Man i Spolem Fren Blong Hem, Wan Saen Blong Ol Las Dei

“Mifala i stap tru, fasin blong mifala i stret, mo i no gat man nating we i gat poen agens long mifala.”—1 TES. 2:10, NW.

YU TRAEM ANSA LONG OL KWESTIN YA:

․․․․․

?Yumi lanem wanem long Delila, Absalom, mo Judas Iskariot, we trifala i spolem narafala?

․․․․․

?Yumi save mekem wanem blong folem fasin blong Jonatan mo Pita blong stap tru long narafala?

․․․․․

?Yumi save mekem wanem blong yumi stap tru long woman no man blong yumi, mo long Jehova?

1-3. (a) ?Wanem saen i soemaot se yumi stap long ol las dei? ?Man we i mekem fasin ya hem i olsem wanem? (b) ?Wanem trifala kwestin we bambae yumi ansa long trifala?

?DELILA, Absalom, mo Judas Iskariot, trifala i gat wanem fasin we i sem mak? Trifala i no stap tru long narafala. Delila i no stap tru long Jaj Samson, man ya we i lavem hem. Absalom i no stap tru long papa blong hem King Deved. Mo Judas Iskariot i no stap tru long Masta blong hem Jisas Kraes. Nogud fasin blong trifala i mekem bigfala trabol i kasem narafala mo i mekem narafala i harem nogud. ?From wanem i gud we yumi save fasin blong trifala?

² Wan woman blong raetem ol buk i talem se slak fasin blong plante man tede, hemia se oli letem ol fren blong olgeta i go long han blong ol enemi blong olgeta. Yumi no sapraes long samting ya. Jisas i tokbaot saen we i soemaot se bambae “wol ya i finis.” Hem i talem se: “Bambae ol man . . . oli stap letem ol fren blong olgeta oli go long han blong ol enemi blong olgeta.” (Mat. 24:3, 10) Man we i ‘letem narafala i go long han blong enemi blong hem,’ hem i no stap tru long narafala. Fasin blong ol man raonabaot long yumi tede we oli no stap tru long narafala, i soemaot se yumi stap long “ol las dei” olsem we Pol i talem. Hem i talem se bambae ol man oli “no gat fasin blong stap tru long God mo long narafala man, . . . oli man blong spolem fren blong olgeta.” (2 Tim. 3:1, 2, 4, NW) Plante taem ol man we oli raetem ol buk mo ol muvi, oli tokbaot ol man mo woman we oli no stap tru long narafala se oli harem gud. Be ol buk mo ol muvi oli no talem samting we i tru. Man we i no stap tru long narafala mo i spolem fren blong hem, i mekem narafala i harem nogud tumas. Ol fasin olsem oli saen we i soemaot se yumi stap long ol las dei.

³ ?Yumi save lanem wanem long ol man we Baebol i tokbaot olgeta se oli no stap tru long narafala? ?Hu olgeta we yumi save folem fasin blong olgeta blong stap tru long narafala? ?Yumi mas gat strong tingting blong stap tru long hu? Bambae yumi tokbaot ansa blong ol kwestin ya.

 SAMFALA WE YUMI NO MAS FOLEM FASIN BLONG OLGETA

4. ?Delila i spolem Samson olsem wanem? ?From wanem fasin blong hem i rabis olgeta?

⁴ Fastaem bambae yumi tokbaot Delila, wan woman we i save trikim man. Jaj Samson i laekem hem tumas. Samson i wantem lidim ol man blong God, blong oli mekem faet agensem ol man Filistia. Faef king blong ol man Filistia oli save se Delila i no lavem Samson mo bambae hem i no stap tru long hem. Ale oli talem long Delila se bambae oli givim bigfala mane long hem, sipos hem i faenemaot wanem i mekem se Samson i gat bigfala paoa. Delila i wantem bigfala mane ya tumas, ale hem i mekem olsem ol haeman ya oli talem. Tri taem hem i traem faenemaot from wanem Samson i gat bigfala paoa, be hem i no save faenemaot. ‘Evri dei hem i stap askem long Samson plante taem, gogo Samson i taed gud long hem.’ Ale Samson i talemaot long hem se i no gat man i katem hea blong hem samtaem. Mo hem i se sipos man i katem hea blong hem, bambae hem i no moa strong. * Nao Delila i mekem Samson i pilo long leg blong hem, gogo hem i slip. Mo hem i singaot wan man i kam, i katemaot hea blong Samson. Biaen hem i letem Samson i go long han blong ol enemi blong hem, mo i letem olgeta oli mekem eni samting we oli wantem long Samson. (Jaj. 16:4, 5, 15-21) !Samting we Delila i mekem i rabis olgeta! !Hem i wantem mane tumas, nao hem i letem man we i laekem hem tumas i go long han blong ol enemi blong hem!

5. (a) ?Absalom i mekem wanem blong no stap tru long Deved? ?Fasin blong Absalom i soemaot wanem? (b) ?Deved i harem olsem wanem taem fren blong hem Ahitofel i tanem baksaed long hem?

⁵ Wan man we i no stap tru long narafala, hemia Absalom. Tingting blong hem i strong blong kasem paoa mo haenem, i olsem we faea i bon long hat blong hem. Hem i wantem tekem ples blong papa blong hem king Deved. Ale, Absalom i pulum ol man Isrel “oli kam long saed blong hem.” Hem i giaman se hem i laekem olgeta. Hem i mekem promes long olgeta be hem i no holem promes blong hem. Hem i putum han blong hem i goraon long ol man mo i kisim olgeta. Hem i mekem olsem se hem i tingbaot olgeta mo i wantem givhan long olgeta. (2 Saml. 15:2-6) Absalom i pulum gudfala fren blong Deved we nem blong hem Ahitofel, blong i tanem baksaed long Deved mo i joen long olgeta we oli agensem Deved. (2 Saml. 15:31) Long Ol Sam 3 kasem Ol Sam 55, Deved i tokbaot olsem wanem hem i harem nogud tumas taem fren blong hem i no stap tru long hem. (Sam 3:1-8; ridim Ol Sam 55:12-14.) Rabis plan blong Absalom i agensem king we Jehova i jusumaot. Hemia i soemaot se hem i no tingbaot raet blong God blong jusumaot hu bambae i king. (1 Kron. 28:5) Be rabis plan blong Absalom i no wok. Deved i gohed blong rul olsem king we Jehova i jusumaot.

6. ?Judas i spolem Jisas olsem wanem? ?Long sam lanwis, ol man oli yusum nem blong Judas taem oli tokbaot wanem?

⁶ Naoia yu traem tingbaot samting we Judas Iskariot i mekem long Kraes. Laswan taem we Jisas i mekem kakae blong Pasova wetem ol 12 aposol blong hem, hem i talem se: “Tru mi talem long yufala, wan long yufala bambae i letem mi mi go long han blong ol enemi blong mi.” (Mat. 26:21) Biaen, long garen blong Getsemane, Jisas i talem long Pita, Jemes, mo Jon se: “Yufala i luk. Man ya we i glad blong letem mi mi go long han blong ol enemi blong mi, hem i kam klosap finis.” Taem Jisas i stap toktok yet, Judas i kam wetem plante man. “Wantaem nomo, hem i kam long Jisas, i talem se, ‘Halo, Tija,’ nao i kis long hem.” (Mat. 26:46-50; Luk 22:47, 52) Judas i “letem man ya we i stret nomo,” i go long han blong ol enemi blong hem blong oli kilim hem i ded. ?Judas i spolem Jisas blong kasem hamas mane? !Toti sekel silva nomo! (Mat. 27:3-5) Long sam lanwis, ol man oli yusum nem blong Judas blong tokbaot man we i mekem rabis plan blong salem fren blong hem. *

7. ?Yumi lanem wanem long stori blong (a) Absalom mo Judas mo (b) Delila?

 ⁷ ?Yumi lanem wanem long stori blong trifala ya? Absalom mo Judas tufala i ded long fasin we i blong sem, from we tufala i spolem ol man we Jehova i jusumaot. (2 Saml. 18:9, 14-17; Wok 1:18-20) Taem ol man oli harem nem blong Delila, oli tingbaot we hem i giaman se hem i lavem Samson mo i no stap tru long Samson. (Sam 119:158) !Yumi mas sakemaot tingting ya we yumi wantem tumas mane mo haenem! Fasin olsem i save pulum yumi blong mekem samting we i spolem fasin fren blong yumi wetem Jehova. Ol samting we yumi lanem long ol stori ya, oli givhan long yumi blong blokem fasin blong no stap tru long Jehova.

YUMI MAS FOLEM FASIN BLONG OLGETA WE OLI TRU FREN

8, 9. (a) ?From wanem Jonatan i promes se bambae hem i stap tru long Deved? (b) ?Yumi save folem fasin blong Jonatan olsem wanem?

⁸ Baebol i tokbaot stori blong plante man we oli tru fren. Bambae yumi tokbaot samting we yumi save lanem long stori blong tu man. Faswan hemia Jonatan we i stap tru long Deved. Jonatan i fasbon pikinini boe blong King Sol. Maet hem nao bambae i kam king blong ol man Isrel, afta long Papa blong hem. Be Jehova i jusum Deved blong i kam king. Jonatan i no jalus long Deved. Hem i folem plan we God i mekem. “Hem i laekem Deved we i laekem hem tumas,” mo Jonatan i promes se bambae hem i stap tru long hem. Hem i givim klos blong hem, naef blong faet blong hem, bonara, mo strap blong hem, long Deved. Hemia i blong soemaot se hem i ona long Deved olsem king. (1 Saml. 18:1-4) Jonatan i mekem evri samting we hem i save mekem blong givhan long Deved. Hem i putum laef blong hem long denja taem hem i blokem Deved blong Sol i no kilim hem. Jonatan i wan tru fren. Hem i talem long Deved se: “Yu nao bambae yu kam king blong Isrel, mo . . . mi bambae mi kam nambawan haeman blong yu.” (1 Saml. 20:30-34; 23:16, 17) Yumi no sapraes we afta long ded blong Jonatan, Deved i mekem wan singsing we i talemaot se hem i laekem Jonatan tumas mo i sore long hem.—2 Saml. 1:17, 26.

⁹ Jonatan i save hu man we hem i mas stap tru long hem. Hem i stap tru fulwan long Jehova we i King blong heven mo wol. Mo hem i givhan long Deved, man ya we Jehova i jusumaot. Yumi mas mekem i sem mak. Nating se yumi no gat wan spesel wok blong mekem long kongregesen, yumi mas glad blong givhan long ol brata we Jehova i yusum olgeta blong lidim yumi.—1 Tes. 5:12, 13; Hib. 13:17, 24.

10, 11. (a) ?From wanem Pita i no lego Jisas be i stap tru long hem? (b) ?Yumi save folem fasin blong Pita olsem wanem?

¹⁰ Wan narafala man we fasin blong hem i tijim yumi, hemia aposol Pita. Hem i promes se bambae hem i stap tru long Jisas. Jisas i talem wan pijatok blong tijim ol man blong hem se oli mas bilif long bodi blong hem, mo long blad blong hem we bambae hem i givim olsem wan sakrefaes. Jisas i no stap tokbaot prapa bodi mo blad blong hem. Plante man blong hem oli sek long ol tok blong hem, nao oli no moa biaen long hem. (Jon 6:53-60, 66) Ale Jisas i askem long ol 12 aposol blong hem se:  “?Olsem wanem long yufala? ?Yufala tu i wantem gowe long mi?” Pita i ansa se: “Masta. ?Bambae mifala i save go long hu? Yu nomo yu gat ol tok blong laef ya we i no save finis. Mo mifala i bilif finis long yu. Mifala i save finis we yu yu Tabu Man blong God.” (Jon 6:67-69) ?Olsem wanem? ?Pita i kasem save long ol tok blong Jisas? Ating nogat. Be Pita i mekem desisen se bambae hem i stap tru long Jisas, Pikinini ya blong God we God i jusumaot.

¹¹ Pita i no ting se maet Jisas i rong, mo bambae hem i jenisim toktok blong hem biaen. Pita i gat tingting daon, mo hem i save se Jisas i “gat ol tok blong laef ya we i no save finis.” Yumi mas mekem i sem mak. Taem yu ridim sam tijing we i had blong kasem save long olgeta, long ol buk we oli kamaot long ‘slef we i stret mo waes,’ ?yu harem olsem wanem? ?Yu mekem wanem taem yu luk se samting we yu ridim i defren long tingting we yu gat? Yu mas traehad blong kasem save long ol tijing ya. Yu no mas ting se bambae ol tijing ya oli jenis, nao oli laenap wetem tingting blong yu.—Ridim Luk 12:42.

YU MAS STAP TRU LONG MAN NO WOMAN BLONG YU

12, 13. ?Wanem i mekem se sam man oli no stap tru long woman blong olgeta? ?Nomata man i gat hamas yia, from wanem i no stret blong hem i slip wetem narafala woman?

¹² Eni samting we man i mekem blong spolem narafala, hem i nogud olgeta. Fasin ya i no mas spolem pis long famle mo long kongregesen, mo i no mas spolem fasin blong yumi blong joen gud. Bambae yumi tokbaot samting we yumi save mekem blong stap tru long man no woman blong yumi, mo long Jehova.

¹³ Man we i slip wetem woman blong narafala man, i spolem woman blong hem bigwan. * Man we i slip wetem narafala woman, hem i no stap tru long woman blong hem. Hem i stap tingbaot narafala woman, i spenem taem wetem narafala woman, mo fasin blong hem i soemaot se hem i laekem narafala woman. Ale hem i lego woman blong hem. Wantaem nomo laef blong woman blong hem i jenis. ?Samting ya i hapen olsem wanem long man mo woman we fastaem tufala i lavem tufala? Fas samting we i hapen se man i no tingbaot woman blong hem mo woman i no tingbaot man blong hem. Wan woman we i stadi long laef blong ol man mo woman, nem blong hem Gabriella Turnaturi i talem se man i save lego woman blong hem from we tufala i no moa traehad blong mekem mared blong tufala i strong. Hemia i save hapen tu long man mo woman we tufala i mared longtaem finis. Wan man we i gat 50 yia i mared 25 yia long woman blong hem. Woman blong hem i stap tru long hem. Be man ya i divos long woman blong hem from we hem i wantem stap wetem wan narafala woman we hem i luk se i naes. Samfala oli talem se hemia fasin blong ol man we oli gat yia olsem. Be nomata man i gat hamas yia, i no stret nating blong hem i slip wetem narafala woman. *

14. (a) ?Wanem tingting blong Jehova long olgeta we oli no stap tru long man no woman blong olgeta? (b) ?Jisas i talem wanem taem hem i tokbaot man we i no stap tru long woman blong hem?

¹⁴ ?Wanem tingting blong Jehova long olgeta we oli lego man no woman blong olgeta from wan risen we i no stap long Baebol? God i no laekem nating fasin ya we man no woman tufala i divos. Hem i tok strong agensem olgeta we oli mekem i no stret long woman no man blong olgeta mo oli lego olgeta. (Ridim Malakae 2:13-16.) Jisas i gat sem tingting olsem Papa blong hem long man we i no stap tru long woman blong hem. Jisas i talem se man i no save lego woman blong hem from we hem nomo i wantem, nao i mekem olsem se i no gat wan samting i hapen.—Ridim Matiu 19:3-6, 9.

15. ?Olgeta we oli mared, oli save mekem wanem blong oli save stap tru long woman no man blong olgeta?

¹⁵ ?Olgeta we oli mared, oli save mekem wanem blong stap tru long woman no man blong olgeta? Tok blong God i talem se: “Oltaem yu mas harem gud blong stap wetem [woman no man blong yu]” we yu mared long hem, taem yu yangfala yet. Mo ‘i gud yu wetem woman [no man] blong yu we yu  laekem hem tumas, yutufala i mekem ol samting we i save mekem yutufala i glad.’ (Prov. 5:18; Pri. 9:9) Taem tufala we i mared i stap kam olfala, tufala i mas mekem evri samting we tufala i save mekem blong mared blong tufala i stap strong. I no se tufala i laef tugeta nomo be tufala i mas tingbaot tufala. ?Hemia i minim wanem? Tufala i mas fren gud tugeta. Bambae tufala i fren gud sipos tufala i kaen long tufala, tufala i lukaot gud long tufala, mo tufala i mekem samting tugeta. Tufala i mas wok strong blong blokem eni samting we i save spolem mared blong tufala, mo fasin fren blong tufala wetem Jehova. Tufala i mekem olsem taem tufala i stadi Baebol tugeta, prij tugeta, mo prea tugeta blong Jehova i blesem tufala.

YU MAS STAP TRU LONG JEHOVA

16, 17. (a) ?Wanem i save traem fasin blong yumi blong stap tru long God? (b) ?Wanem stori i soemaot gudfala frut we i save kamaot taem yumi obei long loa blong God?

¹⁶ Samfala long kongregesen oli mekem bigfala sin mo kongregesen i stretem olgeta. Ol elda oli “tok strong long olgeta, blong mekem fasin blong bilif blong olgeta i kam strong moa.” (Taet. 1:13) From fasin blong olgeta, kongregesen i mas putumaot olgeta. Sipos olgeta we God i stretem, oli letem fasin ya i “tijim olgeta,” bambae oli save fren gud wetem God bakegen. (Hib. 12:11, NW) ?Olsem wanem sipos kongregesen i putumaot wan famle no wan fren blong yumi? Fasin blong yumi bambae i soemaot se yumi stap tru long hem no long Jehova. Yumi mas stap tru long Jehova. Jehova i stap lukluk samting we yumi mekem, blong save sipos yumi stap folem loa blong hem blong no joen wetem eniman we kongregesen i putumaot.—Ridim 1 Korin 5:11-13.

¹⁷ Bambae yumi tokbaot wan stori we i soemaot gudfala frut we i save kamaot, taem ol memba blong wan famle oli stap tru long Jehova, mo oli obei long loa blong hem blong no joen wetem ol famle we kongregesen i putumaot olgeta. Wan yangfala we kongregesen i putumaot hem, i stap afsaed bitim 10 yia. Long taem ya papa mo mama blong hem, mo fofala brata blong hem oli “no go joen” wetem hem. Samtaem hem i traem blong joen wetem olgeta, be evriwan long famle oli stap tru long Jehova. Oli no toktok long hem nating. Biaen kongregesen i tekembak hem. Hem i talem se oltaem hem i sore long famle blong hem, speseli long naet taem hem i stap hem wan. Hem i talem se sipos famle blong hem i joen wetem hem sam samtaem nomo, bambae hem i harem gud, mo i no moa sore long olgeta. Be from we famle blong hem i no toktok long hem mo i no joen wetem hem long eni samting, hem i wantem tumas blong joen wetem olgeta bakegen. Mo hemia nao samting we i mekem se hem i wantem fren gud wetem Jehova bakegen. I gud yu tingbaot stori ya sipos yu harem se bambae yu brekem loa blong God, blong yu go joen wetem ol famle blong yu we kongregesen i putumaot olgeta.

18. ?Bambae yu yu folem fasin blong man we i spolem fren blong hem no man we i stap tru long fren blong hem?

¹⁸ Yumi laef long wan wol we ol man oli no stap tru long narafala, mo oli spolem fren blong olgeta. Be plante brata sista long kongregesen oli stap tru long narafala mo long Jehova. I gud yumi folem fasin blong olgeta. Laef blong olgeta i soemaot se ‘oli stap tru, fasin blong olgeta i stret, mo i no gat man nating we i gat poen agens long olgeta.’ (1 Tes. 2:10, NW) Yumi mas mekem evri samting we yumi save mekem blong yumi stap tru long God mo long ol narafala.

[Ol futnot]

[Kwestin]

[Tok blong pija long pej 16]

Nating se ol narafala oli lego Jisas, be Pita i stap tru long hem