Lok Roro [Erupe] Tye Lanyut Me Kare Me Agikki

“Pe ibwot ada ki gen ma itye kwede; twegi gubed i nguti, dok icogi i cwinyi macalo icoyo i kom got.”​—CAR. 3:3.

MI LAGAM PI LAPENY MAGI:

Pwony ango ma tye me cikowa ma wanongo ki i tim me roro pa Delila, Abcalom, ki dong Juda Iskariote?

Wan waromo lubo lanen me gen ma Yonacan gin ki Petero gunyuto-ni nining?

Wan watwero weko cwinywa moko liking me bedo lugen i nyom ki dong bot Jehovah nining?

1-3. (a) Ngo ma tye but lanyut me kare me agikki, dok man kwako gin ango? (b) Lapeny mene ma wabigamogi?

 NGO ma Delila, Abcalom, ki Juda Iskariote ducu gitye kwede? Gin ducu pe gubedo lugen​—Delila bot laco ma onongo marre, Langolkop Samson; Abcalom bot wonne, Kabaka Daudi; Juda bot laditte, Yecu Kricito. Joni ducu gukelo arem i kom luwotgi! Pingo myero waket tamwa i kom kit kwo pa joni?

² Dako mo ma lacoc owacci lok roro tye i kin tim maraco ma dong onya i kare-ni. Man myero pe omi ibed ki ur. I kare ma Yecu tye ka tito lanyut me kare me “agikki piny,” en owacci: “Jo mapol . . . gibiketo lok roro.” (Mat. 24:3, 10) “Lok roro” te lokke ni “jalo nyo miyo ngat moni icing lumonene.” Bedo labongo gen ma kit man nyuto ni watye ka kwo i “kare me agikki,” kit ma yam con Paulo otito ni dano bibedo ‘labongo gen ki luroro-ni.’ (2 Tem. 3:1, 2, 4) Kadi bed ni luco bukke ki tuko me vidio gibedo ka medo kado i kom kodi kwo man nyo gimiyo nen calo gin mamit, ento bedo labongo gen ki lok roro rac dok miyo ngat moni deno can malit adada. Ki lok ada, man tye but lanyut me kare me agikki piny!

³ Pwony ango ma watwero nongone ki i Baibul i kom jo magi ma yam con pe gubedo lugen-ni? Lanen pa jo mene ma gubedo lugen bot luwotgi ma watwero lubone? Ki dok nga ma myero wagen adada? Kong dong wanenu lagamme.

LANEN ME CIKOWA MA GINONGE I BAIBUL

4. Delila oketo lok roro i kom Samson nining, dok pingo man obedo gin marac adada?

⁴ Mukwongo, kong dong waneno lok kom Delila, dako ma Langolkop Samson onongo maro  adada-ni. Samson onongo cwinye tye me lweny ki Lupiliciti pi jo pa Lubanga. Pien onongo gingeyo ni Delila pe ki mar me ada i kom Samson, rwodi abic pa Lupiliciti gumiye lim madit wek obwol Samson otit ka ma tek kome madwong-ngi a ki iye wek gineke woko. Delila ki cwiny me mito lim oye lok pa rwodi-ni, ento yellene me nongo ka ma teko pa Samson tye iye oto nono tyen adek kulu. En obedo ka dide “matek ki lokke nino ki nino.” I agikkine, “omiyo cwinye oballe me to woko.” En otite ni tekone bia woko ka kilyelo yer wiye pienni cakke wa ka tinone peya ki lyelo yer wiye dok ka kilyelo, tekone bia woko. * Inge tite, Delila oweko Samson onino i eme, ci gilyelo yer wiye ka dong olwongo lumone ci omiye i cinggi wek gutim gin ma gimito i kome. (Lungol. 16:4, 5, 15-21) Man obedo gin marac adada! Pi miti me lim, Delila oketo roro i kom ngat ma onongo marre adada.

5. (a) Abcalom pe obedo lagen nining bot Daudi, dok man onyuto gin ango? (b) Daudi owinyo nining ma lubbe ki tim me roro pa Akitopel-li?

⁵ Me aryone, kong dok wanenu lok kom Abcalom ma onongo pe gene-ni. Pien en onongo mito bedo ladit, Abcalom omoko tamme me mayo ker ki bot wonne, Kabaka Daudi. Mukwongo, Abcalom “oywayo cwiny jo Icrael ducu odwoko i kome” kun cikke botgi dok nyuto mar mogo me gobagoba. En onongo gwako korgi dok noto lemgi, calo iwacci en onongo ada tye ki miti dok paro pigi. (2 Cam. 15:2-6) Abcalom bene oweko Akitopel ngat ma Daudi geno adada-ni oribbe kwede i piro lok me turo ker. (2 Cam. 15:31) I Jabuli me 3 ki 55, Daudi otito kit ma tim man me roro-ni ogude kwede. (Jab. 3:1-8; kwan Jabuli 55:12-14.) Tim me lewic pa Abcalom me bedo ki miti marac kacel ki piro lok i kom kabaka ma Jehovah aye ocimo-ni nyuto ni en onongo pe mito loc pa Lubanga. (1 Tekwaro 28:5) Jemo pa Abcalom-mi pe orii, dok Daudi omedde ameda ki loc macalo ngat ma Jehovah aye owiro.

6. Juda oketo roro i kom Yecu nining, dok i yo ango ma pol kare kitiyo ki nying man ni Juda-ni?

⁶ Me adekke, kong dok wanyamu gin ma Juda Iskariote, ma laroro-ni, otimo i kom Yecu Kricito. I kwero kwer me agikki me Kato kacel ki lukwenane 12, en owaccigi ni: “Ada awacciwu, ngat acel i kinwu bimiya ki lomonena.” (Mat. 26:21, Baibol pa Katoli) Lacen i dyewor meno, i poto me Gececemane, Yecu owaco bot Petero, Yakobo, ki dong Jon ni: ‘Wunen! ngat ma miya bot lumonena dong tye cok.’ Cutcut Juda otuc i poto kacel ki jo ma en opiro lok kwedgi, “obino bot Yecu atir, ocako mote ni, ‘Lapwony itye!’ Ci onoto leme.” (Mat. 26:46-50; Luka 22:47, 52) Juda ‘obalo pi miyo dano ma pe ki bal,’ Yecu Kricito, icing lumonene. Pingo Juda otimo man? Pi ryal me lim 30 keken! (Mat. 27:3-5) Nying man ni Juda-ni pol kare kitiyo kwede i kom ngat ma laroro, tutwalle ngat ma keto roro i kom lareme.

7. Pwony ango ma wanongo ki i kwo pa (a) Abcalom gin ki Juda ki dong (b) Delila?

⁷ Pwony ango ma wanongo ki i lanen magi ma gitye me cikowa-ni? Abcalom gin ki Juda guto to me lewic pi bedo luroro i kom jo ma Jehovah owirogi. (2 Cam. 18:9, 14-17; Tic. 1:18-20) Nying Delila pol kare kibitic kwede i  kom ngat ma pe gene dok tye ki mar me gobagoba. (Jab. 119:158) Pud dong pire tek ni omyero wakwer gin mo keken ma miyo wabedo ki cwiny me maro dito nyo woro, ma weko warwenyo cwak pa Jehovah! Wanongo pwony magwar adada me kwero gin mo keken ma twero weko pe wabedo lugen.

LUB LANEN PA JO MA GUBEDO LUGEN

8, 9. (a) Pingo Yonacan ocikke me bedo lagen bot Daudi? (b) Wan waromo lubo lanen pa Yonacan-ni nining?

⁸ Baibul bene loko i kom jo mapol ma gubedo lugen. Kong wanyamu lok i kom co aryo ki dong pwony ma wanongo ki botgi, kun wacako ki ngat acel ma obedo lagen bot Daudi. Yonacan, latin kayo pa Kabaka Caulo, aye onongo myero ole kom ker pa wonne me loyo jo Icrael. Ento Jehovah oyero Daudi aye me bedo kabaka. Yonacan oye tam pa Lubanga. En pe obedo ki nyeko i kom Daudi calo ngat ma tye ka laro ker kwede. Ma ka meno Yonacan “te cako bedo i mar adwong i cunye i kom Daudi” kun cikke me bedo lagen bote. (1 Cam. 18:1-4, Baibul me leb Lango) Yonacan otimo jami ducu ma en twero me ‘jingo cwiny Daudi,’ kun bene keto kwone ka mading kun cung i nyim wonne Caulo pi Daudi. Yonacan onyuto genene ci owaco bot Daudi ni: “Ibibedo kabaka ma loyo Icrael, an abibedo lalub kori.” (1 Cam. 20:30-34; 23:16, 17) Pe tye me ur ni inge to pa Yonacan, Daudi onyuto cwercwinye kacel ki marre pi Yonacan kun wero wer me kumo.​—2 Cam. 1:17, 26.

⁹ Yonacan onongo ngeyo nga ma myero ebed lagen bote. En onongo tye lagen ma lubbe ki Twero me Loc pa Jehovah, dok ocwako Daudi ki cwinye ducu ngat ma Lubanga owiro. I kare-ni bene, kadi bed peya kicimowa me bedo ki mot me tic i kacokke, omyero wacwak labongo dic omege ma kicimogi me telowa.​—1 Tec. 5:12, 13; Ibru 13:17, 24.

10, 11. (a) Pingo Petero onyuto gen kun bedo kacel ki Yecu? (b) Wan waromo lubo lanen pa Petero nining, dok man myero omi watim gin ango?

¹⁰ Lanen mukene maber aye pa lakwena Petero, ma ocikke me bedo lagen bot Yecu. Kricito otiyo ki lapor me konyo lupwonnyene me niang kit ma pire tek kwede botgi me bedo ki niye i kome ki dong remone ma ebityero. Man pe obedo camo kome nyo matone remone, ento lupwonnyene mapol pe guniang lokke dok guweke woko. (Jon 6:53-60, 66) Pi meno, Yecu olokke bot lukwenane 12 ci openyogi ni: “Wun bene wumito ket woko?” Petero ogamo  ni: “Rwot, wabicito bot anga? In itye ki lok me kwo ma pe tum. Wan waye, dok watyeko niang ni, in i Ngat Maleng pa Lubanga.” (Jon 6:67-69) Man mono te lokke ni Petero oniang jami ducu ma Yecu pud oa ka wacone ma lubbe ki Tyero kwone-ni? Ka pe gin mo, nen calo en pe oniang. Kadi bed kit meno, Petero omoko tamme me bedo lagen bot Wod ma kiwiro pa Lubanga.

¹¹ Petero pe otamo ni Yecu nen calo tye ki tam marac dok ka kimiye kare, ci Yecu biloko lokke-ni. Pe kumeno, Petero oye ki mwolo ni Yecu tye ki “lok me kwo ma pe tum.” I kare-ni bene, ngo ma wabitimo ka wakwano lok mo ki i bukkewa ma a ki bot “lagwok-ot ma lagen” ento pe waniang iye nyo pe rwatte ki tamwa? Omyero watute me niang iye maber adada ma ka bedo ki tam ni omyero ki lok wek orwatte ki tamwa.​—Kwan Luka 12:42.

BED LAGEN MATWAL BOT LUOTI

12, 13. Ngat moni cako kwero nyuto gen bot luote nining? Pingo ngat moni pe myero oti ki mwakane me gengo ngeye?

¹² Bedo ngat ma pe genne i yo mo keken tye bal marac ma myero pe kiwek obal kuc ki ribbe me paco pa Lukricitayo kacel ki kacokke. Ma lubbe ki man, myero kong dong wanenu kit ma cwinywa twero moko kwede liking i kom Lubangawa ki dong luotwa.

¹³ Tim me abor tye gin mo marac adada ma pe nyuto gene wacel. Dano ma pe bedo lagen bot luote ento mito ngat mukene nongo oturo genene. Dok luot ma pe kibedo lagen bote ni cako kwo kic kic. Ento man mono cako timme nining i kin jo aryo ma onongo yam gimarre tutwal-li? Man pol kare cakke ka miti pa laco nyo dako ocako rwenyo woko i kom lawote. Dako mo ma nyinge Gabriella dok tye lapwony madit otito ni nyuto gen manok cakke ka laco nyo dako juko timo jami ducu ma twero wek gijing wat i kingi. Man bene romo timme i kin luot ma dong guteggi ma gunyomme pi mwaki mapol. Me laporre, laco mo ma tye mwaka 50 dok orii i nyom pi mwaka 25, oketo kenye woko gin ki dakone wek enyom lamego mukene ma ogamo wange. Jo mukene giwacci man pe obedo gin marac. Pe te lokke ni ka dong mwakawa dit ci myero wakwo i yo ma kit man. Bedo labongo gen bot luoti rac adada. *

14. (a) Jehovah winyo nining ka odok i lok me gonyo nyom? (b) Gin ango ma Yecu owaco ma lubbe ki bedo lagen i nyom?

¹⁴ Jehovah winyo nining i kom jo ma gikwero luotgi labongo lubo cik me Ginacoya? Lubangawa “dag gonyo nyom,” dok en omiyo cik magwar i kom jo ma gikwero luotgi. (Kwan Malaki 2:13-16.) Calo Wonne, Yecu opwonyo ni ngat mo keken pe myero oryem nyo okwer luote pien meno tye bal.​—Kwan Matayo 19:3-6, 9.

15. Jo munyomme gitwero gwoko gennegi bot luotgi nining?

¹⁵ Jo munyomme gitwero gwoko gennegi bot luotgi nining? Lok pa Lubanga wacci: “Gum obed i kom dakoni [nyo cwari] ma inyomo ka tinoni” dok bene ni, “bed ki yomcwiny kacel ki dako [nyo laco] ma imaro.” (Car. 5:18; Latit. 9:9) Ka luot aryo ducu giwoto ki tii, omyero “gutim jami ducu ma twere” me gwoko margi kacel ki watgi. Man te lokke ni ngat acel acel myero opar pi lawote, ocwal cawa kacel  ki lawote, dok obed cok ki lawote. Omyero guket cwinygi me jingo margi kacel ki watgi ki Jehovah. Pi meno, laco ki dako omyero gukwan Baibul i yo matut kacel, gubed i ticwa me pwony kacel kare ki kare, ki dong guleg kacel wek gunong mot pa Jehovah.

BED LAGEN BOT JEHOVAH

16, 17. (a) I yo ango ma gwoko genewa bot Lubanga romo bedo i atematema i paco ki dong i kacokke? (b) Labol mene ma nyuto ni lubo cik pa Lubanga ma lubbe ki kwero ribbe ki wadiwa ma kiryemogi ki i kacokke romo kelo adwogi maber?

¹⁶ Tye omege ki lumege mogo i kacokke ma gutimo bal madongo adada ento ‘kijukogi ki tek wek gucak bedo ki niye me ada.’ (Tito 1:13) Jo mukene balgi oweko kiryemogi woko ki i kacokke. Bot ‘jo ma gunongo’ pwod ma kit man, okonyogi me gwoko watgi ki Jehovah. (Ibru 12:11) Ento ka watye ki watwa mo nyo laremwa macok ma kiryemo woko ki i kacokke kono? Man keto gennewa i atematema, pe bot ngat ma kiryemo ni ento bot Lubanga. Jehovah tye ka nenowa ka ce wabilubo cikke pe me ribbe ki ngat mo keken ma kiryemo woko ki i kacokke.​—Kwan 1 Jo Korint 5:11-13.

¹⁷ Nen kong labol acel ma nyuto adwogi maber ma bino ka jo me ot moni gilubo cik pa Jehovah pe me ribbe ki wadigi ma kiryemogi woko ki i kacokke. Awobi mo kiryemo woko ki i kacokke pi mwaki makato apar kulu, i mwaki magi ducu wonne, minne, ki dong omegine angwen ‘pe gukubbe kwede’ i yo mo keken. I kine mukene, en temme kun ridde me timo jami mogo kacel kwedgi, ento gin ducu gucung matek pe me note kwede i yo mo keken. I kare ma dong kidwokke i kacokke, en owacci kare ducu onongo eparo adada me bedo kacel kwedgi, tutwalle i dyewor ma nongo etye kene. En owaco ni ka ce onongo gutemme me ribbe kwede kadi matidi mo, man onongo bicobo miti ma etye kwede me ribbe kwedgi. Ento, pienni pe gukubbe kwede kadi matidi mo, man otugo cwinye me yelle matek wek eroc watte ki Jehovah. Tam kong i kom labol man ka ce cwinyi bwoli me turo cik pa Lubanga wek i kubbe ki wadini ma kiryemogi ki i kacokke.

18. Man ma dong wapoyo wiwa pi ber pa bedo lagen ki dong adwogi marac ma bino pi lok roro-ni, imoko tammi me timo gin ango?

¹⁸ Watye ka kwo i lobo ma danone pe gigene dok gitye luroro. Ento pud inongo ni i kacokke pa Lukricitayo tye iye jo mapol ma gigene dok bene watwero lubo lanengi. Kit yo me kwogi tye macalo caden ma loko pigi ni: “Pe ibwot ada ki gen ma itye kwede; twegi gubed i nguti, dok icogi i cwinyi macalo icoyo i kom got.” (Car. 3:3) Wageno ni wan ducu wabimoko liking i kom Lubangawa kun wabedo jo ma genne bote ki dong i kinwa kekenwa.

[Lok ma tye piny]

[Peny me Kwan]

[Cal ma tye i pot karatac 16]

Kadi bed jo mukene gukwere woko Petero obed lagen bot Wod ma Lubanga owiro