‘Nejin Ekõn̦aan Kwal̦o̦k kõn Jemen’
‘Nejin Ekõn̦aan Kwal̦o̦k kõn Jemen’
“Ejjel̦o̦k juon ejel̦ã . . . wõn eo Jema, a Nejin wõt, im eo Nejin e kõn̦aan kwal̦o̦k E.”—LUK 10:22.
TA UWAAK EO AM̦?
Etke Jijej wõt emaroñ kwal̦o̦k kõn Jemen ilo juon wãween me ejjel̦o̦k bar juon emaroñe?
Ewi wãween an kar Jijej kwal̦o̦k kõn Jemen ñan ro jet?
Ilo wãween et ko kwõmaroñ kajjioñe Jijej im kwal̦o̦k kõn Jemen ñan ro jet?
1, 2. Ta kajjitõk eo epen an jet uwaake? Etke?
‘WÕN in Anij?’ Elõñ armej epen aer uwaake kajjitõk in. Ñan waanjoñak, ro me rej ba er Kũrjin rej tõmak bwe Anij ej jilu anij ilo juon. Rej ba men in bõtab epen ñan aer kõmel̦el̦e kõn tõmak in aer. Juon ri tõl in kabuñ im ej bar ri jeje ear ba bwe ejjel̦o̦k juon armej emaroñ kõmel̦el̦e katak in bwe Anij ej jilu anij ilo juon. Etke? Ej ba men in kõnke ewõr jet men ko me kõj armej jejjab maroñ mel̦el̦e kaki. Bar jet rej tõmak bwe armej rar wal̦o̦k jãn menin mour ko. Rej ba bwe ejjel̦o̦k Anij im aolep men ko jej loi kõn mejed rar make jide im wal̦o̦k. Em̦m̦aan eo ebuñbuñ etan Charles Darwin ear jab ba bwe ejjel̦o̦k Anij. Men eo drein ear ba ej bwe ejjel̦o̦k juon armej emaroñ mel̦el̦e kõn Anij.
2 Jekdo̦o̦n el̦aññe rej tõmak ilo Anij ak jaab, enañin aolep armej ro elõñ aer kajjitõk kõn Anij. Bõtab, armej rein rej bõjrak jãn aer kajjioñ in jel̦ã kõn Anij kõnke rejjab lukkuun m̦õn̦õn̦õ kõn uwaak ko ñan kajjitõk ko aer. Em̦õj an Setan “kapilo l̦õmn̦ak an ro re jab tõmak.” (2 Korint 4:4) Eñin unin jejjab bwilõñ bwe elõñ armej ro rej pok wõt im rejjab jel̦ã m̦ool eo kõn Anij, eo ej Jemed im Ri Kõm̦anm̦an men otemjej!—Aiseia 45:18.
3. (1) Wõn eo ear kwal̦o̦k kõn Jemen ñan kõj? (2) Ta kajjitõk ko jenaaj etali?
3 Elukkuun aorõk bwe armej ro ren jel̦ã m̦ool eo kõn Anij. Etke? Kõnke ro wõt im rej “kũr ñan etan Jeova, naaj lo̦mo̦o̦ren er.” (Joel 2:32) Bwe jen maroñ kũr ñan etan Anij, jej aikuj katak kõn Anij bwe jen jel̦ã kõn E. Jijej Kũraij ear katakin rũkal̦ooran ro an kõn men kein. Ear kwal̦o̦k kõn Jemen ñan er. (Riit Luk 10:22.) Ilo naaj katak in, jenaaj etale kajjitõk kein: Etke Jijej wõt emaroñ kwal̦o̦k kõn Jemen ilo juon wãween me ejjel̦o̦k bar juon emaroñe? Ewi wãween Jijej ear kõm̦m̦ane men in? Im ewi wãween jemaroñ kajjioñe Jijej ilo ad kwal̦o̦k ñan ro jet kõn Jemen?
JIJEJ WÕT EMAROÑ KWAL̦O̦K KÕN JEMEN ILO JUON WÃWEEN ME EJJEL̦O̦K BAR JUON EMAROÑE
4, 5. Etke Jijej wõt emaroñ kwal̦o̦k kõn Jemen ilo juon wãween me ejjel̦o̦k bar juon emaroñe?
4 Jijej ear armej eo em̦m̦antata im ear jipañ ro jet bwe ren jel̦ã kõn Jemen. Etke? Kõnke m̦okta jãn an kar men otemjej pãd, Jijej ear mour ãinwõt juon jetõb ilañ. Ear “make wõt Nejin Anij.” (Jon 1:14, UBS; 3:18, UBS) Ke Jemen ear kõm̦anm̦an men otemjej, Jijej wõt ear pãd ippãn. Ium̦win elõñ to̦ujin im to̦ujin iiõ ko in aerro kar make iaaer, Jijej ear katak kõn Jemen im wãween ko rem̦m̦an ippãn. Ilo aerro kar epaakel̦o̦k wõt doon, yokwe eo aerro ñan doon ear bareinwõt l̦apl̦o̦k. (Jon 5:20, 14:31) El̦ap an kar Jijej katak kõn aolep wãween ko ippãn Jemen ilo aolep iien kein!—Riit Kolosse 1:15-17.
5 Jemen ear jitõñ Nejin bwe en ri kõnono eo An, ãinwõt “Naan in Anij.” (Revelesõn 19:13) Men in ej kalikkar bwe kar lel̦o̦k juon jerbal emake wõt ñan Jijej bwe en kwal̦o̦k kõn Jemen ñan ro jet. Eñin unin Jon ear je im ba bwe Jijej, Naan eo, “ej pãd iturin Jemen.” (Jon 1:1, 18, UBS) Jon emaroñ kar l̦õmn̦ak kõn m̦anit ko jo iien ko ñe rej m̦õñã ke ear je naan kein. Ilo iien ko etto, rekõn kõm̦m̦an bwe ri lotok ro ren jijet iturin doon bwe en pidodo aer bwebwenato. Ilo ejja wãween in wõt, Nejin ear “pãd iturin Jemen” im erro ar maroñ bwebwenato im kwal̦o̦k aolepen bũrueerro ñan doon.
6, 7. Ta eo ear kõm̦m̦an bwe en epaakl̦o̦k wõt kõtaan eo an Jeova im Jijej?
6 Nejin ear “jitõnbõro ippãn [Anij] raan otemjej.” (Riit Jabõn Kõnnaan 8:22, 23, 30, 31.) Nejin im Jemen rar epaakel̦o̦k wõt doon. Rar jerbal ippãn doon, im Jijej ear katak ñan kajjioñe wãween ko ippãn Jemen. Ãlikin an kar Jeova kõm̦anm̦an enjel̦ ro im armej ro, Jijej ear lo wãween an Jeova kõm̦m̦an ñan kajjojo iaaer. Men in ear kõm̦m̦an bwe en l̦apl̦o̦k an yokwe im kautiej Jemen.
7 Meñe ilo iien eo Setan ear jum̦ae jim̦we im maroñ eo an Jeova ñan tõl, Jijej ear loe wãween an kar Jeova kwal̦o̦k yokwe, jim̦we, mãlõtlõt, im joñan kajoor eo an ke Ear n̦amejal̦an juon apañ l̦apl̦ap. Ejjel̦o̦k pere bwe men in ear kõpooj Jijej ñan an naaj kõm̦adm̦õd apañ ko enaaj iiooni ñe enaaj kar itok im jerbal ilo lal̦ in.—Jon 5:19.
8. Etke aolep bwebwenato ko kõn Jijej rej jipañ kõj bwe jen katak kõn wãween ko rem̦m̦an ippãn Jemen?
8 Kõnke ear lukkuun epaake Jeova, ear pidodo an Jijej kwal̦o̦k kõn Jemen ilo juon wãween me e wõt emaroñ kõm̦m̦ane. Wãween eo em̦m̦antata jemaroñ katak kõn Jemen ej ilo ad etale katak ko im kõm̦m̦an ko an Nejin eo ej make wõt. Ñan waanjoñak, emaroñ pen ñan mel̦el̦e kõn naan in “yokwe” el̦aññe jej lale kõmel̦el̦e ko ilo juon bok. Bõtab ilo ad riiti Baibõl̦ eo, jej loe aolep bwebwenato ko kõn jerbal in kwal̦o̦k naan eo an Jijej. Bwebwenato kein rej kwal̦o̦k wãween an kar Jijej yokwe armej ro im ej jipañ kõj bwe jen mel̦el̦e bwe Anij ej yokwe. (1 Jon 4:8, 16) Yokwe ejjab wãween eo wõt im Jijej ear kwal̦o̦k ñan rũkal̦oor ro an. Ear bar kwal̦o̦k ñan rũkal̦oor ro an wãween ko jet me ewõr ippãn Anij ke ear pãd ijin ioon lal̦.
EWI WÃWEEN JIJEJ EAR KWAL̦O̦K KÕN JEMEN?
9. (1) Ta wãween ko ruo Jijej ear kwal̦o̦k kõn Jemen? (2) Jouj im kwal̦o̦k juon waanjoñak me Jijej ear kõjerbale ñan kwal̦o̦k kõn Jemen.
9 Ewi wãween Jijej ear kwal̦o̦k kõn Jemen ñan rũkal̦oor ro an? Ear kõm̦m̦ane men in ilo ruo wãween ko: ikijjeen katak ko an im ikijjeen kõm̦m̦an ko an. M̦okta, jenaaj katak kõn men ko me Jijej ear katakin ro jet. Men ko me Jijej ear katakin rũkal̦oor ro an rej katakin kõj kõn l̦õmn̦ak ko, eñjake ko im wãween ko an Jemen. Ñan waanjoñak, Jijej ear ba bwe Jemen ej ãinwõt juon em̦m̦aan me ewõr an bwij in jiip. Juon iaan jiip kein ear jebwãbwe im em̦m̦aan in ejaje epãd ia. El̦ap an em̦m̦aan in yokwe kajjojo iaan jiip ko nejin. Kõn men in, ej etal jãn jiip ko jet bwe en pukote jiip eo me ear jebwãbwe. Jijej ear ba bwe ke em̦m̦aan eo ear loe jiip eo, “el̦ap an lañlõñ kõn jiip in jãn ruwatimjuonñoul im ruwatimjuon ko rar jab jebwãbwe.” Etke Jijej ear kwal̦o̦k waanjoñak in? Ear make kõmel̦el̦e: “Ãindein Jememwõj ej pãd i lañ E jab kõn̦aan bwe juon iaan rein re dik en jako.” (Matu 18:12-14) Ta eo waanjoñak in ej katakin kõj kõn Jeova? Bõlen jet iien kwõj l̦õmn̦ak bwe ejjel̦o̦k tokjem̦. Bõtab keememej bwe el̦ap an Jemam̦ ilañ yokwe im kaorõke eok. Ej watõke eok ãinwõt juon iaan “rein re dik.”
10. Ewi wãween men ko me Jijej ear kõm̦m̦ani rar kwal̦o̦k kõn Jemen?
10 Wãween eo kein karuo me Jijej ear kwal̦o̦k kõn Jemen ñan rũkal̦oor ro an ej kõn men ko ear kõm̦m̦ani. Eñin unin ke rijjelõk Pilip ear ba ñan Jijej: “Kwõn kwal̦o̦k Jemam̦ ñan kõm,” Jijej ear maroñ uwaake im ba: “Eo ear lo Ña, ear lo Jema.” (Jon 14:8, 9) Jen lale jet wãween ko me Jijej ear kajjioñe Jemen kõn men ko ear kõm̦m̦ani. Ke juon ri lõba ear oware Jijej bwe en kejmour e, Jijej ear erl̦o̦kwe pein im uññũri em̦m̦aan in meñe ear “obrak kõn nañinmej in lõba.” Jijej ear ba: “I kõn̦aan, kwõn erreo.” Tokãlik, ke ear mour em̦m̦aan in jãn nañinmej eo an, ear jel̦ã bwe Jeova ear lel̦o̦k kajoor eo an ñan Jijej bwe en kejmour e. (Luk 5:12, 13) Bareinwõt ke Lazerõs ear mej, rũkal̦oor ro an Jijej remaroñ kar kile kõn tũriam̦o eo an Jemen ke rej loe an Jijej “lim̦õ ilo an im bũrom̦õj” im “jañ” kõn an eddo bũruon. Meñe Jijej ear jel̦ã kadede bwe enaaj kõmour Lazerõs jãn mej, Jijej ear bũrom̦õj ãinwõt ro jeran im baam̦le eo an Lazerõs. (Jon 11:32-35, 40-43) Bõlen ewõr juon bwebwenato me em̦m̦antata ippam̦ ilo Baibõl̦ eo kõn Jijej im ej kwal̦o̦k kõn joñan tũriam̦o eo an Jemen.
11. (1) Ta eo Jijej ear kwal̦o̦k kõn Jemen ilo iien eo ear karreoiki tampel̦ eo? (2) Etke men in ej kaenõm̦m̦an kõj?
11 Ta eo kwõmaroñ katak kake ñe kwõj riiti bwebwenato eo kõn Jijej ilo iien eo me ear karreoiki tampel̦ eo? Baj an̦to̦o̦nel̦o̦k ta eo ear wal̦o̦k: Jijej ear kõm̦m̦ane juon to in deñdeñ im kadiwõjl̦o̦k armej ro im rej wiakake kau im jiip ko jãn tampel̦ eo. Ear juloki jããn ko im ukõji tebõl̦ ko an ri wiakake ro. (Jon 2:13-17) Ke Jijej ear kõm̦m̦ane men in, rũkal̦oor ro an rar keememej kanaan eo me Kiiñ Devid ear je: “El̦ap aõ kijejeto bwe en em̦m̦an aer kõjerbal m̦weo im̦õm̦.” (Sam 69:9) Men eo me Jijej ear kõm̦m̦ane ñan ri nana rein ej kalikkar bwe elukkuun kar kõn̦aan jojomare kabuñ eo em̦ool. Ke kwõj riiti bwebwenato in, kwõj ke kile wãween eo me Jijej ear kajjioñe Jeova? Men in ej kakeememej kõj bwe el̦ap an Anij maroñ ñan jol̦o̦k nana otemjej im elukkuun kõn̦aan kõm̦m̦ane men in. Ak kiiõ l̦õmn̦ak kõn eñjake eo an Jeova ñe ej loe aolep nana ko rej pãdjake aolepen lal̦ in! Wãween an Jeova im Jijej eñjake kõn men kein renana el̦ap an kaenõm̦m̦an kõj ñe men ko im rejjab jim̦we rej wal̦o̦k ñan kõj.
12, 13. Ta eo kwõj katak kõn Jeova jãn wãween an kar Jijej kõm̦m̦an ñan rũkal̦oor ro an?
12 Bar juon wãween me Jijej ear kwal̦o̦k kõn Jemen ej ilo kõm̦m̦an ko an ñan rũkal̦oor ro an. Ekkã aer kar akwããl kõn wõn eo iaaer el̦ap im utiej. (Mark 9:33-35; 10:43; Luk 9:46) Ak kõnke eto an Jijej kar mour ippãn Jemen, ejel̦ã ta l̦õmn̦ak eo an Jeova kõn utiej bõro. (2 Samuel 22:28; Sam 138:6, UBS) Bareinwõt, Jijej ear loe an kar utiej bũruon Setan Tepil̦. Setan ej l̦õmn̦ak wõt kõn e make im ekõn̦aan bwe en utiejl̦o̦k jãn ro jet. Innem, Jijej emaroñ kar lukkuun bũrom̦õj ke ej loe ejja l̦õmn̦ak rot in ippãn rũkal̦oor ro an. Rar kõn̦aan bwe ren utiejl̦o̦k jãn ro jet! Ejjab rũkal̦oor ro wõt im rar bõk l̦õmn̦ak in ebõd, ak bar rijjelõk ro 12 me Jijej ear make kããlõt er! Im rar kwal̦o̦k utiej bõro m̦ae raan eo ãliktata Jijej ear mour ioon lal̦ in. (Luk 22:24-27) Meñe ãindein, Jijej ear jouj wõt ke ear kajim̦weik er. Ear kõjatdikdik wõt bwe juon iien renaaj katak ñan l̦oore l̦õmn̦ak ko an im an ettã bõro.—Pilippai 2:5-8, UBS.
13 Jijej ear kajjioñe Jemen ke ear kijenmej wõt ippãn rũkal̦oor ro an im kajim̦weik er. Men in ej kwal̦o̦k kõn kain Anij rot Jeova. Ta eo kwõj katak kõn Jemen jãn men ko Jijej ear ba im kõm̦m̦ani? Jemen Jijej ejjab el̦l̦o̦k jãn armej ro doon meñe ekkã aer kõm̦m̦ani likjab ko. Ad jel̦ã im mel̦el̦e kõn kain Anij rot Jeova enaaj lujur kõj ñan ukel̦o̦k im jar im kajjitõk bwe en jeorlok ad bõd.
NEJIN EAR KÕN̦AAN KWAL̦O̦K KÕN JEMEN
14. Ewi wãween an kar Jijej kalikkar bwe ear lukkuun kõn̦aan kwal̦o̦k kõn Jemen ñan ro jet?
14 Elõñ ri tõl in kien rej kajjioñ in dãpij mel̦el̦e ko armej ro rej aikuj in jel̦ã kake bwe armej ro ren pãd wõt ium̦win maroñ ko aer. Bõtab Jijej ear jab ãindein. Jijej ear kõn̦aan jipañ armej ro bwe ren jel̦ã kõn Jemen. Ear kwal̦o̦k aolep men ko otemjej me rar aikuj jel̦ã kõn Jeova. (Riit Matu 11:27.) Bareinwõt, Jijej ear lel̦o̦k ñan rũkal̦oor ro an ‘mãlõtlõt bwe ren jel̦ã Eo em̦ool,’ Jeova Anij. (1 Jon 5:20) Ilo wãween et ear kõm̦m̦ane men in? Eokwe, Jijej ear jipañ rũkal̦oor ro an bwe ren mel̦el̦e kõn men ko ear katakin er kõn Jemen. Jijej ear jab n̦ooje Jemen. Ta mel̦el̦ein men in? Ear jab kwal̦o̦k katak ko rebõd me ejjel̦o̦k juon enaaj mel̦el̦e kaki, ãinwõt katak eo kõn jilu anij ilo juon.
15. Etke Jijej ear jab kwal̦o̦k ñan rũkal̦oor ro an kõn aolep men ko me ear jel̦ã kõn Jemen?
15 Jijej ear ke kwal̦o̦k ñan rũkal̦oor ro an kõn aolep men ko me ear jel̦ã kõn Jemen? Ear jab. Ear kwal̦o̦k an mãlõtlõt ke ear jab kwal̦o̦k men ko otemjej ñan rũkal̦oor ro an. (Riit Jon 16:12, UBS.) Jejaam̦ ba men in? Kõnke aolep men ko me Jijej ear jel̦ã kake kõn Jemen, ‘el̦ap jãn joñan aer maroñ bũki’ ilo tõre eo. Bõtab, Jijej ear kõmel̦el̦eik er bwe enaaj l̦apl̦o̦k aer naaj mel̦el̦e ñe “ri jipañ” eo enaaj itok. Ri jipañ in ej kõkkar kõn kajoor eo an Anij me emaroñ tõl er “ñan m̦ool otemjej.” (Jon 16:7, 13, UBS) Ñan waanjoñak, ro jemen im jinen ajri ro remaroñ jab kwal̦o̦k men otemjej ñan ro nejier m̦ae iien eo rerũtto im remaroñ mel̦el̦e. Ãinwõt rũtto rein, Jijej ear kõttar ñan iien eo me rũkal̦oor ro an rar pojak ñan aer bõk mel̦el̦e ko rem̦wilal̦l̦o̦k kõn Jemen. Ilo wãween in, Jijej ear jouj wõt im ear keememej bwe ewõr joñan maroñ ko aer.
KAJJIOÑE JIJEJ ILO AM̦ JIPAÑ RO JET BWE REN JEL̦Ã KÕN JEOVA
16, 17. Etke kwõmaroñ katakin ro jet kõn Jeova?
16 Ñe ej l̦apl̦o̦k am̦ jel̦ã kajjien juon armej im kwõj loe bwe ej juon eo me el̦ap an yokwe, kwõnaaj kar kõn̦aan kõnnaan kõn e ñan ro jet. Ke Jijej ear pãd ioon lal̦ in, ear kõnnaan kõn Jemen. (Jon 17:25, 26) Jemaroñ ke bar ãindein im kwal̦o̦k kõn Jeova ñan ro jet?
17 Ãinwõt ad kar katak kake, el̦apl̦o̦k an kar Jijej jel̦ã kõn Jemen jãn ro jet. Bõtab, ear kõn̦aan katakin ro jet kõn jet iaan men ko me ear jel̦ã kaki. Ear bareinwõt jipañ rũkal̦oor ro an bwe en l̦apl̦o̦k aer mel̦el̦e kõn Jemen. Jijej ej bareinwõt jipañ kõj bwe jen jel̦ã kõn Jemen ilo juon wãween me armej ro jet rejjab mel̦el̦e kake. Ekanooj l̦ap ad kam̦m̦oolol bwe Jijej ear kõn̦aan kwal̦o̦k ñan kõj kõn Jemen ikijjeen katak ko im kõm̦m̦an ko an! Jelukkuun jeraam̦m̦an bwe jejel̦ã kõn Jeova. (Jeremaia 9:24; 1 Korint 1:31) Jaar kate kõj bwe jen maroñ epaake Jeova ãinwõt ro jeran im kiiõ elukkuun epaake kõj. Kõn men in, jemaroñ katakin ro jet men ko jejel̦ã kõn Jeova. Ewi wãween?
18, 19. Ilo wãween et ko kwõmaroñ kwal̦o̦k kõn Jemen ñan ro jet? Jouj im kõmel̦el̦e.
18 Ñe jej kajjioñe Jijej ilo naan im kõm̦m̦an ko ad, jej kwal̦o̦k kõn Jemen ñan ro jet. Keememej bwe elõñ iaan ro jej iioon er ilo jerbal in kwal̦o̦k naan rejjab jel̦ã kõn Anij. Emaroñ bõd l̦õmn̦ak ko aer kõn Anij kõnke ro jet rar katakin er katak ko rejjab m̦ool. Jemaroñ katakin er jãn Baibõl̦ eo kõn etan Anij, ta ankilaan ñan armej ro, im kõn kain Anij rot E. Bareinwõt, elõñ men ko rekããl jemaroñ katak kõn Anij jãn bwebwenato ko ilo Baibõl̦ eo. Innem, jemaroñ kakajoor ro jet ilowaan eklejia eo ad ñe jej kõnnaan ippãer kõn men kein rekããl me jaar katak kaki.
19 Jej aikuj kajjioñe Jijej im kwal̦o̦k kõn Jemen ilo kõm̦m̦an ko ad. Ñe armej ro rej lo bwe jej yokwe ro jet ãinwõt Kũraij ear yokwe armej, remaroñ kõn̦aan kõm̦m̦an bwe ren jem̦jerãik Jijej im Jemen. (Epesõs 5:1, 2) Rijjelõk Paul ear rõjañ kõj im ba: “Kom̦win ri kajjioñe ña, ãinwõt ña ij bareinwõt ri kajjioñe Kũraij.” (1 Korint 11:1) Jelukkuun m̦õn̦õn̦õ bwe jemaroñ jipañ armej ro jet bwe ren jel̦ã kõn Jeova ikijjeen kõm̦m̦an ko ad! Kõn men in, jen kate kõj bwe jen kajjioñe Jijej im kwal̦o̦k kõn Jemen ñan ro jet.
[Kajitõk ko ñan katak]
