‘Mwana Kezola nde Bantu Kuzaba Tata’

“Ata muntu mosi ve kuzaba kana Tata kele nani, kansi Mwana mpamba muntu kuzaba ti bantu yina ya Mwana zola nde bo zaba kana Tata kele nani.”​—LUKA 10:22.

INKI MVUTU NGE TAPESA?

Sambu na nki Yezu fwanaka na kuzabisa bantu yankaka kyeleka na yina metala Tata?

Inki mutindu Yezu zabisaka bantu yankaka mambu ya Tata?

Na nki mitindu nge lenda landa mbandu ya Yezu na yina metala kulonga kyeleka sambu na Tata?

1, 2. Inki ngyufula keyangisaka bantu mingi mpi sambu na nki?

‘NZAMBI kele nani?’ Ngyufula yai keyangisaka bantu mingi. Mumbandu, ata bantu mingi yina kekudibingaka Bakristu kekwikilaka nde Nzambi kele Butatu, bo kendimaka nde dilongi yai kele mpasi na kubakisa. Nsoniki mosi yina kele mpi ntwadisi ya dibundu bakisaka nde: “Dilongi yai meluta mayele ya bantu. Yo kewakanaka ve ti bangindu ya bantu.” Kansi, bantu mingi yina kendimaka dilongi ya kintukila kekwikilaka nde Nzambi kele ve. Bo kemonaka nde bima yonso ya kitoko ya lugangu kudibasikilaka. Ata mpidina, na kisika ya kubuya nde Nzambi kele, Charles Darwin sukisaka nde: “Sambu na mono, yo kemonana nde dilongi yai meluta mayele ya bantu.”

² Yo vanda mambu yonso yina bantu mingi kekwikilaka, bo kekudiyulaka bangyufula na kuzaba kana Nzambi kele. Kansi, ntangu bo kezwaka ve bamvutu ya mbote, bantu mingi keyambulaka kusosa kuzaba Nzambi. Ya kyeleka, Satana “me fwaka mayele na bo.” (2 Kor. 4:4) Bantu fyoti keyitukaka mutindu bantu mingi kezabaka ve kyeleka na yina metala Tata, Ngangi ya luyalanganu!​—Yez. 45:18.

3. (a) Nani zabisaka beto kyeleka na yina metala Ngangi? (b) Inki bangyufula beto tatadila?

³ Kansi, yo kele mfunu nde bantu kuzaba kyeleka na yina metala Nzambi. Sambu na nki? Sambu bantu yina taguluka kele kaka bayina kesambaka na zina ya Yehowa. (Roma 10:13) Kusamba na zina ya Nzambi kelombaka kuzaba nde Yehowa kele Muntu ya Kyeleka. Yezu Kristu tendudilaka balongoki na yandi kyeleka yai ya mfunu mingi. Yandi zabisaka bo kyeleka ya metala Tata. (Tanga Luka 10:22.) Sambu na nki Yezu vandaka ti makuki ya kuzabisa kyeleka na yina metala Tata kuluta bantu yankaka? Inki mutindu Yezu salaka yo? Mpi nki mutindu beto lenda landa mbandu na yandi na yina metala kulonga bantu yankaka kyeleka ya Tata? Bika beto tadila bangyufula yai.

 KAKA YEZU KRISTU MUNTU MEFWANA

4, 5. Sambu na nki Yezu fwanaka mpenza na kuzabisa kyeleka na yina metala Tata na yandi?

⁴ Yezu fwanaka mpenza na kuzabisa kyeleka ya Tata na yandi. Sambu na nki? Sambu na ntwala ya kuganga bima yonso yankaka, kigangwa ya kimpeve yina kumaka Yezu zingaka na zulu bonso ‘mwana mosi ya Nzambi.’ (Yoa. 1:14; 3:18) Yandi vandaka mpenza na kisika mosi ya kuswaswana! Ntangu bigangwa yankaka vandaka ve, Mwana sepelaka na dikebi ya zola yina Tata na yandi monisilaka yandi mpi yandi longukaka na kuzaba Tata mpi bikalulu na yandi. Yo fwete vanda nde Tata mpi Mwana vandaka kusolula mingi mpi kuyedisaka zola ya kyeleka na kati na bo na nsungi ya bamvula mingi kibeni. (Yoa. 5:20; 14:31) Mwana zabaka mbote-mbote bikalulu ya Tata na yandi!​—Tanga Kolosai 1:15-17.

⁵ Tata ponaka Mwana sambu na kuvanda kinati-ndinga na yandi, disongidila “Ndinga ya Nzambi.” (Kus. 19:13) Yo yina, Yezu fwanaka mpenza sambu na kuzabisa bantu yankaka kyeleka na yina metala Tata. Ya kyeleka, Yoane nsoniki ya Evanzile monisaka Yezu yina vandaka “Ndinga” bonso muntu yina “vandaka penepene na Tata Nzambi.” (Yoa. 1:1, 18) Na kusadilaka ngogo yina, Yoane monisaka kikalulu yina bantu mingi vandaka kumonisa na ntangu ya kudya na bilumbu na yandi. Yo vandaka mbote nde munzenza kuvanda penepene ya muntu yina meyamba yandi. Kuvanda penepene vandaka kusadisa bo na kusolula mbote. Yo yina, mutindu Mwana “vandaka penepene,” salaka nde yandi solula mpenza mbote-mbote ti Tata na yandi.

6, 7. Inki mutindu bangwisana yina Tata ti Mwana vandaka ti yo landaka kuyela?

⁶ Bangwisana yina Tata ti Mwana vandaka ti yo landaka kuyela. Mwana “vandaka kupesa [Nzambi] kiese konso kilumbu.” (Tanga Bingana 8:22, 23, 30, 31.) Yo yina, bangwisana yina bo vandaka ti yo kumaka ngolo mutindu bo vandaka kusala kumosi mpi Mwana longukaka na kulanda mbandu ya bikalulu ya Tata na yandi. Ntangu Nzambi gangaka bigangwa yankaka ya mayele, Mwana monaka mutindu Yehowa vandaka kuganga bo mpi yandi vandaka na kyese mingi sambu na bikalulu ya Nzambi.

⁷ Ntembe yina Satana basisaka sambu na nswa yina Yehowa kele ti yo ya kuyala, pesaka Mwana dibaku ya kulonguka mutindu Yehowa kemonisaka zola, lunungu, mayele mpi ngolo na ntwala ya dyambu mosi ya mpasi. Ntembe kele ve nde, dyambu yai sadisaka Yezu na kuvanda ya kuyilama sambu na kunwana ti bampasi yina yandi kutanaka ti yo na kisalu na yandi ya kusamuna ntangu yandi vandaka na ntoto.​—Yoa. 5:19.

8. Inki mutindu masolo ya Baevanzile kesadisa beto na kuzaba mambu mingi na yina metala bikalulu ya Tata?

⁸ Sambu Mwana vandaka ti bangwisana ya mbote ti Yehowa, yandi zabisaka mambu ya metala Tata na mutindu ya sikisiki yina ata muntu yankaka lendaka kusala ve. Keti kutadila mambu yina Mwana mosi kaka ya kubutuka ya Nzambi longaka mpi salaka kele ve mutindu ya kuluta mbote yina beto lenda zaba Tata? Mu mbandu, yo zolaka kuvanda mpasi na kubakisa mbote-mbote ntendula ya ngogo “zola” kana beto tangaka yo kaka na diksionere. Kansi, ntangu beto keyindulula mambu ya sikisiki yina bansoniki ya Baevanzile sonikaka na yina metala kisalu ya kusamuna ya Yezu mpi mitindu yandi vandaka kudibanza sambu na bantu yankaka beto lenda bakisa bangogo ‘Nzambi kele zola.’ (1 Yoa. 4:8, 16) Yo kele mpi kyeleka sambu na bikalulu yankaka ya Nzambi yina Yezu longaka balongoki na yandi ntangu yandi vandaka na ntoto.

MUTINDU YEZU MONISAKA TATA NA YANDI

9. (a) Na nki mitindu zole ya mfunu Yezu zabisaka kyeleka na yina metala Tata na yandi? (b) Pesa mbandu mosi ya kemonisa mutindu Yezu zabisaka bantu kyeleka na yina metala Tata na yandi na malongi na yandi.

⁹ Inki mutindu Yezu longaka balongoki na yandi ya ntete mpi bayina kumaka balongoki na yandi na nima mambu ya metala Tata? Yandi salaka yo na mitindu yai zole ya mfunu: Na malongi mpi na bikalulu na yandi. Bika beto tadila ntete malongi ya Yezu. Mambu yina Yezu longaka balongoki na yandi monisaka nzayilu ya mingi yina yandi vandaka ti yo na yina metala mabanza, mawi mpi banzila ya Tata na yandi. Mumbandu, Yezu fwanisaka Tata na yandi ti munkwa-mameme ya zola yina kwendaka kusosa dimeme yina vilaka. Yezu tubaka nde ntangu yandi monaka dimeme  yina vilaka, ‘kiese na yandi lutaka kiese yina ya yandi ke monaka sambu na mameme makumi uvwa na uvwa yina vilaka ve.’ Mbandu yai kepesa nki dilongi? Yezu tendulaka nde: “Mutindu mosi, Tata na beno yina kele na zulu ke zolaka ve nde ata leki mosi na kati ya baleki yai kuvila.” (Mat. 18:12-14) Mbandu yai kelonga nge nki na yina metala Yehowa? Ata na bantangu yankaka nge kekudimonaka bonso muntu ya kukonda mfunu mpi ya bo mevilaka, Tata na nge ya zulu kekudibanzaka sambu na nge mpi ketudilaka nge dikebi. Na meso na yandi, nge kele “mosi na kati ya baleki yai.”

10. Inki mutindu Yezu longaka kyeleka ya metala Tata na yandi na nkadilu na yandi?

¹⁰ Bikalulu ya Yezu kele mutindu ya zole yina yandi longaka balongoki na yandi kyeleka ya metala Tata. Yo yina ntangu ntumwa Filipo zabisaka Yezu nde: “Songa beto Tata,” Yezu songaka yandi nde: “Muntu yina me mona mono yandi me mona mpi Tata.” (Yoa. 14:8, 9) Tadila bambandu yankaka ya ketubila mutindu Yezu monisaka bikalulu ya Tata na yandi. Ntangu muntu mosi ya vandaka ti maladi ya wazi bondilaka Yezu na kubelula yandi, yandi simbaka muntu yina ‘nitu yonso fulukaka na wazi’ mpi Yezu zabisaka yandi nde: “Mono me zola, beluka ka nge!” Ntembe kele ve nde ntangu yandi belukaka muntu yango monaka mutindu Yehowa sadisaka yandi na mambu yina Yezu salaka. (Luka 5:12, 13) Dyaka, ntangu Lazare fwaka balongoki ya Yezu bakisaka mawa yina Tata kewaka ntangu “mawa ti mpasi simbaka [Yezu] na ntima” mpi ‘yandi yantikaka kudila.’ Ata Yezu zabaka nde yandi tafutumuna Lazare, yandi waka mpasi yina dibuta mpi banduku ya Lazare vandaka kuwa. (Yoa. 11:32-35, 40-43) Ntembe kele ve nde masolo yankaka ya Biblia ya nge kezolaka tasadisa nge na kumona mawa ya Tata mutindu mambu yina Yezu salaka monisaka yo.

11. (a) Ntangu Yezu panzaka bima na tempelo, inki yandi monisaka sambu na Tata na yandi? (b) Sambu na nki disolo yina Yezu panzaka bima na tempelo kepesa beto kikesa?

¹¹ Kansi, inki nge lenda tuba na mutindu yina Yezu panzaka bima na tempelo? Yindula dyambu yai: Yezu mesala fimbu ya bansinga mpi mekula bantu yina vandaka kuteka bangombe ti mameme. Yandi kulaka bantu yina vandaka kushanze mbongo mpi balulaka bamesa na bo. (Yoa. 2:13-17) Dyambu yai ya kikesa yibusaka balongoki bangogo yai ya mbikudulu ya Ntotila Davidi: “Kuzola ya mono ke zola nzo na nge, yo ke pela na ntima na mono bonso tiya.” (Nk. 69:10) Mutindu Yezu salaka buna, yandi monisaka mpusa ya ngolo ya kunwanina lusambu ya kyeleka. Keti nge kemona bikalulu ya Tata na disolo yai? Yo keyibukisa beto nde Nzambi kele kaka ve ti ngolo ya kukonda ndilu sambu na kumanisa mambi na ntoto kansi mpi mpusa ya ngolo ya kusala yo. Mutindu Yezu salaka mambu na kikesa yonso na ntwala ya mambi kemonisa mutindu Tata kewaka ntangu yandi kemonaka mambi keyalumuka na ntoto bubu yai. Ntangu beto kenwanaka ti kukonda lunungu dyambu yai kepesaka mpenza kikesa!

12, 13. Inki nge lenda longuka na yina metala Yehowa na mutindu Yezu sadilaka balongoki na yandi mambu?

¹² Beto tadila mbandu yankaka​—mutindu Yezu sadilaka balongoki na yandi mambu. Bo vandaka kutulana ntembe sambu na kuzaba nani vandaka muntu ya kuluta nene. (Mar. 9:33-35; 10:43; Luka 9:46) Sambu yandi lutisaka ntangu mingi ti Tata, Yezu bakisaka mutindu Yehowa kekudiwaka sambu na bikalulu ya mutindu yina. (2 Sam. 22:28; Nk. 138:6) Dyaka, Yezu monaka mutindu Satana Dyabulu monisaka bikalulu ya mutindu mosi. Muntu yai ya bwimi kudiyangisaka mingi sambu na kiyeka mpi lukumu. Yo yina, yo fwete vanda nde Yezu waka mpenza mawa mutindu kikalulu ya lulendo landaka na kuyela na kati ya balongoki yina yandi longaka! Nkutu, kikalulu yina monanaka mpenza na kati ya bantumwa yina yandi ponaka! Bo monisaka kikalulu ya lulendo tii na kilumbu ya nsuka ya luzingu ya Yezu na ntoto. (Luka 22:24-27) Kansi, Yezu landaka na kusungika bo na mawete ti kivuvu nde bo talanda mbandu na yandi ya kudikulumusa.​—Filp. 2:5-8.

¹³ Keti nge lenda mona bikalulu ya Tata na mutindu Yezu sungikaka bikalulu ya mbi ya balongoki na yandi ti kukanga-ntima yonso? Keti bisalu mpi bangogo ya Yezu kemonisa Tata, mutindu yandi yambulaka ve balongoki na yandi ata bo vandaka kusala bifu mbala na mbala? Keti kuzaba bikalulu yai ya Nzambi kepusa beto ve na kukwenda penepene na yandi sambu na kumonisa nde beto kebalulaka ntima ntangu beto kesalaka bifu?

 MWANA MONISAKA TATA NA YANDI NA LUZOLO YONSO

14. Inki mutindu Yezu monisaka nde yandi vandaka ti luzolo ya kulonga kyeleka ya Tata na yandi?

¹⁴ Bamfumu mingi ya nku kelandaka kuyala bantu ntangu bo kezolaka ve kusonga bo mambu yina bo fwete zaba. Kansi, Yezu vandaka ti luzolo ya kuzabisa bantu mambu yina yandi zabaka sambu na Tata mpi kulonga bo yankaka kyeleka na yandi. (Tanga Matayo 11:27.) Dyaka, Yezu pesaka balongoki na yandi “mayele sambu na kuzaba Nzambi ya kieleka,” Yehowa Nzambi. (1 Yoa. 5:20) Mambu yai ketendula inki? Yezu kangulaka mabanza ya balongoki na yandi na mpila nde bo bakisa malongi na yandi na yina metala Tata. Yandi bumbilaka bo ve kyeleka sambu na Tata na kuzabisaka bo nde yandi kele diswekamu ya Butatu.

15. Sambu na nki Yezu bumbaka mambu yankaka na yina metala Tata na yandi?

¹⁵ Keti Yezu longaka mambu yonso yina yandi zabaka sambu na Tata na yandi? Ve, na mayele yonso yandi zabisaka bo ve mambu yonso yina yandi zabaka. (Tanga Yoane 16:12.) Sambu na nki? Sambu na ntangu yina balongoki na yandi ‘lendaka kukanga yo ve na ntima.’ Kansi, mutindu Yezu tendulaka yo bo zolaka kuzaba mambu mingi ntangu mpeve santu yina kele nsadisi zolaka kukwisa sambu na kutwadisa bo na “nzila ya kieleka yonso.” (Yoa. 16:7, 13) Kaka bonso bibuti ya mayele lenda bumbila bana na bo binsweki tii ntangu bo tayela sambu na kubakisa mambu, Yezu mpi vingilaka tii ntangu balongoki na yandi yelaka na kimpeve mpi kumaka ti makuki ya kubakisa mambu yankaka ya metala Tata. Na mawete yonso, Yezu bakisaka bandilu na bo.

LANDA MBANDU YA YEZU NA KUSADISAKA BANKAKA NA KUZABA YEHOWA

16, 17. Sambu na nki nge kele ti makuki ya kuzabisa bankaka kyeleka ya metala Tata?

¹⁶ Ntangu nge zabaka muntu mosi buna mbote mpi sepelaka ti mutindu yandi monisaka zola, keti yo pusaka nge ve na kutela bantu yankaka mambu ya metala yandi? Ntangu Yezu vandaka na ntoto, yandi zabisaka bantu mambu ya metala Tata na yandi. (Yoa. 17:25, 26) Keti beto lenda landa ve mbandu na yandi ntangu beto kelonga bantu yankaka kyeleka na yina metala Yehowa?

¹⁷ Mutindu beto mekatuka kutadila yo, Yezu vandaka ti nzayilu ya mingi na yina metala Tata na yandi kuluta bantu yankaka. Kansi, yandi vandaka ti luzolo ya kulonga mambu yankaka yina yandi zabaka, yo vanda ntangu yandi pesaka balongoki na yandi mayele sambu na kubakisa bikalulu ya nene ya kimuntu ya Nzambi. Na nsadisa ya Yezu, keti beto kesepelaka ve ti Tata na beto na mutindu yina bantu mingi kesalaka yo ve bubu yai? Beto kemonisa mpenza ntonda na mutindu Yezu longaka beto na luzolo yonso kyeleka sambu na Tata na yandi na nzila ya malongi mpi ya bikalulu na yandi! Ya kyeleka, beto kevandaka ti lukumu mutindu beto mezabaka Tata. (Yer. 9:24; 1 Kor. 1:31) Ntangu beto kesalaka bikesa sambu na kupusana penepene ya Yehowa, yandi kepusanaka penepene na beto. (Yak. 4:8) Yo yina, beto kele ti makuki ya kulonga bantu yankaka mambu yina beto kezabaka. Inki mutindu beto lenda sala yo?

18, 19. Na nki mitindu nge lenda longa bantu yankaka kyeleka na yina metala Tata? Tendula.

¹⁸ Beto fwete landa mbandu ya Yezu na kuzabisaka kyeleka ya metala Tata na bangogo mpi na bisalu na beto. Yibuka nde bantu mingi yina beto kekutanaka ti bo na kisalu ya bilanga kezabaka ve Nzambi. Malongi ya luvunu mebebisaka mabanza na bo na yina metala Nzambi. Beto lenda zabisa bantu mambu yina Biblia kelongaka na yina metala zina ya Nzambi, lukanu na yandi sambu na bantu mpi kimuntu na yandi. Dyaka, beto lenda solula ti bampangi Bakristu masolo yankaka ya Biblia yina kemonisaka kimuntu ya Nzambi na mutindu yina beto vandaka ve kusepela ti yo na ntama. Kana beto sala buna, bo lenda mpi kubaka mambote.

¹⁹ Inki mutindu nge lenda monisa Tata na bikalulu na nge na kusalaka bikesa sambu na kulanda mbandu ya Yezu? Ntangu bantu kemona zola ya Kristu na mambu yina beto kesala, bo tapusana penepene ya Tata mpi ya Yezu. (Ef. 5:1, 2) Ntumwa Polo syamisaka beto na kulanda ‘mbandu na yandi, mutindu yandi mpi landaka mbandu ya Kristo.’ (1 Kor. 11:1) Kusadisa bantu na kutadila Yehowa na mutindu beto mosi kekuditwadisaka kele mpenza dibaku ya mbote ya beto kele ti yo! Ya kyeleka, bika nde beto yonso kulanda mbandu ya Yezu na kuzabisaka bantu yankaka kyeleka na yina metala Tata.

[Bangyufula ya disolo ya kulonguka]