Racalaʼdxiʼ xiiñiʼ Dios gunibiaʼnu Bixhoze
Racalaʼdxiʼ xiiñiʼ Dios gunibiaʼnu Bixhoze
«Iruti runibiáʼ laabe, jma que naa ne cani racaladxe gunibiáʼ laabe.» (LUC. 10:22)
XI NICÁBILUʼ
Xiñee Jesús si nga zanda gacané binni gunibiáʼ Bixhoze.
Ximodo bisihuinni Jesús tuu nga Bixhoze.
Ximodo zanda gúninu cásica biʼniʼ Jesús ora guluinu binni tuu nga Bixhózebe.
1, 2. Xi guendarinabadiidxaʼ raca nagana para stale binni guicabi, ne xiñee.
TUU nga Dios. Raca nagana para stale binni guicabi ni. Stale de ca binni ni na zinanda Cristu runi crecaʼ naca Dios ti Trinidad, peru laaca nuu stale de laacaʼ riniʼcaʼ nagana para guiene binni ni. Xaíque stiʼ ti yuʼduʼ bizeeteʼ lu tobi de ca libru stiʼ nagana para gusiidiʼ binni de Trinidad, purtiʼ nuu caadxi cosa ni qué zanda guiene binni. Xcaadxi runi cré málasi bihuinni guiráʼ ni nuu, laacaʼ qué runi crecaʼ pa nuu ti Dios ne riniʼcaʼ zacasi bihuinni guiráʼ cosa sicarú nuu lu Guidxilayú. Peru dede Charles Darwin qué niníʼ gastiʼ Dios, sínuque guníʼ qué rugaanda xquendabiaaniʼ binni para guiene guiráʼ xixé cosa ni zeeda de Dios.
2 Intiica cosa guni cré binni, stale de laacabe riuu ora rinabadiidxacabe pa dxandíʼ nuu Dios. Peru cumu qué ricabi binni laacabe ni racaláʼdxicabe gánnacabe de Dios la? rusaana de guyúbicabe laabe. Racá ridúʼyanu dxandipeʼ «rusicahui binidxaba xquenda biaani» ca binni qué runi cré Dios (2 Cor. 4:4). Cadi guendaridxagayaa diʼ nga gánnanu stale binni qué gánnacaʼ gastiʼ de Dios ne qué runibiáʼ chaahuicaʼ Bixhózenu, Dios ni bizáʼ guibáʼ ne Guidxilayú (Isa. 45:18).
3. 1) Tuu nga cayacané laanu para gunibiaʼnu Dios bizáʼ laanu. 2) Gunáʼ nga ca guendarinabadiidxaʼ zacábinu lu tema riʼ.
3 Peru nabé risaca nga guiziidiʼ binni de Dios ne gunibiáʼ chaahuiʼ laabe. Xiñee yaʼ. Purtiʼ zalá ca binni si ni «iquiiñeʼ lá Jiobá» (Rom. 10:13, NM). Para ganda iquiiñenu lá Dios naquiiñeʼ gunibiáʼ chaahuinu tuu nga Jiobá, ne gunibiaʼnu laabe casi modo bisiidiʼ Jesucristu ca discípulo stiʼ, purtiʼ zaqué nga casi ora nuluiʼbe laacaʼ ximodo nga Bixhózebe (biindaʼ Lucas 10:22). Xiñee Jesús si nga jma zanda gacané binni gunibiáʼ Dios. Ximodo bíʼnibe ni. Ximodo zanda chinándanu ejemplu stibe ora gacanenu binni gunibiáʼ Bixhózebe. Zacábinu ca guendarinabadiidxaʼ ca lu tema riʼ.
JESUCRISTU SI NGA ZANDA GACANÉ BINNI GUNIBIÁʼ DIOS
4, 5. Xiñee Jesús si nga jma zanda gacané binni gunibiáʼ Bixhoze.
4 Jesús si nga zanda gacané binni gunibiáʼ Bixhózebe, guirútiruʼ qué zanda gúnini casi laabe. Xiñee rininu zacá yaʼ. Purtiʼ laabe nga primé binni bizáʼ Dios; ante guibánibe casi binni lu Guidxilayú maca bibánibe guibáʼ casi «tobi lucha Xiiñi [Dios]» (Juan 1:14; 3:18). ¡Nabé risaca puestu gupa Jesús! Ante guzáʼ Bixhózebe sti binni, laabe maca nuube gaxha de laa ne biʼniʼ sentirbe modo gunnaxhii Bixhózebe laabe, zacá binibiaʼbe ximodo laa ne ximodo runi dxiiñaʼ. Cumu guyuu Jesús né Bixhoze juntu stale millón de millón de iza la? gunda guníʼnebe laa ne guniʼné laabe ne nabé gunnaxhiisaacabe (Juan 5:20; 14:31). ¡Racá ridúʼyanu pabiáʼ binibiáʼ chaahuiʼ Jesús ximódopeʼ nga Bixhoze! (Biindaʼ Colosenses 1:15-17.)
5 Gulí Dios Xiiñiʼ para guiníʼ pur laa, ngue runi biree labe «Stiidxa Dios» (Apo. 19:13). Racá ridúʼyanu Jesús si nga zanda guluíʼ laanu tuu nga Bixhoze, o gusiidiʼ laanu ximodo laabe, guirútiruʼ qué zanda guni ni. Nga runi, lu Evangeliu stiʼ Juan na: «Nuu né [Xiiñibe] laabe tobi si» (Juan 1:1, 18). Ca dxi stiʼ Juan guyuu ti costumbre ora maʼ chitó ca binni que. Cumu nabé gaxha ribí tuuxa ni guca invitar de sti binni ni zuba ruaa mexaʼ la? zanda güícabe diidxaʼ laasicabe. Zacaca nga Jesús, cumu «nuu né [Bixhózebe] laabe tobi si» la? gunda guníʼnebe laa stale tiempu.
6, 7. Ximodo para beeda gaca xhamigu Jiobá ne Jesús.
6 Ra gudiʼdiʼ tiempu jmaruʼ si guca xhamígucabe, ngue runi jma gunnaxhii Bixhoze Jesús laa ra zidiʼdiʼ dxi (Pro. 8:22, 23, 30, 31). Cumu bíʼnibe dxiiñaʼ né Bixhózebe ne bíʼnibe stipa pur gusihuínnibe ca guenda stiʼ la? jmaruʼ si guyuucabe tobi si. Ne jma bisisácabe ca guenda stiʼ Bixhózebe ora biiyabe modo laa né cada tobi de ca binni ni zanda guni adorar laa.
7 Ora bicaalú Binidxabaʼ derechu ni napa Jiobá de guni mandar guibáʼ ne Guidxilayú, biiyaʼ Jesús ximodo bisihuinni Bixhoze nadxii binni, runi ni jneza, nuu xpiaaniʼ ne napa poder para guni chaahuiʼ guendanagana naroʼbaʼ que. Guiráʼ ni bíʼyabe de Bixhózebe bisiidini laabe para ganda gudxiilube ca guendanagana ni gápabe ora guibánibe lu Guidxilayú (Juan 5:19).
8. Ximodo racané relatu stiʼ ca Evangeliu laanu para ganda guiene chaahuinu ximódopeʼ nga ca guenda stiʼ Jiobá.
8 Cumu guyuu Jesús gaxha de Jiobá la? laasibe nga gunda bisiénebe ximódopeʼ Bixhózebe, ninruʼ sti binni qué zanda gúnini. Nga runi, para ganda gunibiáʼ chaahuinu Dios naquiiñeʼ guidúʼndanu ca diidxaʼ guníʼ Xiiñibe ne cani biʼniʼ. Quíxhenu ti ejemplu. Guiníʼ íquenu pabiáʼ nagana ñaca para laanu ñene chaahuinu xi riníʼ diidxaʼ guendarannaxhii pa ñidúʼndasinu xi riníʼ diidxaʼ ca lu ti diccionariu. Peru ora guiníʼ íquenu ca relatu zeeda lu ca Evangeliu ra ruzeeteʼ ximodo bicheeche Jesús diidxaʼ ne modo gúcabe né binni la? jma ziénenu ca diidxaʼ riʼ: «De Dios nga reeda enda ranaxhii» (1 Juan 4:8, 16). Zacaca nga rizaaca né xcaadxi guenda stiʼ Jiobá ni bisihuinni Cristu ora guyuu né ca discípulo stiʼ.
BISIHUINNI JESÚS XIMODO NGA BIXHOZE
9. 1) Xi chupa modo bisiidiʼ Jesús ca discípulo stiʼ ximodo nga Bixhoze. 2) Bizeeteʼ ti ejemplu ra bisiidiʼ Jesús ximodo nga Bixhoze.
9 Ximodo gucané Jesús ca primé discípulo stiʼ ne cani beeda gaca xpínnibe despué para gunibiaʼcaʼ Bixhózebe yaʼ. Bíʼnibe ni de chupa modo: pur cani bisiidibe ne pur cani bíʼnibe. Primé la? lu cani bisiidibe bisihuínnibe ximodo riníʼ ique Jiobá, modo runi sentir ne ximodo runi dxiiñaʼ. Ti biaje bichaaga Jesús Bixhoze casi ti pastor ni nabé nadxii ca dendxuʼ stiʼ. Biniti ti dendxuʼ stiʼ pastor que, peru «ora [...] bidxela be laame, [...] jma [biechenebe] laame que ca xcaadxi dendxu ni qué niniti». Xi gucalaʼdxiʼ Jesús nusiidiʼ né relatu riʼ yaʼ. Laabe guniʼbe: «Zacaca qué racalaʼdxi Bixhoze tu ni nuu ibáʼ initi nin tobi de ca nahuiini riʼ» (Mat. 18:12-14). Xi rizíʼdinu de Jiobá lu relatu riʼ yaʼ. Rizíʼdinu nabé rizaaláʼdxibe laanu purtiʼ nuunu lade cani «nahuiini» guníʼ Jesús, neca nuu biaje guiníʼ íquenu qué risácanu ne maʼ bisiaandabe laanu.
10. Ximodo bisihuinni cani biʼniʼ Jesús ca guenda stiʼ Bixhoze.
10 Gunáʼ nga guiropa modo bisihuinni Jesús nezalú ca discípulo stiʼ ximodo nga Bixhoze yaʼ. Pur cani bíʼnibe. Ngue runi, ora gunabaʼ Felipe laabe guluiʼbe laacaʼ Bixhózebe, bicábibe laa sicaríʼ: «Ni ma biiya naa la? ma biiya Bixhozeʼ» (Juan 14:8, 9). Guidúʼyanu caadxi ejemplu ra bisihuinni Cristu ca guenda ni napa Dios. Dxi gunabaʼ ti hombre «napa lepra» laabe gusiándabe laa, laabe gudáʼnabe laa ne guniʼbe: «Zusianda lii, ne mápeca bianda luʼ». Dxandipeʼ biiyaʼ hombre ni huará que ximodo nga Jiobá lu ni biʼniʼ Jesús (Luc. 5:12, 13). Ne ora guti Lázaro biiyaʼ ca discípulo que ximodo bisihuinni Jesús pabiáʼ riá Bixhózebe binni purtiʼ «uyuu yuuba ladxidóʼ [be] dede uca diti [be]» ne biinabe. Neca nánnabe zusibánibe laa, gucanabe ora biiyabe ca binnilidxi ne ca xhamigu gueʼtuʼ que cayuunacaʼ (Juan 11:32-35, 40-43). Guiranu nápanu xiixa relatu ni riuuláʼdxinu, ne zanda guininu casi ora ñacanécani laanu nidúʼyanu pabiáʼ rilaselaʼdxiʼ Bixhózenu binni pur cani biʼniʼ Jesús.
11. 1) Ora guladxi Jesús ca binni cutoo ndaaniʼ yuʼduʼ que, xi bisihuínnini de Bixhózebe. 2) Ximodo racané relatu riʼ laanu.
11 Yanna, xi rizíʼdinu dxi bisiá Cristu ndaaniʼ yuʼduʼ que yaʼ. Bixuiʼlú modo bíʼnibe ni. Bíʼnibe ti chicote de doo para guládxibe cani cutoo raqué ne ca yuze ne ca dendxuʼ sticaʼ. Bisáʼbibe xpidxíchicaʼ ora bitiixhibe ca mexaʼ sticaʼ (Juan 2:13-17). Xi rusiidiʼ relatu riʼ laanu yaʼ. Cumu né gana guleebe ca binni que de raqué la? bietenalaʼdxiʼ ca discípulo stibe ca diidxaʼ riguixhená guníʼ rey David riʼ: «Tantu racalaʼdxeʼ gapaʼ liʼdxuʼ dede runduuxeni naa» (Sal. 69:9). Ni biʼniʼ Jesús né ca binni malu riʼ bisihuínnini racaláʼdxibe gaca adorar Dios jneza. Ñee ridúʼyanu ximodo nga Bixhózebe lu ni bíʼnibe riʼ la? Relatu riʼ rusietenaláʼdxini laanu ti cosa: cadi napa si Dios poder para cuee guendaquéiquiiñeʼ lu Guidxilayú riʼ, sínuque dxandíʼ racaláʼdxibe gúnibe ni. Ni biʼniʼ Jesús riʼ rusihuinni ximodo runi sentir Bixhózebe ora ruuyaʼ pabiáʼ zidale guendaquéiquiiñeʼ ndaaniʼ Guidxilayú riʼ. ¡Nabé riguixhedxí nga ladxidoʼno ora gúnicabe laanu xiixa ni cadi jneza!
12, 13. Xi rizíʼdinu de Jiobá ora guidúʼyanu modo gucané Jesús ca discípulo stiʼ.
12 Guidúʼyanu sti ejemplu ni rusihuinni ximodo gucané Jesús ca discípulo stiʼ. Laacaʼ qué nusaana de nidinde diidxacaʼ purtiʼ racaláʼdxicaʼ gánnacaʼ tu laa jma risaca ládecaʼ (Mar. 9:33-35; 10:43; Luc. 9:46). Pur guiráʼ ni biziidiʼ Jesús dxi guyuu gaxha de Bixhoze, nanna dxichi xi riníʼ ique Dios de ora gudxiibaʼ binni laca laa (2 Sam. 22:28; Sal. 138:6). Laaca biiyaʼ Jesús ximodo bisihuinni Binidxabaʼ rudxiibaʼ laca laa, purtiʼ qué ridxá né ni napa, sínuque ricá ique gaca tuuxa ni jma risaca. Nga runi, nabé biuubaʼ ladxidóʼ Cristu ora biiyaʼ zaqueca caníʼ ique ca discípulo stiʼ, nabé ndaʼ bisiidibe laacaʼ cadi gúnicaʼ zaqué, dede né cani gulibe para gaca apóstol stibe bíʼnicaʼ zaqué. Ne bisihuínnicabe riuuláʼdxicabe gácacabe tuuxa ni jma risaca lu últimu dxi bibani Jesús lu Guidxilayú (Luc. 22:24-27). Peru qué nidxágabe de nudiibe conseju laacaʼ né diidxaʼ nadóʼ, ne qué niníʼ íquebe qué ziuu dxi guiziidicaʼ gácacaʼ casi laabe, ti binni ni qué rudxiibaʼ laca laa (Fili. 2:5-8).
13 Ñee rudiʼnu cuenta pabiáʼ rindaa para guidxiichi Jiobá ora ridúʼyanu modo guluu jneza Jesús ca discípulo stiʼ la? Ñee ridúʼyanu ximodo qué rusaana Jiobá ca xpinni neca gucheenecaʼ laabe stale biaje pur cani guníʼ ne ni biʼniʼ Cristu la? Ora guiníʼ íquenu lu ca guenda sicarú napa Dios, ñee cadi dxandíʼ riale de ladxidoʼno guinábanu laabe gutiidiláʼdxibe donda stinu la?
NABÉ GUYUULAʼDXIʼ JESÚS GULUÍʼ TUU NGA BIXHOZE
14. Ximodo bisihuinni Jesús riuulaʼdxiʼ gunibiáʼ binni Bixhoze.
14 Stale de ca gobiernu ni ruquiichináʼ binni qué rudiicaʼ lugar ganna binni xquídxicaʼ stale cosa, zacá rucaacaʼ binni guni ni racaláʼdxicaʼ. Peru Jesús guyuulaʼdxiʼ gusiidiʼ binni stale cosa ni nanna de Bixhoze ti gunibiáʼ chaahuicabe Dios (biindaʼ Mateo 11:27). Ne casi guníʼ tobi de ca discípulo stibe: «Xiiñi Dios, [...] bisiene Iaanu ti gunibiáʼ nu tobi lucha Dios», Jiobá (1 Juan 5:20). Ximodo bíʼnibe ni yaʼ. Laabe bixhélebe xquendabiaanicaʼ ti ganda guiénecaʼ ni gusiidibe laacaʼ de Bixhózebe. Ne qué ñábibe laacaʼ qué ziuu dxi gánnacaʼ tuu nga Jiobá, casi runi ca binni ni rusiidiʼ de Trinidad.
15. Xiñee qué nusiidiʼ Jesús guiráʼ ni nanna de Bixhoze.
15 Ñee bisiidiʼ Jesús guiráʼ ni nanna de Bixhoze la? Coʼ, purtiʼ nuu stale cosa ni qué niniʼbe (biindaʼ Juan 16:12). Xiñee yaʼ. Laapebe gúdxibe ca discípulo stibe xiñee ora guniʼbe ca diidxaʼ riʼ: «Nagasi qué zanda guni huantar tu ni». Peru gúdxibe laacaʼ ziénecaʼ stale cosa ora guidxiña «ni nexhe gueda acané» laacaʼ, laani nga espíritu santu, ni zusiene laacaʼ «irá ni dxandíʼ» (Juan 16:7, 13). Guzéʼtenu ti ejemplu. Ora nahuiiniʼ xiiñiʼ binni la? qué rabi bixhózebe o jñaabe laabe stale cosa, sínuque ribeza dede ora maʼ huaniisibe, purtiʼ óraca maʼ zanda guiénebe cani. Ngaca nga ni biʼniʼ Cristu, laa guleza dede ora maʼ zanda guiene ca discípulo stiʼ xcaadxi cosa ni naquiiñeʼ gánnacaʼ de Bixhózebe. Guca Jesús nachaʼhuiʼ né laacabe ne laaca gunna nuu ni qué zanda guiénecabe.
GACANENU STI BINNI GUNIBIÁʼ JIOBÁ CASI BIʼNIʼ JESÚS
16, 17. Xiñee zanda gusíʼdinu binni ximodo nga Jiobá.
16 Ora gunibiaʼnu tuuxa ne gusisácanu laa purtiʼ galán ca guenda napa, cadi dxandíʼ rucaani laanu guininu galán de laabe la? Ngapeʼ nga ni biʼniʼ Jesús dxi guyuu lu Guidxilayú riʼ: guniʼbe cosa galán de Bixhózebe (Juan 17:25, 26). Ñee zanda gúninu cásica biʼniʼ Jesús ora gusíʼdinu xcaadxi binni de Jiobá la?
17 Casi maʼ bidúʼyanu, Jesús si nga jma runibiáʼ Bixhoze, ne guyuuláʼdxibe gusiidibe binni de laa, peru qué ñábibe laacaʼ guiráʼ ni nánnabe de Bixhózebe. Laabe gucanebe ca discípulo stibe ganna chaahuicaʼ ximódopeʼ nga Jiobá. Pur cani bisiidiʼ Cristu nga jma nadxiinu Jiobá que biaʼ nadxii xcaadxi binni Dios, ne rudiʼnu xquíxepeʼ laabe purtiʼ gunda binibiaʼnu ximodo nga Bixhózebe pur cani bisiidibe ne pur cani bíʼnibe. Dede zanda gábinu xcaadxi binni runibiaʼnu Dios ni bizáʼ laanu (Jer. 9:24; 1 Cor. 1:31). Cumu rúninu stipa pur chuʼnu gaxha de Jiobá la? laabe laaca riuube gaxha de laanu (Sant. 4:8). Ne pur guiráʼ ni maʼ bizíʼdinu zanda gusíʼdinu binni ximodo nga Jiobá. Ximodo zanda gúninu ni yaʼ.
18, 19. Ximodo zanda guluinu binni tuu nga Dios. Bisiene ni guicábiluʼ.
18 Galán gúninu casi biʼniʼ Jesús ora gusíʼdinu ximodo nga Bixhózebe pur ni guininu ne pur cani gúninu. Cadi guiaandaʼ ndiʼ laanu: stale de ca binni ni rinínenu ora maʼ zigucheechenu diidxaʼ qué runibiaʼcaʼ Dios. Ca cosa ni cadi jneza bisiidiʼ binni laacabe de Dios maʼ bichaacani modo ruuyacabe laabe. Peru laanu zanda gusíʼdinu laacabe tu láʼ Dios, xi naguixhe ique guni ne ximódopeʼ nga laa. Laaca galán guinínenu xcaadxi xpinni Cristu de ca relatu ni zeeda lu Biblia ni rusihuinni ximódopeʼ nga Dios, dede zándaca guizíʼdinu xiixa ni qué gánnanu dxiqué. Zacá laaca zacanenu laacabe cueendúcabe ni galán.
19 Yanna, ximodo zanda guluinu binni tuu nga Jiobá ora gúninu stipa pur chinándanu ejemplu stiʼ Jesús yaʼ. Laanu laaca zanda gúninu cásica biʼniʼ Jesús, zanda gusihuínninu ximodo nga Jiobá pur cani gúninu. Ora guʼyaʼ binni rusihuínninu nadxiinu Cristu pur cani rúninu la? racaneni laacaʼ chuuláʼdxicaʼ gunibiaʼcaʼ Dios ne gunibiaʼcaʼ Xiiñibe (Efe. 5:1, 2). Apóstol Pablu bidii conseju riʼ laanu: «Lachinanda ejemplu stinne casi zinanda ejemplu sti Cristu» (1 Cor. 11:1). Nabé risaca dxiiñaʼ ni nápanu de gacanenu binni gunibiáʼ chaahuiʼ Jiobá ne ora gúʼyacaʼ guiráʼ ni rúninu. Nga runi, cadi gusaana de chinándanu ejemplu stiʼ Jesús ne guluinu xcaadxi binni ximodo nga Bixhózebe.
[Guendarinabadiidxaʼ stiʼ párrafo]
