‘A Ngalek a Soal Lomeketakl ra Chedam’

“Diak a chad el medengelii a Chedam . . . ngdi Ngalek me ngikel le ngileltii a Ngalek el lomeketakl ra Chedam.”​—LUKAS 10:22.

NGMEKERANG A OMONGER?

Ngera uchul me a Jesus a uleba ileakl el techall el mo olecholt er a Demal?

Ngoeak a ngera el rolel e a Jesus a ulechotii a Demal el mo er a rechad?

Ke mekerang e mo oukerebai er a Jesus el olecholt er a Chedam?

1, 2. Ngmeringel er a rechad el mo onger er a ngera el ker? E ngera uchul?

 ‘NGTECHANG a Dios?’ A rebetok a rrau a rengrir el kirel tia el ker. El ua tiang, a ruumesingd el chad el melekoi el kmo te Kristiano a oumerang el kmo a Dios a Trinidad, alta ngdiak lodengelii a belkul tia el osisechakl. A ta el chad el meluches el kirel a tekoi er a klechelid a kmo a osisecheklel a Trinidad a diak el sebeched el smodii, e le nguldimukl er aike el tekoi el diak el sebechir a rechad el mo medengei. E tirke el kuk oumerang er a uldasu el kmo kede mla er a mongkii el mei a diak loumerang er a Dios. Te oumerang el kmo a rokui el tekoi a di mle ngii el duubech. Engdi a Charles Darwin a dimlak lolekoi el kmo ngdiak a Dios, e ngbai dilu el kmo a rechad a kmal diak el sebechir el mo ungil medengei a chouaika el tekoi.

² A rechad er a betok el klechelid a ngar er ngii a kerrir el kirel a Dios. Engdi a rebetok er tir a mo diak losiik er a Dios e le ngdiak lebetik a ungil el nger er a kerrir. Me nguaisei, a Satan a mla “chouid a rengrir tirikel diak loumerang.” (2 Korinth 4:4) Me ngdiak lemechas a rengud el kmo, a ruumesingd el chad a rrau a rengrir e diak lodengelii a klemerang el kirel a Chedam, el ngike el Ulemeob er a eanged me a chutem!​—Isaia 45:18.

3. (a) Ngtecha ulechotii a Chedam el me er kid? (b) Ngera el ker a bo donger?

³ A rechad a kmal kirir el mesuub er a klemerang el kirel a Dios. E ngera uchul? E le ngdi tirke el omekedong “er a ngklel a Jehovah” a mo suobel. (Rom 10:13, NW) A bo domekedong er a ngklel a Dios, e ngkired el mo ungil el medengelii e mo medengei a blekerdelel. A Jesus a ullisechakl er a redisaiplo er ngii el kirel a Demal, e ulemeketakl er Ngii el mo er tir. (Monguiu er a Lukas 10:22.) Tia el suobel a mo mesaod aika el ker el kmo: Ngera uchul me a Jesus a mle sebechel el ochotii a Demal? Ngmilekerang a loruul er tiang? E kede mekerang e oukerebai er ngii e olecholt er a Chedam el mo er a rebebil?

 A JESUS A MLE SEBECHEL EL OCHOTII A CHEDAM

4, 5. Ngera uchul me a Jesus a mla er ngii a ileakl el techellel el olisechakl el kirel a Demal?

⁴ A Jesus a mle sebechel el ochotii a Demal el mo er a rebebil el kuk ngaruchei er a ngii di el chad. E ngera uchul? E le Jesus a mle anghel el ngar er a eanged er a uchei er a lobeob a rokui el bleob. Ngii a “dital Ngelekel a Dios.” (Johanes 1:14; 3:18) Ngdi ta el Jesus a ulebengkel a Demal er seikid el taem, me ngsiluub a betok el tekoi er a Demal. Ngmle sebechir el chadecheduch er a delongelir el kmal kemanget el taem, me te milekurulii a kmes el deleuill me a bltikerreng er a delongelir. (Johanes 5:20; 14:31) Ka molatk er sel klou el klemedengei er a Jesus el kirel a blekerdelel a Demal!​—Monguiu er a Kolose 1:15-​17.

⁵ A Chedam a ngileltii a Ngelekel el mo Melekingel, el “Tekoi ra Dios.” (Chocholt 19:13) Me a Jesus a uleba ileakl el techall el mo ouchais er a rebebil el kirel a Demal. Tiakid a uchul me a Johanes a milluches el kmo, a Jesus el “Tekoi” a “ngara bita ra Demal.” (Johanes 1:1, 18) A Johanes a locha millatk er a siukang er a rechad er sel taem sel lomengur. A reteru el chad a mo dmak el dengchokl me ngbeot er tir el chadecheduch er a delongelir. Me nguaisei, a Ngalek a dengchokl er “bita ra Demal,” me te mle ungil el chadecheduch.

6, 7. Ngmilekerang e lmuut el mo kmes sel deleuill er a Chedam me a Ngalek?

⁶ A Ngalek a “mle uchul a deuil a rengul a Dios er a bek el sils.” (Monguiu er a Osisechakl 8:22, 23, 30, 31.) Me a cherengel a taem e a deleuill er tir a millemolem el mukeroul. Te dilak el oureor me a Jesus a milsuub el mo oukerebai er a blekerdelel a Demal. Me a uriul er a lobeob a rechanghel me a rechad, e a Ngalek a milsa sel rolel er a Jehovah a lomekerreu er a derta er tir, me a bltkil a rengul me a omengull er ngii el mo er a Demal a liluut el mo klou.

⁷ Me ngmo lmuut er sel taem el Satan a mlo omtok er a llemeltel a Jehovah el mengedereder, e ngmle sebechel a Ngalek el mesuub er sel rolel er a Jehovah a lolecholt a bltikerreng, llemalt, llomeserreng me a klisiich er a chelsel a meringel el blekeradel. Me ngmilsuub el mo outekangel a meringel el blekeradel el blo lechebangel er sel taem er a loruul er a omesiungel er tia el chutem.​—Johanes 5:19.

8. Ngera me a cheldecheduch el kirel a Jesus a ngosukid el mo medengei a blekerdelel a Chedam?

⁸ Sel kmes el deleuill er ngii me a Jehovah a uchul, me ngdi ta el Ngalek a sebechel el dmolech el mesaod el kirel a Chedam. A kot el ungil rolel e kede mo medengelii a Chedam a oeak sel dosuub a osisecheklel me a omerellel a di ta el Ngelekel. El ua tiang, ngdiak el sebeched el mo medengelii a belkul a “bltikerreng” el oeak a di donguiu er a dictionary. Engdi sel dolatk aike el cheldecheduch er a Biblia el mesaod er a omesiungel a Jesus, e desa sel rolel a lomekerreu er a rechad, e ngsebeched el mo medengelii a belkul a tekoi el kmo, a “Dios a bltikerreng.” (1 Johanes 4:8, 16) Ngdimlak di el bltikerreng a lulechotii a Jesus el mo er a redisaiplo er ngii, e ngdirrek el ullecholt a lmuut el bebil el blekerdelel a Dios.

SEL ROLEL A JESUS ER A LOLECHOLT ER A DEMAL

9. (a) Ngoeak a ngera el eru el rolel e a Jesus a ullecholt er a Demal? (b) Mosaod er a okesiu el luluusbech er ngii a Jesus el olecholt er a Demal.

⁹ Ngmilekerang a Jesus er a lolecholt er a Demal el mo er a redisaiplo er ngii me tirke el mo disaiplo er a uriul? Ngulechotii el oeak aika el eru el rolel: a osisecheklel me a omerellel. Me a kot e kede mo mesaod er a osisecheklel. Aike el lullisechakl a Jesus a ullecholt er a klou el klemedengei er ngii el kirel a uldesuel me a omerellel a Demal. El ua tiang, ngulemekesiu er a Demal el mo er a chad el kerekikl er a delebechel el sib er ngii el meringel el olechoud er a chimo el ririid el chermel. Me a Jesus a dilu el kmo, “sel lebetik er ngii, e a deuil a rengul el kirel ngikel di chimol sib a kuk morbab er a deuil a rengul el kirel a ikel 99 el dimlak leriid.” Ngera me a Jesus a dillii tia el okesiu? Ngmesaod er ngii el kmo, “Me ng ua isei el Demmiu el ngar a eanged a diak el soal a tar tirkal mekekerel ngalek a bo leriid.” (Matteus 18:12-​14) Me ngera kede  suubii el kirel a Jehovah? Alta e a lebebil er a taem e ke mo omdasu el kmo ngdiak a belkum, engdi a Demam el ngar er a eanged a kmal betik a rengul e omekerreu er kau. Me ngomes er kau el ua “tar tirkal mekekerel ngalek.”

10. Ngmilekerang a Jesus e ochotii a Demal el okiu a omerellel?

¹⁰ Sel ongeru el rolel e a Jesus a ullecholt er a Demal a okiu a omerellel. Me a apostol el Filipus er a ledu el kmo, “Mochotii er kemam a Chedam,” e a Jesus a mle sebechel el melekoi el kmo: “Ngikel mla mesekak a mla mesa Chedam.” (Johanes 14:8, 9) Me bo domes a bebil el omerellel a Jesus el ullecholt a blekerdelel a Demal. A “tal chad el kemkom” er a lolengit er a Jesus el mo omekungil er ngii, e a Jesus a uldersii a chimal el rutechii e dilu el kmo: “Ngsoak, me bo mklikiid.” Me a uriul er a bo el ungil er a rektel, e ngika el chad a mle sebechel el mesang el kmo a Jehovah a milsa Jesus a klisiich el mo omekungil er ngii. (Lukas 5:12, 13) Me sel taem er a lemad a Lazarus, e a redisaiplo er a Jesus a ulterekokl el mlo medengelii a klechubechub er a Chedam er a lomes er a Jesus el “kmal mlo imis el mekngit a rengul” e “lilangel.” Alta ngmle medengei el kmo ngmo olekiis er ngii, engdi a Jesus a milechesuar a kngtil a rengrir a rechedal me a resechelil a Lazarus. (Johanes 11:32-​35, 40-​43) Me nglocha dirrek el ngar er ngii a soam el cheldecheduch er a Biblia el kirel a Jesus el ngosukau el mo mesa klechubechub er a Jehovah.

11. (a) Ngera el blekerdelel a Demal a lulechotii a Jesus er a longikiid er a Templo? (b) Ngera me tia el cheldecheduch a melisiich er kid?

¹¹ E ngera ke suubii er a omerellel a Jesus er a longikiid er a Templo? Ka molatk er a Jesus er a lerellii a ekil el mo chelebed, e uleldik er tirke el olterau a sib me a kerebou. E sola e mriid a ududir a rekerukem a udoud e mitech a tebelir. (Johanes 2:13-​17) Me a redisaiplo er a lomes er tia el mesisiich el omerellel a Jesus e te mlo melatk a tekingel a King el David el kmo: “A blakerreng er ngak el kirel a Templo er kau a kmard er a chelsek el ua ngau.” (Psalm 69:9) Me tia el cheldecheduch a meketeklii el kmo a Jesus a kmal mle soal el mesebechakl er a mera el omengull. Ngsebechem el mesa blekerdelel a Jehovah er a omerellel a Jesus? Ngomeklatk er kid el kmo a Dios a ngar er ngii a klisichel el sebechel el okngemed a rokui el chelebirukel er tia el chutem, e dirrek el kmal soal el meruul el uaisei. Me ka molatk er a uldesuel a Jehovah sel lomes a betok el mekngit el omerellir a rechad er a chutem er chelechang! Tiang a mera el melisiich er kid sel doutekangel a chebirukel el omeruul.

12, 13. Ngera kede suubii el kirel a Jehovah el oeak a omerellel a Jesus el mo er a redisaiplo er ngii?

¹² A Jesus a dirrek el ullecholt er a Demal el oeak a omerellel el mo er a redisaiplo er ngii. Te mle blechoel el kaititekangel er a delongelir el kmo ngtecha er tir a kot el ngarbab. (Markus 9:33-​35; 10:43; Lukas 9:46) Ngii el mle kemanget el taem el obengkel a Demal a uchul me ngmle ungil medengei a uldesuel a Jehovah el kirel a kldidairreng. (2 Samuel 22:28; Psalm 138:6) Ngdirrek el milsa blekerdelel a Satan el Diabelong el kmo ngkedidai a rengul. A Satan a di melatk er ngii e soal a ngarbab el deruchall. Me ngulterekokl a Jesus el kmal mle mekngit a rengul er a lesterir tirke el lullisechakl er tir el disaiplo el olecholt er tia el kldidairreng el sorir a ngarbab el deruchall! Ngdirrek el mle sebechel mesa tia el blekeradel er delongelir a rechapostol er ngii! Te ullecholt a kldidairreng el mo lmuut er a ulebongel el sils er a klengar er a Jesus er tia el chutem. (Lukas 22:24-​27) Me nguaisei, engdi a Jesus a di millemolem el mesmechokl er tir el oba bltikerreng, me ngmillatk el kmo a cherengel a taem e ngsebechel el mo ngariou a rengrir el uai ngii.​—Filipi 2:5-8.

¹³ Ngsebechem el mesang a blekerdelel a Jehovah er a rolel a Jesus a losmechokl er a redisaiplo er ngii? A tekingel me a omerellel a Jesus ngngera ngosisecheklid el kirel a Chedam? Kede mesang el kmo ngdiak lobes er a rechedal el mo lmuut er a taem el tir a mirruul a diak lemelemalt el omeruul el dimlak el durengrir. Me sel bo dodengei a blekerdelel a Jehovah, e ngmelisiich er kid el mo obult e meluluuch el olengit a klausubes er ngii el kirel a kngtid.

 A NGALEK A MLE SOAL EL OLECHOLT ER A DEMAL

14. Ngmilekerang a Jesus e meketeklii el kmo ngmle soal el olecholt er a Demal?

¹⁴ A rebetok el merreder a diak louchais er a rechad a tekoi el kirir el mo medengei. Engdi a Jesus a dimlak leuaisei, ngbai mle soal el ouchais er a rechad a rokui el tekoi el kirir el mo medengei el kirel a Chedam. (Monguiu er a Matteus 11:27.) A Jesus a dirrek el milsterir a redisaiplo er ngii a “sekutaberreng el . . . mo medengelii a meral Dios” el Jehovah. (1 Johanes 5:20) Me tiang ngera belkul? A Jesus a ngilsuterir el mo omtab a belkul a osisecheklel el kirel a Demal, e dimlak lomart er a Demal el oeak a osisechakl el kirel a Trinidad el diak el sebechir a rechad el mo medengei.

15. Ngera uchul me a Jesus a dimlak louchais a rokui el tekoi el kirel a Demal?

¹⁵ A Jesus nguluuchais a rokui el tekoi el lodengei el kirel a Demal? Ngdimlak, ngullecholt a llomeserreng er a lak louchais a rokui el tekoi. (Monguiu er a Johanes 16:12.) E ngera uchul? E le a redisaiplo er ngii a dimlak el sebechir el mo medengei er sel taem. Engdi a Jesus a uluuchais el kmo a lmuut el betok el tekoi a mocholt el mo er tir sel lemei a ‘chongeseu.’ A ‘chongeseu’ a sel oureor el klisichel a Dios, el mo omekrael er tir el mo er a “rokuil klemerang.” (Johanes 16:7, 13) A ruungalek el mellomes a rengrir a mengiil el mo er sel taem el lemeklunga a rengelekir e mo ouchais a bebil el tekoi. Me a Jesus a mle uaisei, el milengiil er a ungil el taem e mo ouchais er a redisaiplo er ngii a lmuut el betok el kirel a Chedam. Ngullecholt a bltikerreng e millatk er a ngelsengesir.

BO MUA JESUS EL NGOSUTERIR A RECHAD EL MO MEDENGELII A JEHOVAH

16, 17. Ngera me ngsebechem el ouchais er a rebebil el kirel a Chedam?

¹⁶ Sel bo mungil medengelii a chad e modengei el kmo ngungil el chad, e ngulterekokl el soam el mo ouchais er a rechad el kirel. Sera lengar a chutem a Jesus e ngmle blechoel el mesaod el kirel a Demal. (Johanes 17:25, 26) Me kid, ngsebeched el mo uai ngii e ngosuterir a rechad el mo medengelii a Jehovah?

¹⁷ Kede mla mesang el kmo, a Jesus a kuk mle klou a klemedengei er ngii el kirel a Demal er a rebebil. Me ngmle soal el ouchais a tekoi el lodengei e dirrek el milsterir a ruleltirakl er ngii a sekutaberreng me bo el sebechir el omtab a lmuut el betok el kirel a blekerdelel a Demal. A Jesus a dirrek el mla ngosukid el mo medengei a tekoi el kirel a Chedam el oumesingd el chad a diak lodengei. Me kede oba klou el omereng el saul, e le Jesus el uleak a osisecheklel me a omerellel, e ngulechotii a Demal el mei er kid! Me ngsebeched el ousimang e le kid el medengelii a Jehovah. (Jeremia 9:24; 1 Korinth 1:31) Kede mla melasem el mo kmeed er a Jehovah, e ngii a mla olekeed er ngii er kid. (Jakobus 4:8) Me chelechang e ngmla mo sebeched el ouchais er tia el klemedengei er kid el mo er a rebebil. Ngmekerang a doruul er tiang?

18, 19. Ngoeak a ngera el rolel e ngsebechem el olecholt er a Chedam el mo er a rechad? Mosaod.

¹⁸ Ngkired el oukerebai er a Jesus e olecholt er a Chedam el oeak a tekinged me a omerelled. Lak dobes el kmo a rebetok el chad el doldingel er tir a diak lodengelii a Dios. A klsuul el osisechakl a locha mla chouid a uldesuir. Me ngsebeched el ousbech er a Biblia el olecholt er a ngklel a Dios, a blekerdelel, me a moktek er ngii el kirel a klechad. Me a lsekum e kede menguiu er a Biblia e suubii a tekoi el dimlak dodengelii el kirel a blekerdelel a Jehovah, e ngsebeched el mesaod er ngii sel dobengterir a rudam me a rudos. Tiang a ungil rolel a dekasisiich er a delongeled.

¹⁹ Me kede mekerang e oukerebai er a Jesus e olecholt er a Chedam el oeak a tekoi el doruul? A bo deua Kristus e dolecholt a bltikerreng, e a rechad a sebechir el omes a omerelled e mo sorir el meruul a deleuill er tir el obengkel a Jesus me a Demal. (Efesus 5:1, 2) A apostol el Paulus a millisiich er kid el ‘moukerebai er ngii, el ua ingii loukerebai ra Kristus.’ (1 Korinth 11:1) Ngkmal ungil el techall a dobang el sebeched el olengeseu er a rechad el mo medengelii a Jehovah el okiu a omerelled! Mada, me dolemolem el oukerebai er a Jesus e dolecholt er a Chedam el mo er a rechad.

[Aike el Ker er a Suobel]