‘Ba Adag e En ni Fak ni Ngar Nanged e Chitamangin’
‘Ba Adag e En ni Fak ni Ngar Nanged e Chitamangin’
“Dariy be’ ni manang ko mini’ e en ni Chitamangiy, ya ke mus ni en ni Fak e manang, nge piin ni ba adag e en ni Fak nem ni ngar nanged e Chitamangin.”—LUKE 10:22.
UW ROGON NI GA RA FULWEG?
Mang fan nri bay rogon Jesus ni nge ayuweg e girdi’ ngar nanged murung’agen e Chitamangin?
Uw rogon ni ke ayuweg Jesus e girdi’ ngar nanged murung’agen e Chitamangin?
Mang boch e kanawo’ nrayog ni ngad folwokgad rok Jesus u rogon ni i ayuweg e girdi’ ngar nanged murung’agen e Chitamangin?
1, 2. Mang deer e ba mo’maw’ ni nge nang boor e girdi’ e fulweg riy, ma mang fan?
‘MINI’ Got?’ Boor e girdi’ ni ke balyangan’rad ko re deer ney. Ba ga’ ni girdi’ ni yad ma yog ni yad a Kristiano e ke mich u wan’rad ni Got e Trinitas, machane yad ma yog nib mo’maw’ rorad ni ngar nanged fan e re machib ney. Be’ ni ma yoloy e babyor ma ku ir reb e tayugang’ ko teliw e ke yoloy ni fare machib ni Trinitas e dabiyog ni ngan weliy fan ya bay boch ban’en riy ni dabiyog ni nge nang e girdi’ fan. Maku boch e girdi’ e ke mich u wan’rad ni girdi’ e ke sum ko gamanman. Yad ma yog ni dariy e Got, ma urngin ban’en ni bay e yigi par rok me sum. De yog Charles Darwin ni dariy e Got, machane ki yog ni dabiyog rok e girdi’ ni ngar nanged fan murung’agen Got nib fel’ rogon.
2 Yooren e girdi’, ni yugu demtrug ko mang e teliw rorad e bay e deer rorad u murung’agen Got. Machane faanra dabiyog ni ngar pirieged e fulweg ko deer rorad, ma boor i yad e ke tal i gay. Riyul’ ni Satan e ke “ta’ lanin’rad u fithik’ e lumor.” (2 Kor. 4:4) Ere aram fan ni yooren e girdi’ e darur nanged e tin riyul’ u murung’agen e Chitamangidad ni ir e ke sunmiy e palpalth’ib.—Isa. 45:18.
3. (a) Mini’ e ayuwegdad ni ngad nanged murung’agen e En ni Ke Sunmiydad? (b) Mang boch e deer e ngad weliyed murung’agen?
3 Machane rib ga’ fan ni nge fil e girdi’ e tin riyul’ u murung’agen Got. Mang fan? Ya kemus ni piin ni yad ra pining “fithingan Somol” e yad ra fos. (Rom. 10:13) Faanra ngan pining fithingan Got mab muun ngay ni ngad nanged ko ir mini’. Ke fil Jesus Kristus ngak pi gachalpen murung’agen e Chitamangin. (Mu beeg e Luke 10:22.) Mang fan ni kemus ni Jesus e rayog ni nge tamilangnag rarogon e Chitamangin nrib fel’ rogon? Uw rogon ni rin’ Jesus e re n’ey? Ma uw rogon ni rayog ni ngad folwokgad rok, u rogon ni ayuweg e girdi’ ni ngar nanged murung’agen e Chitamangin? Gad ra weliy e fulweg ko pi deer ney.
BAY ROGON JESUS KRISTUS NI NGE AYUWEG E GIRDI’ NGAR NANGED E CHITAMANGIN
4, 5. Mang fan nri bay rogon Jesus ni nge ayuweg e girdi’ ngar nanged murung’agen e Chitamangin?
4 Jesus e ri bay rogon ni nge ayuweg e girdi’ ni ngar nanged murung’agen e Chitamangin. Mang fan? U m’on ni kan sunmiy urngin ban’en nib fos, ma immoy Jesus u tharmiy ni “Fak Got ni kari maagirag rok.” (John 1:14; 3:18) Rib fel’ mab thil e liw ni bay rok. Kemus ni Jesus e bay rok e Chitamangin u m’on ni kan sunmiy urngin ban’en ma kemus ni yigoo ir e immoy ni be ayuweg. Bochan ni ke pag bokum biyu’ e duw ni i chag Jesus ngak e Chitamangin, ma aram e kari nang pi fel’ngin Got. (John 5:20; 14:31) Ma bochan ni ke fel’ e tha’ u thilrow, ma kari t’uf bagayow rok bagayow. Mu susunnag fini yoor e n’en ni ke fil Jesus u murung’agen pi fel’ngin e Chitamangin.—Mu beeg e Kolose 1:15-17.
5 Ke mel’eg Jehovah Jesus ni nge mang “Fare Thin rok Got” ara mit e thin. (Rev. 19:13) Ere kemus ni Jesus e kan pi’ e maruwel ngak ni nge ayuweg e girdi’ ni ngar nanged murung’agen Jehovah. Aram fan ni yoloy John, ni Jesus ni ir “fare Thin” e bay u “tooben e en ni Chitamangiy.” (John 1:1, 18) Nap’an ni yog John e pi thin ney, ma sana be lemnag reb e yalen ni yima rin’ e ngiyal’ nem ni ran pining l’agruw ni’ ko abich ma ngar parew u taabang ya nge yog ni ngar sabethingow. Ere nap’an ni yog ni en ni Fak e “ba’ u tooben e en ni Chitamangiy” ma re n’ey e be yip’ fan nrayog ni nge non ngak e Chitamangin nib fel’ rogon.
6, 7. Uw rogon ni ke gel i yan e tha’ u thilin Jehovah nge Jesus?
6 Be yog e Bible ni ‘gubin e rran ni be felfelan’ [Got] ngak’ Jesus. (Mu beeg e Proverbs 8:22, 23, 30, 31.) Be gel i yan e tha’ u thilin Jehovah nge Fak ma bochan ni yow ma maruwel u taabang ma aram me yog rok Jesus ni nge dag fel’ngin e Chitamangin. Ke guy Jesus rogon ni ma ayuweg Jehovah e pi n’en ni ke sunmiy ere ke gel e t’ufeg nge tayfan rok ngak e Chitamangin.
7 Mus nga nap’an ni togopuluw Satan ko gagiyeg rok Jehovah ma ke fil Jesus rogon ni i dag Jehovah e t’ufeg nge feni mat’aw e ngongol rok, ma ba gonop, mab gel gelngin. Re n’ey e ke ayuweg Jesus nge nang rogon ni nge pithig e magawon ni i mada’nag u nap’an e machib.—John 5:19.
8. Uw rogon ni nge ayuwegdad e thin nu Bible u murung’agen Jesus ni ngad nanged pi fel’ngin e Chitamangin?
8 Bochan nib fel’ e tha’ u thilrow Jehovah, ma aram me yog rok Jesus ni nge ayuweg e girdi’ ngar nanged murung’agen e Chitamangin nib fel’ rogon. Bin th’abi fel’ kanawo’ ni ngad nanged murung’agen e Chitamangin riy e ngad filed e n’en ni rin’ Jesus nge n’en ni ke fil ngak e girdi’. Ni bod ni rayog ni nge tamilang fan fare bugithin ni t’ufeg ni faanra kemus ni kad beeged e re thin ney u reb e babyor ni ka nog e dictionary ngay? Dabiyog. Machane faanra ngad fal’eged i lemnag e thin nu Bible ni i weliy murung’agen e machib ni i tay Jesus ma gad ra guy rogon ni ke ayuweg boch e girdi’. Ma re n’ey e rayog ni nge ayuwegdad ni ngad nanged fan e n’en ni be yog e Bible ni “Got e t’ufeg.” (1 John 4:8, 16) Gathi kemus ni t’ufeg e dag Jesus ngak e pi gachalpen, ya ki dag e tin ni ka bay pi fel’ngin Got ngorad.
ROGON NI KE AYUWEG JESUS E GIRDI’ NGAR NANGED MURUNG’AGEN E CHITAMANGIN
9. (a) Mang l’agruw e kanawo’ ni ke ayuweg Jesus pi gachalpen ni ngar nanged e Chitamangin riy? (b) Mu weliy reb e kanawo’ uw rogon ni ke ayuweg Jesus e girdi’ ni ngar nanged murung’agen e Chitamangin, u daken e machib ni i tay.
9 Uw rogon ni ke ayuweg Jesus pi gachalpen ni ngar nanged e Chitamangin e ngiyal’ nem nge piin ni yad ra mang pi gachalpen boch nga m’on? Ke fanay Jesus l’agruw e kanawo’ ni aram u daken e machib ni i tay nge ngongol rok. Ngad weliyed ko som’on murung’agen e machib ni i tay. N’en ni ke fil ngak pi gachalpen e be m’ug riy nri manang rarogon e lem rok e Chitamangin nge kanawoen ni i rin’ boch ban’en. Bod ni ke taarebnag Jesus e Chitamangin ngak be’ ni bay ba ran’ i saf rok ni ke yan i gay reb ni ke malog. Me yog Jesus ni “ba gel e felfelan’ nra tay ni bochan e taab binem, ko felfelan’ ni be tay ni bochan fa mereb i ragag nge mereb nde yan nga bang.” Mang e be yip’ fan e re fanathin nem? Me ulul Jesus ngay ni gaar: “Ku er rogon e Chitamangimed nu tharmiy nde adag bagayad e nochi bitir ney ni nge malog.” (Matt. 18:12-14) Mang e rayog ni ngam fil u murung’agen Jehovah ko re fanathin ney? Yugu aram rogon ni yu ngiyal’ e ga ma lemnag ni dariy fam ara kan pagtalinem machane Chitamam nu tharmiy e be lemnag rarogom. Be sap ngom ni bod “bagayad e nochi bitir ney.”
10. Uw rogon ni ayuweg Jesus e girdi’ ngar nanged murun’agen e Chitamangin u daken e ngongol rok?
10 Bin l’agruw e kanawo’ ni ke ayuweg Jesus e girdi’ ngar nanged murung’agen e Chitamangin riy e u daken e ngongol rok. Ere nap’an ni ke yog Filip ngak Jesus ni gaar: “Somol, mu dag ngomad e en ni Chitamangiy,” me fulweg Jesus ngak ni gaar: “Cha’ ni ke guyeg e ke guy e en ni Chitamangiy.” (John 14:8, 9) Mu lemnag boch e kanawo’ u rogon ni dag Jesus pi fel’ngin e Chitamangin. Nap’an ni ke wenig be’ nib daraw ngak Jesus ni nge golnag, me math Jesus ngak fa’en ni “kaygi foch e daraw u dow” me yog ni gaar: “Mm’agan’ug ngay, ere nge chuw e daraw rom.” Nap’an ni ke gol e cha’nem, ma dariy e maruwar riy ni ke guy rogon ni ke ayuweg Jehovah u daken Jesus. (Luke 5:12, 13) Maku arrogon u nap’an ni ke yim’ Lazarus, ma ki guy pi gachalpen e runguy rok e Chitamangin u nap’an ni ke “taganan’” Jesus, “me yor.” Yugu aram rogon ni ke nang Jesus nra faseg Lazarus ko yam’ me runguy chon e tabinaw rok Lazarus ya ke guy gelngin e kireban’ rorad. (John 11:32-35, 40-43) Dariy e maruwar riy ni bay e chep nu Bible nri ga baadag ma ra ayuwegem ngam guy e runguy rok Jehovah u daken e n’en ni rin’ Jesus.
11. (a) Nap’an ni toluf Jesus e piin ni yad be fol chuway’ u tempel, ma mang e be fil Jesus ngak e girdi’ u murung’agen e Chitamangin? (b) Mang fan ni ma fal’eg e re n’ey lanin’dad?
11 Machane mang e ga ra fil u nap’an ni ke chuweg Jesus e piin ni ma fol chuway’ u tempel? Mu susunnag e n’en ni buch: Ke fal’eg Jesus fen e dimow u yu yil’ i gaf, me tuluf e girdi’ ni yad ma pi’ nchuway’ e saf nge garbaw u tempel. Ke yan ngak e girdi’ ni yad ma thilyeg e salpiy me thikiy e tebel rorad me wer e salpiy rorad ni wasey nga but’. (John 2:13-17) Re n’em ni ke rin’ Jesus e ke ayuweg pi gachalpen ni nge yib ngan’rad fare yiiy rok David ni Pilung: “Rogon feni pasigan’ug ni nggu tiyan’ug ko tempel rom e be gak’ u lan ngorongoreg.” (Ps. 69:9) N’en ni ke rin’ Jesus ngak e pi girdi’ nem e be m’ug riy ni riyul’ ni baadag ni nge ayuweg e bin riyul’ e liyor. Gur, ga be guy fel’ngin Jehovah u nap’an ni ga ra beeg e re chep ney? Re n’ey e be puguran ngodad ni gathi kemus ni bay gelngin Got ni nge chuweg e tin nib kireb u fayleng ya riyul’ ni baadag ni nge chuweg. Mu susunnag ko uw rogon u wan’ Jehovah u nap’an ni be guy e ngongol nib kireb ni yibe rin’ u ga’ngin yang u fayleng. Gad ra nang ko uw rogon u wan’ Jehovah nge Jesus e re n’ey, ma ra fal’eg lanin’dad u nap’an ni yibe rin’ e tin nde mat’aw ngodad.
12, 13. Mang e rayog ni ngad filed u murung’agen Jehovah u rogon ni ayuweg Jesus pi gachalpen?
12 Chiney e gad ra weliy rogon ni ke ayuweg Jesus pi gachalpen. Ur tugthingad ko mini’ arorad e thabi’ tolang. (Mark 9:33-35; 10:43; Luke 9:46) Bochan ni immoy Jesus rok e Chitamangin nib n’uw nap’an ere manang ko uw rogon u wan’ Jehovah e lem nib tolang. (2 Sam. 22:28; Ps. 138:6) Maku ke guy Jesus rogon ni ke dag Satan e re ngongol ney. Rib ga’ fan u wan’ Satan e liw nib tolang. Aram fan ni rib gel e kireban’ ni tay Jesus u nap’an ni guy ni ka be m’ug e re ngongol ney u fithik’ pi gachalpen nib muun ngay e piin ni ke mel’eg ni ngar manged e pi apostal rok. Kar daged e re ngongol ney nge yan i mada’ ko bin tomur e rran ko yafas rok Jesus. (Luke 22:24-27) Machane de tal Jesus i fonownagrad u fithik’ e gol, ma ka be athapeg ni ngar sobut’niged lanin’rad ni bod ir.—Fil. 2:5-8.
13 Gur, rayog ni ngam guy fel’ngin Jehovah u nap’an ni ke yal’uweg pi gachalpen u fithik’ e gum’an’? Kam fil ban’en u murung’agen Jehovah ko ngongol nge pi n’en ni yog Jesus. Dabi pag Jehovah e girdi’ rok ni yugu aram rogon ni yad ma oloboch. Gad ra nang ni pi fel’ngin Got e ra pi’ e athamgil nga lanin’dad ni ngad kalgadngan’dad ma ngad weniggad ngak Jehovah ni nge n’ag fan e kireb rodad.
BA M’AGAN’ JESUS NGAY NI AYUWEG E GIRDI’ NGAR NANGED MURUNG’AGEN E CHITAMANGIN
14. Uw rogon ni dag Jesus ni baadag ni nge ayuweg e girdi’ ni ngar nanged murung’agen e Chitamangin?
14 Boor e tayugang’ ko am ni yad ma mithag boch ban’en ya yad be guy rogon ni nge par e girdi’ u tan pa’rad. Machane Jesus e ba m’agan’ ngay ni nge weliy murung’agen e Chitamangin ni nge tamilang u wan’ e girdi’. (Mu beeg e Matthew 11:27.) Maku ke ayuweg Jesus pi gachalpen ni ngar “nanged fa bin riyul’ e Got.” (1 John 5:20) Mang e be yip’ fan e re n’ey? Ke ayuwegrad Jesus ni nge tamilang u wan’rad e n’en ni ke fil ngorad u murung’agen e Chitamangin. De mithag murung’agen e Chitamangin u daken fare machib nib mo’maw’ ni ngan nang fan ni aram fare Trinitas.
15. Mang fan nde fil Jesus urngin ban’en u murung’agen e Chitamangin ngak pi gachalpen?
15 Gur, ke fil Jesus ngorad urngin ban’en ni ke nang u murung’agen e Chitamangin? Danga’, ya i gonopiy e pi n’en nib t’uf ni nge fil ngorad. (Mu beeg e John 16:12.) Mang fan? Ya ‘yugu ra yoor ngorad e ngiyal’ nem.’ Machane rogon ni yog Jesus e boor e tamilangan’ ni ran fil ngorad u nap’an nra yib gelngin Got nib thothup ni nge pow’iyrad ngar nanged “urngin e tin riyul’.” (John 16:7, 13) Taareb rogon ko piin gallabthir ni yad ba gonop ni darur rogned gubin ban’en ngak e bitir rorad nge mada’ ko ngiyal’ ni ke yog ni ngar nanged fan boch ban’en. Ku arrogon Jesus nde yog urngin ban’en ngak pi gachalpen ya ke sonnagrad ni ngar ilalgad ko tirok Got ban’en. I lemnag Jesus e tin rayog rorad.
MU FOLWOK ROK JESUS U ROGON NI AYUWEG E GIRDI’ NI NGAR NANGED JEHOVAH
16, 17. Mang fan ni bay rogom ni ngam ayuweg e girdi’ ni ngar nanged murung’agen Jehovah?
16 Faanra bay be’ ni ga manang nib fel’ rogon ma ri ga baadag daken, gathi ra k’aringem e re n’ey ni ngam weliy ngak e girdi’ murung’agen? Nap’an ni immoy Jesus u fayleng me weliy ngak e girdi’ murung’agen e Chitamangin. (John 17:25, 26) Gur, rayog rodad ni ngad folwokgad rok Jesus?
17 Rogon ni kad weliyed e ku boor e tamilangan’ rok Jesus u murung’agen e Chitamangin ngak boch e girdi’. Machane baadag ni nge fil e n’en ni manang me ayuweg pi gachalpen ya nge yog ni ngar nanged boch ban’en nib toar fan u murung’agen pi fel’ngin e Chitamangin. Ki ayuwegdad Jesus ni ngad nanged murung’agen e Chitamangin ni yooren e girdi’ e dawori tamilangan’rad riy. Ere gad ba felfelan’ ni ke ayuwegdad Jesus ngad nanged murung’agen e Chitamangin u daken e machib ni i tay nge ngongol rok. Bin riyul’ riy e rayog ni ngad ufgad ni bochan e gad manang e en Chitamangiy. (Jer. 9:24; 1 Kor. 1:31) Kad maruwelgad nib elmerin ni nge fel’ e tha’ u thildad Jehovah ma kad chugurgad ngak. (Jas. 4:8) Ere aram fan ni rayog rodad e chiney ni ngad filed ngak boch e girdi’ murung’agen. Uw rogon ni ngad rin’ed e re n’ey?
18, 19. Mang boch e kanawo’ nrayog ni ngad ayuweged boch e girdi’ ni ngar nanged murung’agen Jehovah Got ni Chitamangidad?
18 Nap’an ni ngad folwokgad rok Jesus u daken e thin ni gad ma yog nge n’en ni gad ma rin’ ma aram e gad be ayuweg e girdi’ ngar nanged murung’agen Jehovah. Dab da paged talin ni boor e girdi’ ni gad ma mada’nag u nap’an e machib ni dar nanged Jehovah. Sana de puluw rogon ni yad be lemnag murung’agen Got ni bochan e machib ni googsur ni kan fil ngorad. Rayog ni ngad filed ngorad e thin nu Bible ni be weliy murung’agen fithingan Got, nge tin nib m’agan’ ngay ni fan ko girdi’ nge rarogon. Maku boch e thin nu Bible e be ayuwegdad ni ngad nanged pi fel’ngin Got ni kafin i tamilang u wan’dad. Rayog ni ngad weliyed e pi n’ey ngak e pi walag u lan e ulung ya nge pi’ e athamgil ngorad.
19 Ngad ayuweged e girdi’ ngar nanged murung’agen Jehovah u daken e ngongol rodad ni bod e n’en ni rin’ Jesus. Nap’an nra guy e girdi’ e t’ufeg rok Kristus u daken e ngongol rodad ma ra k’aringrad ni ngar athamgilgad ni nge fel’ e tha’ u thilrad Jesus nge Chitamangin. (Efe. 5:1, 2) Ke yog apostal Paul ngodad ni gaar: “Um folwokgad rog, ni bod rogon ni gu be folwok rok Kristus.” (1 Kor. 11:1) Ri gad ba felfelan’ ni rayog ni ngad ayuweged e girdi’ ngar nanged murung’agen Jehovah u daken e ngongol rodad. Ere gad be athapeg nrayog ni ngad folwokgad rok Jesus ngad ayuweged e girdi’ ngar nanged murung’agen e en Chitamangiy.
[Study Questions]
