Chakʼ ta ojtikinel Totil li Nichʼonile

«Jaʼ noʼox jech ec li Jtote muʼyuc bochʼo snaʼbe cʼu xʼelan yoʼnton. Vuʼun noʼox jnaʼ, xchiʼuc ta snaʼic ec li bochʼotic ta xcacʼbe snaʼique.» (LUC. 10:22)

¿KʼUSI TA JTAKʼTIK?

¿Kʼu yuʼun jaʼ noʼox stuk mas lek laj yakʼ ta ojtikinel Totil li Jesuse?

¿Kʼuxi laj yakʼ ta ojtikinel Stot li Jesuse?

¿Kʼutik yelan xuʼ xkakʼtik ta ojtikinel li Totil jech kʼuchaʼal la spas Jesuse?

1, 2. ¿Kʼusi sjakʼojbe sbaik epal krixchanoetik, xchiʼuk kʼu yuʼun vokol chaʼiik ta stakʼel?

¿BUCHʼU jaʼ li Diose? Li sjakʼobil liʼe toj tsots chaʼiik jlom krixchanoetik ta stakʼel. Jech kʼuchaʼal liʼe, li yajtsʼaklomtak Cristo ta alele chalik ti toj tsots ta aʼibel skʼoplal li chanubtasel ta sventa Trinidade. Oy jun pale ti la stsʼiba jlik livro ta sventa li Trinidade, chal ti mu la stakʼ albel smelolal ta skoj la ti mu xaʼibeik smelolal li krixchanoetike. Li buchʼutik xchʼunojik ti kʼunkʼun kʼataj tal li kuxlejaletike chalik ti muʼyuk Diose. Chalik xtok ti jech noʼox la tal stuk li kʼusitik kʼupilik sbae. Pe jaʼuk li Charles Darwine muʼyuk laj yal ti muʼyuk Diose. Jaʼ noʼox laj yal ti chʼabal la spʼijilik li krixchanoetik sventa chaʼibeik smelol ta sventa taje.

² Epal krixchanoetik ti kʼusuk noʼox xchʼunojike, ta onoʼox sjakʼbe sbaik mi oy ta melel li Diose. Pe kʼalal muʼyuk ta stabeik stakʼobil li kʼusitik tsjakʼbe sbaike, ta tsʼakale chikta sbaik ta saʼel li Diose. Yuʼun «jaʼ macbil yoʼntonic yuʼun» li Satanase (2 Cor. 4:4). Ta skoj taje, li krixchanoetike mu snaʼ kʼusi tspasik yuʼun mu xojtikinik ta melel li Totile, ti jaʼ li Buchʼu spasoj li vinajelbalumile (Isa. 45:18).

3. 1) ¿Buchʼu laj yakʼ kojtikintik li Totile? 2) ¿Kʼusitik ta jtakʼtik batel?

³ Ta melel, li krixchanoetike toj tsots skʼoplal skʼan snaʼik li kʼusitik melel ta sventa Diose. ¿Kʼu yuʼun? Yuʼun jaʼ noʼox li «bochʼotic tscʼanbeic vocol Cajvaltique [«ta sbi Jeova», NM] jaʼ ta xcolic» (Rom. 10:13). Li buchʼu tskʼan vokol ta sbi Jeovae, te tsakal skʼoplal ti skʼan xojtikinbe lek li stalelal Jeovae. Li Jesuse la xchanubtas yajtsʼaklomtak ta sventa taje xchiʼuk laj yakʼbe yojtikin li Totile (kʼelo Lucas 10:22). ¿Kʼu yuʼun jaʼ noʼox Jesús lek laj yakʼ ta ojtikinel li Totile? ¿Kʼutik yelan laj yakʼ ta ojtikinel?  ¿Kʼuxi xuʼ jchanbetik Jesús sventa chkakʼbetik yojtikin yantik li Totile? Li ta xchanobil liʼe ta jkʼelbetik batel li stakʼobiltake.

LI JESUSE JAʼ NOʼOX STUK CHAPAL SVENTA CHAKʼ TA OJTIKINEL LI TOTILE

4, 5. ¿Kʼu yuʼun jaʼ noʼox stuk xuʼ mas lek laj yakʼ ta ojtikinel Totil li Jesuse?

⁴ Li Jesuse jaʼ noʼox stuk laj yakʼ ta ojtikinel li Totile. ¿Kʼu yuʼun? Yuʼun kʼalal chʼabal toʼox kʼusitik kuxajtike, li Jesuse te xa onoʼox ta vinajel kʼuchaʼal jun espiritu. Yuʼun jaʼ «li jun noʼox Xnichʼon Diose» (Juan 1:14; 3:18). ¡Jaʼ jun mukʼta matanal staoj! Kʼalal chʼabal toʼox yan kuxlejaletike, li Jesuse te xa onoʼox oy xchiʼuk Stot, vaʼun ep kʼusitik la xchan ta stojolal xchiʼuk ta sventa li stalelaltake. Li Nichʼonil xchiʼuk li Totile ta smilal xa noʼox jabiletik lek loʼilajik, ta skoj taje solel chʼi yuʼunik li kʼanelal ta jujuntale (Juan 5:20; 14:31). Ta melel, li Nichʼonile toj ep van tajek kʼusitik la xchan ta sventa stalelal li Totile (kʼelo Colosenses 1:15-17).

⁵ Li Totile la stʼuj li Nichʼonil sventa xkʼot ta yajkʼopojel, ta skoj taje la sbiin: «Cʼop yuʼun Dios» (Apo. 19:13). Jech oxal, li Jesuse jaʼ noʼox stuk xuʼ yuʼun xakʼbe yojtikin yantik li Totile. Li Juane laj yal ti Jesuse, «li Cʼope», xkoʼolaj «ti jun oyic xchiʼuc Stote» (Juan 1:1, 18). Li kʼusi laj yal taje, jaʼ xkoʼolaj ti kʼuyelan nopem xaʼiik ti kʼalal jmoj chveʼik ta skʼakʼalil li Juane. Li jun jvulaʼale te nopol ta xchoti xchiʼuk yajval na sventa xloʼilajik lek. Jaʼ yuʼun li Nichʼonil eke «jun oyic» sventa lek xloʼilajik xchiʼuk li Stote.

6, 7. ¿Kʼuxi chʼi batel ti kʼuyelan lek xil sbaik li Totil xchiʼuk li Nichʼonile?

⁶ Li Totil xchiʼuk li Nichʼonile jech chʼi-o batel ti kʼuyelan lek xil sbaike. Jech oxal, xi laj yal li Nichʼonile: «Vuʼun xcuxetelun yoʼnton [Dios] scotol ora; scotol cʼacʼal» (kʼelo Proverbios 8:22, 23, 30, 31). Jaʼ yuʼun, ti kʼuyelan lek xil sbaike epaj batel ta skoj ti koʼol ch-abtejike. Jech xtok, la xchanbe stalelaltak Stot li Nichʼonile. Kʼalal la spas yan pʼijil kuxlejaletik li Jeovae, li Nichʼonile laj yakʼ venta kʼuyelan ta xil li kuxlejaletik taje, vaʼun mas epaj ti kʼuyelan skʼanoj li Stote.

⁷ Akʼo mi la stoy sba Satanás ta stojolal li Ajvalilal tspas Jeovae, li Nichʼonile la xchanbe Stot ti kʼuxi chakʼ ta ilel kʼanelal, tukʼilal, pʼijilal xchiʼuk juʼelal kʼalal jaʼo oy tsots vokolile. Taje, jaʼ te la xchan sventa xkuch yuʼun li vokoliletik kʼalal mi tal xchol mantal ta Balumile (Juan 5:19).

8. ¿Kʼuxi tskoltautik li loʼiletik ta Evanjelioetik sventa jchanbetik mas li stalelaltak Totile?

⁸ Ta skoj ti toj lek xil sbaik li Nichʼonil xchiʼuk li Jeovae, jaʼ noʼox stuk lek laj yakʼ ta ojtikinel li Stote, yuʼun muʼyuk buchʼu jech spas yuʼun. Ti kʼuxi xuʼ xkojtikintik lek li Totile jaʼ ti jchanbetik skʼoplal ti kʼusi la spas xchiʼuk ti kʼusitik chanubtasvan li jun noʼox Xnichʼone. Jech kʼuchaʼal liʼe, nopo noʼox avaʼi ti jaʼ noʼox xasabe smelolal ta diksionario li kʼusi skʼan xal li jpʼel kʼop kʼanelal xie, taje toj tsots ta aʼiel. Pe kʼalal ta jnopbetik skʼoplal li kʼusi chal Evanjelioetik ta sventa li cholmantal la spas Jesús xchiʼuk ti kʼuxi la skolta li yantike, jaʼ te xuʼ xkaʼibetik smelolal ti kʼalal chal ti jaʼ «stalel ta xcʼanvan o» li Diose (1 Juan 4:8, 16). Kʼalal ay ta Balumil li Jesuse laj yakʼbe ta ilel yantik stalelal Dios li yajtsʼaklomtake.

KʼUXI LAJ YAKʼ TA OJTIKINEL STOT LI JESUSE

9. 1) ¿Kʼuxi chaʼtos laj yakʼ ta ojtikinel Stot li Jesuse? 2) Alo junuk skʼelobil kʼuxi laj yakʼ ta ojtikinel Stot ti kʼuyelan chanubtasvan li Jesuse.

⁹ Li Jesuse, ¿kʼuxi laj yakʼ ta ojtikinel Stot ta stojolal li baʼyel yajtsʼaklomtake xchiʼuk li buchʼu chkʼotik ta yajtsʼaklomtak  ta mas jelavele? Chaʼtos ti kʼuxi la spase: ti kʼuyelan chanubtasvane xchiʼuk li kʼusitik la spase. Jaʼ kalbetik baʼyel skʼoplal ti kʼuyelan chanubtasvane. Li kʼusi laj yakʼbe xchan yajtsʼaklomtak li Jesuse, jaʼ chakʼ ta ilel kʼuyelan snopben li Stote, li kʼuyelan chaʼi sbae xchiʼuk ti kʼuyelan stalelale. Jech kʼuchaʼal liʼe, li Jesuse la skoʼoltas ta jun jchabichij li Stote, ti chbat saʼ jkot xchij ti chʼayeme. Li Jesuse laj yal ti kʼalal tsta li jkot xchije «toj echʼem xcuxet yoʼnton; jaʼ mu sta jech xcuxet yoʼnton yuʼun li balunlajuneb (99) yoʼvinic muʼyuc xchʼaye». ¿Kʼu yuʼun la stunes Jesús li lokʼolkʼop taje? Xi tstakʼe: «Jaʼ jech ec li Jtotic te oy ta vinajele, mu scʼan me chchʼay junuc li ololetic liʼi» (Mat. 18:12-14). ¿Kʼusi xuʼ xachan ta stojolal Jeova li ta lokʼolkʼop taje? Xuʼ van muʼyuk abalil chavaʼi aba o muʼyuk buchʼu skʼanojot chavaʼi aba. Pe vuleso me ta ajol ti oyot ta yoʼonton li Jtotik ta vinajele xchiʼuk ti chat yoʼonton ta atojolale. Yuʼun jech chilot kʼuchaʼal «li ololetic liʼi».

10. ¿Kʼuxi laj yakʼ ta ilel stalelal Stot li Jesuse?

¹⁰ Xchibal ti kʼuyelan laj yakʼ ta ojtikinel Stot ta stojolal li yajtsʼaklomtake, jaʼ li ta kʼusitik la spase. Li Felipee xi laj yalbe li Jesuse: «Acʼbun cotquincutic li Jtotic Diose», xi la stakʼ li Jesuse: «Li bochʼotic laj xa yilicune laj xa yilic o li Jtote» (Juan 14:8, 9). Jkʼeltik batel junantik ti kʼuyelan laj yakʼ ta ilel stalelaltak Stot li Jesuse. Jun veltae oy jun vinik ti «tsacbil ta cʼaʼel [chamele]», la skʼanbe Jesús ti akʼo xpoxtaate, vaʼun li Jesuse la spik li vinike xchiʼuk xi laj yalbee: «Ta jcʼan ta jcoltaot. Colan chaʼe». Kʼalal poxtaj xaʼox li vinike, laj yakʼ venta ti jaʼ akʼbat yip yuʼun Jeova li Jesuse (Luc. 5:12, 13). Jech xtok, kʼalal jaʼo cham li Lazaroe, li yajtsʼaklomtake laj yakʼik venta ti chkʼuxubinvan li Totile, yuʼun li Jesuse «ep laj yat yoʼnton ec; toj chopol laj yaʼay» xchiʼuk «lic ocʼuc». Akʼo mi snaʼoj xa onoʼox ti chchaʼkuxes Lázaro li Jesuse toj chopol laj yaʼi kʼalal laj yil ti chat yoʼonton li yutsʼ yalaltak xchiʼuk li yamigotake (Juan 11:32-35, 40-43). Ta melel, li voʼote xuʼ van oy junuk loʼil ta Vivlia ti toj kʼupil chavil ti te chalbe skʼoplal li xkʼuxul yoʼonton Stot li Jesuse.

11. 1) Kʼalal la xchʼuba chʼulna li Jesuse, ¿kʼusi laj yakʼ ta ilel ta stojolal li Stote? 2) ¿Kʼu yuʼun tspat koʼontontik taje?

¹¹ Kʼalal chachanbe skʼoplal ti kʼuyelan la xchʼuba chʼulna li Jesuse, ¿kʼusi xuʼ xachan? Nopo noʼox avaʼi li kʼusi kʼot ta pasele: «Li Jesuse lic stsʼot lec chʼojon, jaʼ la sloqʼues o scotol te ta chʼulna. La sloqʼues cʼalal ta chijetic, ta vacaxetic. La sbutqʼuinbe xmexaic noxtoc li jeltaqʼuinetique; te la stanibe comel li staqʼuinique» (Juan 2:13-17). Li kʼusi la spas Jesús taje, li yajtsʼaklomtake vul-o ta sjolik li albilkʼop laj yal ajvalil Davide: «Coʼol sʼelan tilemal cocʼ ta xʼabtej ta coʼnton ta sventa ti achʼulna ti tsots scʼoplal ta xcaʼie» (Sal. 69:9, Ch). Li kʼusi jpʼel  ta yoʼonton la spase, jaʼ te laj yakʼ ta ilel ti tskʼan tspakbe skʼoplal li melel yichʼel ta mukʼ Diose. ¿Mi xavilbe stalelal li Totil li ta loʼil taje? Li kʼusitik la spas Jesuse jaʼ chakʼ vuluk ta joltik ti Diose maʼuk noʼox xuʼ yuʼun tslajes li kʼusitik chopol ta Balumile, yuʼun oy ta yoʼonton tslajes xtok. Ti kʼuyelan laj yakʼ ta ilel stalelal Jesuse, jaʼ chakʼ ta ilel ti kʼuyelan chaʼi sba li Totil kʼalal chil ti mas xa tsok batel li balumil liʼe. ¡Taje jaʼ chakʼ spatobil koʼontontik kʼalal oy kʼusi muʼyuk tukʼ chkichʼtik pasbele!

12, 13. ¿Kʼusi xuʼ jchantik ta stojolal Jeova ti kʼuyelan la stukʼibtas yajtsʼaklomtak li Jesuse?

¹² Kalbetik yan skʼelobil xtok ti kʼuyelan laj yil yajtsʼaklomtak li Jesuse. Li yajtsʼaklomtake laj yut sbaik ta sventa buchʼu junukal ichʼbil ta mukʼ ta xkʼot yuʼunik (Mar. 9:33-35; 10:43; Luc. 9:46). Ta skoj ti epal jabiletik te la xchiʼin li Stote, li Jesuse snaʼoj kʼuyelan chaʼi sba ta sventa li talelal taje (2 Sam. 22:28; Sal. 138:6). Li Jesús xtoke, laj yil ti toj mukʼ chaʼi sba li Satanase xchiʼuk ti jaʼ noʼox tsaʼ li kʼusi tskʼan stuke. Jaʼ yuʼun, li Jesuse toj chopol van tajek laj yaʼi ti jech chakʼik ta ilel stalelalik li yajtsʼaklomtak ti jaʼ la xchanubtasane. Maʼuk noʼox taje, yuʼun jech laj yakʼ ta ilel stalelalik li yajtakboltak ti stʼujoj xaʼox lokʼele. Li stukike jech-o laj yakʼ ta ilel stalelalik kʼalal jutuk xaʼox skʼan xcham li Jesuse (Luc. 22:24-27). Akʼo mi jech, li Jesuse ta slekil yoʼonton laj yalilanbe-o mantal. Yuʼun spatoj yoʼonton ti bikʼit chakʼ sbaik jech kʼuchaʼal stuke (Fili. 2:5-8).

¹³ Li Jesuse la xchanbe slekil talelal li Jeovae, jaʼ yuʼun ta slekil yoʼonton la stukʼibtasbe xchopol talelal li yajtsʼaklomtake. ¿Mi xuʼ xachanbe stalelal Totil ta sventa ti kʼusi la spas xchiʼuk ti kʼusi laj yal li Jesuse? Li Stote muʼyuk chikta li steklumale, akʼo mi ep kʼusitik chopol ta spasik. Kʼalal chkojtikinbetik stalelaltak li Jeovae tskoltautik sventa jsutes koʼontontik xchiʼuk ti jkʼopontik sventa xchʼaybutik li jmultike.

LI NICHʼONILE TSKʼAN CHAKʼ TA OJTIKINEL LI STOTE

14. ¿Kʼuxi laj yakʼ ta ilel Jesús ti tskʼan chakʼ ta ojtikinel li Stote?

¹⁴ Sventa oyuk ta skʼobik krixchanoetik li ajvaliletike muʼyuk chalbeik ta jamal li kʼusitik melele. Pe jaʼuk li Jesuse mu jechuk la spas, yuʼun li stuke oy ta yoʼonton skoltael krixchanoetik sventa xchanbeik stalelal li Stote, jaʼ yuʼun jamal laj yal kʼuyelan li Stote (kʼelo Mateo 11:27). Jech xtok, xi laj yal jun yajtsʼaklom Cristoe: «Li Xnichʼon Diose laj yacʼbutic jbijiltic sventa acʼo cotquintic li batsʼi Dios ta melele» (1 Juan 5:20). ¿Kʼusi skʼan xal taje? Li Jesuse la skolta li yajtsʼaklomtak sventa xaʼibeik smelolal li chanubtasel ta sventa Totile. Li Jesuse lek laj yakʼ ta ojtikinel li Stote, yuʼun muʼyuk chanubtasvan ta sventa Trinidad ti toj tsots ta aʼibel smelolale.

15. ¿Kʼu yuʼun muʼyuk laj yalbe yajtsʼaklomtak skotol li kʼusitik ta sventa Stot li Jesuse?

¹⁵ ¿Mi laj yakʼ ta ojtikinel skotol kʼusitik snaʼoj ta stojolal Stot li Jesuse? Muʼyuk. Kʼalal jech la spase laj yakʼ ta ilel spʼijil (kʼelo Juan 16:12). ¿Kʼu yuʼun? Yuʼun li yajtsʼaklomtak li vaʼ kʼakʼal taje mu toʼox xuʼ yuʼunik «yaʼyel scotol» ta sventa li Diose. Jech kʼuchaʼal laj yal li Jesuse, mas to ta xaʼibeik smelolal mi tal li jkoltavaneje, jaʼ xkaltik li chʼul espiritue, ti jaʼ ch-akʼbat snaʼik «scotol li cʼusi melele» (Juan 16:7, Ch; 16:13). Jech kʼuchaʼal jun pʼijil totil ti muʼyuk chalbe skotol kʼusitik li xnichʼnabtak kʼalal bikʼitiktoe, li Jesús eke jaʼ to laj yalbe yajtsʼaklomtak ti kʼalal xaʼibeik xaʼox smelolal ta sventa li Stote. Li Jesuse la stsak ta venta li kʼusitik mu xaʼibeik smelolale.

 CHANBO STALELAL JESÚS SVENTA XOJTIKINIK JEOVA LI YANTIKE

16, 17. ¿Kʼu yuʼun xuʼ xkakʼtik ta ojtikinel ta stojolal yantik ta sventa li Totile?

¹⁶ Kʼalal oy buchʼu chavojtikin ti lek stalelale, ¿mi mu tstijuk avoʼonton sventa xavalbe yantik? Kʼalal liʼ toʼox oy ta Balumil li Jesuse laj yalbe skʼoplal li Stote (Juan 17:25, 26). ¿Mi xuʼ van xkakʼtik ta ojtikinel Jeova jech kʼuchaʼal la spas li Jesuse?

¹⁷ Jech kʼuchaʼal laj xa kiltike, li Jesuse jaʼ noʼox stuk ti mas snaʼ ta sventa li Stote. Akʼo mi jech, oy ta yoʼonton laj yalbe yantik li kʼusitik snaʼoj ta stojolal li Stote, yuʼun la skolta yajtsʼaklomtak sventa xaʼibeik smelolal ta sventa li stalelaltake. Koliyal li koltael chakʼbutik Jesuse, mas me ta jkʼantik li Jtotike, ti mu jechuk tspasik li yan krixchanoetike. ¡Toj echʼ noʼox ta jtojbetik ta vokol ti laj yakʼ kojtikintik Stot ta sventa li chanubtasel laj yakʼe xchiʼuk li ta kʼusitik la spase! Ta melel, jaʼ jun mukʼta matanal chkaʼitik ti chkojtikintik li Totile (Jer. 9:24; 1 Cor. 1:31). Mi mas chijnopaj ta stojolal li Jeovae, jech chnopaj ta jtojolaltik ek (Sant. 4:8). Jaʼ yuʼun, li avie xuʼ xa xkalbetik yan krixchanoetik li kʼusi jnaʼojtik ta sventa li Totile. ¿Kʼuxi xuʼ jpastik taje?

18, 19. ¿Kʼutik yelan xuʼ xkakʼtik ta ojtikinel li Totile? Albo smelolal.

¹⁸ Skʼan me jchanbetik stalelal li Jesuse, kʼalal chkakʼtik ta ojtikinel li Totile skʼan me xkakʼtik ta ilel ta jkʼopojeltik xchiʼuk li ta kʼusitik ta jpastike. Teuk me ta joltik ti mu snaʼik buchʼu jaʼ Dios li buchʼu ta jcholbetik mantale. Ta skoj ti muʼyuk lek yichʼojik chanubtasele, xuʼ van mu xojtikinik lek li Diose. Li voʼotike xuʼ xkalbetik krixchanoetik li kʼusi chal Vivlia ta sventa li sbie, li kʼusi tskʼan ta sventa li krixchanoetike xchiʼuk li stalelaltake. Jech xtok, xuʼ xkalbetik kermanotaktik loʼiletik ta Vivlia ti chalbe stalelaltak Dios ti mu toʼox jnaʼtike. Mi jech ta jpastike ta stabeik sbalil ek.

¹⁹ Skʼan jchanbetik Jesús xchiʼuk skʼan xkakʼtik ta ojtikinel ta jtalelaltik li Totile. Kʼalal chakʼik venta ta jtalelaltik ti kʼuyelan chijkʼanvan jech kʼuchaʼal li Cristoe, xuʼ van xtijbat-o yoʼontonik sventa xnopajik ta stojolal li Totile xchiʼuk ta stojolal li Jesuse (Efe. 5:1, 2). Li jtakbol Pabloe xi tstijbutik koʼontontike: «Jaʼ chanic cʼusi ta jpas jech chac cʼu chaʼal jaʼ ta jchan cʼusi la spas li Cristoe» (1 Cor. 11:1). ¡Jaʼ jun mukʼta matanal jtaojtik ti xuʼ jkoltatik sventa xojtikinik Jeova li krixchanoetike! Akʼo mi ta jtaleltik noʼox. Jech oxal, jchanbetik-o li Jesuse, yuʼun laj yakʼ ta ojtikinel ta stojolal yantik li Stote.

[Sjakʼobiltak sventa xchanobil]