“Pe Taʼýra añoite oikuaa pe Túvape. Ha pe Taʼýra omombeʼuséramo ambue tapichápe mávapa pe Túva, upéva oikuaáta avei chupe.” (LUC. 10:22, NM)

¿MBAʼÉPA REMBOHOVÁITA?

¿Mbaʼérepa Jesús añoite ikatuvaʼekue oikuaauka porã mbaʼeichaguápa pe Túva?

¿Mbaʼéichapa Jesús ohechauka mávapa pe Túva?

¿Mbaʼéichapa ikatu ñahaʼanga Jesúspe ha jaikuaauka mbaʼeichaguápa pe Túva?

1, 2. ¿Mbaʼépa heta hénte ndaikatúi ombohovái, ha mbaʼérepa?

 ¿MÁVAPA Ñandejára? Oĩ ndoikuaáiva voi mbaʼéichapa ombohováita ko porandu. Pór ehémplo, heta umi heʼíva ijehe kristianoha oimoʼã Ñandejára, pe Taʼýra ha espíritu sánto peteĩnteha, péro ohechakuaa avei ko mbaʼe ndaikatuiha oñentende. Peteĩ saserdóte ohaivaʼekue: “Ñane akã ningo nomeʼẽi ñantende hag̃ua pe Trinidad. Upéva nahesakãmoʼãi voi arakaʼeve yvyporakuérape”. Heta ogueroviáva pe evolusión katu opensa Ñandejára noĩriha mamove ha heʼi avave ndojapói hague umi mbaʼe porãita oĩva ñande jerére, síno oiko hague ijehegui reínte. Charles Darwin ndeʼíriramo jepe ndaiporiha Ñandejára, heʼi: “Che ahechakuaaháicha, koʼã mbaʼe yvypóra nontendemoʼãi voínte”.

² Hetaiterei tapicha, tahaʼe haʼéva pe ogueroviáva, oñeporandu jepi heta mbaʼe Ñandejáragui, péro nahesakãivo chupekuéra mávapa ni mbaʼeichaguápa Haʼe, ndoikuaasevéintema mbaʼeve. Upéicha jahecha Satanás ‘ombohesaʼypytũha umi ndogueroviáivape’ (2 Cor. 4:4). Ndareíri ningo hetaite hénte oñekonfundipa ha ndoikuaái pe Túvape, ko arapy Apohare (Isa. 45:18).

3. a) ¿Mávapa oikuaauka ñandéve mbaʼeichaguápa ñande Apohare? b) ¿Mbaʼe mbaʼépa oñembohováita ko artíkulope?

³ Tekotevẽterei ningo enterovéva oikuaa Ñandejárape. ¿Mbaʼérepa? Umi ojeroviáva “Jehová réra rehe” añoite ojesalváta (Rom. 10:13, NM). Péro upearã jaikuaa porã vaʼerã chupe. Jesucristo oĩrõ guare ko yvy ape ári omombeʼuvaʼekue hemimboʼekuérape mávapa pe Túva (elee Lucas 10:22). ¿Mbaʼérepa Jesús añoite ikatuvaʼekue oikuaauka porã mbaʼeichaguápa pe Túva? ¿Mbaʼéichapa ojapovaʼekue upéva? ¿Ha mbaʼéichapa ikatu ñahaʼanga chupe ñamombeʼu jave  ñande rapichakuérape mávapa Ñandejára? Ñahesaʼỹijomína koʼã mbohapy porandu.

JESUCRISTO AÑOITE IKATU OIKUAAUKA PORÃ MÁVAPA PE TÚVA

4, 5. ¿Mbaʼéicha rupípa Jesús añoite ikatuvaʼekue oikuaauka porã mávapa Itúva?

⁴ Jesús añoite ikatuvaʼekue oikuaauka porã mávapa Itúva. Ñandejára ojapo chupe opa mbaʼe mboyve, ha upéicha rupi oiko heta tiémpore yvágape Itúva ndive ‘Taʼýra peteĩetévaramo’ ou mboyve ko yvy ape ári (Juan 1:14; 3:18, NM). ¡Ajépa tuichaite mbaʼe upéva! Ojejapo mboyve ambue mbaʼe, pe Taʼýra vyʼapópe ohasa heta tiémpo Itúva ndive ha oaprende chugui heta mbaʼe porã. Haʼekuéra hetaiterei áñore oñemongeta ha ohasávo pe tiémpo koʼýte ojoayhuve hikuái (Juan 5:20; 14:31). Añetehápe jaʼekuaa Jesús oikuaa porãiterei hague Itúvape (elee Colosenses 1:15-17).

⁵ Pe Túva oiporu Itaʼýrape oñeʼẽ hag̃ua hérape, upévare oñehenói avei chupe ‘Ñandejára Ñeʼẽ’ (Rev. 19:13). Upéicha rupi Jesús añoite ikatuvaʼekue omombeʼu ha omboʼe porã opavavépe mbaʼeichaguápa Itúva. Ndareíri Juan heʼi Jesús rehe “pe Ñeʼẽ” “oĩva pe Túva ykére” (Juan 1:1, 18, NM). Juan heʼírõ guare upéva, imanduʼa mbaʼéichapa upe tiémpope umi hénte oguapými okaru hag̃ua. Pe óga jára oguapy jepi imbohupa ykerete ikatu hag̃uáicha oñemongeta porã avave ostorvaʼỹre chupekuéra. Upéicha avei, pe Taʼýra “oĩva pe Túva ykére” heta oñemongetavaʼekue Itúva ndive.

6, 7. ¿Mbaʼéichapa pe Túva ha Taʼýra oñemoag̃uive ojuehe?

⁶ Pe Túva ha Taʼýra ojokuaave ha ojoayhuve ohasávo pe tiémpo. Pe Túva ‘koʼẽ koʼẽ rehe ipyʼarory’ Itaʼýra ndive (elee Proverbios 8:22, 23, 30, 31). Haʼekuéra ombaʼapo rupi oñondive oñemoag̃uive ojuehe, ha pe Taʼýra oaprende heta mbaʼe Itúvagui ha ohaʼanga chupe. Avei ohechávo mbaʼéichapa otrata ohóvo peteĩteĩ hembiapokuépe, koʼýte omombaʼeve Itúvape.

⁷ Satanás ontendekárõ guare Jehová ndorekoiha derécho oporosãmbyhývo, pe Taʼýra ohecha mbaʼéichapa Itúva ohechauka oporohayhu, hekojoja, iñarandu ha ipoderosoha ombohovái hag̃ua peteĩ provléma ijetuʼuetereíva. Umi mbaʼe katuete opreparáne raʼe chupe ikatu hag̃uáicha ombohovái umi mbaʼe hasyvéva ohasavaʼekue ko yvy ape ári (Juan 5:19).

8. ¿Mbaʼéichapa ñanepytyvõ Jesús rembiasakue ikatu hag̃uáicha ñantende porãve mbaʼeichaguápa pe Túva?

⁸ Pe Taʼýra peteĩete oikuaa porãiterei rupi Itúvape ikatuvaʼekue ohechauka porã mbaʼeichaguápa hína Jehová. Upévare, ikatu hag̃uáicha jaikuaa pe Túvape, ñahesaʼỹijovaʼerã umi mbaʼe heʼi ha ojapovaʼekue Itaʼýra. Ñapensamína ko ehémplore. Ajépa ijetuʼuetéta ñantende porã hag̃ua mbaʼépa heʼise mborayhu jahekánterõ peteĩ diksionáriope. Péro ñañemoĩramo jajepyʼamongeta Jesús rembiasakuére ha umi mbaʼe oñandúvare umi héntere, katuete ñantende porãvéta mbaʼépa heʼise “Ñandejára ningo mborayhu” (1 Juan 4:8, 16). Avei jaikuaáta hetave mbaʼe Ñandejáragui, Cristo ohechauka rupi ambue mbaʼe porã hemimboʼekuérape.

JESÚS OHECHAUKA MBAʼEICHAGUÁPA ITÚVA

9. a) ¿Mbaʼéichapa Jesús ohechauka hemimboʼekuérape mbaʼeichaguápa Itúva? b) Emombeʼu peteĩ ehémplo Jesús oiporuvaʼekue omboʼe hag̃ua mbaʼeichaguápa Itúva.

⁹ Jesús ohechaukavaʼekue hemimboʼekuérape mbaʼeichaguápa Itúva umi mbaʼe omboʼe ha ojapóva rupive, upéicha rupi ñande kristiáno koʼag̃agua ikatu avei jaikuaa  Jehovápe. Haʼe oporomboʼérõ guare ohechauka oikuaa porãha Itúva opensáva, oñandúva ha ojapóva. Pór ehémplo, ombojoja Itúvape peteĩ ovecharerekua rehe osẽva oheka peteĩ ijovecha okañýva, ha ojuhúvo “ovyʼave upe peteĩmíre, ovyʼa rangue umi 99 ovecha nokañyivaʼekuére”. ¿Mbaʼépa omboʼese rakaʼe Jesús ko ehémplo rupive? Haʼe heʼi: “Upéicha avei, che Ru oĩva yvágape ndoipotái oñehundi ni peteĩ koʼã michĩvéva jepe” (Mat. 18:12-14, NM.) ¿Mbaʼépa ñande ikatu ñaaprende ko ehémplogui? Ikatu sapyʼánte ñaimoʼã avave naimanduʼaiha ñanderehe térã ndajavaleiha voi. Péicha jave, ani ñanderesarái ñande Ru yvagapegua ojepyʼapyha ñanderehe, chupe g̃uarã ningo ñande haʼe avei umi “michĩvéva” hakateʼỹeteha.

10. ¿Mbaʼéichapa Jesús ohechauka Itúva oporoporiahuverekoha?

¹⁰ Jesús ohechauka avei hemimboʼekuérape mbaʼeichaguápa Itúva umi mbaʼe ojapóva rupive. Pór ehémplo, peteĩ jey apóstol Felipe ojerure Jesúspe ohechauka hag̃ua chupekuéra Itúva, ha haʼe heʼi: “Chéve cherecháva ohecháma avei che Rúpe” (Juan 14:8, 9, NM). Jahechamína mbaʼe mbaʼépa Jesús ojapovaʼekue ohechauka hag̃ua mbaʼeichaguápa Itúva. Peteĩ kuimbaʼe “henyhẽva lépragui” ojerure asýrõ guare omonguerami hag̃ua chupe, haʼe opoko hese ha heʼi: “Aipota rekuera”. Jesús ojapóvo upéva, ko karai iléprava katuete ohechakuaáne raʼe mbaʼeichaguápa Jehová (Luc. 5:12, 13, NM). Lázaro omanórõ guare katu umi disípulo ohechakuaa avei pe Túva oporoporiahuverekoha. Upérõ, pe oikovaʼekue “oguapyeterei Jesús rehe, ombyasy ha [...] hasẽ”. Jepe haʼe oikuaa omoingove jeytaha chupe, oñeñandu vaieterei ohechávo mbaʼeichaitépa Lázaro hentekuéra ha iñamigokuéra ombyasy pe oikóva (Juan 11:32-35, 40-43, NM). Oiméne katuete oĩ ambue mbaʼe ñandegustavéva Jesús ojapovaʼekue ha ohechaukáva ñande Ru Jehová ñandeporiahuverekoha.

11. a) ¿Mbaʼépa ohechauka Jesús omosẽmbárõ guare témplogui umi ombaʼevendévape? b) ¿Mbaʼérepa ñanemokyreʼỹ Jesús ojapovaʼekue?

¹¹ Peteĩ jey Jesús ojapo peteĩ tukumbo, omosẽmba pe témplogui umi mymbavendeha, oitypa umi kambísta mesa ha omosarambi imonedakuéra (Juan 2:13-17). ¿Mbaʼépa ñaaprende Jesús ojapovaʼekuégui? Koʼã mbaʼe omomanduʼa hemimboʼekuérape rréi David heʼivaʼekue: ‘Nde róga ahayhueterei, ha upéva tatáicha okaru cherehe’ (Sal. 69:9, NM). Péicha Jesús ohechauka oipotaitereiha oñemombaʼeguasu hekoitépe Itúvape ha upévare ndohejareíri koʼã héntepe. ¡Ajépa ojekuaa porãite Jesús ojoguaha Itúvape! Jehová ningo ipoderosoiterei ohundi hag̃ua umi iñañávape, ha ko ehémplo rupive jahechakuaa haʼe ojaposetereiha upéva. Jesús ipochy ohechárõ guare umi mbaʼe noĩporãiva ha upéva ohechauka mbaʼéichapa oiméne oñeñandu Jehová ohechávo hetaite mbaʼe  vai oikóva ko múndope. Katuete ñañeñandu porãta ñanemanduʼáramo koʼã mbaʼére oĩ jave ñanembohasa asy reietéva.

12, 13. ¿Mbaʼépa jaikuaa Jehovágui jahechávo mbaʼéichapa Jesús otrata hemimboʼekuérape?

¹² Jahechamína koʼág̃a mbaʼéichapa Jesús otratavaʼekue hemimboʼekuérape. Haʼekuéra pyʼỹi ojodiskuti oikoségui pe iñimportantevévaramo ijapytepekuéra (Mar. 9:33-35; 10:43; Luc. 9:46). Jesús ohasa rupi heta tiémpo Itúvandi, oikuaa mbaʼépa haʼe opensa umi oñembotuichasévare (2 Sam. 22:28; Sal. 138:6). Avei ohechákuri mbaʼéichapa Satanás opensa rupi ijehénte, oñembotuichase ha oipota oñemombaʼeguasu chupe. Upévare oiméne Jesús ombyasyeterei oĩ haguére hemimboʼekuéra apytépe oñemoimportanteséva, ha umi apóstol jepe oñembotuichase haʼe omboʼe hetáramo jepe chupekuéra. Ha Jesús omanoha ára peve ojekuaa gueteri hesekuéra upeichaha (Luc. 22:24-27). Péro haʼe ipasiénsia ha pyʼaporãme oñemoñeʼẽ jey jey chupekuéra, ha ojerovia ág̃ante ikatutaha okambia hikuái ha hekomirĩ haʼéicha (Fili. 2:5-8).

¹³ ¿Mbaʼépa jaikuaa pe Túvagui jahecha rire mbaʼéichapa Jesús ipasiénsia hemimboʼekuérare oñemoñeʼẽ ha okorrehi jave chupekuéra? ¿Jahechápa umi mbaʼe Jesús heʼi ha ojapovaʼekuére, Jehová ndohejamoʼãiha hembiguaikuérape ojavy jey jeýramo jepe? Ñapensáramo umi mbaʼe porãita Jehová ohechaukávare, ndajakyhyjemoʼãi ñañemboja hag̃ua hese jajavy jave ha jajerure hag̃ua chupe tañaneperdonami.

PE TAʼÝRA OMOMBEʼUSE MBAʼEICHAGUÁPA ITÚVA

14. ¿Mbaʼéichapa Jesús ohechauka oikuaaukaseha mávapa Itúva?

¹⁴ Heta mburuvicha oñomi hetaiterei mbaʼe umi hénte oĩvagui ipoguýpe ani hag̃ua oikuaa hikuái opa mbaʼe oikóva. Jesús katu ndahaʼeiete upéicha, haʼe omombeʼuseterei voi heta mbaʼe oikuaáva Itúvagui (elee Mateo 11:27). Upévare peteĩ hemimboʼe heʼivaʼekue: ‘Ñandejára Raʼy [...] omeʼẽ ñandéve akã porã jaikuaa hag̃ua pe añeteguávape’ térã Jehovápe (1 Juan 5:20, ÑÑB). ¿Mbaʼépa heʼise upéva? Heʼise ohesapeʼaha chupekuéra ontende hag̃ua umi mbaʼe omboʼéva pe Túvagui. Haʼe ndeʼíri pe Túva, Taʼýra ha espíritu sánto peteĩnteha oñomi hag̃ua umi héntegui pe añetegua.

15. ¿Mbaʼérepa Jesús nomombeʼúi opaite mbaʼe oikuaáva pe Túvagui?

¹⁵ ¿Omombeʼúpa Jesús opaite mbaʼe oikuaáva pe túvagui? Nahániri. Oĩ heta mbaʼe nomombeʼuivaʼekue (elee Juan 16:12). ¿Mbaʼérepa? Haʼe heʼi kuri hemimboʼekuérape: “Peẽ ndaikatumoʼãi pegueropuʼaka koʼág̃a”. Upéicharamo jepe heʼi oñemyesakãtaha chupekuéra hetave mbaʼe ou vove “pe pytyvõhára”, pe espíritu sánto, ha upéva ‘oipytyvõta’ chupekuéra “ontendepaite hag̃ua pe añetegua” (Juan 16:7, 13, NM). Umi túva imbaʼerechakuaáva ningo oikuaa ifamília michĩ aja nontendemoʼãiha heta mbaʼe, upévare ohaʼarõ tuichamie ikatu hag̃uáicha omombeʼu chupekuéra hetave mbaʼe. Upéicha avei Jesús ohaʼarõnte hemimboʼekuéra imbareteve ha ikatupyrymie ontende hag̃ua ambue mbaʼe oñemboʼétava chupekuéra pe Túvagui. ¡Ajépa imbaʼerechakuaaite hendivekuéra!

JAIKUAAUKÁKENA UMI HÉNTEPE MÁVAPA JEHOVÁ, JESÚS OJAPO HAGUÉICHA

16, 17. ¿Mbaʼéicha rupípa ikatu hína ñamombeʼu porã ñande rapichakuérape mbaʼeichaguápa Ñandejára?

¹⁶ Jaikuaáramo peteĩ tapicha ipyʼaporãvape jaguerohoryeterei voi chupe ha ñamombeʼuse  opavavépe mbaʼeichaguápa haʼe. Jesús ojapovaʼekue upéva oúrõ guare ko yvy ape ári: omombeʼu umi héntepe mbaʼeichaguápa Itúva (Juan 17:25, 26). ¿Ikatúpa ñahaʼanga Jesúspe ñamombeʼúvo ñande rapichakuérape mbaʼeichaguápa Jehová?

¹⁷ Jahecha haguéicha ko artíkulope, ndaipóri ambue tapicha oikuaa porãva pe Túvape Jesús oikuaaháicha, haʼe omombeʼuvaʼekue heta mbaʼe Ñandejáragui ha oipytyvõ hemimboʼekuérape ontende hag̃ua heta mbaʼe hypyʼũva Jehovágui. Heta tapicha ndoikuaái Jehovápe, péro Cristo rupive ñande jaikuaa porã chupe. Umi mbaʼe omboʼe ha ojapóvare ohechauka ñandéve mbaʼeichaguápa pe Túva ha javyʼaiterei upe haguére. ¡Ajépa tuichaite mbaʼe ñandéve g̃uarã jaikuaa ñande Apoharépe! (Jer. 9:24; 1 Cor. 1:31.) Ñañehaʼã haguére ñañemoag̃ui Jehováre, haʼe avei oñemoag̃ui ñanderehe (Sant. 4:8). Upévare ikatu ñamombeʼu ñande rapichakuérape umi mbaʼe jaikuaáva chugui. ¿Mbaʼéichapa jajapokuaa upéva?

18, 19. ¿Mbaʼéichapa ikatu jahechauka mávapa pe Túva?

¹⁸ Jesús ojapo haguéicha, ñande avei jahechaukavaʼerã mbaʼeichaguápa pe Túva umi mbaʼe jaʼéva ha ñane rembiapo rupive. Ñanemanduʼavaʼerã heta tapicha jatopáva predikasionhápe ndoikuaaiha mávapa Ñandejára. Umi japu oñemboʼéva ko múndope oheja vai Ñandejárape umi hénte renondépe, péro la Biblia rupive ñande ikatu ñamboʼe chupekuéra héra, mbaʼeichaguápa haʼe ha mbaʼépa ojapóta yvyporakuéra rehehápe. Jastudiávo la Biblia ñaaprende heta mbaʼe ipyahúva Ñandejáragui ohechaukáva mbaʼeichaguápa hína haʼe. Iporãta ñañemongetárõ ñane ermanokuéra ndive umi mbaʼe ñaaprendévare. Ha jajapóramo upéicha, ñaipytyvõta avei chupekuéra.

¹⁹ Ñande ningo ikatu hína ñahaʼanga Jesúspe ha jahechauka mbaʼeichaguápa pe Túva opa mbaʼe jajapóvare.Ñande rapichakuéra ohechávo japorohayhuha Cristo ojapo haguéicha, haʼekuéra oñemoag̃uisevéta avei Jesús ha Itúva rehe (Efe. 5:1, 2). Apóstol Pablo ñanemokyreʼỹvaʼekue kóicha: ‘Peiko chéicha, che aiko Cristo oiko haguéicha’ (1 Cor. 11:1, BNP). Umi mbaʼe jaʼe ha jajapóvare jahechaukañaína mbaʼeichaguápa pe Túva ha upéva tuichaiterei mbaʼe ñandéve g̃uarã. Upéicharõ, ñañehaʼãmbaitékena ñahaʼanga Jesúspe ha ñamombeʼu ñande rapichakuérape mbaʼeichaguápa pe Túva.

[Porandu ñahesaʼỹijóva]