kumweba ati, “Ndefwaya. Pola.” Ilyo fye apolele, alimwene amaka ya kwa Yehova mu fyo Yesu acitile. (Luka 5:12, 13) Ilyo Yesu “aumfwile ubulanda nga nshi, aumfwa no bubi” kabili ‘aponya ne filamba’ pa kumfwa ukuti Lasaro nafwa, abasambi bafwile balimwene ukuti Yehova wa luse. Nangu ca kuti Yesu alishibe ukuti aleyabuusha Lasaro, alyumfwile sana ububi nge fyo ba lupwa ne fibusa fya kwa Lasaro baumfwile. (Yoh. 11:32-35, 40-43) Kufwile kwaliba amalyashi ya mu Baibolo ayalanda pali Yesu ayo mwatemwa ayalenga mulemona ifyo Wishi aba no luse.

11. (a) Ilyo Yesu asangulwile itempele, finshi asokolwele pali Wishi? (b) Bushe ifyo Yesu asangulwile itempele fitukoselesha shani?

¹¹ Finshi musambililako ku fyo Yesu asangulwile itempele? Elenganyeni ifyo cali: Yesu apangile ica kufopwelako ica myando no kutamfya bonse abaleshitisha ing’ombe ne mpaanga. Apoosele ne ndalama sha balekabula indalama no kupenuna amatebulo yabo. (Yoh. 2:13-17) Ifyo Yesu acitile mwi tempele fyalengele abasambi bakwe ukwibukisha  amashiwi ya Mfumu Davidi ayatila: “Nalitemwisha ing’anda yenu.” (Amalu. 69:9) Filya Yesu acitile, alangile ukuti alefwaisha ukutungilila ukupepa kwa cine. Nga mwabelenga ili ilyashi, bushe mulamona imibele ya kwa Wishi? Tusambililamo ukuti Lesa alikwata amaka ya kupwisha ifyabipa fyonse pa calo kabili alafwaisha ukufifumyapo. Ifi Yesu apatile ifyabipa, filangilila ifyo Wishi omfwa ububi pa fyabipa ificitika pano calo. Ifyo Yesu acitile, ala filatulakoselesha nga batufyenga!

12, 13. Finshi twingasambilila kuli Yehova ku fyo Yesu alesakamana abasambi bakwe?

¹² Natulande pa ca kumwenako na cimbi pa fyo Yesu alesakamana abasambi bakwe. Lyonse balekansana pa wali umukalamba. (Marko 9:33-35; 10:43; Luka 9:46) Pa mulandu wa kuti alibombele sana na Wishi, Yesu alishibe ifyo Yehova omfwa pa bantu ba cilumba. (2 Sam. 22:28; Amalu. 138:6) Yesu alimwene ukuti Satana Kasebanya wa cilumba. Uyu muntu wa cilumba alefwaya sana ukulumbuka no kukwata icifulo. Kanshi Yesu alyumfwile sana ububi ilyo amwene ukuti abasambi abo asambilishe bali bacili no mutima wa kuibililika! Nangu fye batumwa abo asalile, nabo bene bali no mutima wa kufwaisha ififulo! Mpaka fye no bushiku bwa kulekeleshako pe sonde ubwa kwa Yesu, abasambi bakwe bali bacili ne mibele ya kuibililika. (Luka 22:24-27) Lelo Yesu atwalilile fye ukubafunda bwino bwino, ukwabula ukunenuka pantu alishibe ukuti bakasuka bakasambilile ukuba nga ena.—Fil. 2:5-8.

¹³ Kanshi kuti twamona ukuti Yehova alyafwile Yesu ukutekanya pa kulungika abasambi bakwe. Bushe tamulemona ukuti ifyo Yesu alecita ne fyo alesosa filangilila ukuti Wishi talekelesha abantu bakwe nangu bakwate impuso ishingi? Apo twalishiba imibele ya kwa Lesa, bushe nga twalufyanya te kuti tuye kuli ena ku kulomba ubwelelo nga twalapila?

UMWANA ALI-ITEMENWE UKUSOKOLOLA WISHI

14. Bushe Yesu alangilile shani ukuti ali-itemenwe ukusokolola Wishi?

¹⁴ Bakateka abengi aba lukambo bafwaya ukutitikisha abantu no kubateeka mu busha pa kukanabeba ifyo balingile ukwishiba. Lelo Yesu ena, aleitemenwa ukweba abantu ifyo aishibe pali Wishi, no kumusokolola bwino ku bantu. (Belengeni Mateo 11:27.) Yesu alipeele abasambi bakwe ‘amano ya kwishiba uwa cine’ Yehova Lesa. (1 Yoh. 5:20) Bushe aya mashiwi yalola mwi? Yesu alyafwile abasambi bakwe ukulaumfwikisha ifyo alesambilisha pali Wishi. Tafishile ifyo Wishi ali, pantu tabasambilishe ukuti muli Lesa mwaba abene batatu abo te kuti mwishibe bwino.

15. Cinshi ico Yesu ashasokolwelele fyonse pa muku umo pali Wishi?

¹⁵ Bushe Yesu alisokolwele fyonse ifyo aishibe pali Wishi? Iyo, tabasambilishe ifingi pa muku umo. (Belengeni Yohane 16:12.) Mulandu nshi? Pantu pali ilya nshita abasambi bakwe ‘nga tabafyumfwile.’ Nga fintu Yesu alondolwele, bali no kwishiba ifingi nga ‘kaafwa’ aisa, umupashi wa mushilo uwali no kubatungulula “mu cine conse.” (Yoh. 16:7, 13) Nga filya fine abafyashi ba mano te kuti basambilishe umwana fyonse mpaka akula, e fyo na Yesu acitile. Alilolelele mpaka abasambi bakwe bafikapo no kukwata amaka ya kumfwa ifishinka fimo pali Wishi. Kanshi Yesu alishibe ukuti tabali no kumfwikisha fyonse pa muku umo.

 AFWENI ABANTU UKWISHIBA YEHOVA NGA FILYA YESU ACITILE

16, 17. Cinshi ico musokolwela Lesa ku bantu?

¹⁶ Nga mwaishiba bwino umuntu no kumutemwa pa mulandu wa mibele yakwe iisuma, bushe tamufwaya ukulalanda pali ena kuli bambi? Ilyo Yesu ali pe sonde, alelanda pali Wishi. (Yoh. 17:25, 26) Bushe te kuti tupashanye Yesu ukulasokolola Yehova ku bantu?

¹⁷ Nga fintu twasambilila, Yesu alishibe sana ifingi pali Wishi ukucila abantu bonse. Lelo ali-itemenwe ukusambilishako abantu fimo ifyo aishibe, alipeele na basambi bakwe amano ya kwishiba ifyakosa fimo pa mibele ya kwa Lesa. Pa mulandu wa fyo Yesu atwafwa, bushe tatwaishiba ifingi pali Lesa ifyo abantu abengi muno nshiku bashaishiba? Ala tulatasha pa mulandu wa kuti ukupitila mu fyo alesambilisha ne mibele yakwe, Yesu ali-itemenwe ukutusokolwela Wishi! Na kuba, kuti twaitakisha pa mulandu wa kwishiba Wishi. (Yer. 9:24; 1 Kor. 1:31) Ilyo tulefwaisha ukupalama kuli Yehova, na o alapalama kuli ifwe. (Yako. 4:8) E co na ifwe kuti twaebako abantu ifyo twaishiba pali Lesa. Kuti twacita shani?

18, 19. Ni mu nshila nshi mwingasokolwelamo Lesa ku bantu? Londololeni.

¹⁸ Tulingile ukupashanya Yesu ukulasokolola Wishi mu fyo tulanda ne fyo tucita. Tufwile ukwishiba ukuti abengi abo tusanga mu mulimo, Lesa tabamwishiba. Ifisambilisho fya bufi fyalilenga ukuti beishiba Lesa. Tulingile ukubasambilisha pe shina lya kwa Lesa, pa fyo afwaya ukucitila abantu, na pa fyo aba nga fintu Baibolo ilanda. Lelo limo kuti tulelanshanyako na basumina banensu pa malyashi yamo aya mu Baibolo ayalanda pa fyo Lesa aba ayo twalefilwa ukumfwikisha. Nga tulecita ifi, nabo kuti banonkelamo.

¹⁹ Bushe te kuti tulesokolola Wishi mu fyo tucita nga tuleibikilishako ukupashanya Yesu? Nga ca kuti ifyo tucita filelanga ukuti twalitemwa Kristu, abantu bakapalama kuli Wishi na ku Mwana wakwe. (Efes. 5:1, 2) Umutumwa Paulo atukoseleshe ‘ukumupashanya ifyo na o alepashanya Kristu.’ (1 Kor. 11:1) Ala twalikwata ishuko ilikalamba ilya kwafwa abantu ukwishiba Yehova ukupitila mu fyo tucita! Kanshi lekeni bonse tutwalilile ukupashanya Kristu ukulasokolola Wishi ku bantu.

[Ifipusho]