Chureqa Tatanta rejsichiyta munan
Chureqa Tatanta rejsichiyta munan
“Nitaj pipis yachanchu pichus Tata kasqanta, manachayqa Churilla yachan, pimantajchus Churi rejsichiyta munan, chaypis.” (LUC. 10:22.)
¿IMATÁ KUTICHIWAJ?
¿Imaraykutaj Jesuslla imaynachus Tata Dios kasqanta rejsichiyta aterqa?
¿Imaynatá Jesús Tatanta rejsicherqa?
¿Imaynasmantá Jesús jina, Tata Diosta rejsichisunman?
1, 2. ¿Imatataj ashkha runas tapukunku, imaraykú?
ASHKHA runasqa jinata tapukunku: “¿Pitaj Diosrí?”, nispa. Sutʼincharinapaj, ashkha runas cristianos kasqankuta nispapis, Diosqa Trinidad kasqanta creenku. Ashkha runasrí chay yachachiy, mana entiendey atina kasqanta ninku. Iglesiata kamachej runaqa, wakin imasta runas mana entiendeyta atisqankurayku, Trinidadmanta yachachiy mana sutʼinchay atina kasqanta qhelqarqa. Chantapis runas jinallamanta rikhurisqanta nejkuna, Dios kasqanta mana creenkuchu. Tʼukunapaj jina ruwasqa kaj imaspis, jinallamanta rikhurisqanta yuyanku. Chaywanpis Charles Darwinqa, Dios kasqanta mana qhesacharqachu, astawanpis Diosmanta wakin imasta, runas mana entiendeyta atisqankuta nerqa.
2 Runasqa imapi creespapis, sichus Dios kasqanta maykʼajllapis tapukunkupuni. Chaywanpis mana allin kutichiykunata tarispa, niña tapukunkuchu. Cheqamantapuni Satanasqa, “mana creejkunaj yuyayninkuta laqhayachin” (2 Cor. 4:3, 4). Chayrayku yaqha tukuy runas, tukuy imata Ruwaj Tata Diosmanta mana sutʼita yachankuchu, uma muyusqastaj kashanku (Isa. 45:18).
3. a) ¿Pitaj imaynachus Ruwawajninchej kasqanta rejsichiwarqanchej? b) ¿Ima tapuykunatataj ukhunchasunchej?
3 Chaywanpis runasqa, Diosmanta cheqa kajta yachanankupuni tiyan. Imaraykuchus Jehovaj “sutinta oqhar[ejlla]” salvasqa kanqa (Rom. 10:13). Chay sutita oqharinapajtaj, imaynachus Jehová kasqantaraj allinta yachananchej tiyan. Jesucristoqa, discipulosninman imaynachus Tatan kasqanta rejsicherqa, chaytataj yachananchej tiyan (Lucas 10:22 leey). ¿Imaraykutaj Jesuslla ni pi jina rejsichiyta aterqa? ¿Imaynamantá chayta ruwarqa? ¿Imaynatá imaynachus Tata Dios kasqanta wajkunaman rejsichishaspa Jesús jina ruwasunman? Chay tapuykunata ukhuncharina.
JESUCRISTO NI PI JINA WAKICHISQA
4, 5. ¿Imaraykutaj Jesuslla imaynachus Tatan kasqanta rejsichiyta aterqa?
4 Jesusqa, Tatanta rejsichinanpaj sumaj wakichisqa karqa. Imaraykuchus payqa, tukuy imamanta ñaupajta ruwasqa karqa. Niraj Jallpʼapi runa jina kausashaspa, janaj pachapi “Diospa kʼata Churi[n jina]” kausarqaña (Juan 1:14; 3:18). Paylla ajinapi rikukorqa. Manaraj ni ima kausaj kashajtin Chureqa, Tatanpa munakuyninpi, qhawayninpi ima, kusisqa kasharqa, imaynachus kasqanmanta, ruwasqanmanta ima yachakuspa. Cheqamantachá may chhika unay watasta kausakusqankupi sumajta parlarikorqanku, maytataj munanakorqanku (Juan 5:20; 14:31). Arí, Chureqa imaynapunichus Tatan kasqanta sumajta rejserqa (Colosenses 1:15-17 leey).
5 Tata Diosqa, Churinta willarajninta jina ajllarqa, chayraykutaj “Diospa Palabran” sutikun (Apo. 19:13). Jesuslla imaynachus Tatan kasqanta rejsichiyta chayri yachachiyta aterqa. Chayraykuchá Juan, Evangelionpi “Palabra” “Tatanpa ojllayninpi cacuj” nin (Juan 1:1, 18, Mosoj Testamento, 1956). Unayqa, wajyarisqa runasta, khuskata tiyachej kanku, ajina qayllanasqas kaspataj sumajta parlarikuyta atej kanku, Juantaj chaymanta parlasharqa. Kikillantataj Churiwan Tatawan qayllanasqas kasqankurayku, sumajta parlarikoj kanku.
6, 7. ¿Imaynamantataj Tatawan, Churiwan astawan masichakorqanku?
6 Astawan masichakusqankurayku, Tataqa Churinwan “sapa pʼunchay” kusikoj (Proverbios 8:22, 23, 30, 31 leey). Arí, masichakusqankoqa khuska llankʼasqankurayku astawan sinchʼiyarqa. Churitaj Tatanpa, kʼacha kaykunasninta rikuchiyta yachakorqa. Chantapis yuyayniyoj kausajkuna ruwasqa kajtinku, imaynatachus Jehová paykunata qhawasqanta Jesús rikorqa, chayrayku Tatanta astawan munakorqa.
7 Chureqa, Jehovaj kamachiyninta Satanás iskayrayachishajtin, imaynatachus Tatan chay jatun chʼampaypi munakuyninta, cheqan kayninta, yachayninta, atiyninta ima, rikuchisqanta rikorqa. Chaytaj, Jallpʼaman jamojtin chʼampaykunasninta atipananpaj wakicherqa (Juan 5:19).
8. ¿Imaraykutaj Evangelios, Tata Diospa kʼacha kaykunasninta aswan sumajta entiendenapaj yanapawanchej?
8 Kʼata Chureqa, Jehovawan mayta masichakusqanrayku, ni pi jina imaynachus Tatan kasqanta sutʼinchayta aterqa. Chayrayku Tata Diosta rejsinapajqa, Churej ruwasqanta, parlasqanta ima ukhunchana. Kaywan kikincharina: imachus munakuy rimay kasqanta diccionariollapi leerispaqa, mana sutʼitachu entiendesunman. Chaywanpis Jesuspa kausayninmanta, imatachus runamanta sientesqanmanta ima, Evangelios nisqanpi tʼukurispaqa, “Diosqa munakuymin” nisqanta aswan sumajta entiendenchej (1 Juan 4:8, 16). Chantá Jesucristo discipulosninman Jehovaj waj kʼacha kaykunasninta rikuchisqantapis entiendellanchejtaj.
JESUSQA IMAYNACHUS TATAN KASQANTA REJSICHERQA
9. a) ¿Imaynasmantá Jesús discipulosninman imaynachus Tatan kasqanta rejsicherqa? b) ¿Imaynatá Jesús imaynachus Tatan kasqanta yachachisqannejta rejsicherqa? Sutʼinchariy.
9 ¿Imaynatá Jesús discipulosninman, imaynachus Tatan kasqanta rejsicherqa, chantá noqanchejmanpis? Iskaynejmanta: yachachisqasninwan, ruwasqasninwan ima. Yachachisqasninpi tʼukurispaqa, imaynatachus Jehová yuyasqanta, sientekusqanta, ruwasqanta ima sumajta entiendesqanta reparanchej. Sutʼincharinapaj, Tatanta munakuyniyoj michejwan kikincharqa, pichus tropamanta chinkasqa ovejitata maskʼaj llojsin, tarispataj “astawan kusikun jisqʼon chunka jisqʼonniyoj mana chinkajkunamanta nisqaqa”. ¿Imatataj Jesús kay kikinchaywan yachacherqa? Pay nerqa: “Ajinallatataj janaj pachapi kashaj Tataykichej mana munanchu ujllapis kay juchʼuykunamanta chinkananta”, nispa (Mat. 18:12-14). ¿Noqanchejrí imatá yachakunchej? May pisipaj qhawakojtinchejpis, chayri qonqasqa kasqanchejta yuyakojtinchejpis, Tatanchejqa noqanchejmanta interesakun. Imaraykuchus Jesús nisqan “juchʼuykunamanta” ujnin kanchej.
10. ¿Imaynatá Jesuspa ruwasqasnin imaynachus Tatan kasqanta rikucherqa?
10 Chantapis Jesusqa, imaynachus Tatan kasqanta ruwasqasninnejta discipulosninman rejsicherqa. Chayrayku apóstol Felipe Tatanta rikuchinanta nejtin, jinata kuticherqa: “Noqata rikuwajqa Tataytapis rikun”, nispa (Juan 14:8, 9). Imaynasmantachus Cristo, Diospa kʼacha kaykunasninta rikuchisqanta qhawarina. Uj kuti “leprawan onqosqa” runa sanoyachinanta mañakojtin, makinwan llankharispa, jinata nerqa: “Arí, munani; llimphuchasqa kay”, nispa. Chay runaqa, Jesuspa ruwasqanpi Jehovaj atiyninta rikorqa (Luc. 5:12, 13). Chantapis discipulosnenqa, Lázaro wañojtin, Tatan jina khuyakuyniyoj kasqanta rikorqanku, imajtinchus Jesús “sinchʼita phutikorqa, sonqontaj wawayarqa” chantá “waqarikorqa”. Payqa, Lazarota kausarichinanta yachaspapis, familiaresninpa, amigosninpa llakiyninkuta sienterqa (Juan 11:32-35, 40-43). Tukuymanchá Jesuspa waj kutipi ruwasqasnin gustawanchej, mayqenkunapichus Tata Diospa khuyakuyninta Churinpi rikunchej.
11. a) ¿Imatataj Jesús, templomanta vendejkunata qharqosqanwan Tatanmanta rikucherqa? b) ¿Imaraykutaj chayta ruwasqan mayta sonqochawanchej?
11 Cristo templomanta ovejasta, wakasta ima vendejkunata qharqosqanmanta, ¿imatá nisunman? Kaypi tʼukurina: payqa lazomanta seqʼonata ruwaspa, chhalajkunaj qolqesninkuta pampaman qhallirparispa, mesasninkuta tijrararqa (Juan 2:13-17). Ajinata ruwajta rikuspa discipulosnenqa, rey Davidpa profecianta yuyarikorqanku, maypichus nin: “Wasiykita sinchʼita munakusqayrayku tukukushaniña”, nispa (Sal. 69:9). Jesusqa chayta ruwaspa, cheqa yupaychayta sinchʼita jarkʼayta munasqanta rikucherqa. Rikunchej jina, Jesusqa imaynachus Jehová kasqanta rikucherqa. Chaytaj, Jallpʼamanta sajra ruwaykunata chinkachinanpaj Dios atiyniyoj kasqanta, astawanpis sinchʼita chayta ruwayta munasqanta yuyarichiwanchej. Jesús mana iskayrayaspa chayta ruwasqanqa, kay pachapi sajra ruwaykunata rikuspa, imaynachus Tatan sientekusqanta rikuchin. Sajra ruwaykunawan tinkukuspa chayta yuyarikoyqa, ¡mayta sonqochawanchej!
12, 13. ¿Imatá Jehovamanta yachakunchej, imaynatachus Jesús discipulosninta qhawasqanpi?
12 Jesús imaynatachus discipulosninta qhawasqanmantapis mayta yachakullanchejtaj. Paykunaqa, pichus aswan kurajpaj qhawasqa kasqanmanta siminakullajpuni kanku (Mar. 9:33-35; 10:43; Luc. 9:46). Jesús, Tatanwan unayta kausakusqanrayku, jatunchakuymanta imatachus Tatan yuyasqanta allinta yacharqa (2 Sam. 22:28; Sal. 138:6). Chantapis Jesusqa, Satanás atiyniyoj, rejsisqataj kayta munaspa jatunchakusqanta rikorqa. Chayrayku discipulosnin jatunchakusqankuta rikuspa, maytachá sonqonta nanachikorqa. Imajtinchus paykunaman sumajta yachacherqa, apostolesnin kanankupajpis ajllarqa. Paykunataj Jesús wañuchisqa kanan pʼunchaykama jatunchakorqanku (Luc. 22:24-27). Chaywanpis payqa, kʼachamanta mana saykʼuspa yuyaychallarqapuni, tiempowan pay jina llampʼu sonqo kanankupitaj atienekorqa (Fili. 2:5-8).
13 ¿Rikunchejchu imaynachus Tata Dios kasqanta, Jesús discipulosninta pacienciawan cheqanchasqanpi? ¿Rikunchejchu Cristoj ruwasqanpi, nisqanpi ima, Tatan kamachisninta, kutin kutita pantajtinkupis mana saqerpayasqanta? ¿Manachu Diospa kʼacha kaykunasninpi tʼukuriy, pantajtinchej perdonninta mañakunapaj tanqawanchej?
CHUREQA TATANTA REJSICHIYTA MUNARQA
14. ¿Imaynatá Jesús, Tatanta rejsichiyta munasqanta rikucherqa?
14 Ashkha kamachejkunaqa, runas atiyninkupi kanankupaj, mana imatapis yachanankuta munankuchu. Jesustajrí, Tatanmanta yachasqanta ashkha imasta mana pakaspa sutʼinchayta munarqa (Mateo 11:27 leey). Chantapis ujnin discipulon jinata nerqa: “Yachallanchejtaj Diospa Churin jamuspa yachayta qowasqanchejta, cheqa kaj Diosta rejsinanchejpaj”, nispa (1 Juan 5:20). ¿Ima niyta munan chay? Tatanmanta imatachus nisqanta entiendeyta atinankupaj, yuyayninkuta kicharisqanta. Jesusqa, Tatanmanta mana imatapis pakarqachu, nitaj Trinidad kasqantachu nerqa.
15. ¿Imajtintaj Jesús Tatanmanta imatachus yachasqanta mana tukuynintachu rejsicherqa?
15 ¿Tukuy ima yachasqantachu, Jesús Tatanmanta sutʼincharqa? Mana, imajtinchus ashkha imasmanta mana imatapis nerqachu (Juan 16:12 leey). ¿Imaraykú? Payllataj discipulosninman jinata sutʼincharqa: “Anchaña kanman qankunapaj”, nispa. Chaywanpis, “sonqochaj Espíritu” santo chayamojtin, aswan yachayta rejsichinanta nerqa, chaytaj “tucuy cheka caj[man]” paykunata pusanan karqa (Juan 16:7, 13, Dios Parlapawanchej). Imaynatachus kʼacha tatas, wawasninkuman wiñajtinkuraj wakin imasta willanku, ajinallatataj Cristopis, discipulosninman wiñay tukusqa runas jina, entiendeyta atinankupaj jina kajtinkuraj wakin imasta sutʼincharqa. Jesusqa, kʼacha kasqanrayku maykamallachus discipulosnin entiendeyta atisqankuta yacharqa.
JESÚS JINA, RUNA MASINCHEJTA JEHOVATA REJSINANKUPAJ YANAPANA
16, 17. ¿Imaraykutaj imaynachus Tata Dios kasqanta wajkunaman rejsichiyta atinchej?
16 Pillatapis rejsispa, kʼacha kasqantataj reparaspaqa, paymanta mayta parlayta munanchej, ¿icharí? Jesuspis Jallpʼapi kashaspa Tatanmanta mayta parlarqa (Juan 17:25, 26). ¿Jesús jina imaynachus Jehová kasqanta, runa masinchejman rejsichisunmanchu?
17 Rikunchej jina, Jesusqa ni pi jina Tatanta sumajta rejserqa. Chay yachasqanmantataj wakinta rejsichiyta munarqa. Chantapis discipulosninta, Tatanmanta mana entiendey atina imasta entiendenankupaj yanaparqa. Noqanchejpis Cristorayku, runas mana yachasqanku imasta Jehovamanta yachanchej. Chantapis yachachisqasninwan, ruwasqasninwan ima, imaynachus Tatan kasqanta rejsichiwasqanchejmanta may agradecesqa kashanchej. Astawanpis Jehovata rejsisqanchejmanta runaykachayta atisunman (Jer. 9:24; 1 Cor. 1:31). Jehovaman qayllaykunapaj kallpachakusqanchejrayku, paypis qayllaykamuwanchej (Sant. 4:8). Chayraykutaj imatachus yachasqanchejta wajkunaman willariyta atinchej. ¿Imaynatá chayta ruwasunman?
18, 19. ¿Imaynasmantá Tata Diosta rejsichisunman? Sutʼinchay.
18 Parlasqanchejwan, ruwasqanchejwan ima, imaynachus Tata Dios kasqanta Jesús jina rejsichinanchej tiyan. Ashkha runasqa, pichus Dios kasqanta mana yachankuchu. Llulla yachachiykunata uyarisqankurayku, Diosmanta pantasqata yuyanku. Chaywanpis noqanchejqa, sutinmanta, imatachus runaspaj munasqanmanta, imaynapunichus kasqanmanta ima, Bibliapi nisqanman jina yachachiyta atinchej. Chantapis Bibliaj wakin yachachiykunasnenqa, Jehová imaynachus kasqanmanta astawan rejsichiwanchej, chaykunamantataj hermanosninchejwan parlarisunman. Ajinamanta paykunatapis yanapasun.
19 Jesús jina ruwaspa, imaynachus Tata Dios kasqanta, ruwasqasninchejnejta rejsichinanchej tiyan. Wajkunaqa, Cristoj munakuyninta ruwasqasninchejpi rikuspa Tataman, Churiman ima qayllaykuyta munanku (Efe. 5:1, 2). Apóstol Pablo yuyaychawanchej: “Noqata qhawarispa imatapis ruwaychej, imaynatachus noqapis Cristota qhawarispa ruwani, ajinata” (1 Cor. 11:1). Runastaqa imaynachus Jehová kasqanta rikunankupaj, ruwasqasninchejwan yanapayta atinchej, chaytaj ni imawan kikinchakunchu. Chayrayku Jesús jina, imaynachus Tata Dios kasqanta wajkunaman rejsichinallapuni.
[Tapuykuna]
