‘N’wana U Rhandza Ku Hlavutela Tata Wakwe’
‘N’wana U Rhandza Ku Hlavutela Tata Wakwe’
“Tatana i mani, ku hava loyi a swi tivaka handle ka N’wana, ni loyi N’wana a rhandzaka ku n’wi hlavutela eka yena.”—LUKA 10:22.
U NGA HLAMULA NJHANI?
Ha yini Yesu a a faneleka swinene ku hlavutela Tata wakwe?
Yesu u n’wi hlavutele njhani Tata wakwe eka vanhu?
Hi tihi tindlela leti u nga tekelelaka Yesu ha tona loko u hlavutela Tata wakwe eka van’wana?
1, 2. Hi xihi xivutiso lexi pfilunganyaka vanhu vo tala naswona ha yini?
‘XIKWEMBU i mani?’ Xivutiso lexi xi pfilunganya vanhu vo tala. Hi xikombiso, vanhu vo tala lava tivulaka Vakreste va tshemba leswaku Xikwembu i Vunharhu-un’we naswona va vula leswaku dyondzo leyi a swi koteki ku yi twisisa. Mutsari un’wana tlhelo mufundhisi u te: “Dyondzo leyi a yi hlamuseleki hikuva ku ni swilo swin’wana leswi munhu a nga swi kotiki ku swi twisisa.” Hi hala tlhelo, vanhu vo tala lava pfumelaka eka dyondzo ya ku tiendlekela ka swilo va tshemba leswaku Xikwembu a xi kona. Va vula leswaku ntumbuluko hinkwawo lowu hlamarisaka wu lo tiendlekela. Hambiswiritano, ematshan’weni yo vula leswaku Xikwembu a xi kona, Charles Darwin u te: “Vanhu a va na byona vuswikoti byo ti twisisa hi ku helela timhaka leti vulavulaka hi Xikwembu.”
2 Vanhu vo tala va ni swivutiso swo tala malunghana ni Xikwembu ku nga khathariseki tidyondzo leti va pfumelaka eka tona. Hambiswiritano, loko va tsandzeka ku kuma tinhlamulo leti enerisaka, vo tala va tshika ku lava ku tiva hi Xikwembu. Entiyisweni, Sathana u ‘dlaye mianakanyo ya lava nga riki vapfumeri.’ (2 Kor. 4:4) Xisweswo a swi hlamarisi leswi vanhu vo tala va pfilunganyekeke naswona va nga wu tiviki ntiyiso hi Tatana, Mutumbuluxi wa vuako hinkwabyo!—Esa. 45:18.
3. (a) I mani loyi a hi hlavuteleke hi Muvumbi? (b) Hi swihi swivutiso leswi hi nga ta swi kambisisa?
3 Kambe i swa nkoka leswaku vanhu va dyondza ntiyiso malunghana ni Xikwembu. Ha yini? Hikuva lava “vitanaka vito ra Yehovha” hi vona ntsena va nga ta ponisiwa. (Rhom. 10:13) Ku vitana vito ra Yehovha swi katsa ku tiva leswaku i Xikwembu xa njhani. Yesu Kreste u dyondzise vadyondzisiwa vakwe mhaka yoleyo ya nkoka. U va hlavutele hi Tata wakwe. (Hlaya Luka 10:22.) Ha yini Yesu a kote ku hlavutela Tata wakwe hi ndlela leyi nga pimanisiwiki ni ya munhu? U swi endlise ku yini sweswo? Naswona hi nga n’wi tekelela njhani loko hi hlavutela Tata wakwe eka van’wana? A hi kambisiseni swivutiso leswi.
YESU KRESTE A A FANELEKA SWINENE
4, 5. Ha yini Yesu a a faneleka swinene ku hlavutela Tata wakwe?
4 Yesu a a faneleka swinene ku hlavutela Tata wakwe. Ha yini? Hikuva loko swivumbiwa leswin’wana hinkwaswo swi nga si vumbiwa, Yesu a a hanya etilweni tanihi “N’wana wa Xikwembu la tswariweke a ri swakwe.” (Yoh. 1:14; 3:18) Xexo a ku ri xikhundlha xo hlawuleka hakunene! Hi nkarhi wolowo N’wana u tshame ni Tata wakwe naswona u dyondze ha Yena ni hi timfanelo Takwe. Yena ni Tata wakwe a va vulavurisana minkarhi hinkwayo naswona sweswo swi endle leswaku vuxaka bya vona byi tshama byi tiyile ku ringana malembe yo tala. (Yoh. 5:20; 14:31) N’wana u fanele a dyondze swilo swo tala malunghana ni vumunhu bya Tata wakwe.—Hlaya Vakolosa 1:15-17.
5 Tatana u hlawule N’wana leswaku a va muvulavuleri wakwe, tanihi “Rito ra Xikwembu.” (Nhlav. 19:13) Hikokwalaho, Yesu a a faneleka swinene ku hlavutela Tata wakwe eka vanhu. Hi yona mhaka leyi Yohane, mutsari un’wana wa buku ya Tievhangeli, a vuleke leswaku Yesu i “Rito,” naswona u tshama ‘exifuveni xa Tata wakwe.’ (Yoh. 1:1, 18) Swi nga ha endleka leswaku loko Yohane a vula xiga xexo a a ehleketa hi mukhuva lowu a wu tolovelekile enkarhini wakwe loko vanhu va ri eku dyeni. Muendzi a a tshama ekusuhi ni muendzi un’wana leswaku va kota ku bula hi ku olova. Hilaha ku fanaka, N’wana a a ri ‘exifuveni xa Tata wakwe’ naswona a a kota ku vulavula na yena hi timhaka ta nkoka swinene.
6, 7. Vuxaka lebyi Tatana ni N’wana a va ri na byona byi hambete byi tiya hi ndlela yihi?
6 Vuxaka lebyi Tatana ni N’wana a va ri na byona byi hambete byi tiya swinene. N’wana u ve “munhu loyi [Xikwembu xi] n’wi rhandzaka hilaha ku hlawulekeke siku ni siku.” (Hlaya Swivuriso 8:22, 23, 30, 31.) Kutani vuxaka bya vona byi hambete byi tiya swinene loko va ri karhi va tirha swin’we niloko N’wana a ri karhi a dyondza ku tekelela timfanelo ta Tata wakwe. Loko ku vumbiwe swivumbiwa leswin’wana, N’wana u vone ndlela leyi Tata wakwe a a tirhisana na swona ha yona kutani rirhandzu ni xichavo lexi a a ri na xona ha yena xi ye xi kula swinene.
7 Nakambe ntlhontlho lowu Sathana a wu pfuxeke malunghana niloko vuhosi Yehovha byi fanerile wu endle leswaku Yesu a dyondza ndlela leyi Yehovha a kombisaka rirhandzu, vululami, vutlhari ni matimba ha yona loko A langutane ni xiyimo xo tika. A swi kanakanisi leswaku sweswo swi hlomisele Yesu ku hlula swiphiqo leswi a a ta hlangavetana na swona endzhaku ka nkarhi loko se a ri laha misaveni.—Yoh. 5:19.
8. Rungula ra tibuku ta Tievhangeli ri hi pfuna njhani leswaku hi dyondza hi timfanelo ta Tatana?
8 Leswi N’wana a a ri ni vuxaka lebyikulu ni Tata wakwe, u kote ku n’wi hlavutela hi vuenti hi ndlela leyi nga pimanisiwiki ni ya munhu. Ndlela leyinene leyi hi nga dyondzaka ha yona hi Tatana i ku kambisisa leswi N’wana wakwe loyi a tswariweke a ri swakwe a swi dyondziseke ni ku swi endla. Hi xikombiso, ehleketa ndlela leyi a swi ta hi tikela ha yona ku ri twisisa hi ku helela rito leri nge “rirhandzu” loko a ho hlaya ntsena nhlamuselo ya rona eka xihlamusela-marito. Kambe loko hi anakanyisisa hi rungula ra vatsari va tibuku ta Tievhangeli leri vulavulaka hi vutirheli bya Yesu ni tindlela leti a va khathaleleke ha tona vanhu van’wana, hi kota ku twisisa leswi xiga lexi nge “Xikwembu i rirhandzu” xi vulaka swona. (1 Yoh. 4:8, 16) Swi tano ni hi timfanelo letin’wana ta Xikwembu leti Yesu a ti hlavuteleke vadyondzisiwa vakwe loko a ha ri laha misaveni.
NDLELA LEYI YESU A HLAVUTELEKE TATA WAKWE HA YONA
9. (a) Hi tihi tindlela timbirhi leti Yesu a hlavuteleke Tata wakwe ha tona? (b) Nyika xikombiso lexi kombisaka ndlela leyi Yesu a hlavuteleke Tata wakwe hi ku tirhisa tidyondzo takwe.
9 Yesu u n’wi hlavutele njhani Tata wakwe eka vadyondzisiwa vakwe ni le ka van’wana lava a va ta va valandzeri vakwe? U n’wi hlavutele hi tindlela timbirhi: hi tidyondzo ni hi mahanyelo yakwe. A hi rhangeni hi ku kambisisa tidyondzo ta Yesu. Tidyondzo leti Yesu a ti dyondziseke vadyondzisiwa vakwe ti hi pfuna ku twisisa mianakanyo ni mintlhaveko ya Tata wakwe. Hi xikombiso, Yesu u fanise Tata wakwe ni wanuna loyi a khathalaka, loyi a fambaka a lava nyimpfu leyi lahlekeke entlhambini wakwe. Yesu u vule leswaku loko n’wini wa ntlhambi a kuma nyimpfu leyi lahlekeke, “u tsaka ngopfu ha yona ku tlula leta 99 leti nga lahlekangiki.” Ha yini a tirhise xifaniso xexo? U te: “Hi ku fanana Tata wa mina la nge tilweni a nga naveli leswaku un’wana wa lava lavatsongo a lova.” (Mat. 18:12-14) U nga dyondza yini hi Yehovha exifanisweni lexi? U nga dyondza leswaku hambiloko minkarhi yin’wana u titwa onge u xikangalafula, Tata wa wena la nge tilweni wa ku rhandza naswona wa khathala ha wena. U ku teka tanihi “un’wana wa lava lavatsongo.”
10. Yesu u n’wi hlavutele njhani Tata wakwe hi mahanyelo yakwe?
10 Ndlela ya vumbirhi leyi Yesu a hlavuteleke Tata wakwe ha yona eka vadyondzisiwa vakwe i mahanyelo yakwe. Xisweswo, loko muapostola Filipi a kombele Yesu a ku, “Hi kombe Tatana,” swa twisiseka leswi Yesu a vuleke a ku, “Loyi a ndzi voneke u vone na Tatana.” (Yoh. 14:8, 9) Xiya swikombiso swin’wana leswi Yesu a kombiseke timfanelo ta Tata wakwe eka swona. Loko ‘wanuna loyi a a tele nhlokonho’ a kombele Yesu leswaku a n’wi hanyisa, Yesu u n’wi khumbile kutani a ku: “Ndza swi lava. Basisiwa.” Endzhaku ka loko wanuna yoloye a hanyisiwile, a swi kanakanisi leswaku u swi xiyile leswaku matimba lama Yesu a n’wi hanyiseke ha wona a ma huma eka Yehovha. (Luka 5:12, 13) Nakambe loko Lazaro a file, vadyondzisiwa va Yesu va xiye ndlela leyi Tata wakwe a a ri ni ntwela-vusiwana ha yona loko Yesu “a konya emoyeni, a karhateka” ivi “a humesa mihloti.” Hambileswi Yesu a a swi tiva leswaku u ta pfuxa Lazaro, u twe ku vava ku fana ni vandyangu wa Lazaro ni vanghana vakwe. (Yoh. 11:32-35, 40-43) Kumbexana ku ni rungula rin’wana eBibeleni leri u ri rhandzaka swinene, leri ku pfunaka ku xiya tintswalo leti Yehovha a nga na tona hilaha Yesu a ti kombiseke hakona hi swiendlo.
11. (a) I yini leswi Yesu a swi hlavuteleke malunghana ni Tata wakwe loko a basisa tempele? (b) Ha yini mhaka ya ku basisiwa ka tempele hi Yesu yi hi chavelela?
11 Hambiswiritano, hi xihi xiboho lexi u nga xi fikelelaka malunghana ni goza leri Yesu a ri tekeke ro basisa tempele? Hi mahlo ya mianakanyo vona leswi humeleleke: Yesu u endle nkharisa wa mapindza kutani a hlongola vanhu lava a va xavisa tihomu ni tinyimpfu etempeleni. U hangalase mali ya vacincisi va mali a tlhela a wisetela matafula ya vona. (Yoh. 2:13-17) Xiendlakalo xexo xi tsundzuxe vadyondzisiwa vakwe vuprofeta bya Hosi Davhida lebyi nge: “Ku hisekela yindlu ya wena swinene ku ndzi dyile.” (Ps. 69:9) Leswi Yesu a tekeke goza rero leri lavaka xivindzi, u kombise leswaku a a swi lava hi mbilu hinkwayo ku sirhelela vugandzeri bya ntiyiso. I yini leswi hi swi dyondza hi vumunhu bya Tata wakwe eka rungula leri? Hi dyondza leswaku Xikwembu xi ni matimba lamakulu yo herisa vubihi emisaveni naswona xi swi lava hi mbilu hinkwayo ku endla tano. Ndlela leyi Yesu a titweke ha yona hi swiendlo swo biha yi kombisa ndlela leyi Yehovha a titwaka ha yona loko a vona vubihi lebyi andzeke laha misaveni namuntlha. Hakunene mhaka leyi ya hi chavelela ngopfu-ngopfu loko hi khomiwa hi ndlela yo biha!
12, 13. I yini leswi u nga swi dyondzaka hi Yehovha eka ndlela leyi Yesu a va khomeke ha yona vadyondzisiwa vakwe?
12 A hi kambisiseni xikombiso xin’wana lexi kombisaka ndlela leyi Yesu a va khomeke ha yona vadyondzisiwa vakwe. A va tshamela ku kanetana hileswaku i mani lonkulu exikarhi ka vona. (Mar. 9:33-35; 10:43; Luka 9:46) Leswi Yesu a heteke nkarhi wo leha swinene a ri ni Tata wakwe, a a swi tiva leswaku Yehovha wa va venga vanhu lava titlakusaka. (2 Sam. 22:28; Ps. 138:6) Ku tlula kwalaho, Yesu u vone moya wo tano eka Sathana Diyavulosi. Xivumbiwa xexo a xi karhateka ntsena hi ku tilavela ndhuma ni xikhundlha. Hikwalaho, Yesu u fanele a twe ku vava swinene loko a vona vadyondzisiwa vakwe lava a va leteleke va hambeta va titlakusa! Hambi ku ri vaapostola vakwe a va ri na wona moya wolowo. Va hambete va kombisa moya wa ku titlakusa ku fikela esikwini ro hetelela ra vutomi bya Yesu bya laha misaveni. (Luka 22:24-27) Kambe Yesu u hambete a va tshinya hi musa hikuva a a ri ni ntshembo wa leswaku eku heteleleni a va ta tekelela mfanelo yakwe ya ku titsongahata.—Filp. 2:5-8.
13 Xana wa byi vona vumunhu bya Yehovha lebyi Yesu a byi tekeleleke hi ku lehisela vadyondzisiwa vakwe mbilu loko a lulamisa langutelo ra vona ro biha? Loko u kambisisa marito ni swiendlo swa Yesu, xana wa swi xiya leswaku Tata wakwe a nga va fularheli vanhu vakwe hambiloko va tshamela ku endla swihoxo? Leswi se hi ti tivaka kahle timfanelo ta Xikwembu, xana a ti hi susumeteli leswaku hi hundzuka kutani hi xi kombela leswaku xi hi rivalela swihoxo swa hina?
N’WANA A A RHANDZA KU HLAVUTELA TATA WAKWE
14. Yesu u swi kombise njhani leswaku a a lava ku hlavutela Tata wakwe eka van’wana?
14 Vafumi lava tshikilelaka va ringeta ku lawula vanhu hi ku va fihlela rungula. Ku hambana na vona, Yesu a a rhandza ku byela vanhu hi Tata wakwe. (Hlaya Matewu 11:27.) Ku engetela kwalaho, Yesu u nyike vadyondzisiwa vakwe “vuswikoti byo twisisa leswaku [va ta tiva] loyi a nga wa ntiyiso,” ku nga Yehovha Xikwembu. (1 Yoh. 5:20) Swi vula yini sweswo? Yesu u pfune vadyondzisiwa vakwe leswaku va twisisa tidyondzo takwe malunghana ni Tata wakwe. A nga n’wi tumbetanga Tata wakwe hi ku va dyondzisa tidyondzo leti nga twisisekiki to tanihi dyondzo ya Vunharhu-un’we.
15. Ha yini Yesu a nga va byelanga vadyondzisiwa vakwe rungula rin’wana malunghana ni Tata wakwe?
15 Xana Yesu u hlavutele swilo hinkwaswo leswi a a swi tiva malunghana ni Tata wakwe? Doo, hi vutlhari a nga va byelanga swilo hinkwaswo vadyondzisiwa vakwe. (Hlaya Yohane 16:12.) Ha yini? Hikuva hi nkarhi wolowo vadyondzisiwa vakwe a va nga ta ‘swi kota ku byarha’ vutivi byebyo. Hilaha Yesu a hlamuseleke hakona, vutivi byo tala a va ta hlavuteriwa byona loko ku fika “mupfuni,” ku nga moya lowo kwetsima, lowu a wu ta va kongomisa “entiyisweni hinkwawo.” (Yoh. 16:7, 13) Ku fana ni vatswari vo tlhariha lava nga ha fihlelaka vana va vona rungula ro karhi kukondza va kula leswaku va kota ku ri twisisa, Yesu u rindze kukondza vadyondzisiwa vakwe va wupfa leswaku va twisisa timhaka tin’wana malunghana ni Tata wakwe. Xisweswo, Yesu u xiye leswaku vadyondzisiwa vakwe a va nga ta swi kota ku twisisa timhaka tin’wana.
TEKELELA YESU HI KU PFUNA VAN’WANA LESWAKU VA TIVA YEHOVHA
16, 17. Ha yini u kota ku hlavutela Tatana eka van’wana?
16 Loko u n’wi tiva kahle munhu wo karhi naswona u tsakela vumunhu byakwe lebyinene, xana a wu susumeteleki ku byela van’wana ha yena? Loko Yesu a ha ri laha misaveni, u vulavule hi Tata wakwe. (Yoh. 17:25, 26) Xana hi nga swi kota ku n’wi tekelela hi ku hlavutela Yehovha eka van’wana?
17 Hilaha hi dyondzeke hakona, Yesu a a n’wi tiva swinene Tata wakwe ku tlula vanhu hinkwavo. Kambe a a swi rhandza ku byela van’wana hi vutivi lebyi a a ri na byona lerova u nyike vadyondzisiwa vakwe vuswikoti byo twisisa timhaka leti enteke hi vumunhu bya Xikwembu. Yesu u hi pfune leswaku hi tiva Tata wakwe ku tlula ndlela leyi vanhu vo tala namuntlha va n’wi tivaka ha yona. Ha tsaka swinene leswi Yesu a hlavuteleke Tata wakwe eka hina hi ku tirhisa tidyondzo ni mahanyelo yakwe. Entiyisweni, ha tibuma hileswi hi tivaka Tata wakwe. (Yer. 9:24; 1 Kor. 1:31) Tanihi leswi hi tikarhateleke ku tshinela eka Yehovha, na yena u tshinerile eka hina. (Yak. 4:8) Hikwalaho, sweswi se ha swi kota ku dyondzisa van’wana hi swilo leswi hi swi tivaka malunghana na Yehovha. Hi nga swi endlisa ku yini sweswo?
18, 19. Hi tihi tindlela leti ha tona hi nga hlavutelaka Tatana eka van’wana? Hlamusela.
18 Hi fanele hi tekelela Yesu hi ku hlavutela Tatana hi marito ni hi swiendlo swa hina. Tsundzuka leswaku vanhu vo tala lava hi hlanganaka na vona ensin’wini a va xi tivi Xikwembu. Va nga ha va va ri ni langutelo leri hoxeke hi Xikwembu hileswi va dyondzisiweke tidyondzo ta mavunwa. Hi ku tirhisa Bibele, hi nga va dyondzisa hi vito ra Xikwembu, xikongomelo xa xona hi vanhu ni hi vumunhu bya xona. Ku engetela kwalaho, hi nga ha bula ni vapfumeri-kulorhi hi timhaka tin’wana ta le Bibeleni leti hlamuselaka vumunhu bya Xikwembu hi ndlela leyi a hi nga yi tivi. Sweswo swi nga endla leswaku na vona va khutazeka.
19 Hi fanele hi tekelela Yesu kutani hi hlavutela Tata wakwe hi mahanyelo ya hina. Loko vanhu va vona swiendlo swa hina swa rirhandzu, va ta susumeteleka ku va ni vuxaka na Yehovha swin’we na Yesu. (Efe. 5:1, 2) Muapostola Pawulo u hi khutaze leswaku hi ‘va vatekeleri va yena, tanihi leswi yena a nga mutekeleri wa Kreste.’ (1 Kor. 11:1) Hakunene hi ni lunghelo lerikulu ro pfuna vanhu leswaku va tiva Yehovha hi mahanyelo ya hina! Onge hinkwerhu hi nga hambeta hi tekelela Yesu hi ku hlavutela Tata wakwe eka van’wana.
[Swivutiso Swa Dyondzo]
