Jesusqa listom këkan Teytanta reqitsimänapaq

“Noqallam Dios Yayäta reqï y noqa reqitsiptïllam waquincunapis Dios Yayata reqiyanqa.” (LUC. 10:22.)

¿IMA NINKIMANRAQ?

¿Imanirtaq Jesusqa pipitapis más puëderqan Teytan imanö kanqanta musyatsikïta?

¿Imanötaq Jesus musyatsikurqan Teytan imanöpis kanqanta?

¿Imatataq ruranantsik Jesusnö kamakoq Teytantsikpita musyatsikunapaq?

1, 2. ¿Ima tapukïtaq pï më nunakunata paqwë yarpakachätsin?

“¿PITAQ Dios?” Kë tapukïqa pï më nunatam yarpakachätsin. Tantearinapaq, mëtsikaq cristiänotukoqkuna Kima Dios Jukllëllachö kanqanta creirpis, atskaqmi cuentata qokuyan tsë creenciaqa mana entiendipaqnö kanqanta. Hasta juk religiösopis, Kima Dios Jukllëllachö kanqan creenciataqa nunakunapa peqan entiendita mana puëdenqantam qellqanqan libronchö nirqan. Jina imëkapis kikinlla rurakanqanman creeqkunanam, Dios kanqanta creiyantsu, tsëpa rantinqa, imëkapis kikinlla kamakäkunqantam wisku cuenta creiyan. Pero kikin Charles Darwinqa Dios kanqanta neganampa rantinmi, Dios imanö kanqanta paqwëpa entienditaqa nunakuna mana puëdeyanqanta nirqan.

² Ima creenciayoq karpis casi llapan nunakunam Dios kanqanta o mana kanqanta tapukuyan. Pero atskaqmi tsë tapukïpa respuestanta ashiyantsu sasa o aja entiendipaqtanö rikar. Awmi, tsë nunakunataqa Satanasmi ‘upa cuentata ticraratsishqa’ (2 Cor. 4:4). Tsëmi casi llapan nunakuna kamakoq Teytata reqiyantsu y paqwë pantashqa këkäyan (Isa. 45:18).

3. a) ¿Pitaq kamakoq Teytantsikta reqitsimarquntsik? b) ¿Ima tapukïkunapitataq yachakushun?

³ Tsënö kaptimpis, Diospita rasumpa kaqta nunakuna yachakuyänanqa alläpam precisan. ¿Imanir? “Porque ‘Jehoväpa jutinta llapan parlaqkuna[lla]m salvakuyanqa’.” (Rom. 10:13, NM.) Tsë jutita parlanapaqqa Jehová imanö kanqanta alli reqinantsikran precisan, awmi, Jesucristu qateqninkunata Teyta Dios imanö kanqanta musyatsiptin reqiyanqannömi noqantsikpis reqinantsik (lei Lucas 10:22).  ¿Imanirtaq Jesusqa pipitapis más alli Teytanta reqitsikurqan? ¿Imanötaq tsëta rurarqan? ¿Y imatataq pëpita yachakushwan Teyta Jehová imanö kanqanta nunakunata yachatsinapaq? Kë tapukïkunapita yachakurishun.

JESUCRISTUQA PIPITAPIS MASMI REQIN

4, 5. ¿Imanirtaq Jesuslla Teytan imanö kanqanta pipitapis más musyatsikïta puëdeq?

⁴ Jesusqa pipitapis masmi Teytanta reqitsikïta puëderqan. ¿Imanir? Porque imatapis manaraq kamarninmi Diosqa pëta kamarqan, tsëmi kë Patsaman manaraq shamurqa ciëlochö juk espíritu karqan, “Diospa jucllella tsurin” (Juan 1:14; 3:18). ¡Imanö shumaqraq tsëqa këkurqan! Pipis manaraq kamashqa këkaptinmi, Diospa Tsurinqa Teytampa kuyakïninta y yanapakïninta chaskikarqanna, y Teytan imanö kanqampita y rurëninkunapitapis yachakïkarqannam. Awmi, Teytawan Tsuriqa millonyëpayan watakunanam parlar kayarqan, y tsënöpam más y más kuyanakuyarqan (Juan 5:20; 14:31). ¡Clärom këkan Teytan imanö kanqanta Jesus pipitapis más musyanqanqa! (Lei Colosenses 1:15-17.)

⁵ Jutinchö parlanampaqmi kamakoq Teytaqa Tsurinta cargota qorqan, tsëmi Bibliaqa “Diospa Palabran” nin Jesuspaq (Apo. 19:13). Tsëmi kamakoq Teyta imanö kanqanta pipitapis más alli musyatsikïta y yachatsikïtaqa Jesuslla puëden. Tsëchi apóstol Juanqa qellqanqan librochö nirqan Palabraqa “Dios Yayapa lädunchö [caycanganta]” (Juan 1:1, 18, NTCN). Kë textochöqa unë witsan costumbrepaqmi parlëkan, tsë witsanqa mikïman invitayanqan nunam cämanö sïllaman piwampis qaqëkur jamakuyaq, tsëmi mëqampis juknimpa pëchonman kinkishëkuptin ishkan shumaq parlakuriyaq. Tsënöllam Teytawan Tsuripis juntolla kawarnin imëkapaqpis shumaq parlakuyaq.

6, 7. ¿Imataq yanapakurqan Teytawan Tsuri más kuyanakuyänampaq?

⁶ Tiempo pasanqanmannö más y más reqinakurmi Teytaqa Tsurimpita “llapan junaq kushishqa karqan” (lei Proverbios 8:30, 31 *). Musyënam, paqta trabajayanqanmi Jesustaqa yanaparqan Teytata reqinqanmannö más kuyanampaq y tsënöllam Teytampis Tsurinta más kuyarqan. Awmi, cada kamanqan angelta y nunata Jehová imanöpis tratanqanta rikarmi, Jesusqa Teytanta más y más kuyarqan y respetarqan.

⁷ Ciëlochö y Patsachö autoridadyoq kanqanta Satanás qochita o gechuyta munaptin, tsë jatun problëmata altsanampaq kuyakïninta, alli rurëninta, yachëninta y kallpanta Jehová imanö utilizanqantam Jesusqa rikarqan. Tsëta rikanqanqa mëraq yanaparqan Patsaman shamurnin tukï problëmakunapa pasar imata ruranampaqpis (Juan 5:19).

8. ¿Imanirtaq Jesuspaq Biblia parlanqanta leirqa más musyantsik Teytan imanö kanqanta?

⁸ Jehoväwan mëtsika tiempo kashqa karmi, japallan Tsurinqa Teytan imanö kanqanta pipitapis más musyatsikïta puëderqan. Tsëmi Teytata alli reqinapaqqa, Jesus parlanqankunapita y ruranqankunapita alli yachakunantsik. Juk igualatsikïwan tsëta rikärishun. Juk diccionariota leirllaqa manachi paqwëqa käyishwantsu o mayashwantsu kuyakï ima kanqanta. Pero Jesus ruranqankunata y nunakunata imanö kuyanqanta Bibliachö leirirqa, masmi käyirintsik ‘Dios allapa cuyacoq’ kanqanta (1 Juan 4:8, 16). Y tsënöllam pasan Teytan imanö kanqanta jukkunachö Jesus qateqninkunata rikätsinqanwampis.

 TEYTAN IMANÖ KANQANTAM JESUSQA MUSYATSIKURQAN

9. a) ¿Ima ishkënöpataq Jesus qateqninkunata musyatsirqan Teytan imanö kanqanta? b) Teytan imanö kanqanta Jesus yachatsikïninwan rikätsikunqanta willakaramï.

⁹ ¿Imanötaq Jesusqa unë witsan y kanan witsan qateqninkunata musyatsishqa Teytan imanö kanqanta? Ishkënöpam: yachatsikïninwan y rurëninkunawan. Yachatsikunqankunaman puntata pensarishun, yachatsikïninwanqa rikätsikurqan Teytan imanö pensanqanta, imanö sientekunqanta y imatapis imanö ruranqantam. Këman pensarishun, juk kutim alläpa kuyakoq mitsikoqtawan Teytanta igualatsirqan, tsë mitsikoqpaqmi nirqan oqrakashqa üshanta tarïkur, alläpa ‘cushicunganta isgun chunca isgun (99) uyshan captinpis’. ¿Imatataq kë igualatsikïwanqa Cristu yachatsikurqan? Kënömi nirqan: “Chaynömi syëlucho caycaj Papäniquipis mana munanchu wamrano yäracuycajcuna ni jucnayllapis ogracänanta” (Mat. 18:12-14, Tayta Diosninchi Isquirbichishan). Y noqantsiktaqa, ¿imatataq kë yachatsimantsik? Mana kaq cuenta y qonqashqanö sientekushqapis, ciëlochö Teytantsikqa kuyamantsikmi, Jesus ninqannöpis, ‘wamranö yarakuykajcunatanö’ o markäkïkaqkunatanömi rikämantsik.

10. ¿Imanötaq Jesus rurëninkunawan rikätsikurqan Teytan imanöpis kanqanta?

¹⁰ Ishkë kaqchöqa, rurëninkunawanmi Jesusqa qateqninkunata rikätsirqan Teytan imanö kanqanta. Tsëmi Teyta Diosta rikätsinampaq apóstol Felipe mañaptin, Jesus kënö nirqan: “Pipis noqata ricamarnïqa Dios Yayatapis ricashqam” (Juan 14:8, 9). Rikärishun Dios imanö kanqanta tukï rurëninkunawan Cristu rikätsikunqanta. Juk kutim “leprawan qeshyaq nuna” kachakëkatsinampaq mañakurqan, tsënam pëqa yatëkur ‘munämi cachacänequita’ nirqan. Awmi, Jesus ruranqanchöqa Jehová imanö kanqantam tsë leprawan qeshyaq nunaqa rikarqan (Luc. 5:12, 13). Y Lazaru wanuriptinnam, Jesus “llaquir shonquncho nanatsicur” waqaptin qateqninkunaqa rikäyarqan Jehoväpis tsënö alläpa llakipäkoq kanqanta. Kawaritsinampaq kaqta musyarpis, Läzarupa kastankuna y amïgonkuna waqaqta rikarmi Jesuspis shonqunchö alläpa llakikurqan (Juan 11:32-35, 40-43). Llapantsikpam kapamantsik Bibliachö alläpa gustamanqantsik willakïkuna, y tsëkunam yanapamantsik Jesuspa rurëninchö Teytan kuyakoq kanqanta rikänapaq.

11. a) ¿Teytan imanö kanqantataq Jesus rikätsikurqan templopita rantikoqkunata qarqurnin? b) ¿Imanirtaq tsëta musyëqa kallpata qomantsik?

¹¹ Y juk kutinam, waskapita chicoteta rurarkur animal rantikoqkunata templopita Cristu qarqurqan, y qellë trokaqkunapa mësankunata kumarmi qellëninkunata ramakacharkurqan (Juan 2:13-17). ¿Imatataq tsëta ruranqampita yachakuntsik?  Llapan kallpanwan tsëta ruranqanmi qateqninkunata yarpätsirqan rey David kënö ninqanta: “Wanurpis wanurïmanmi wayikirëkurqa” (Sal. 69:9). Tsëta rurarmi Jesusqa rikätsikurqan rasumpa kaq adoracionta defendinqanta. ¿Tsëta ruranqanchö rikantsikku Teytan imanö kanqanta? Tsë pasanqanta Biblia willakurqa, mana allikunata ushakätsinampaq Diospa kallpan kanqanllatatsu manam rikätsimantsik, sinöqa shonqupita patsë tsëta rurëta munanqantam. Jesus piñakurnin ruranqanmi rikätsimantsik kanan witsan imëka mana allikunata rikarnin kamakoq Teyta imanö sientekunqanta. ¡Këta musyëqa alläpam shoqamantsik pipis mana kaqpita ima mana allitapis ruramashqa!

12, 13. ¿Imatataq Jehoväpita yachatsimantsik Jesus qateqninkunata imanöpis tratanqan?

¹² Jina Dios imanö kanqantaqa Jesus rikätsikurqan qateqninkunata imanö tratanqanchömi. Pëkunaqa kutin kutinmi pleitoyaq mëqan más precisaq kanqampaq (Mar. 9:33-35; 10:43; Luc. 9:46). Mëtsika watakuna Teytanwan tärashqa karmi Jesusqa alli musyarqan precisaqtukïpaq Jehová imata pensanqanta (2 Sam. 22:28; Sal. 138:6). Jinamampis jukpa kaqta qochikïta munar y precisaq këpaq ërayanqanta Satanás imanö rikätsikunqantam pëqa rikashqa karqan. Tsëchi Jesucristuqa alläpa llakikurqan kutin kutin yachëkätsiptimpis qateqninkuna y hasta akranqan apostolkunapis tsënö kayaptin. Y rasun kaqchöqa, Jesusta wanutsiyänampaq tsariyänan paqaspis precisaq këpaq munëninkunatam rikätsikuyarqan (Luc. 22:24-27). Tsënö kaptimpis, kuyëllapa yachatsitaqa manam utirqantsu, antis tiempo pasariptinqa pënö qollmi shonqu kayänampaqmi markäkurqan o yärakurgan (Fili. 2:5-8).

¹³ Jesus qateqninkunata kuyëllapa yachatsinqanchö, ¿rikantsiktsu Teytampis pacienciayoq kanqanta? Cristu parlanqanchö y ruranqanchö, ¿rikantsikku sirweqninkuna kutin kutin pantayaptimpis Jehová mana jaqirinqanta? Dios imanöpis kanqanman pensanqantsik, ¿manaku yanapamantsik tukï pantanqantsikkunata wanakurnin willanapaq?

JESUSQA LISTOM KËKARQAN TEYTAMPITA MUSYATSIKUNAMPAQ

14. ¿Imanötaq Jesus rikätsikurqan Teytampita musyatsikunampaq listo këkanqanta?

¹⁴ Wakin gobernaqkunaqa manam imatapis musyatsiyantsu nacionninchö këkaq nunakunata. Pero Jesusqa mana imata pakarmi Teytampita llapanta musyatsikurqan (lei Mateo 11:27). Jinamampis, juk qateqnin ninqannömi ‘Diospa Tsurin Jesucristu cäyitsimarqantsic rasonpa caq Diosta reqinapaq’, juk parlakïchöqa, Jehoväta (1 Juan 5:20). ¿Ima ninantaq tsëqa? Teytampita musyayänampaqmi shumaq entiendillapaq yachatsirqan. Manam Kima Dios Jukllëllachö kanqanta yachatsikurtsu Jehoväta reqiyänanta nunakunata pantatsirqan.

15. ¿Imanirtaq Jesusqa Teytampita llapan musyanqanta yachatsikurqantsu?

¹⁵ ¿Teytampita llapan musyanqantaku Jesus yachatsikurqan? Manam. Rasumpa kaqchöqa wakin wakintaqa manam musyatsikurqantsu (lei Juan 16:12). ¿Imanir? Qateqninkunatam kënö nirqan: “Llapanta niyapteqqa, manam cäyiyämanquimantsu” o entiendeyämankimantsu. Tsënö kaptimpis, ‘yanapacoq Santu Espirituta’ chaskir-ran ‘llapan rason caqta’ entiendeyänan karqan (Juan 16:7, 13). Imanömi teytakunaqa pishillaraq wamrankunata llapantaqa yachatsiyantsu poqurkurnin entiendita puëdeyanqanyaq, tsënöllam Cristupis Teytampita llapantatsu qateqninkunata yachatsirqan. Kuyakoq kanqanta  rikätsikurmi llapanta mana entiendita puëdeyanqantaqa cuentaman churarqan.

JESUSNÖ NUNA MAYINTSIKTA YANAPASHUN JEHOVÄTA REQIYÄNAMPAQ

16, 17. ¿Imanirtaq noqantsikqa pipitapis más puëdentsik Teytantsik imanö kanqanta musyatsikïta?

¹⁶ Juk alli nunata reqirirqa, ¿manaku pëpita pï mëta willëta munantsik? Tsëtam Patsachö këkar Jesus rurarqan: Teytampitam parlarqan (Juan 17:25, 26). ¿Manatsuraq pë ruranqannölla Jehová imanö kanqanta nunakunata musyatsishwan?

¹⁷ Rikanqantsiknöpis Jesusqa pipitapis masmi Teytanta reqirqan, tsëmi Teytanta reqitsikunampaq listo këkarqan. Pë yanapaptinmi qateqninkunaqa Jehová imanö kanqanta alli entiendeyarqan. Cristum yanapamarquntsik pipitapis más Jehoväta kuyanapaq, y alläpam agradecikuntsik yachatsikïninwan y rurëninwan Teytan imanö kanqanta musyatsimanqantsikpita. Tsëmi hasta kamakoq Teytata reqinqantsiktapis nita puëdentsik (Jer. 9:24; 1 Cor. 1:31). Jehoväman más witinapaq kallpachakushqantsik kaptinmi, pëpis noqantsikman más witimushqa (Sant. 4:8). Tsënö kaptinmi noqantsikqa pipitapis más pëpita yachatsikïta puëdentsik. ¿Imanötaq tsëtaqa rurashwan?

18, 19. ¿Imanötaq musyatsikïta puëdentsik Teytantsik imanö kanqanta? Willakaramï.

¹⁸ Alläpam precisan Jesusnö parlënintsikwan y rurënintsikwan Teytantsik imanö kanqanta musyatsikunantsik. Yarpäshun, mëtsikaq nunakunam musyayantsu Dios pï kanqanta. Mana alli yachatsikïkunawan pantashqa karmi nunakunaqa Diosta reqiyantsu. Pero noqantsikqa, Diospa jutimpita, nunakunapaq imata munanqampita y imanö Dios kanqanta Bibliapita yachakunqantsikmannömi yachatsikïta puëdentsik. Jina alläpa allim kanqa unë nunakunapaq Biblia willakunqanchö Dios imanö kanqanta yachakurqa, cristiano mayintsikkunawan tsëpaq parlakurishqa. Tsëkunapaq parlakurinqantsikmi pëkunatapis yanapanqa.

¹⁹ ¿Ima nishwantaq Jesusnö rurënintsikkunawan Teytantsik imanö kanqanta rikätsikïpitaqa? Jesus kuyakoq kanqanta rurënintsikchö rikätsikushqaqa, wakinkunapis Jehovätawan Jesustam más reqita munayanqa (Efe. 5:1, 2). Apóstol Pablum kënö nimantsik: “Imanomi noqapis Jesucristu cawanqanno cawaquita tirecä, tsenolla qamcunapis yachacuyë alli portaquita” (1 Cor. 11:1). Rurënintsikkunata rikar Jehová imanö kanqanta nunakuna musyayänampaq yanapakïqa alläpa kushikïpaqmi. Tsëmi Jesusnö imëpis ruranantsik y Kamakoq Teytantsik imanö kanqanta imëkanöpapis musyatsikunantsik.

[Päginapa ura kuchunchö willakï]

[Yachakunapaq kaqpa tapukïninkuna]